Asina votarun los nuestrus pueblus en los Votus del 15 de Marzu del 2026

     El pasáu domingu, 15 de Marzu, juerun los Votus pa escogel los diputáus que van a representalmus en las Cortis autonómicas. En la provincia Salamanca s'escogían 10 diputáus, que se repartierun entri'l PP (5), el PSOE (3) y VOX (2), con la UPL de 4ª juerza en la provincia. 

Provincia Salamanca

    En la nuestra comarca, los votus juerun apaecíus a los que se jidun nel rest la provincia. Asina, los 4 primerus puestus juerun pa los mismus partíus y nel mesmu ordin: PP, PSOE, VOX y UPL. Entri los ganaoris en los pueblus, el PP ganó en Payu, Peñaparda y Villarrubias, y el PSOE en Navafrías y Robrea.

     Asina juerun los votus en la nuestra comarca d'El Rebollal.

	NAVAFRÍAS	PAYU	PEÑAPARDA	ROBREA	VILLARRUBIAS		TOTAL
PP	72 (34,95%)	63 (39,62%)	79 (46,19%)	97 (37,16)	59 (4,09%)		370 (41,25%)
PSOE	94 (45,63%)	60 (37,73)	61 (35,67%)	82 (31,41%)	36 (28,12%)		333 (37,12%)
VOX	31 (15,04%)	25 (15,72%)	16 (9,35%)	58 (22,22%)	29 (22,65%)		159 (17,73%)
UPL	0	5 (3,14%)	9 (5,26%)	12 (4,59%)	2 (1,56%)		28 (3,12%)
PODEMOS	0	1 (0,62%)	1 (0,58%)	6 (2,29%)	0		8 (0,89%)
IU	0	0	2 (1,16%)	1 (0,38%)	2 (1,56%)		5 (0,56%)
SALF	0	3 (1,88%)	0	2 (0,76%)	0		5 (0,56%)
PCTE	1 (0,48%)	0	1 (0,58%)	1 (0,38%)	0		3 (0,33%)
PACMA	2 (0,97%)	0	0	0	0		2 (0,22%)
EVA	1 (0,48%)	0	0	0	0		1 (0,11%)
BRANCUS	5 (2,42%)	2 (1,25%)	2 (1,16%)	2 (0,76%)	0		11 (1,23%)
MALUS	3 (1,43%)	0	4 (2,28%)	3 (1,13%)	0		10 (1,1%)
TOTAL	209 (64,70%)	159 (56,38%)	175 (61,83%)	264 (69,29%)	128 (61,24%)		907 (61,37%)

 

PP: Partíu Populal

PSOE: Partçiu Socialista Obreru Español

VOX: VOX

UPL: Uñión del Pueblu Leonés

PODEMOS: Podemus

IU: Isquierda Uñía

SALF: S’Acabó la Fiesta

PCTE: Partíu Comunista de los Trabajaoris d’España

PACMA: Partíu Contra’l Maltratu Animal

EVA: España Vadiá

NOTA: Númerus sacáus de la web de los Votus de la Junta

El Rebollal tamién estará en los Votus del 15 de Marzu

      La nuestra comarca d'El Rebollal tamién estará presenti en los Votus del domingu 15 de Marzu. Y es que, entri los candidatus de tolus partíus, hai dos en drentru las listas de la UPL (Uñión el Pueblu Leonés).

     Nel númeru 4 de la lista de la UPL tenemus a Patricia Santamaria Hernández, panaera de Peñaparda y relacioná con el mundu'l folclori.

    Comu primel suprenti en la lista de la UPL está José Benito Mateos Pascual, "Txebe", que tamién tieni de vel cola cultura tradicional, ya qu'es tamborileru de Peñaparda y Villarrubias, bailaol, escribiol y defensol de la nuestra palra d'El Rebolla.

     Entri las cosas que pidi la UPL están el jadel un hospital comarcal en Ciarrodrigu o una salía de la C-526 (Carretera Ciarrodrigu-Coria) pa l'autovía. Pa sabel más, PICA AQUÍ

Patricia Santamaría

José Benito Mateos

L'Alicia ya ussa la nuestra palra d'El Rebollal

D'isquierda a derecha: Álvaro de Benito (editol),
José Manuel Jerez (justicial) y José Benito Mateos
(tradustol)

      El pasáu viernis, 20 de Jebreru del 2026, se presentó en Ciarrodrigu un nuevu libru en la nuestra palra d'El Rebollal: "Lo que jidu l'Alicia nel País de las Maravillas", la tradución a la nuestra palra del famosu libru "Alice in Wonderland", de Lewis Carroll. 

     En la chalra, qu'estuvu presentá pol José Manuel Jerez, justicial del Ayuntamientu Ciarrodrigu (tamién estuvu otra justiciala, Carmen Lorenzo), estuvun el tradustol, José Benito Mateos "Txebe", y l'editol, Álvaro de Benito. Dambus dos estuvun palrandu de lo qu'es el libru, de lo importanti qu'es sacal librus en las palras jechas de menus, de los problemas alreol de la tradución d'esti libru, y otrus temas alreol del libru y de la palra.

     En la chalra, que se jidu en la Cassa la Cultura de Ciarrodrigu, estuvun alreol de 30 presonas, qu'apraudierun a la final la chalra y se quearun a la rubrica los librus pol el tradustol y pol l'editol.

