El Rebollal pierdi entovía más genti

La nuestra comarca d'El Rebollal sigui perdiendu genti. Sigún el INE (Istitutu Nacional d'Estadística), a 1 d'Eneru del añu 2018, n'El Rebollal viviamus 1.941 presonas, lo que jadin 35 presonas menus qu'el añu pasáu (1.976 habitantis a 1 d'Eneru del 2017).

Calli de Robrea

Estus númerus no son especialis d'El Rebollal, son asina a lo largu y anchu de tóa la provincia de Salamanca y del nuestru Reinu de Llión. Asina, la provincia de Salamanca ha perdíu, nel añu que pasó, 2.688 habitantis; la de Zamora, 2.855 habitantis, y ena de Llión vivin 4.570 presonas menus. En total, entri las tres provincias llionesas himus perdíu más de 10.000 habitantis.

Las 1.941 presonas que vivimus n'El Rebollal estamus repartíus d'esti mó y manera:

NAVAFRÍAS: 460 (469 nel añu 2017)
PAYU: 335 (354 nel añu 2017)
PEÑAPARDA: 364 (369 nel añu 2017)
ROBREA: 499 (503 nel añu 2017)
VILLARRUBIAS: 283 (281 nel añu 2017)

Asina, con estus númerus, vemus que el pueblu con más genti d'El Rebollal sigui siendu Robrea, anque esti añu ha bajáu de los 500 habitantis, mientris que nel que menus genti vivi es Villarrubias, con 283. Anque esti últimu tieni el méritu de sel el únicu pueblu d'El Rebollal nel que ha subíu la genti, con dos habitantis más que nel añu 2017.

Peñaparda estrena cartelis

Esti mes de Diciembri apencipió en Peñaparda con un estrenu. Y es qu'el lugal ya tieni cartelis nuevus a la entrá y a la salía el pueblu, lo mesmu nel caminu Payu comu en La Puenti.

En total son cuatru los cartelis nuevus, los dos nel sentíu d'entral al pueblu, y los dos de salía del lugal, con el nombri el pueblu atravesáu por una raya colorá.

Cartel d'entrá en La Puenti

Cartel de salía en La Puenti

La palra d'El Rebollal, protagonista ena nueva edición de "El dialecto leonés"

La nuestra palra d'El Rebollal güelvi a sel protagonista. Esta vés, pol mé la nueva edición del libru "El dialecto leonés". 

José Benito Mateos "Txebe"
con el libru

La Cátedra de Estudios Leoneses (CELe) de la ULE (Universidá de Llión), dirigía por José Ramón Morala, ha jechu una nueva edición del libru que, nel añu 1906, escribió Ramón Menendez Pidal alreol de la lengua leonesa, "El dialecto leonés". Además d'una edición "facsímil" del libru (o sea, el libru aparenti a comu salió nel su tiempu), n'esta nueva edición se han metíu relatus nuevus, escritus y leíus polus sus autoris, relatus que corrin tólus lugaris andi se palra leonés enas tres provincias leonesas (Salamanca, Zamora y Llión).

Portá del libru

Y aquí es andi güelvin a sel protagonistas la nuestra palra y la nuestra comarca (la más al sur el Reinu de Llión), pos unu de los relatus vieni escritu ena nuestra palra. Se trata de "Caminus", de José Benito Mateos Pascual, "Txebe", tamborileru y escritol (o sea, el mesmu qu'escribi estas palabrinas). Además de los esritus, se han metíu los mesmus leíus polus sus autoris, y angunus sonis cantáus tamién en leonés, entri los qu'está un ajecháu cantáu, al panderu y ena nuestra palra, por José Benito Mateos, "Cuandu la dorra vieni / La rondaora". Los audius de Txebe y de los demás autoris, se puedin oyel pol mé d'unus códigus QR que vienin ena parti d'atrás el libru, además d'ena página de la Cátedra de Estudios Leoneses.

La nueva edición ha síu jecha pola editorial "El Búho Viajero".

