18 ago. 2017

Laura Ester Ramos gana otra medalla cona seleción de "watelpolu"

Laura Ester Ramos, conas sus raícis en Peñaparda, ganó el pasáu mes de Juliu la medalla de prata enos mundialis de nadal que se jidun en Budapest (Hungría).
Laura Ester nel partíu

Laura juegó, el viernis 28 de Juliu, la final del "watelpolu" femeninu cona seleción española, andi juega comu portera. El partíu final, entri España y los Estáus Uñíus, acabó con el resultáu de 13 - 6 a favol el equipu americanu, que jué el que se llevó la medalla d'oru.

Dispués de lo lográu, y comu vieni jadiendu dendi chiquinina, Laura pasó unus días de las sus vacancias en Peñaparda, andi se l'han veníu jadiendu homenajis estus añus d'atrás (las piscinas mesmu de Peñaparda llevan el su nombri). Esti añu no hi teníu noticia d'homaneji ninguna, asina que sirva esta pequeña noticia comu tal. ¡Noragüena, Laura!

NOTA: afotu jecha duranti el partíu, en RTVE

1 ago. 2017

Payu celebra esti 3 d'Agostu el su festival folclóricu

El pueblu de Payu celebra esti juevis 3 d'Agostu, el su festival folclóricu, organizáu por el grupu "Jálama". Va a sel la VII vés de la "Sartén Charra", que asina es el nombri que tieni esti festival.
Cartel de "La Sartén Charra",
tamién ena nuestra palra d'El Rebollal

El programa e ésti:

19:00   PASACALLIS de tamborilerus, dendi'l multiusus jasta la Praza

20:00   Actuacionis de los GRUPUS DE BAILI
     - Grupu "Amanecer Extremeño" (Moraleja, Cáciris)
     - Pareja de bailaoris de Salamanca
     - Grupu "Jálama" (Payu)

     Además, en drentru el festival, se dará la "Sartén d'Honol".

23:00   CONCIERTU del grupu folk "Baleo"

Pola tardi, a la mesma vés que los bailis, habrá ena praza un mercaíllu con tenderilis d'artesanía.

Tenemus de señalal  tamién qu'el cartel qu'anuncia el festival está escritu, además d'ena lengua oficial, ena nuestra palra d'El Rebollal, enanchandu asina la defensa de la cultura tradicional a la nuestra lengua.

25 jul. 2017

Peñaparda acabará el mes de Juliu con fiestas

El pueblu de Peñaparda va a tenel, entri'l viernis 28 jasta'l domingu 30, tres días de fiesta conos qu'el lugal va a despedil el mes de Juliu. Estus tres días de fiesta vienin pol mé de dos fiestas: la Fiesta el Panderu (días 28 y 29) y la Fiesta la Mancomunidá Altu Águeda (día 30).

FIESTA EL PANDERU 
Cartel de la Fiesta el Panderu


Viernis, 28 de Juliu

19:00   CHALRA alreol de "Rollus y picotas", por Cristian Berga, restauraol
20:00   SEVILLANAS


Sábadu, 29 de Juliu

11:00   FERIA d'artesanía
            ALBORÁ polus tamborilerus de la comarca
            MUESTRA de cómu se jadi un panderu, por Andrea Mateos

19:00   PASACALLIS
             FESTIVAL FOLCLÓRICU          
            - Grupu de dagalis de Peñaparda
            - Jadel "Socia d'honol" a la tia Juliana "Mansa"
            - Grupu "Las Ramajeras" (Las Jurdis)
            - Entrega del Panderu d'Honol a Isabel Ramos "Isabelita"
            - Grupu "El Roble Charro" (Ciarrodrigu)
            - Grupu folclóricu de Peñaparda

23:00   Conciertu de Raúl Díaz de Dios


FIESTA LA MANCOMUNIDÁ 
Cartel de la Fiesta de la Mancomunidá


Domingu, 30 de Juliu

12:00   Principiu de la XV Feria d'Artesanía y Negocius, y de la VIII Feria de Ganáu

