L'Alicia ya ussa la nuestra palra d'El Rebollal

D'isquierda a derecha: Álvaro de Benito (editol),
José Manuel Jerez (justicial) y José Benito Mateos
(tradustol)

      El pasáu viernis, 20 de Jebreru del 2026, se presentó en Ciarrodrigu un nuevu libru en la nuestra palra d'El Rebollal: "Lo que jidu l'Alicia nel País de las Maravillas", la tradución a la nuestra palra del famosu libru "Alice in Wonderland", de Lewis Carroll. 

     En la chalra, qu'estuvu presentá pol José Manuel Jerez, justicial del Ayuntamientu Ciarrodrigu (tamién estuvu otra justiciala, Carmen Lorenzo), estuvun el tradustol, José Benito Mateos "Txebe", y l'editol, Álvaro de Benito. Dambus dos estuvun palrandu de lo qu'es el libru, de lo importanti qu'es sacal librus en las palras jechas de menus, de los problemas alreol de la tradución d'esti libru, y otrus temas alreol del libru y de la palra.

     En la chalra, que se jidu en la Cassa la Cultura de Ciarrodrigu, estuvun alreol de 30 presonas, qu'apraudierun a la final la chalra y se quearun a la rubrica los librus pol el tradustol y pol l'editol.

     "Lo que jidu l'Alicia nel País de las Maravillas", sacáu pola editorial Libros desde Tuma, es el segundu libru que saca en la nuestra palra esta editoral, que ya sacó "El Principinu" nel añu 2021. Dambus dos librus jadin asina, compaña, a "El corral los mis agüelus", el primel libru que se jidu en la nuestra palra d'El Rebollal, del añu 2004.

     La presentación de "Lo que jidu l'Alicia nel País de las Maravillas" ha síu una noticia emportanti, y unus cuantus de periódicus han palráu d'ella:

• Alicia viaja al País de El Rebollar: <<Solo los robles son más nuestros que la palra>> (La Gaceta de Salamanca, 20 de Jebreru del 2026)
• Traducción de <<Alicia en el País de las Maravillas>> una forma de visibilizar la palra de El Rebollal de Salamanca (Noticias Ciudad Rodrigo, 20 de Jebreru del 2026)
• El dialecto del palra se pone en valor y reivindica con la traducción de Alicia en el País de las Maravillas (Salamanca RTV al Día, 20 de Jebreru del 2026)
• Presentada en Ciudad Rodrigo L'Alicia nel País de las Maravillas, nueva publicación en la palra d'El Rebollal (Diario de Salamanca, 20 de Jebreru del 2026)
• Alicia habla <<la palra>> del Rebollar en Ciudad Rodrigo (La Gaceta de Salamanca, 20 de Jebreru del 2026)
• Alicia habla <<la palra>> del Rebollar: literatura para salvar una lengua (Actualidad Literatura, 21 de Jebreru del 2026)

Tó preparáu pa la presentación

La genti del públicu n'un momentu la chalra

Afotud'adispués de la charla

La Charrascona golvió a paseal polas callis de Payu

Una de las quintas jadiendu compaña
a "La Charrascona"

      El pasáu sábadu, 14 de Jebreru, además del Santu Valentín era tamién el Sábadu de Carnaval. Asina, polas callis de Payu golvió a salil "La Charrascona", la muñeca jecha de trapu y vestía de charru qu'es unu de los presonajis típicus de los Carnavalis tradicionalis de la comarca d'El Rebollal (comu, pol ejempru, tamién lo son la Vaca Galana en Villarrubias o la Vaca Romera en Peñaparda). 

     Asina, los "Kintus" del 2026 jidun compaña a "La Charrascona", a la que pusun de moti "La Morocha", y que pasearun polas callis del lugal montá n'un burru, mientris que los quintus iban pidiendu a la genti pa jadel la merienda, tó ellu con la compaña de los sonis del tamborileru José Benito Mateos Pascual "Txebe".