NOTA: afotu del libru sacáu de la página de la CELe

Abierta la carretera de Ciarrodrigu

El pasáu 23 de Noviembri se abrió al tráficu la carretera C-526 (la que va dendi Ciarrodrigu jasta Coria, uñiendu el Reinu de Llión cona Estremaúra Llionesa, por el Puertu Peralis), que estuvu cuertá un més pol mé el su arregru.

Carretera Ciarrodrigu - Coria

Al final, el cachu arregráu va dendi la entrá de Villarrubias jasta el cruci de la pista que va a Payu. Se da el casu de que el cachu que va dendi Villarrubias jasta el Empalmi con Peñaparda lo arregrarun sin cuertalu.

Bachi ena carretera nueva

Lo raru del casu es que una carretera que abrierun a los cochis y cambionis el día 23 de Noviembri, al 1 de Diciembri ya tenía bachis, polu menus unu justu a la salía el Empalmi, d'alreol de 60 cm de largu por 30 d'anchu.

Las rayas de la carretera entovía están pintás d'amarillu, por entovía
falta por arregral el cachu entri Robrea y Villarrubias, y el cachu de Carbajalis, jasta el Puertu Peralis.

Peñaparda inaugura la parti nueva de la su residencia de mayoris

Autoriadis ena puerta la residencia de Peñaparda

El pueblu de Peñaparda inauguró esti viernis 2 de Noviembri la parti nueva de la su residencia de mayoris. Pol mé de la inauguración, además de la alcaldesa, Camila Vizarro y los justicialis de Peñaparda, s'acercarun a esti pueblu d'El Rebollal (la comarca más al sur el Reinu de León) Javier Iglesias, Presidenti de la Diputación de Salamanca y Marcelino Cordero, diputáu provincial, y alcaldis de los pueblus d'alreol, comu los de Navafrías, Payu, Villarrubias o Campillu.

Dispués d'atendel a la prensa ena Praza el lugal, tóa la compaña subió andandu dendi la solana jasta la residencia, andi la alcaldesa y los justicialis les jidun de guía, mostrandu la residencia a los forasterus, y vesitandu a los mayoris qu'en ella están.

L'alcaldesa y el presidenti chalrandu cona prensa

La residencia, jecha a finalis el sigru XX nel antigu cuartel de la Guardia Civil, ha síu enanchá pol mé el dineru empestáu pola Diputación de Salamanca, unas perras que llegan jasta los 75.000 € (setenta y cincu mil eurus).

La inauguración acabó con un conviti enas escuelas viejas, conviti al que juerun muchas de las gentis de Peñaparda.

Conviti enas escuelas viejas

Chalrandu conas trabajaoras de la residencia

Cuertá la carretera de Ciarrodrigu

La carretera entri Ciarrodrigu y Coria, la C-526, estará cuertá pol un mes, dendi'l 22 d'Otubri (lunis) jasta'l 23 de Noviembri (viernis) pol mé'l arregru que van a jadeli. 

Carretera cuertá nel Empalmi

El cachu qu'está cuertáu es el que va dendi'l Empalmi de Peñaparda (km. 34'600) jasta la pista que va a Payu, antis de llegal al Puertu Peralis (km. 41'600). Pol mé d'esti corti, el caminu a Coria y Cáciris pasa hogañu pol Peñaparda y pola metá de Payu.

Al estal cuertá la carretera Ciarrodrigu ha jechu que pasin tamién los cambionis por dambus dos pueblus. En Payu, los problemas enas callis han jechu que haigan teníu de ponel semáforus a la entrá y a la salía del lugal, de mó y manera que no puéan encontralsi dos cambionis en drentru el pueblu.

Esti cachu es unu de los tres que van a arregral, pos está pensáu arregral tóa la carretera entri Robrea y el Puertu Peralis. El últimu arregru se jidu ya hai unus 25 añus, cuandu pasó por El Rebollal la Vuelta a España.

Villarrubias s'enllenó de fiesta con Santu Ferinu

Dendi'l 21 jasta'l 27 d'Agostu, el pueblu de Villarrubias jidu las fiestas al su patrón, Santu Ferinu (26 d'Agostu).