12:15   Actuación del Grupu Folclóricu de Peñaparda, ena Praza Mayol

15:00   Comía pa tóa la genti enas piscinas

17:00   Magia, enas piscinas, por el magu Juan F. Luzón

20:30   Conciertu por el grupu "Enflautados"

Duranti tó'l día habrá varias muestras:
 - Muestra de Ganáu (caminu Payu)
 - Muséu etnográficu
 - Muestra d'afotus (centru cultural)
 - Muestra d'encaji de bolillus (Praza)
 - Muestra de cenderrus (corral en Calli Eras)

Pola tardi, dendi las 5 la tardi, habrá juegus pa los dagalis, con castillus jincháus y tren.

24 jul. 2017

La nuestra palra d'El Rebollal tendrá dineru pa la su defensa

La nuestra palra d'El Rebollal (el mó y manera que tenemus los rebollanus de palral la lengua leonesa) tendrá dineru pa la su defensa.
Cartel en la Calli l'Atriu, Robrea

Pol mé una enmienda de la UPL (Uñión el Pueblu Leonés), la nuestra palra d'El Rebollal tendrá dineru pa jadel material pa que puéa apriendelsi, lo mesmu ena escuela que juera d'ella. La enmienda del partíu leonesista jué aprobá a finalis el mes de Juniu enas Cortis de C. y León y, pol mé d'ella, serán 50.000 € (cincuenta mil eurus) los qu'iran pa que se puéa apriendel a palral la lengua leonesa enas crasis propias de las dos comarcas andi mejol se conserva: El Rebollal y Las Arribis, a los que se podrán añuil otrus 50.000 pa'l sotru añu.

Nel casu la nuestra comarca d'El Rebollal, el material tendrá comu basi el trabaju jechu por Ángel Iglesias Ovejero, natural de Robrea, autol de los prencipalis librus y estudius alreol de la nuestra palra d'El Rebollal: "El habla de El Rebollar. Descripción" y "El habla de El Rebollar. Léxico".

La propuesta nación en drentru el grupu CCRL (Ciudadanus el Reinu de León) que, pol mé la colaboración entri CCRL y UPL, acabó enas Cortis comu enmienda a los dinerus de la autonomía. D'esta propuesta palramus hai unas semanas en esta otra noticia: La palra d'El Rebollal, otra vés enas Cortis

21 jul. 2017

Afotus de las fiestas de San Silveriu y los Sanjuanis

Pinu de Peñaparda
Los pueblus d'Es Rebollal dierun la bienvenía al Veranu conas sus fiestas, San Silveriu (20 de Juniu) en Peñaparda y los Sanjuanis (24 de Juniu) en Navafrías, Payu y Robrea.

Además d'incierrus, capeas, verbenas, misas y procesionis, lo más mentáu juerun la muestra de pájarus en Peñaparda y el conciertu d'acurdión de Raúl Díaz de Dios en Navafrías. Lo más tradicional juerun los pinus en Peñaparda, Payu y Robrea, y los capazus de Payu y Navafrías.

Aquí vos deju anguns de las afotus que jidi estas fiestas.

Incierru en Peñaparda

Pinu de Payu
Pájarus en Peñaparda
Pinu en Robrea




Acurdionis en Navafrías
Raúl Díaz de Dios


Procesión de San Silveriu

16 jun. 2017

Los pueblus d'El Rebollal recibin al Veranu conas sus fiestas a San Silveriu y San Juan

Comu tólus añus, el calendariu natural y el calendariu de fiestas llegan uñíus pa que, n'estus tiempus, los pueblus d'El Rebollal den la bienvenía al Veranu.