     La fiesta acabó con la "muerti La Charrascona" y el conviti que se jidu pa tola genti nel multiussus de Payu, contivi nel qu'estuvun alreol de 70 presonas.

Jadiendu compaña a "La Charrascona"

Momentu'l conviti

Una de las quintas con "La Charrascona"

Otru de los quintus con "La Charrascona"

Las Águedas tuvun la su fiesta en Navafrías

Recibiendu'l bastón de mandu

      El pasáu 7 de Jebreru, sábadu, las mujeris de Navafrías jidun la su fiesta las Águedas, n'un día qu'estuvu acomolgaítu d'agua, pos no dejó de llovel en tola mañana'l sábadu. 

     La fiesta apencipió nel Cuartu, dondi Pilar López, justiciala l'Ayuntamientu, emprestó'l bastón de mandu a l'Aguedera Mayol, Rosario Mateos.

     Nel mesmu Cuartu apencipió la fiesta, con el conviti de dulcis caserus y los sonis y los bailis tocáus pol el tamborileru José Benito Mateos Pascual "Txebe". Dendi allí se jidu un poquinu pasacallis (cortininu pol mé l'agua) polas callis del lugal jasta la hora la comía.

     La fiesta las Águedas acabó a la tardi con una merienda.

Las Águedas nel cuartu Navafrías

PRIMAVERA 2024 (5): Peñaparda y San Silveriu dijun adiós a la Primavera 2024

     El pueblu Peñaparda y el su Santu, San Silveriu, dijun adiós a la Primavera, dandu la bienvenía al Veranu con las sus tradicionalis Fiestas, unas Fiestas qu'esti añu s'alantrarun unus días pa no jadelas a la mesma vés que los Sanjuanis de los pueblus vedinus, Payu, Robrea y Navafrías. 

Poniendu'l Pinu

     Las Fiestas apencipiarun el viernis 14 de Juniu, día que los Quintus trujun y pusun el Pinu, recordandu  y guardandu asina una costumbri milenaria que muestra'l pasu de dagal a sel grandi. Esi viernis acabó con una discu-móvil.

     El sábadu 15 y el domingu 16 de Juniu se jidun los tradicionalis incierru, capea y verbena. La verbena'l sábadu, pol mé la orquesta "DÉNVER", la del domingu con las copras de la cantanti Güisi Muñoz.

     Las Fiestas, y con ellas la Primavera, acabarun el juevis 20 de Juniu, el Día'l Santu, con la misa y la procesión en honol a San Silveriu, y el convite que jidu'l Ayuntamientu en las Escuelas Viejas, conviti nel que pusun la música los tamborilerus del lugal, Raúl Benito y José Benito Mateos "Txebe".

     San Silveriu se despidió asina jasta'l sotru añu, l'añu 2025.

Incierru polas callis del lugal

Momentu de las capeas

La Praza s'enllenó con la orquesta "Denver"

Güisi Moñoz y las sus copras

Procesión en honol a San Silveriu

Naidi faltó al conviti

"Txebe" a la gaita y el tamboril

Raúl tamién tocó los sus sonis

INVIERNU 2024 (6): Navafrías celebra a la Santa Águeda

     El pasáu 4 de Jebreru (domingu), el pueblu Navafrías golvió a vivil la su fiesta a la Santa Águeda. 

Los "dos alcaldis" de Navafrías
nel emprestáu del bastón de mandu

     Asina, a la mañana, l'alcaldi Navafrías, José Manuel Píriz, emprestó'l bastón de mandu a la qu'esti añu jué "alcaldesa pol un día", Agustina Navais, cosa que celebrarun echandu unus bailis en la Praza'l lugal, con la música de José Benito Mateos "Txebe", tamborileru de Peñaparda y Villarrubias.

     En siguiendu con la compaña de la gaita y el tamboril, l'alcaldesa y demás mujeris del pueblu corrierun las callis del lugal, llevandu la fiesta a tolus rinconis de Navafrías.

