26 ago. 2016

Payu s'enllena de música con el Festival Folclóricu "La Sartén Charra"

El pasáu sábadu 13 d'Agostu, el pueblu de Payu golvió a jadel el su Festival Folclóricu, "La sartén charra".

Además del grupu "Jálama" de Payu (nel questá el qu'estu escribi, anque no salga enas afotus), estuvun tamborilerus de la escuela de Ciarrodrigu, además de tamborilerus comu José, d'Aldeadávila, o Berna, de Cabrerizus. Estuvu tamién el músicu zamoranu Alfredo Domínguez Prada que, en compaña de Marta, María, Marta y Berna, tocó un puñáu de sonis tradicionalis. Esti añu, la "Sartén Charra" se le dio a Berna Pérez, tamborileru de Cabrerizus y del grupu folk "Folk on Crest", pola su defensa de la cultura tradicional. Esti premiáu a uñi asina a la lista juntu a Verónica Mangas (2015), Lauri (2014), Consuelo (2013) y José Benito Mateos "TXEBE" (2012).

El Festival Folclóricu acabó a la nochi con el conciertu del grupu leonés "Tarna".

Comu novedá, esti añu se jidu, juntu con el festival, el I Mercáu d'Artesanía. Tamién, comu novedá, estuvu presenti la lengua leonesa, lo mesmu enos cartelis del Festival (con muchas cosinas escritas ena nuestra palra d'El Rebollal) comu nel conciertu de Tarna, que cantarun angunas de las sus tonás en leonés (nel mó y manera de la provincia de León).

Tamborilerus de la escuela de Ciarrodrigu

José d'Aldeadávila (izq) y Berna (dcha)

Berna Pérez, Sartén Charra 2016
Bailandu al son de la dulzaina


Alfredo, Marta, María, Marta y Berna

Conciertu del grupu "Tarna"

Cartel del Festival Folclóricu

10 ago. 2016

Las bicis güelvin a correl los caminus d'El Rebollal

Esti domingu 7 d'Agostu se jidu la "VII Marcha BTT La Villa" (VII Marcha en Bici de Montaña), organizá por el C.D. El Charail.

Con salía y llegá a la Praza Mayol de Peñaparda, la marcha ajuntó a unus 60 ciclistas. Se podía correl de dos mó y maneras: una marcha corta, de 32 km, y una larga, de 48 km, dambas dos polus caminus de Peñaparda y d'El Rebollal.

Además de la carrera de bicis, el C.D. El Charail tamién jidu, el martis 9 d'Agostu, una comía populal, qu'esti añu dejó de láu la paella pa comel un pratu más arrimáu a las nuestra tradicionis, cachuelus con carni. Además de lo nuevu nel menú, las gentis del C.D. El Charail tuvun a bien ponel el menú ena nuestra palra d'El Rebollal. Asina, enos cartelis se pudu leel "cachuelus con carni".

Ena comía estuvun alreol de 120 presonas, que pudun repetil de carni. La tardi el martis acabó cona música de una charanga.

Ciclistas polas callis de Peñaparda

Ciclistas polas callis


Cachuelus con carni ena Praza

3 ago. 2016

La Mancomunidá jidu la su fiesta en Payu

El pueblu de Payu recibió, el domingu 31 de Juliu, la Fiesta de la Mancomunidá Altu Águeda.

Duranti tó'l día se pudun vel, polas callis del lugal, los tenderilis el mercáu d'artesanía (alreol de 30). Además, hubu tamién una muestra de ganáu y otra de trajis de charru.

La Fiesta apencipió con los alcaldis palrandu encima el tabráu. Estuvu comu envitáu el Presidenti de la Cámara de Sabugal, concellu portugués con el que la nuestra comarca comparti muchas cosas, entre las que podemus destacal la hestoria, pos Sabugal jué parti el nuestru Reinu de León jasta'l Tratáu d'Alcañicis (1297).

Dispués de la chalra los alcaldis, le tocó el turnu al grupu "Jálama", que jidu una muestra de los bailis de Payu, lo mesmu al son de la sartén de Verónica Mangas comu de la gaita y el tamboril de José Benito Mateos "TXEBE".

La hora de comel tuvu de protagonista a la paella, que tóa la genti (feriantis, bailaoris, alcaldis, públicu) pudu probal ena comía populal.

La Fiesta la Mancomunidá acabó con el conciertu el grupu estremeñu "Manantial Folk".

Pa'l sotru añu, la Fiesta la Mancomunidá será en Peñaparda, tamién ena nuestra comarca d'El Rebollal.

Grupu "Jálama" de Payu

El burru-taxi polas callis de Payu

Tenderilis del mercáu

El grupu estremeñu "Manantial Folk"

Muestra de trajis de charru

1 ago. 2016

Peñaparda jidu la su Fiesta el Panderu. Y van XVII...

La XVII Fiesta el Panderu truju a Peñaparda musica y bailis, qu'enllenarun el pueblu el viernis y el sábadu.

El viernis 29 de Juliu, primel día de la fiesta, apencipió con una chalra alreol el panderu cuadráu jecha por Raúl Benito. La chalra estuvu acompañá, nel mesmu lugal, d'una muestra d'afotus jechas por Juana Andrés, y d'otra muestra de dibujus de charrus de Peñaparda jechus por el pintol Carlos Medina. A la tardi hubu tamién baili de sevillanas.

El sábadu 30 de Juliu jué el día prencipal de la Fiesta el Panderu. La mañana apencipió conos tenderilis el mercáu artesanal y un pasacallis polus tamborilerus José Benito Mateos "TXEBE" y Juan Antonio Muñoz "Juanan".

Ya a la tardi jué el festival folclóricu, con el grupu de dagalis de Peñaparda, el Baili el Ofretoriu, el grupu "Sedeiro" de Zamora y el grupu folclóricu de Peñaparda. Además, se entregó el Panderu d'Honol al folclorista Joaquín Díaz.

La XVII Fiesta el Panderu acabó a la nochi, con el conciertu de "Gabriel Calvo y la Fabulosa Retahíla".

Baili de sevillanas

La palra presenti en unu de los
tendilis el mercáu

Grupu de dagalis de Peñaparda

Joaquín Díaz, Panderu d'Honol 2016

Grupu "Sedeiro" de Zamora

Conciertu de Gabriel Calvo
y la Fabulosa Retahíla