Asina votarun los nuestrus pueblus en los Votus del 15 de Marzu del 2026

     El pasáu domingu, 15 de Marzu, juerun los Votus pa escogel los diputáus que van a representalmus en las Cortis autonómicas. En la provincia Salamanca s'escogían 10 diputáus, que se repartierun entri'l PP (5), el PSOE (3) y VOX (2), con la UPL de 4ª juerza en la provincia. 

Provincia Salamanca

    En la nuestra comarca, los votus juerun apaecíus a los que se jidun nel rest la provincia. Asina, los 4 primerus puestus juerun pa los mismus partíus y nel mesmu ordin: PP, PSOE, VOX y UPL. Entri los ganaoris en los pueblus, el PP ganó en Payu, Peñaparda y Villarrubias, y el PSOE en Navafrías y Robrea.

     Asina juerun los votus en la nuestra comarca d'El Rebollal.

	NAVAFRÍAS	PAYU	PEÑAPARDA	ROBREA	VILLARRUBIAS		TOTAL
PP	72 (34,95%)	63 (39,62%)	79 (46,19%)	97 (37,16)	59 (4,09%)		370 (41,25%)
PSOE	94 (45,63%)	60 (37,73)	61 (35,67%)	82 (31,41%)	36 (28,12%)		333 (37,12%)
VOX	31 (15,04%)	25 (15,72%)	16 (9,35%)	58 (22,22%)	29 (22,65%)		159 (17,73%)
UPL	0	5 (3,14%)	9 (5,26%)	12 (4,59%)	2 (1,56%)		28 (3,12%)
PODEMOS	0	1 (0,62%)	1 (0,58%)	6 (2,29%)	0		8 (0,89%)
IU	0	0	2 (1,16%)	1 (0,38%)	2 (1,56%)		5 (0,56%)
SALF	0	3 (1,88%)	0	2 (0,76%)	0		5 (0,56%)
PCTE	1 (0,48%)	0	1 (0,58%)	1 (0,38%)	0		3 (0,33%)
PACMA	2 (0,97%)	0	0	0	0		2 (0,22%)
EVA	1 (0,48%)	0	0	0	0		1 (0,11%)
BRANCUS	5 (2,42%)	2 (1,25%)	2 (1,16%)	2 (0,76%)	0		11 (1,23%)
MALUS	3 (1,43%)	0	4 (2,28%)	3 (1,13%)	0		10 (1,1%)
TOTAL	209 (64,70%)	159 (56,38%)	175 (61,83%)	264 (69,29%)	128 (61,24%)		907 (61,37%)

 

PP: Partíu Populal

PSOE: Partçiu Socialista Obreru Español

VOX: VOX

UPL: Uñión del Pueblu Leonés

PODEMOS: Podemus

IU: Isquierda Uñía

SALF: S’Acabó la Fiesta

PCTE: Partíu Comunista de los Trabajaoris d’España

PACMA: Partíu Contra’l Maltratu Animal

EVA: España Vadiá

NOTA: Númerus sacáus de la web de los Votus de la Junta

La Charrascona golvió a paseal polas callis de Payu

Una de las quintas jadiendu compaña
a "La Charrascona"

      El pasáu sábadu, 14 de Jebreru, además del Santu Valentín era tamién el Sábadu de Carnaval. Asina, polas callis de Payu golvió a salil "La Charrascona", la muñeca jecha de trapu y vestía de charru qu'es unu de los presonajis típicus de los Carnavalis tradicionalis de la comarca d'El Rebollal (comu, pol ejempru, tamién lo son la Vaca Galana en Villarrubias o la Vaca Romera en Peñaparda). 

     Asina, los "Kintus" del 2026 jidun compaña a "La Charrascona", a la que pusun de moti "La Morocha", y que pasearun polas callis del lugal montá n'un burru, mientris que los quintus iban pidiendu a la genti pa jadel la merienda, tó ellu con la compaña de los sonis del tamborileru José Benito Mateos Pascual "Txebe".

     La fiesta acabó con la "muerti La Charrascona" y el conviti que se jidu pa tola genti nel multiussus de Payu, contivi nel qu'estuvun alreol de 70 presonas.

Jadiendu compaña a "La Charrascona"

Momentu'l conviti

Una de las quintas con "La Charrascona"

Otru de los quintus con "La Charrascona"

La nievi se dio un paséu pola comarca d'El Rebollal

El picu Jálama neváu

      L'Inviernu ha veníu esti añu acomolgaítu de nievi, y en los mesis d'Eneru y Jebreru (más que á nel d'Eneru) son muchus los días qu'ha neváu, anque la nievi ha duráu pocu en la comarca pol mé'l calol que vinu adispués. Sí qu'aguantó un poquininu más en los picus más altus, comu'l Jálama o'l Podu Moru.

     Aquí vos dejamus angunas afotus de la nievi d'estus días, esperandu que se cumpra esu de que "añu de nievis, añu de bienis".

Nevandu en Peñaparda

Nievi en Payu

Nievi en Peñaparda

Bancu en metá la nievi

Nievi en Peñaparda (2)

El Podu Moru neváu

Ya se barruntan las Navidadis n'El Rebollal

Árbol de Navidá en Payu

      Los pueblus de la comarca d'El Rebollal ya s'están enllenandu d'adornus y lucis pa estus días de fiesta que vienin. 

     Asina, en pueblus comu Navafrías, Payu y Peñaparda ya se puedin vel engalanás las callis y prazas con los árbolis de Navidá y con las lucis típicas d'esti tiempu.

     Aquí vos dejamus con angunas afotus de los adornus.