Los primerus en dal la bienvenía al Veranu son los peñaparderus, honrandu a San Silveriu. Esti es el programa que han preparáu, en Peñaparda, p'apencipial bien el Veranu.
Poniendu la Viga en Payu
(afotu del añu 2016)

VIERNIS 16
20:00   Levantamientu del PINU polus quintus
23:00   VERBENA cona orquesta "HOLDEM"

SÁBADU 17
13:30   INCIERRU polas callis del lugal
18:00   CAPEA
23:00   VERBENA cona orquesta "MAX MUSIC SHOW"

DOMINGU 18
13:30   INCIERRU polas callis del lugal
18:00   CAPEA

LUNIS 19
16:00   JUEGUS pa los dagalis

MARTIS 20
12:00   MISA en honol a San Silveriu
13:00   INCIERRU pa los dagalis
19:00   Muestra de CETRERÍA (águilas y halconis)

Los otrus pueblus que celebran las sus fiestas, Navafrías, Payu y Robrea, lo jadin los mesmus días, viernis, sábadu y domingu, anque los navafrieñus tienin tamién el lunis juegus pa los dagalis. Éstu es lo que vamus a podel disfrutal enos Sanjuanis d'El Rebollal.

VIERNIS 23
20:00   Levantamientu del PINU polus quintus (ROBREA)
21:00   Levantamientu de la VIGA (PAYU)
23:00   CAPAZU (PAYU)
23:00   CAPAZU (NAVAFRÍAS)
23:30   VERBENA cona orquesta "TRÍO MUSICAL MARFIL" (PAYU)
23:30   VERBENA cona orquesta "DISCO TRÓPICO" (ROBREA)
00:30   DISCU-MÓVIL (NAVAFRÍAS)

SÁBADU 24
11:00   MISA en honol a San Juan (NAVAFRÍAS)
12:00   MISA en honol a San Juan (ROBREA)
12:00 a 14:00   JUEGUS pa los dagalis (ROBREA)
12:30   INCIERRU A CABALLU por el Práu la Jerraúra (NAVAFRÍAS)
13:00   INCIERRU polas callis del lugal (PAYU)
14:00   PAELLA pa tóa la genti (ROBREA)
15:00 a 17:00   JUEGUS pa los dagalis (ROBREA)
18:00   CAPEA, animá cona charanga "LA CLAVE" (NAVAFRÍAS)
18:30   CAPEA tradicional (PAYU)
18:30   CAPEA tradicional (ROBREA)
23:00   VERBENA cona orquesta "GRUPO SUMMER" (NAVAFRÍAS)
23:30   DISCU-MÓVIL (PAYU)
00:00   VERBENA cona "ORQUESTA SHOW" (ROBREA)

DOMINGU 25
11:00   MISA en honol a San Juan (PAYU)
12:00   INCIERRU A CABALLU (ROBREA)
12:30   INCIERRU A CABALLU por el Práu la Jerraúra (NAVAFRÍAS)
13:00   JUEGUS pa los dagalis (PAYU)
18:00   JORICIA conos novillerus de la Escuela Taurina de Salamanca MANUEL DIOSLEGUARDE y LEONARDO PASSAREIA. De seguíu, CAPEA tradicional (NAVAFRÍAS)
18:30   CAPEA tradicional (ROBREA)
23:00   CONCIERTU d'acurdión jechu por RAÚL DÍAZ DE DIOS (NAVAFRÍAS)

LUNIS 26
16:30   JUEGUS pa los dagalis (NAVAFRÍAS)

Un añu más, es curiosu que los pueblus d'El Rebollal, ricus en folclori, lo dejin de láu enas sus fiestas. Curiosu tamién que, en teniendu una lengua propia ena comarca d'El Rebollal, ningún pueblu  la ussi enos cartelis de las fiestas.