     "Lo que jidu l'Alicia nel País de las Maravillas", sacáu pola editorial Libros desde Tuma, es el segundu libru que saca en la nuestra palra esta editoral, que ya sacó "El Principinu" nel añu 2021. Dambus dos librus jadin asina, compaña, a "El corral los mis agüelus", el primel libru que se jidu en la nuestra palra d'El Rebollal, del añu 2004.

     La presentación de "Lo que jidu l'Alicia nel País de las Maravillas" ha síu una noticia emportanti, y unus cuantus de periódicus han palráu d'ella:

• Alicia viaja al País de El Rebollar: <<Solo los robles son más nuestros que la palra>> (La Gaceta de Salamanca, 20 de Jebreru del 2026)
• Traducción de <<Alicia en el País de las Maravillas>> una forma de visibilizar la palra de El Rebollal de Salamanca (Noticias Ciudad Rodrigo, 20 de Jebreru del 2026)
• El dialecto del palra se pone en valor y reivindica con la traducción de Alicia en el País de las Maravillas (Salamanca RTV al Día, 20 de Jebreru del 2026)
• Presentada en Ciudad Rodrigo L'Alicia nel País de las Maravillas, nueva publicación en la palra d'El Rebollal (Diario de Salamanca, 20 de Jebreru del 2026)
• Alicia habla <<la palra>> del Rebollar en Ciudad Rodrigo (La Gaceta de Salamanca, 20 de Jebreru del 2026)
• Alicia habla <<la palra>> del Rebollar: literatura para salvar una lengua (Actualidad Literatura, 21 de Jebreru del 2026)

Tó preparáu pa la presentación

La genti del públicu n'un momentu la chalra

Afotud'adispués de la charla

La Charrascona golvió a paseal polas callis de Payu

Una de las quintas jadiendu compaña
a "La Charrascona"

      El pasáu sábadu, 14 de Jebreru, además del Santu Valentín era tamién el Sábadu de Carnaval. Asina, polas callis de Payu golvió a salil "La Charrascona", la muñeca jecha de trapu y vestía de charru qu'es unu de los presonajis típicus de los Carnavalis tradicionalis de la comarca d'El Rebollal (comu, pol ejempru, tamién lo son la Vaca Galana en Villarrubias o la Vaca Romera en Peñaparda). 

     Asina, los "Kintus" del 2026 jidun compaña a "La Charrascona", a la que pusun de moti "La Morocha", y que pasearun polas callis del lugal montá n'un burru, mientris que los quintus iban pidiendu a la genti pa jadel la merienda, tó ellu con la compaña de los sonis del tamborileru José Benito Mateos Pascual "Txebe".

     La fiesta acabó con la "muerti La Charrascona" y el conviti que se jidu pa tola genti nel multiussus de Payu, contivi nel qu'estuvun alreol de 70 presonas.

Jadiendu compaña a "La Charrascona"

Momentu'l conviti

Una de las quintas con "La Charrascona"

Otru de los quintus con "La Charrascona"

Las Águedas tuvun la su fiesta en Navafrías

Recibiendu'l bastón de mandu

      El pasáu 7 de Jebreru, sábadu, las mujeris de Navafrías jidun la su fiesta las Águedas, n'un día qu'estuvu acomolgaítu d'agua, pos no dejó de llovel en tola mañana'l sábadu. 

     La fiesta apencipió nel Cuartu, dondi Pilar López, justiciala l'Ayuntamientu, emprestó'l bastón de mandu a l'Aguedera Mayol, Rosario Mateos.

     Nel mesmu Cuartu apencipió la fiesta, con el conviti de dulcis caserus y los sonis y los bailis tocáus pol el tamborileru José Benito Mateos Pascual "Txebe". Dendi allí se jidu un poquinu pasacallis (cortininu pol mé l'agua) polas callis del lugal jasta la hora la comía.

     La fiesta las Águedas acabó a la tardi con una merienda.

Las Águedas nel cuartu Navafrías

RECUERDUS ENERU: Peñaparda no faltó al su encuentru con la Luminaria

     El pueblu Peñaparda golvió a tenel la su nochi mágica con la

Luminaria en Peñaparda

Luminaria San Sebastian, qu'esti añu se jidu'l viernis 16 d'Eneru (alantrandu asina un día, pos normalmenti se jadi'l sábadu). Asina, los quintus y las gentis del lugal estuvun alreol de la lumbri comiendu y bebiendu n'esa fría nochi'l mes d'Eneru, n'una tradición que vieni dendi bien antigu. 

     Ya'l domingu 18 d'Eneru comu vieni siendu costumbri, las gentis de Peñaparda aprovecharun el borraju la Luminaria pa passal una mañana de domingu assandu carni y pasandu un güen ratu juntus.

La genti alreol de la Luminaria

De fiesta la mañana'l domingu

La "praca los francesis" golvió a la puerta'l Cuartu

"Praca los francesis"

     El Cuartu Peñaparda golvió a tenel a la su puerta la "praca los francesis", una praca jecha de mármol que recuerda'l pasu los soldáus francesis pola comarca d'El Rebollal y la resistencia de las gentis d'El Rebollal en tiempus de Napoleón.

     Asina, el pueblu Peñaparda güelvi a lucil la praca, que se quitó l'añu pasáu pa ponel en la praza dondi estaba'l nuevu tabrón pa los pregonis. Agora se puedin vel dambus dos en la puerta'l Cuartu.

Cuartu de Peñaparda