Pinu de los quintus

Además de los ya sabíus incierru, capea, verbena y misa al santu, que no faltan en ninguna fiesta de la comarca, Santu Ferinu tuvu otras cosas especialis.

P'apencipial, el miércolis 22 d'Agostu, un homenaji a los emigrantis del lugal, andi se presentó un cuadru en honol a los emigrantis, pintáu por Carlos García, y una muestra d'afotus antiguas, tó cona compaña de la musica de la gaita y el tamboril de José Benito Mateos "Txebe", con las sus raícis (del láu del padri) en Villarrubias.

El miércolis 23 juerun los juegus pa los dagalis. Ya el juevis 24 d'Agostu, jué'l levantamientu el Pinu polus quintus del lugal, tamién cona compaña de la gaita y el tamboril de Txebe. Las fiestas de Santu Ferinu d'esti añu 2018 acabaru el lunis 27 con una paella pa tóa la genti nel Riufríu.

A las fiestas de Santu Ferinu s'acercarun , comu es costumbri, gentis de tólus pueblus d'El Rebollal.

NOTA: por problemas técnicus, no puéu ponel tóas las afotus que jidi. Pol mé d'essu, ná más va l'afotu el Pinu, la única que hi podíu recuperal

El grupu "Raícis del Águeda" lleva a los tabráus la nuestra palra

La nuestra palra d'El Rebollal, el mó y manera que tenemus n'El Rebollal d'ussal la lengua leonesa, tieni nuevus defensoris. Esta vés se trata del grupu "Raícis del Águeda" que, rebujandu la nuestra palra con las vestimientas y bailis tradicionalis, ha jechu una comedia llamá "Nuestras Raícis", comedia de la que ya han jechu dos representacionis. 

Procesión cona Virgin

La primera representación jué el pasáu 13 d'Agostu, lunis, nel pabellón de Robrea. Jué tanta la genti que jué a vela que muchus de los que s'arrimarun a Robrea no pudun entral nel pabellón (entri ellus, esti qu'escribi estas palabrinas).

La segunda representación jué hai unus días, el sábadu 20 d'Otubri, nel Teatru de Ciarrodrigu (d'andi son las afotus). Otra vés, hubu mucha genti viendu lo que, encima el tabráu jadían los miembrus el grupu. Las comedias gustarun muchu, y la genti salió mú contenta el Teatru.

Lavandu nel regatu

Bailandu ena matancia

Las comedias se jadin en sieti partis, que jadin un recorríu polas tradicionis de Robrea, dendi el ofretoriu a la Virgin el Rosariu jasta las bóas, pasandu por el laval la ropa nel regatu, la ronda, los ratus de los hombris ena taberna, la siega o la matancia, ussandu pa ellu los bailis tradicionalis de Robrea y la palra d'El Rebollal en las chalras de los personajis.

El grupu "Raícis del Águeda" está jechu con gentis, además de Robrea, d'otrus pueblus comu Payu y Guinaldu. Anque no han confirmáu si van a jadel las comedias en más lugaris, es algu que, de seguru, puéa sel n'un tiempu no mú lejotis.

Robrea recuerda, un añu más, a los muertus d'Agostu del 36

Robrea recordó, el pasáu 12 d'Agostu, domingu, a los muertus y preseguíus d'aquel mes d'Agostu el añu 36, primeru de la Guerra Civil. 

Delantri el Monolitu de Robrea

Asina, la asociación Documentación y Estudio de El Rebollar jidu el su homenaji de tólus añus con música, tocá por Pablo García (tamborileru de Robrea), y froris en un actu jechu al pié el Monolitu en homenaji y recuerdu a los muertus d'aquel añu, y presentáu por Esther Prieto, de Robrea.

NOTA: Afotus emprestás por Ángel Iglesias, de Robrea, presidenti de Documentación y Estudio de El Rebollar

Homenaji con froris

Afotu de la genti qu'estuvu en Robrea

Las bicis pasearun las sus coloris por Peñaparda

El pasáu sábadu 11 d'Agostu, las bicis golvierun a correl las callis y caminus de Peñaparda.