Árbol de Navidá en Navafrías

Asina luci la Praza Navafrías

Adornus en Payu

El pinu de Peñaparda

Buzonis y Reyis en Peñaparda

VERANU 2024 (1): Los Sanjuanis dierun la bienvenía al Veranu

     El Veranu apencipió en la comarca d'El Rebollal con los tradicionalis "Sanjuanis", que se jadin en los pueblus de Navafrías, Payu y Robrea. 

Juenti Santa (Navafrías)
Afotu emprestá pol Tomás Acosta (Navafrías)

     Tós tres pueblus dierun la bienvenía al Veranu con unas fiestas acomolgaítas d'incierrus, capeas y verbenas, entri las que podemus mental (pol sel diferenti a las demás) el homenaji a la música los añus 80 que se jidu en Robrea pol mé'l grupu "Pandora". Tampocu no faltarun las diferentis misas y procesionis en honol al Santu, el 24 de Juniu.

     Entri las tradicionis d'esti tiempu y estas fiestas, qu'ajundin las sus raícis en tiempus antigus (milis d'añus), se jidun éstas: levantamientu la Viga y Capazu (Payu); levantamientu'l Pinu (Robrea); engalanal las Juentis y Foguera (Navafrías).

     Es curiosu que, en siendu'l Rebollal una comarca con una lengua propia, la palra d'El Rebollal, en ningunu de los pueblus l'haigan ussáu pa los cartelis de las Fiestas. Tamién es curiosu que, en siendu una comarca rica en istrumentus, trajis y bailis, el folclori tampocu no estuvu presenti.

     Asina, con los Sanjuanis, la nuestra comarca d'El Rebollal entró nel Veranu, un Veranu que, de seguru, tendrá fiestas abondu.

La Viga (Payu)

Homenaji a la música de los 80 (Robrea)

La genti en Robrea profitó de la música de los 80

El Pinu (Robrea)

La Sierra Gata, en contra las minas

     Dambus dos láus de la Sierra Gata, l'estremeñu y el leonés, apencipian a levantalsi en contra las minas que quierin jadel n'estus lugaris. 

Cartel contra la mina en Payu

Y es qu'una empresa forastera quieri jadel unas minas a cielu abiertu, afuracandu toa la Sierra, pa buscal y llevalsi juera litiu, golfra,... y demás mineralis.

     El problema, sigún la prataforma "Sierra de Gata Viva", es la derrota que van a jadel en toa la Sierra: cuertal árbolis pol millonis, jadel buracus en tolus lugaris, derrotal maniantalis, jadel que las aguas no se puean bebel (tampocu no'l ganáu), contaminación pol metalis pesáus, despropial las tierras a las gentis,... Derrotal tólu que jadi especial a la nuestra Sierra Gata, pos las minas estarían en los terrenus lo mesmu de pueblus de Cáciris comu de Salamanca: l'Acebu, Los Joyus, Valverdi, Las Eljas, San Martín, Navafrías y Payu, anque la contaminación pol metalis pesáus, de las aguas y pol ruíu tamién llegaría a tolus alreoris.

     La prataforma "Sierra de Gata Viva" (https://sierradegataviva.org) ha apencipiáu chalras y recogías de rúbricas contra la mina, despricandu tolus malis que van a trael a la Sierra Gata. Asina, en la nuestra comarca d'El Rebollal se han dáu chalras contra la mina en Payu (el viernis 24 Mayu) y en Navafrías (el martis 28 Mayu), chalras en las que ha habíu mucha genti interesá.

Chalra en Navafrías

Mapa con las minas

     La prataforma está arrecogiendu rúbricas pa presental las razonis contra la mina antis del día 5 Juniu, qu'es cuandu se cumpri'l tiempu pa presentalas. Hai hojas de rúbricas en los cuartus de Payu y Navafrías, además d'en los comercius y tabernas de la Sierra.

     Hai jechas varias campañas en Change.org. La más nueva, dendi'l Ayuntamientu Navafrías, puedis vela (y rubrical) AQUÍ: CAMPAÑA CONTRA LA MINA

Otru cartel contra la mina en Payu

PRIMAVERA 2024 (1): Los bailis d'El Rebollal, protagonistas en la Charrada de Ciarrodrigu

     La nuestra comarca d'El Rebollal jué protagonista en la Charrada de Ciarrodrigu, qu'esti añu 2024 llegaba al númeru 43 y que tuvu de jadelsi nel Teatru pol mé la lluvia.

Milagros Toribio recibi la "Encina Charra"
de manus del alcaldi de Ciarrodrigu,
Marcos Iglesias

     P'apencipial, esti añu juerun dos los grupus d'El Rebollal que bailarun en la Charrada: el grupu "Jálama" de Payu y el grupu folclóricu de Peñaparda.

     Apencipió'l grupu de Payu que, a los sonis de la sartén de Verónica Mangas, las tres parejas de bailaoris jidun tres bailis: la "Jota", la "Charrá Segunda" y el "Fandangu".

     Dispués de Payu le tocó bailal a Peñaparda. Con los sonis del panderu d'Isabel Ramos "Isabelita", las sieti parejas qu'estuvun bailarun "L'Ajecháu", el "Salteáu" y el "Corríu brincáu".

     Peru no sólu en los bailis jué protagonista la nuestra comarca. Y es qu'esti añu la "Encina Charra", el premiu que tolus añus se da en la Charrada a anguién qu'ha dedicáu la su vía al folclori, ha síu pa la peñapardera Milagros Toribio, de 76 añus, bailaora'l grupu de Peñaparda, pol tolus añus qu'ha bailáu y apriendíu a bailal nel pueblu.

     Comu curiosidá, el tamborileru José Benito Mateos "Txebe" bailó con dambus dos grupus d'El Rebollal.

NOTA: afotus emprestás pol Carmen Sánchez (Nuevu Amatus)

Grupu "Jálama" de Payu

Grupu folclóricu de Peñaparda