23 oct 2013

La comarca d'El Rebollal, ena telivisión

Anque son muchas las vecis que la nuestra comarca d'El Rebollal sali ena teli, el que salga ena Telivisión Española (TVE) y por algu güenu pasa las menus vecis. Esti lunis, 21 d'otubri la nuestra tierra salió nel programa "Un país para comérselo" (Un país pa comelsilu).

El programa, presentáu por Ana Duato, de la serii "Cuéntame cómo pasó" (Cuéntami cómu pasó), es apaecíu a un programa de viaji ena que la presentaora va corriendu lugaris pol mé los sus pratus típicus, la su comía.

Esta vés le tocó a la comarca de Ciarrodrigu y los pueblus de La Raya, en drentru de los cualis está la nuestra comarca. Además de palrral d'otrus pueblus (Saucelli, Ciarrodrigu, Santispíritus,...), de la nuestra comarca mentarun Navafrías y Peñaparda.

El cachu d'El Rebollal (al final del programa) lo grabarun primeru enas minas de golfa (wolframio) de Navafrías, andi la presentaóra chalró con tres antigus minerus. Dispués juerun al lugal d'El Bardal, tamién en Navafrías, andi dos mujeris jidun unus cachuelus comu patu típicu y se pudun vel a dos tocaoras de panderu de Peñaparda además d'una pareja de bailaoris. Tós juntus (minerus, pandereras, bailaoris, cocineras y genti de la teli) comierun los cachuelus n'El Bardal. El programa acabó cona presentaora dándosi un bañu ena Pesquera de Riofríu. No podía faltal, n'esti cachu, una mención a la palra d'El Rebollal y al panderu cuadráu.

Jasta aquí lo güenu, anque himus de contal angunus fallus. El primeru al chalral de la palra y el panderu cuadráu, a los que le quitarun el su origin astur-leonés pa poneli otru que ná tieni de vel. El segundu, que nel Riufríu le pusun que ná más era de Peñaparda, cuandu la pesquera es compartía con Villarrubias. Y el terceru, que a los otrus dos pueblus d'El Rebollal, Payu y Robrea (únicu pueblu de la provincia conos cartelis enas dos lenguas, la palra (leonés) y la oficial), ni siquiera los mentarun.

Con tó y con esu, El Rebollal salió esti lunis ena teli y por algu güenu, anque juesi con angún fallu.

NOTA: por si anguién no ha vistu el programa, aquí vos deju el enlaci: Un país pa comélsilu. Salamanca, tierra de frontera

1 oct 2013

RESUMIN DEL VERANU 1: Peñaparda se visti d'oru

Comu tólus añus, n'El Rebollal han pasáu muchas cosas y, pol mé de no vagalmi n'esi tiempu enrealmi con estu de las noticias, voi a ponelvus las más emportantis poquinu a pocu.

Apencipiamus polus deportis o, mejol, polu qu'el deporti truju a Peñaparda.
Pasacallis jasta las piscinas

Esti veranu se jidun en Barcelona los campeonatus del Mundu de natación. Comu'l añu passáu, Laura Ester Ramos, conas sus raícis en Peñaparda (su madri nació nel pueblu), jué la portera prencipal de la Seleición Española de watelpolu. Y esta vés truju a Peñaparda la medalla d'oru. La seleición española venció ena final a la d'Australia pol 8 golis a 6 (8-6) en un partíu juegáu el día 2 d'agostu d'esti 2013.

El día 17 d'esi mesmu mes d'agostu se le jidu un homenaji en Peñaparda. Nel homenaji no faltarun ni la chalra ena Praza, ni el pasacallis con gaita y tamboril de dos de los tamborilerus del pueblu, José Benito Mateos "TXEBE" y Raúl Benito, ni la paella ena Praza pa alreol d'unas 200 presonas. Lo más emportanti jué el descubrimientu el monolitu y el letreru enas piscinas que, dendi esi día 17 d'agostu, llevan el nombri de Laura Ester Ramos.