25 may. 2017

La palra d'El Rebollal, otra vés enas Cortis

Sieti añus dispués, la nuestra palra d'El Rebollal va a sel mentá enas Cortis de C. y León. Esta vés, pol mé una "enmienda" a los dinerus autonómicus.
Cartel ena palra d'El Rebollal, en Robrea

Pol mé'l acuerdu que han jechu el grupu CCRL (Ciudadanus el Reinu de Llión) y el partíu UPL (Uñión el Pueblu Llïonés), el procuraol enas Cortis por UPL, Luis Mariano Santos, ha presentáu una "enmienda" a los dinerus para que, d'ellus, 50.000 € (cincuenta mil eurus) sean dedicáus a jadel material pa que la genti aprienda las dos palras llïonesas que mejol se conservan ena provinca de Salamanca: la nuestra palra d'El Rebollal y la palra de Las Arribis. D'esti mó y manera, se jadrían librus, vídeus,... pa apriendel dambas dos palras cogiendu comu muestra los estudius de Ángel Iglesias Ovejero (pola palra d'El Rebollal) y Llorente Maldonado (pa la palra de Las Arribis).
Los 50.000 eurus se repartirían entri los materialis pa dambas dos comarcas, y habría otrus 50.000 pa'l sotru añu pa'l mesmu serviciu. Y es que, el podel apriendel dambas palras llïonesas enas escuelas con güen material es algu prencipal pa que puedan seguil vivas.

Asina, pol mé los dinerus de l'autonomía, la nuestra palra va a golvel a estal enas Cortis. Lejus quéa ya aquel 26 de Mayu del 2010 cuandu, pa la PNL (Proposición No de Lei) en defensa de la lengua llïonesa, el procuraol del PSOE (Partíu Socialista Obreru Español) José Ignacio Martín Benito (nacíu en La Encina) leyó una parti el poema "Jálama", escritu ena palra d'El Rebollal por José Benito Mateos Pascual.

24 may. 2017

Los caballus golvierun a Robrea pa la su Feria

El pueblu de Robrea golvió a jadel, y cona d'esti añu 2017 van ochu vedis, la su Feria el Caballu. Esta vés la jidun entri'l viernis 19 y el domingu 21 de Mayu.
Preparáus pa'l paséu a caballu

El viernis 19 se jidu una chalra alreol de los torus, que valió d'homenaji a los torerus José Miguel Pérez "Joselillo" y Eduardo Gallo.

Ya el sábadu 20 se desayunarun migas y, una vés cogías juerzas, se jidu una paséu a caballu jasta La Cascajera. Dispués de la comida pa tós, la feria se llevó jasta'l pabellón andi, además de cenal, se pudun vel sevillanas y, a la nochi, un conciertu de framencu con el grupu "Kurkillo".

Pa acabal, el domingu 21 se jidu una feria d'artesanía, una muestra d'afotus del mundu el toru, y se remató tó con sevillanas.

Sali d'oju que, en algu que se jadi ena nuestra comarca, no apareza ni la nuestra palra d'El Rebollal (ni enos cartelis, ni nel programa), y que se apuesti por el framencu y las sevillanas dejandu de láu lo charru. Un puntu a corregil pa'l sotru añu, en drentru de lo qu'es una güena idea.

14 may. 2017

Semana de rayus, truenus y aguarrás

La comarca d'El Rebollal ha teníu, en tólus pueblus, una semana de tormentas y mucha agua, que ha vemíu a abonal la sequeá que había en tóa la comarca.
Arcu del Señol en Peñaparda


Las tormentas apencipiarun el miércolis 10 de Mayu, sobri tó a la tardi. Antis de la tormenta se pudu vel un gran Arcu dobri sobri los cielus d'El Rebollal. Esa mesma tardi cayó una de las tormentas más grandis que se recuerdan. Pol mé d'ella, lo menus en Peñaparda estuvun al sotru día sin teléfonu enas cassas. Tamién en Peñaparda, cayerun dos rayus que, conos sus truenus, se barruntarun en tó'l lugal y jidu cimbreal tóas las cassas del pueblu de mó y manera apaecíu a un terremotu. Esi día, la estación de Navafrías arrecogió 35 l/m2 (litrus el metru cuadráu), cuasi tós dendi las 6 de la tardi.
Las callis jechas regatus

Las tormentas siguierun el juevis 11 de Mayu y, comu himus dichu más arriba, tuvun al pueblu de Peñaparda sin teléfonu tó'l día. Jué el día que más llovió, con 45 litrus el metru cuadráu.

