Más genti n'El Rebollal

El pasáu mes de diciembri se pubricarun los númerus de los habitantis enos pueblus, pol mé el INE (Istitutu Nacional d'Estadística).

Estus númerus mos idin que, nel total d'El Rebollal, somus más la genti que vivimus ena comarca. Himus passáu de los 2.045 habitantis (a 1 d'eneru del 2013) jasta los 2.061 habitantis (a 1 d'eneru del 2014). Es algu que mos llama la atención, mirandu que nel total la comarca de Ciarrodrigu ha perdíu 627 habitantis.

Peñaparda, unu de los pueblus
que ha perdíu habitantis

Mirandu un poquinu más de cerca los númerus, vemus que los pueblus que han aumentáu los sus habitantis han síu Navafrías (+1) y, más que ningunu, Robrea (+32). Del otru láu, han perdíu habitantis Payu (-8), Peñaparda (-7) y Villarrubias (-2).

Los númerus, pa los añus 2013 y 2014 son éstus:

NAVAFRÍAS     485 (2013)     486 (2014)
PAYU     376 (2013)     368 (2014)
PEÑAPARDA     391 (2013)     384 (2014)
ROBREA     488 (2013)     520 (2014)
VILLARRUBIAS     305 (2013)     303 (2014)

TOTAL     2.045 (2013)     2.061 (2014)

Semana de niebra n'El Rebollal

La tercera semana de diciembri ha síu la semana más fría n'El Rebollal pol mé las niebras. Jasta angún día no ha levantáu la niebra, asina que estus días ha jechu más fríu que ningunu en lo que va del Tardíu.

Peñaparda

Peñaparda, una hora dispués

El Rebollal sin lús

El pasáu viernis 28 de noviembri la comarca d'El Rebollal golvió a quealsi sin lús.

Pol mé la aguarrá y el airi que jidu la madrugá del juevis al viernis, se jué la lús en tó'l Rebollal unus minutinus dispués de las 6 de la mañana.

Alreol de las 8 y media golvió la lús a Robrea, Villarrubias y Peñaparda. Payu y Navafrías no tuvun lús jasta passáu el meyudía, en llegandu a las 2 de la tardi.

Se jidu la V Fiesta el Tardíu

El pasáu sábadu 22 de noviembri se jidu en Robrea la V Fiesta el Tardíu, un "rendez-vous" que, pol mé de dal la bienvenía al Tardíu, ajunta n'El Rebollal a un montonáu de gentis del folclori y la música tradicional de la provincia de Salamanca.

Cartel de la V Fiesta el Tardíu

Asina, esti añu han cenáu alreol de 50 presonas, con una comía de bacaláu, carni assá, nícalus,... Las tonás de siempri se pudun oyel ya mientris la cena, tonás comu la "Calli de la Botica" y otras muchas.

Dispués de la cena se pudun oyel sonis tocáus polus tamborilerus veníus dendi Salamanca, Ciarrodrigu, Guinaldu, Bodón, Robrea, Peñaparda,... Acompañáus de panderetas, castañuelas, guitarra y jasta una gaita gallega. Tamién se pudun oyel los sonis de la sartén de Payu. No faltarun los bailaoris, veníus además dendi pueblus comu Vitigudinu, Bogaju, Saúgu, Barruecupardu,...

Momentu del baili

La palra d'El Rebollal tamién estuvu presenti ena Fiesta el Tardíu, apencipiandu por el mesmu nombri de la fiesta, siguiendu polus cartelis y por angunas cancionis ena Palra comu "Que rompan la Jessa Arriba".

Sentáus a la mesa pa cenal

Esta bienvenía al Tardíu jadi la númeru 5, dendi aquella primera del añu 2009.

Cochis antigus por El Rebollal

La III Clásica Jurdis - Sierra de Gata, que jué entri los días 15 y 16 de Noviembri, passó polus pueblus d'El Rebollal.

En saliendu de Las Jurdis, alreol de las 2 de la tardi passarun estus cochis antigus polus nuestrus pueblus. Robrea, Villarrubias, Peñaparda y Payu vierun passal cochis de carreras antigus comu Porsche 911, Ford Capri, Ford Fiesta, Toyota Celica,...

La noticia de la carrera salió tamién nel parti el meyudía del sábadu ena teli d'Estremaúra.

Cochis antigus passandu por Peñaparda

Los Reyis Magus pasarun por El Rebollal

Lo Reyis en Peñaparda

La nochi del 5 d'eneru golvió a sel mágica.

Los Reyis Magus d'Orienti pasarun pola nuestra comarca d'El Rebollal en su viaji alreol el mundu, parandu en tólus pueblus y dejandu regalus a los dagalis.

La Tia Gora jadi 109 añus

El pasáu sábadu 4 d'eneru la Tia Gora jidu 109 añus.

La Tia Gora tocandu el panderu. Eneru 2014

Gregoria Benito Rodríguez, la Tia Gora de Peñaparda, nació en Peñaparda el 4 d'eneru del añu 1905. Anque ya no sali a paseal a la calli comu antañu (los sus ojus no le dejan), entovía se la puedi oyel cantal a las mañanas y, si tieni un panderu a manu, tocal y cantal unus sonis.

Con 109 añus, la Tia Gora es la mujel más vieja de tóa la provincia de Salamanca y una de las más viejas d'España. Se da el casu de que la segunda mujel más vieja de Salamanca tamién es de Peñaparda, la Tia Lonisia "Cabrera", que jadrá 108 nel mes de juniu.