Peñaparda tieni un nuevu libru

Portá del libru

El pueblu de Peñaparda ya tieni un nuevu libru alreol, esta vés alreol de las sus tradicionis.

Con el nombri de "Tesoro de tradiciones. Peñaparda (Salamanca)", el escritol, José Manuel Fraile Gil, corri las tradicionis musicalis el pueblu de Peñaparda, arrecogiendu los sonis y tonás antiguas, qu'el autol llevaba arrecogiendu nel lugal dendi los añus 80 el sigru XX. Asina, en áina 400 páginas, Fraile escribi los sonis y romancis arrecogíus a las mujeris que, nel sigru pasáu juerun las últimas de las tocaoras antiguas, de las que poni afotus. Esu, sin olvial a las nuevas pandereras, que tamién tienin un rinconinu enas hojinas el libru.

Momentu de la presentación

Presentáu en Peñaparda por el su autol el pasáu viernis, 26 de Juliu, en drentru la XX Fiesta el Panderu, el libru vieni cona compaña de un CD nel que puedin oyelsi 86 cancionis, romancis y cuentus. Un CD nel que, anqu'el panderu es protagonista, tampocu no faltan la gaita y el tamboril, o las vocis d'aquellus hombris y mujeris que mos dejarun, comu el nombri el libru mos idi, un tesoru de tradicionis en mó y manera de ajecháus, salteáus, corríus, jotas, ofretorius, pasacallis, romancis, copras, cuentus,... Y la palra d'El Rebollal, que tamién tieni un rinconinu bien importanti nel libru.

Nel libru, además de las gentis de Peñaparda, han ayuáu el Ayuntamientu de Peñaparda, la Diputación de Salamanca, el Instituto de la Identidades de Salamanca y la Cátedra de Estudios Leoneses.

NOTA: afotu de la presentación emprestá por Rubén Mateos (Peñaparda)

Las bicis enllenarun de coloris los caminus de Payu

Corriendu polus caminus

El pasáu domingu, 21 de Juliu, las bicis y correoris golvierun a enllenar las callis y caminus de Payu, ena que ya jadi la quinta carrera de bicis de montaña, que se corrió con el nombri "V Xálima Trail Running & BTT".

Organizá por genti del lugal y cona ayúa el Ayuntamientu de Payu, en total juerun 250 presonas las que s'apuntarun a correl en bici y a pié, lo que dió un montonáu de vía y coloríu a las callis de Payu.

Apencipiandu la carrera

Ena carrera en bici se corrierun 40 km. De los hombris, el más ligieru jué Alejandro Rodríguez, de Mirobike (Ciarrodrigu). De las mujeris, Vanessa Amaro, de La Casa de las Bicis (La Bañeza).

En cuantis a la carrera a pié, hubu dos carreras, una de 7 kilómetrus y otra de 20 kilómetrus. La de 7 la ganarun Ángel Gutiérrez y Hortensia Hernández. La carrera carrera larga jué para Álvaro Ramos y María Gómez.

NOTA: afotus emprestás por Unai Pintado (Payu)