Cartelinu de la carrera

El C.D. El Charaíl volvió a jadel la su carrera, la Marcha BTT "La Villa", carrera qu'esti añu ha jechu el númeru 9 (IX en númerus romanus). Comu siempri, había dos caminus: el cortu, con 32 km, y el largu, con 46 km.

En total, juerun alreol de 50 los correoris que cogierun la su bici y salierun a correl los caminus de Peñaparda y alreoris.

Pa'l sotru añu será el númeru 10 de la Marcha BTT "La Villa".

NOTA: había jechu afotus de la carrera, peru se me derrotó el móvil y no las hi puíu recuperal

Murió el Tiu Miguel "Gatu", el hombri más vieju de Peñaparda

El pasáu día 4 d'Agostu, domingu, murió en Francia Miguel Martín Mateos, el Tiu Miguel "Gatu".

Nacíu en Peñaparda nel mes d'Eneru el añu 1914 era, con 104 añus, el hombri más vieju de Peñaparda y, quiciás, de to'l Rebollal. Labraol y ganaéru, estuvu nel Frenti ena Guerra Civil.

El intierru jué'n Peñaparda el lunis 13 d'Agostu.

NOTA: no hi encontráu ninguna afotu de él anque sé que tengu anguna por angún láu. Cuandu la encuentri pondré otra vés la noticia

Los sonis de la sartén relindarun polus rinconis de Payu nel su Festival

Tamborilerus nel pasacallis

Las callis y la Praza de Payu golvierun a enllenalsi con sonis y bailis pol mé el su festival folclóricu, la Sartén Charra, qu'esti añu 2018 llegó jasta'l númeru 8. Asina, el pasáu 2 d'Agostu, los sonis y tonás de la sartén, la gaita y el tamboril, las castañuelas y el acurdión se pudun oyel en drentru el festival d'esti añu.

La tardi apencipió con el tradicional pasacallis, nel que tóa la genti corrió las callis del lugal vestíus conas sus vestimientas tradicionalis.

Grupu "Jálama" nel pasacallis

Al Son del Tamboril

Ya ena Praza, los grupus jidun los sus bailis. Apencipió el grupu "Jálama" de Payu que, a los sonis de la sartén de Verónica Mangas, "Vero", bailó "La Jota", "Charrá segunda" y "El Fandangu y repicotéu". Adispués le tocó la vés a Berna Pérez, de Cabrerizus que, a la gaita y el tamboril tocó, entri otras cosas, "La Rosca". El sotru grupu, dendi Ciarrodrigu, jué "Al Son del Tamboril", nel que Juan José Sánchez, "Juanjo", tocó, tamién a la gaita y el tamboril, angunus sonis tradicionalis de la provincia de Salamanca. Golvió a subil el grupu "Jálama" que, esta vés a la gaita y el tamboril de José Benito Mateos, "Txebe", bailó la "Jota de dos pasus" y "La botella". P'acabal, una pareja de cá grupu bailó una charrada y una jota, esta vés a la gaita de Txebe (la charrada) y de Juan Antonio Muñoz, "Juanan" (jota).

Grupu Jálama

Berna Pérez y los sus bailaoris

Esti añu, se premió cona Sartén d'Honol a Maribel Barrado, maestra de cantu y percusión enos cursus de Guinaldu, andi ha apriendíu a tocal a la genti estrumentus comu el panderu, la pandereta,...

Maribel Barrado, Sartén d'Honol 2018

Al Son del Tamboril

Ya a la nochi, el final al festival lo pusu Raúl Díaz de Dios con el su acurdión, en un conciertu nel que tamién subierun, a acompañali con el acurdión Jesús Mangas y Agapito Pascual, dambus dos de Payu, y Antonio Rastrero (Navafrías), y con la gaita y el tamboril Berna Pérez y José Benito Mateos, "Txebe".