Laura al láu el monolitu y el letreru con el su nombri



29 sept 2013

La carretera el Puertu, cuertá por un regatu en Villarrubias

El regatu El Cristu de Villarrubias (el que pasa al láu la Juenti el Gallu) ha güeltu a mostralmus la su juerza n'esti prencipiu el Tardíu.
El regatu pasandu pol cima la carretera

El pasáu viernis 27 de setiembri, dispués de una tardi enterita de aguarrás bien juertis en tó El Rebollal, regatu El Cristu creció tantu qu'el su agua pasaba pol cima la carretera C-526 (Ciarrodrigu-Coria), y estuvu cuertá una media hora, jasta alreol las 10 de la nochi.

Nel lugal estuvun pa que la cosa no juesi a peol un cochi la Guardia Civil. Estuvun tamién los bomberus, pos el agua el regatu llegaba jasta las ventanas d'una cassa jecha cerca el regatu.

No es la primera vés qu'el regatu El Cristu mos recuerda que se puedi salil. Hay unus añus, enas fiestas de Santu Ferinu, el regatu creció con una tormenta de mó y manera qu'el agua llegó jasta los cochis qu'estaban aparcáus cerca.

NOTA: afotu emprestá por Yannick Pechard

7 jun 2013

La Tia Lonisia "Cabrera" jadi 107 añus

La Tia Lonisia "Cabrera" (Dionisia Morales), de Peñaparda, jidu el sábadu 1 de juniu los 107 añus.
La Tia Lonisia (derecha) y la Tia Gora (izquierda)

Con tó y con esu, la Tia Lonisia no es la mujel más vieja del lugal, pos la Tia Gora jidu nel mes d'eneru los 108. Dambas dos mujeris, la Tia Lonisia y la Tia Gora vivin en Peñaparda, y dambas dos son las dos mujeris con más añus de tóa la provincia de Salamanca, y están en drentru las más viejas de tó'l país (lista de centenarius).

Peñaparda puedi presumil de centenarias, pos dambas dos mujeris no son las únicas que ha habíu nel lugal. Anque ya hai unus añus que murió, la Tia Anastasia tamién llegó a los cien.

NOTA: afotu jecha por Carlos García (EFE), arrecogía de la noticia apaecía nel periódicu Público

30 may 2013

El tiempu n'El Rebollal (semana del 20 al 26 de mayu del 2013)


Esta semana ha síu cuasi la primera con calol de tó'l mes de mayu y, anque las nochis han estáu frías, las tardis ha jechu bien de sol y de calol. El tiempu estus días ha síu asina:

LUNIS 20. Mín: 2'2 ºC / Más: 14'1 ºC   SOL Y NUBIS
MARTIS 21. Mín: 0'1 ºC / Más: 16'2 ºC   SOL Y NUBIS
MIÉRCOLIS 22. Mín: 5'4 ºC / Más: 21'2 ºC   SOL
JUEVIS 23. Mín 6'4 ºC / Más: 20'4 ºC   SOL
VIERNIS 24. Mín: 4'9 ºC / Más: 20'5 ºC   SOL
SÁBADU 25. Mín: 3'1 ºC / Más: 21'9 ºC   SOL
DOMINGU 26. Mín: 4'4 ºC / Más: 20'3 ºC   SOL Y NUBIS

NOTA. Temperaturas medías en drentru Peñaparda, la mínima (Mín) a las 8 la mañana (8:00) y las másimas (Más) a las 5 la tardi (17:00)

24 may 2013

El Rebollal nel primel Festival Folclóricu d'Águeda

El domingu 19 se jidu, nel pueblu d'Águeda (al láu de Ciarrodrigu) el primel Festival Folclóricu, organizáu por Rubén Vegas Ratero y cona ayúa del ayuntamientu de Águeda. Nel Festival participarun gentis de la nuestra comarca d'El Rebollal, de los pueblus de Robrea, Peñaparda y Payu.
Angunus de los tamborilerus y bailaoris del Festival

Esi domingu, a la mañana, se jidu un pasacallis polas callis del lugal. Ya a la tardi, ena praza el pueblu, sería el Festival. Allí se pudun vel bailis de Payu y Peñaparda tocáus con gaita, tamboril, panderu y sartén por José Benito Mateos "TXEBE" (Peñaparda y Villarrubias). Comu no podía sel menus, los sonis de panderu y sartén estuvun cantáus ena nuestra palra d'El Rebollal.

