18 feb 2016

Llegarun las primeras nievis del añu

Las primeras nievis del añu 2016 han llegáu a la comarca d'El Rebollal.

Las nevás del domingu 14 y el lunis 15 de Jebreru trujun a la nuestra comarca d'El Rebollal las primeras nievis, a las que s'uñerun las caías ena madrugá entri el miércolis y el juevis.
Jálama cona nievi caía en Jebreru

Anque no jué mucha la nievi caía ningunu de los días, si que cuajó un poquininu en Navafrías, además de enas cumbris de Jálama y de la Jañona.

La nievi ha veníu acompañá de yelus polas nochis, con temperaturas de alreol de los 5 gráus pol baju el ceru (-5ºC).

10 feb 2016

Las gentis d'El Rebollal celebran los sus Carnavalis

Los Carnavalis (tamién llamáus Antrueju) tamién s'han podíu barruntal en los nuestrus pueblus d'El Rebollal estus primerus días de Jebreru, del Sábadu 7 al Miércolis 10.
La Charrascona polas Callis de Payu

Juerun las gentis de Payu las primeras en salil a la calli el Sábadu a cumpril cona tradición y paseal a la su Charrascona polas callis del lugal.

Los Carnavalis con más genti juerun en Peñaparda. Tamién jué el Antrueju con más días de fiesta, pos se jidun cosas el Domingu, el Martis de Carnaval y el Miércolis de Cenida. El Domingu la "Asociación del Pandero Cuadrado" (Asociación el Panderu Cuadráu) jidu la comía el Domingu de Carnaval, ena que estuvun alreol de 100 presonas. La parti más tradicional se jidu el Martis de Carnaval, cuandu un grupu de amantis de las tradicionis salierun vestíus de jorramachi a pedil, comu es costumbri, polas callis del lugal, al son de la gaita y el tamboril. Pa acabal, el Miércolis de Cenida s'asarun sardinas, choridus y panceta, y se jidu el Intierru la Sardina.

En Robrea tamién celebrarun el Martis de Carnaval, de mó y manera que salierun disfrazáus los dagalis polas callis del pueblu, día que acabó con una merienda pa tós los que salierun.

Anque menus famosus que otrus, los Carnavalis d'El Rebollal siguin alegrandu a las gentis de los nuestrus pueblus. La Charrascona golvió, otru añu más, a oyelsi polas nuestras callis.


Comía del Domingu de Carnaval
en Peñaparda
Genti vestía de jorramachi en Peñaparda


El Antrueju de Peñaparda tamién llegó a los mayoris

Asandu las sardinas el Miércolis de Cenida en Peñaparda
Martis de Carnaval en Peñaparda



AFOTUS:
 - Payu: Asun Núñez Martín
 - Peñaparda: Virginia Iglesias ("Gentis vestías de Jorramachi");  Patricia Santamaría (afotu del Martis de Carnaval) y José Benito Mateos