Pa acabal la semana, el viernis 12 de Mayu las tormentas dejarun, sigún la estación de Navafrías, 32'2 l/m2.

Asina, n'El Rebollal s'arrecogierun en tres días 112'2 litrus el metru cuadráu, más o menus lo que tendría d'habel llovíu nel mes enteru.

NOTA: datus arrecogíus de AEMET (Agencia Estatal de Meteorología)

10 may. 2017

Las carreteras d'El Rebollal son noticia

Esti mes de Mayu las carreteras d'El Rebollal han síu noticia por motivus diferentis.

Apencipiamus con la nueva inauguración de la carretera entri Navafrías y Valverdi. Cuertá, p'arregrala, dendi'l 15 d'Agostu del añu 2016, ya está abierta pa'l que quiera ussala. El sábadu 6 de Mayu se jidu la nueva inauguración, ena qu'estuvun, además de angunus de los justicialis del lugal, Javier Iglesias (Presidenti de la Diputación de Salamanca) y Marcelino Cordero (diputáu comarcal).

Bachi a la entrá de Saúgu
Peol suerti tienin los vedinus de Robrea. El grupu "Ciudadanos del Reino de León" ("Ciudadanus el Reinu de León", CCRL) ha güeltu a denuncial el estáu de la carretera entri Robrea y Saúgu. Nel escritu de denuncia, el grupu mienta el estáu de la carretera comu horrorosu y criminal, idiendu además qu'el conducil porla mesma es apaecíu a jadel un "rally". Asina, dendi'l grupu de "Ciudadanus el Reinu de León" pidin a la Diputación de Salamanca qu'arregrin la carretera  antis de "que haiga de lamental algu gravi pol mé el horrorosu estáu nel qu'está hogañu".

N'estas afotus podemus vel cóu está la carretera entri Robrea y Saúgu.

Carretera Robrea Saúgu

Carretera Robrea-Saúgu (2)


17 abr. 2017

Robrea y Peñaparda ena Charrá de Ciarrodrigu 2017

"El Fandangu" de Robrea
La XXXVIII Charrá de Ciarrodrigu, el sábadu 15 d'Abril, ha síu especial pa los grupus d'El Rebollal. Y es que esti añu han síu dos los grupus d'El Rebollal que han estáu presentis: el grupu "El Fandangu", de Robrea, y el grupu folclóricu de Peñaparda. Digu que ha síu especial porque, cuasi siempri, es ná más un pueblu u otru el qu'está, y esti añu han estáu dambus dos juntus.

Dispués del pasacallis, los primerus rebollanus que subierun al tabráu juerun los robreanus de "El Fandangu". Las tres parejas bailarun, al son de la gaita y el tamboril de José María, tres bailis: "Jota de dos pasus", "El Son" y "El Fandangu".

Justu dispués bailó el grupu de Peñaparda, al son del panderu d'Isabel Ramos. Las dos parejas bailarun el "Ajecháu", el "Salteáu" y el "Corríu brincáu".

Bailaoris de Peñaparda
Además de los grupus d'El Rebollal estuvun tamién de otrus lugaris, comu Ciarrodrigu, la Sierra Francia o Las Arribis, y d'otras provincias comu Cáciris o Güelva. El premiáu esti añu cona "Encina Charra" jué Diego Vacas, bailaol de Vilvestri, que cogi asina el relevu a Isabel Ramos, panderera de Peñaparda, a la que le dierun el premiu ena Charrá del añu pasáu.

8 abr. 2017

Robrea estrena nuevus cartelis ena nuestra palra

El pueblu de Robrea ha estrenáu, nel mes de Marzu, nuevus cartelis ena nuestra palra d'El Rebollal (el mó y manera que tenemus los rebollanus d'ussal la lengua leonesa).
Unu de los cartelis nuevus
de los caminus de Robrea

Esta vés los nombris escritus ena nuestra palra están en los caminus del lugal. Son cuatru las rutas (rutas reondas) que s'han puestu en rebollanu. Con estus nuevus cartelis, el pueblu de Robrea tieni puestus ena nuestra palra d'El Rebollal los nombris de los caminus y los nombris de las callis, güena muestra del compromisu del pueblu ena defensa de las nuestras tradicionis, de las que la palra es una de las prencipalis.