Además de las tradicionis d'El Rebollal se pudun vel tamién los sonis y bailes de tamborilerus comu Alberto Vela "El Tutura" (La Maya), Jose "El Tamborino" (Casaris de Las Jurdis), además de los bailis del grupu de dagalis de "El Botón Charro" de Ciarrodrigu.

Nel pasacallis d'antis del festival se pudun oyel tamién a muchus tamborilerus de la comarca veníus dendi Robrea, Payu, Peñaparda, Saúgu, Ciarrodrigu, Alba de Yeltis, Casaris de las Jurdis y Villasbuenas de Gata (estus dos últimus de la provincia de Cáciris).

NOTA: afotu emprestá por José M. Pintado

23 may 2013

El tiempu n'El Rebollal (semana del 13 al 19 de mayu del 2013)

Esta ha síu una semana con fríu, más que ná la segunda metá la semana, con yelu, lluvia y jasta granidu. El tiempu ha síu asina:

LUNIS 13. Mín: 4'1 ºC / Más: 22'1 ºC   SOL
MARTIS 14. Mín: 6'4 ºC / Más: 22'5 ºC   SOL
MIÉRCOLIS 15. Mín: 7'1 ºC / Más: 17'4 ºC   SOL
JUEVIS 16. Mín 3'0 ºC / Más: 11'1 ºC   LLUVIA Y GRANIDU
VIERNIS 17. Mín: 5'8 ºC / Más: 10'2 ºC   LLUVIA Y GRANIDU
SÁBADU 18. Mín: 7'7 ºC / Más: 12'2 ºC   SOL Y NUBIS
DOMINGU 19. Mín: 4'6 ºC / Más: 10'5 ºC   LLUVIA

NOTA. Temperaturas medías en drentru Peñaparda, la mínima (Mín) a las 8 la mañana (8:00) y las másimas (Más) a las 5 la tardi (17:00)

18 may 2013

El tiempu n'El Rebollal (semana del 6 al 12 de mayu del 2013)

Esta semana, himus teníu n'El Rebollal un tiempu más frescu que la semana que pasó, con tólus días d'entresemana nubráus o con agua, y el sol y el calol pal fin de semana anque, al no habel nubis, a las nochis jidu más fríu esus días. Esti es el tiempu que jidu estus días:

LUNIS 6. Mín: 6'7 ºC / Más: 14'8 ºC   LLUVIA
MARTIS 7. Mín: 9'5 ºC / Más: 17'9 ºC   NUBIS
MIÉRCOLIS 8. Mín: 12'3 ºC / Más: 17'5 ºC   NUBIS
JUEVIS 9. Mín 12'2 ºC / Más: 19'2 ºC   LLUVIA
VIERNIS 10. Mín: 11'1 ºC / Más: 17'3 ºC   SOL Y NUBIS
SÁBADU 11. Mín: 4'3 ºC / Más: 19'5 ºC   SOL
DOMINGU 12. Mín: 2'9 ºC / Más: 21'4 ºC   SOL

NOTA. Temperaturas medías en drentru Peñaparda, la mínima (Mín) a las 8 la mañana (8:00) y las másimas (Más) a las 5 la tardi (17:00)

5 may 2013

El tiempu n'El Rebollal (semana del 29 d'abril al 5 de mayu del 2013)

Esta semana apencipió del mesmu mó y manera qu'acabó la semana antis: con nivei. Asina, el lunis a la mañana estuvu nevandu alreol de dos horas. La semana apencipió con fríu, comu d'inviernu, peru ha acabáu con calol, cuasi comu de veranu. Esti es, en númerus, el tiempu que ha jechu esta semana:

LUNIS 29. Mín: 0'9 ºC / Más: 7'5 ºC   NIEVI
MARTIS 30. Mín: 2'7 ºC / Más: 7'9 ºC   LLUVIA
MIÉRCOLIS 1. Mín: 4'9 ºC / Más: 13'8 ºC   SOL Y NUBIS
JUEVIS 2. Mín -0'5 ºC / Más: 15'7 ºC   SOL Y NUBIS
VIERNIS 3. Mín: 0'4 ºC / Más: 17'7 ºC   SOL
SÁBADU 4. Mín: 0'8 ºC / Más: 19'1 ºC   SOL
DOMINGU 5. Mín: 3'0 ºC / Más: 21'4 ºC   SOL Y NUBIS