Comu otrus añus, el festival de Payu, comu compromisu ena defensa de la cultura tradicional, golvió a ussal la nuestra palra d'El Rebollal, la nuestra lengua leonesa, enos cartelis.

NOTA: afotus jechas por Rubén Mateos, menus la del grupu "Al Son del Tamboril" dendi'l tabráu, de José Benito Mateos

Grupu "Jálama" al tamboril

Baili entri tólus grupus

Raúl Díaz de Dios y otrus acurdionis

La palra d'El Rebollal
nel cartel de Payu

El nafrieñu Pedro Martín jadi 100 añus

Homenaji de los jubiláus de Navafrías

La comarca d'El Rebollal, y Navafrías en particulal, siguin engordandu la su lista de centenarius.

El nuevu centenariu es Pedro Martín Alfonso, nacíu el 2 d'Agostu el añu 1918. A sus cien añus Pedru, que vivi nel lugal con Paz, la su dagala, entovía sigui leyendu prensa y librus, unu de las sus prencipalis aficionis.

Trabajó arrecogiendu aceitunas y cudiandu ganáu en Guinaldu. Tamién ena Cámara Agraria jadiendu papelis pa los jubiláus, y jué corréu jasta que cogió la retreta. Estuvu ena Guerra, d'andi golvió sin una pierna. Una de las cosas de las que tieni más orgullu es d'habel apriendíu a leel y a escribil a muchus de los dagalis del lugal.

Figurina regalu el Ayuntamientu

Pol mé los sus cien añus, Pedru ha recebíu angunus homenajis en Navafrías, comu el que le jidun los jubiláus el pueblu nel mes de Juliu juntu a las bóas d'oru de dos matrimoñus, y ena qu'el escritol, tamién nafrieñu, Tomás Acosta, leyó una puesía jecha pa él.

Pedro y Paz ena fiesta de la familia

Tamién el Ayuntamientu de Navafrías le jidu el su homenaji nel mes d'Agostu n'El Bardal, homenaji con una chalra el alcaldi, Esteban Alfonso, y nel que le dierun una figurina copia d'una que hai ena Casa Lis de Salamanca, además d'un libru de Geografía, comu güen aficionáu a leel.

El día del su cumpriañus lo celebró cona su familia.

NOTA: afotus emprestás por Paz Martín (Navafrías)

Pedro con las sus hijas Isabel, Carmen y Paz

Los sonis tradicionalis enllenarun Peñaparda ena Fiesta el Panderu

Las callis y rinconis de Peñaparda golvierun, un añu más, a enllenalsi de sonis y bailis tradicionalis pol mé la Fiesta el Panderu, que ya jidu la númeru 19.

Afotu de los qu'estuvun ena Fiesta el Panderu

El viernis 27 de Juliu apencipió la Fiesta el Panderu con una chalra alreol la música bretona (Bretaña) jecha por Pedro Sánchez Encinas. Nel mesmu lugal, el escritol peñaparderu Francisco M. Aldehuelo presentó, nel su pueblu, el su libru "La primera morada".

A última hora la tardi se jidu ena Praza una muestra de sevillanas.

Ya el sábadu 28 se jidu lo prencipal de la Fiesta el Panderu.

Pasacallis

A la mañana, estuvun los tenderilis del mercáu tradicional.

A la tardi, el festival folclóricu apencipió con el pasacallis dendi la Residencia jasta la Praza. Adispués, bailarun encima el tabráu los siguientis grupus:
 - Grupu de dagalis de Peñaparda
 - Grupu Zangaena (Riulobus, Cáciris)
 - Ofretoriu de Peñaparda
 - Grupu de mayoris de Peñaparda

Panderu d'Honol

En metá el festival, recibió el Panderu d'Honol el periodista Javier Pérez de Andrés, pol mé los programas grabáus en Peñaparda pa la telivisión autonómica. Ena su chalra de agraecimientu, Javier Pérez reivindicó la cultura de los pueblus, olvidá frenti a la "gran cultura" de masas, idiendu que tenemus de defendel la nuestra cultura, tantu los sonis, comu los bailis, las vestimientas, los juegus,... Y la nuestra palra d'El Rebollal, qu'es el mó y manera que tenemus n'El Rebollal d'ussal la lengua leonesa.