Con estus nuevus cartelis de Robrea, son dos los pueblus de la comarca que tienin marcáus los nombris de los caminus ena palra d'El Rebollal. El otru es Peñaparda, andi ya hai angunus añus que se pusun los cartelis en angunus caminus.

Calli de Robrea

Caminu de Peñaparda

29 mar. 2017

Nievi y granidu pa dal la bienvenía a la Primavera

La nievi y el granidu cogierun por sorpresa a las gentis d'El Rebollal n'esta recien apencipiá Primavera.

Payu dispués del granidu
Asina, dendi'l miércolis 22 jasta'l viernis 24 de Marzu, la protagonista jué la nievi que anque poca, lo mesmu en cantidá y en duración, s'ansomó por tólus rinconis de la nuestra comarca.

Lo más emportanti jué el sábadu 25 de Marzu cuandu, ena metá la tardi, se presentó con juerza el granidu, que dejó las callis de tólus pueblus d'El Rebollal tal y comu si hubiesi neváu. Y es que media hora de granidu, rayus y truenus dejarun alreol de 10 cm (centímetrus) de yelu, además de queal sin lús a Peñaparda por dos horas, dendi las 7 y media jasta las 9 y media la nochi. El granidu duró enas callis y nel campu muchu más que la nievi, y entovía el domingu a la tardi se podía vel en angunus rinconis.
Geranius con nievi

La resaca de la granidá jué el domingu, cuandu cuertarun, a esu del meyudía, la lús en tó'l Rebollal pa arregral lo que la tormenta había derrotáu. Tamién dió el granidu tema pa chalral a tóa la genti d'El Rebollal, y no juerun pocus los que dijun que nunca nu habían vistu cosa igual nel lugal.

Asina, juerun la nievi y el granidu los que dierun la bienvenía a la Primavera n'esti añu 2017.

NOTA: Afotu de Payu emprestá por Beatriz Mateos Domíngez


Tejáus neváus en Peñaparda

Nevandu en Peñaparda

Callis de Peñaparda
dispués de la tormenta

El granidu en Villarrubias al sotru día
video

4 mar. 2017

Marzu saluda con nievi a'l Rebollal

Peñaparda dendi'l Castillu
El mes de Marzu ha queríu saludal a la nuestra comarca d'El Rebollal d'un mó y manera mú especial: con una nevá de golpi porradu.

La nievi, que sí estaba pregoná pa'l sábadu, s'alantró un día enteru y cayó, en güena cantidá, dendi'l meyudía el viernis 3 de Marzu. Escapáu apencipió a cuajal nel campu, enos tejáus y jasta enas callis, anque del mesmu mó y manera que vinu se jué, asina que no hubu problema ningunu ni enas callis ni enas carreteras.

Tólus pueblus d'El Rebollal pudun vel la nievi el viernis. Aquí vos deju angunas afotus.

NOTA: afotu de Robrea emprestá por Encarnación Martín (Encarni)
Tejáus de Robrea

"ElCastillu", Peñaparda

"La Puenti", Peñaparda
Podu Moru (Villarrubias) dendi Peñaparda




4 feb. 2017

El Rebollal, presenti nel "record" de tamborilerus en Aldeatejá

La comarca d'El Rebollal tamién estuvu presenti nel pueblu d'Aldeatejá (Salamanca), andi se batió el "record" del mundu de tamborilerus tocandu a la mesma vés.
Txebe y Vero con el grupu "Jálama"
ena Charrá de Ciarrodrigu 2015

Asina, representandu a la comarca d'El Rebollal estuvun Verónica Mangas "Vero", de Payu, y José Benito Mateos "Txebe", por Peñaparda.