NOTA. Temperaturas medías en drentru Peñaparda, la mínima (Mín) a las 8 la mañana (8:00) y las másimas (Más) a las 5 la tardi (17:00)

28 abr 2013

El tiempu n'El Rebollal (semana del 22 al 28 d'abril del 2013)

Dispués d'una semana con tiempu de veranu, esta semana paici qu'el inviernu ha güeltu a la comarca d'El Rebollal, con una güena bajá de las temperaturas y jasta nievi. El domingu amaneció con Jálama neváu y noticias de nievi caía tamién en Navafrías, y la tardi del domingu truju tamién unus copinus de nievi. El resumin del tiempu que ha jechu esta semana es ésti:

LUNIS 22. Mín: 6'2 ºC / Más: 16'0 ºC   SOL
MARTIS 23. Mín: 5'2 ºC / Más: 17'7 ºC   SOL
MIÉRCOLIS 24. Mín: 3'7 ºC / Más: 20'8 ºC   SOL
JUEVIS 25. Mín 5'2 ºC / Más: 21'4 ºC   NUBIS
VIERNIS 26. Mín: 8'8 ºC / Más: 20'0 ºC   TORMENTA
SÁBADU 27. Mín: 5'1 ºC / Más: 11'3 ºC   NUBIS
DOMINGU 28. Mín: 0'7 ºC / Más: 6'9 ºC   NIEVI

NOTA. Temperaturas medías en drentru Peñaparda, la mínima (Mín) a las 8 la mañana (8:00) y las másimas (Más) a las 5 la tardi (17:00)

Nievi en Jálama esti domingu

24 abr 2013

La puenti Vaucarrus ya es hestoria

Al fondu, la puenti Vaucarrus dispués de la volaúra
Dispués de muchus mesis idiendu que iban a tirala, esti miércolis 24 d'abril de 2013 s'ha voláu, con esplosivus, la Puenti Vaucarrus.

Esta puenti llevaba en pie alreol de 20 añus, cuandu jidun la carretera nueva. Antañu había otra puenti antigua jecha de piedra. Al acabalsi el Pantanu de Vaucarrus, esta puenti estaba condená a desaparecel baju las aguas, y por el peligru que podía habel, se tenía de tiral. Con tó y con esu, han síu muchus los mesis que se ha tardáu en jadel la volaúra. Primeru la iban a jadel los soldáus, dispués una empresa privá y, pa acabal, lo ha jechu otra empresa privá. En tó esti tiempu, las puertas de la presa han estáu abiertas sin cogel agua, ná más que nel tiempu de marzu que llovió muchu (pa que no se inundasi Ciarrodrigu).
Ha síu mucha la genti d'El Rebollal y alreoris que s'han acercáu a Vaucarrus a vel la volaúra la puenti, conas cámaras de jadel afotus y jasta pa grabal vídeus. Los guardias estuvun vigilandu que naidi cogiesi la antigua carretera que pasaba pol cima la puenti, carretera que, comu no pué sel menus, está cuertá dendi hai unus mesis, dendi qu'abrierun la puenti nueva.

Con esta volaúra, la puenti Vaucarrus ya es hestoria.

El tiempu n'El Rebollal (semana del 15 al 21 d'abril del 2013)

Esta semana El Rebollal ha teníu un tiempu más de primerus del veranu que de primavera. Asina, himus teníu calol por el día, anque tamién al estal entovía en abril, ha jechu fríu a las nochis. El tiempu, día a día, ha síu asina.

LUNIS 15. Mín: 9'5 ºC / Más: 17,2 ºC   SOL
MARTIS 16. Mín: 4'7 ºC / Más: 22,1 ºC   SOL
MIÉRCOLIS 17. Mín: 7'1 ºC / Más: 24,2 ºC   SOL
JUEVIS 18. Mín: 7'1 ºC / Más: 21,4 ºC   SOL
VIERNIS 19. Mín: 8'2 ºC / Más: 17,5 ºC   SOL
SÁBADU 20. Mín: 0'6 ºC / Más: 18,3 ºC   SOL
DOMINGU 21. Mín: 1'0 ºC / Más: 19,1 ºC   SOL

NOTA. Temperaturas medías en drentru Peñaparda, la mínima (Mín) a las 8 la mañana (8:00) y las másimas (Más) a las 5 la tardi (17:00)