Baili el Ofretoriu

No jué la del periodista la única reivindicación de la tardi, pos José Benito Mateos, "Txebe", tamborileru del lugal, reivindicó que la palra d'El Rebollal etuviesi tamién presenti ena Fiesta el Panderu comu parti emportanti qu'es de la nuestra cultura tradicional.

Ya a la nochi, pa rematal la Fiesta el Panderu, se pudu oyel el conciertu el grupu charru "Zaragata Folk", conciertu nel que tuvun la ayúa del ya mentáu José Benito Mateos "Txebe", a la gaita y el tamboril, y de las pandereras de Peñaparda, al panderu.

Entri la genti qu'estuvu ena Fiesta el Panderu, se pudu vel al famosu José Pinto, de Casillas, conocíu por el programa "Boom!".

NOTA: Afotus emprestás por Rubén Mateos (Peñaparda) menus la de las sevillanas (José Benito Mateos) y la chalra (Toi Collado, de Peñaparda)

Grupu de mayoris

Pandereras

Zaragata Folk

Grupu de dagalis

Grupu Zangaena

Sevillanas

Manuel Pérez (izquierda) y Txebe (derecha)
nel conciertu de Zaragata Folk

Chalra y presentación el libru

El grupu "Jálama" de Payu, nel II Festival Hispanu-Lusu de Ciarrodrigu

El grupu "Jálama" de Payu jué el pasáu 21 de Juliu, unu de los grupus protagonistas nel II Festival Hispanu-Lusu que se jidu en Ciarrodrigu comu remati a la Escuela de Veranu de Folclori. 

Pasacallis

Baju la batuta de Verónica Mangas "Vero" (la sartenera) y José Benito Mateos "Txebe" (el tamborileru), el grupu "Jálama" jidu un recorríu polus bailis jechus al rismu la sartén. Asina, encima el tabráu se pudun vel los bailis de "La Jota", "Charrá segunda" y "Fandangu y repicotéu".

Grupu Jálama ena Praza de Ciarrodrigu

Además del grupu de Payu, tamién estuvun encima el tabráu, ena Praza Mayol de Ciarrodrigu, los alunus de la Escuela de Veranu, el Rancho Folklórico Machinhatense (Oliveira de Azeméis, Aveiru, Portugal), la Asociación Cultura Tradición y Música Popular (Zamora, Reinu de Llión), el Grupo de Danzas Justo del Río (Burgus, Castilla) y la Asociación Folklórica Renacer (Badajós, Estremaúra).

NOTA: afotus emprestás por Beatriz Mateos (Payu, pasacallis) y Poli (Ciarrorigu, nel tabráu)

Los Sanjuanis pasarun por El Rebollal

La Viga de Payu

El comarca d'El Rebollal dió la bienvenía al Veranu conos sus Sanjuanis, que son fiestas en tres de los cincu pueblus d'El Rebollal: Navafrías, Payu y Robrea. Los otrus dos celebran San Silveriu (Peñaparda, el 20 de Juniu) y Santu Ferinu (Villarrubias, el 26 d'Agostu).

Asina, entri'l viernis 22 y el lunis 25, nafrieñus, payengus y robreanus profitarun de los sus Sanjuanis, enos que no faltarun tradicionis milenarias comu El Pinu (Robrea) o La Viga (Payu), el Capazu (Payu) y la Foguera de San Juan (Navafrías), y otras cosas que tampocu no faltan enas nuestras fiestas d'El Rebollal comu los incierrus a caballu, la misa al Santu o los juegus pa los dagalis.

Un güen mó y manera de dal la bienvenía al Veranu (que no al calol, que ha tardáu más en llegal).

NOTA: (*) Afotus emprestás por Verónica Mangas (Payu)

Pinu de Robrea

Los quintus de Payu
y la Viga (*)

Verbena en Payu (*)