En total juerun 255 los tamborilerus qu'estuvun nel "récord Guiness", que tocarun a la mesma vés tonás tan tradicionalis comu "El burru de Villarinu", "El tíu Vicenti" y "La Tarara". Además de los d'El Rebollal estuvun también tamborilerus de tóa la provincia Salamanca, y de las provincias de Cáciris y Zamora.

Los tamborilerus tocandu pa'l "record"

NOTA: afotu de los tamborilerus emprestá por Luiso García

22 ene. 2017

Las gentis de Peñaparda honran a San Sebasián

Las gentis de Peñaparda s'empeñan en no dejal moril angunas tradicionis y, un añu más, han celebráu la Luminaria en honol a San Sebasián, unu de los "santus del gorru", del mesmu mó y manera que se ha jechu dendi hai sigrus.
Luminaria en Peñaparda al láu el charaíl

Anque no está puestu comu festivu (y esu que San Sebastián ha síu una fiesta grandi dendi siempri), las gentis de Peñaparda dejarun a un láu el fríu de la nochi (la estación de Navafrías marcaba -7,2ºC a las nuevi la mañana el domingu) y s'arrimarun a la luminaria a cantal, bailal, comel y bebel. La Luminaria, que siempri se jidu la víspera el santu (20 d'Eneru) la pasarun al sábadu 21 pol mé la genti que vivi juera.

El día el santu se pudun oyel los sonis de gaita y tamboril de José Benito Mateos "TXEBE" que, pola su cuenta y riesgu, jidu el pasacallis en honol a estas fiestas el Inviernu.

Tamién en Robrea jidun la su Luminaria al láu el Pabellón, nel caminu Ciarrodrigu.

20 ene. 2017

Llegó el fríu al Rebollal

Temperatura en La Puenti (Peñaparda)
El fríu del Invernu ya llegó al Rebollal. Y es que, ena madrugá entri'l miércolis 18 y el juevis 19 d'Eneru se han dáu las temperaturas más bajas de tó'l añu.

En Peñaparda, nel lugal de La Puenti se han medíu ondi gráus y mediu pol baju el ceru (-11,5ºC). Ena estació el tiempu de Navafrías tamién se midierun -11,5ºC a las ochu la mañana del juevis. Cuasi tó'l día estuvu con temperaturas pol baju el ceru en tól'l Rebollal. Había, enos tejáus y enos caminus, un yelu comu si juesi una nevá.

Caminu heláu en Payu
El viernis 20 d'Eneru, día San Sebastián, ya abonó el tiempu y, pol mé las nubis, anque jidu fríu no  jué comu el día d'antis. La estación de Navafrías "ná más" que midió jasta los sieti con ochu pol baju el ceru (-7,8ºC) a las ondi la nochi.

NOTA: afotu del caminu emprestá por Alexandra Vinaty (Payu)

8 ene. 2017

Se mos jué la "Tia Pepa", sartenera de Villarrubias

Esti miércolis 4 d'Eneru murió en Itueru, a los 96 añus, María Josefa Hernández Hernández, más conocía comu la "Tia Pepa", la última sartenera de Villarrubias.
La "Tia Pepa" con la su sartén

La "Tia Pepa" tocó pa'l grupu de charru de Villarrubias ena Charrá d'El Rebollal que se jidu, nel añu 1990, nel pueblu de Villarrubias, una de las últimas que se jidun. Nel II Festival Folclóricu "Juenti el Gallu", nel añu 2011 en Villarrubias, los grupus jidun el pasacallis pasandu pola su cassa, comu homenaji a la "Tia Pepa".

Cona su muerti, el charru de Villarrubias pierdi a la su sartenera, y a una de las pocas presonas (quiciás la última) qu'entovía s'acordaban de los bailis de Villarrubias.

El intierru jué el juevis, 5 d'Eneru, en Villarrubias.

La "Tia Pepa" con el grupu de charru de Villarrubias

NOTA: afotu del grupu de charru arrecogía de la página web de Villarrubias