     Tampocu no faltarun la comía y la cena, que las águedas d'esti añu la jidun nel restauranti "Lucanus" de Navafrías, dondi estuvun comiendu alreol de 40 mujeris.

     Pa rematal la fiesta, entri la comía y la cena tolas mujeris pudun bailal con la música la charanga "La Clave".

Comía nel "Lucanus"

El restauranti llenu pa la comía las águedas

Tardíu 2023 (4): Peñaparda nel "Conoci los nuestrus pueblus"

     El pueblu Peñaparda tamién tuvu'l su día del "Descubre nuestros pueblos" ("Conoci los nuestrus pueblus"). Esta vés tocó'l sábadu 9 de Diciembri del 2023. 

La palra, el panderu y el charru en la Discoteca

     El día apencipió recibiendu a la genti en la Praza con café y dulcis pa cogel con juerza la mañana.

     Adispués d'esti segundu desayunu, tó'l que quiju pudu jadel la vesita a la Cantera Molal, el lugal d'andi salían antañu las ruéas pa los molinus jarinerus.

     Una vés jechu'l paséu, la genti pudu vesital el pueblu, además de las diferentis muestras qu'estuvun preparás pa esi día.

Recibiendu a la genti

     En la Discoteca, se pudun vel muestras de cuadrus (pintáus pol Mari Ángeles Martín y la su madri Lucía),  jongus y cultura tradicional, con una pequeña chalra alreol de la nuestra palra d'El Rebollal jecha pol José Benito Mateos Pascual "Txebe".

     N'el Muséu, las muestras de trajis de charru y del trabaju'l linu, con una pequeña chalra jecha pol Antonia Pascual Sánchez y Raúl Benito Calzada.

     Dispués de la vesita al pueblu jué la comía, unas patatis guisás con costilla, comía en la qu'estuvun alreol de 150 presonas.

     Pa rematal el día, no podían faltal los bailis charrus, de los que dio una güena muestra'l grupu folclóricu de Peñaparda.

Jongus grandononis

Muestra de jongus

Muestra de cuadrus

Maquetina d'El Charaíl del Rollu (Peñaparda)
y las Tres Columnas de Ciarrodrigu,
jechas pol José Antonio Sánchez

Comiendu

Tampocu no faltarun los bailis

Tardíu 2023 (3): Los "1000 Otoños" vinun a Payu

 El pasáu 25 de Noviembri del 2023, el programa "1000 Otoños en Salamanca" (1000 Tardíus en Salamanca) visitarun el pueblu de Payu. 

La Puenti'l Gas, en Payu

El programa, patrocináu pola Diputación de Salamanca, jidu la su primera pará en Payu.

El día apencipió con la llegá de los vesitantis que, adispués de las presentacionis, salierun al campu a jongus, que jué'l tema escogíu pa esta vesita.

Adispués, la genti pudu jadel una vesita al lugal y, antis de la comía, hubu una chalra alreol de los jongus arrecogíus.

Ya dispués de comel, hubu una chalra-conciertu alreol de la nuestra palra d'El Rebollal jecha pol José Benito Mateos Pascual "Txebe" (esti que vos palra).

En las cosas que se jidun estuvun alreol de 40 presonas, venías dendi tolus rinconis de la provincia Salamanca.

Momentu de la comía

El Rebollal tamién estará presenti en los Votus del 13 de Jebreru

Patricia Santamaría

La comarca d'El Rebollal también estará presenti en los Votus del domingu, 13 de Jebreru d'esti 2022. Y es que dos de los sus vedinus están en drentru las listas del partíu UPL (Uñión el Pueblu Leonés). 

Asina, comu númeru 2 de la lista de la UPL tenemus a Patricia Santamaría Hernández, "Patri", de 39 añus, y comu númeru 5 está José Benito Mateos Pascual, "Txebe", de 47 añus, tamborileru y escritol.

Dambus dos, vedinus de Peñaparda, son orgullosus defensoris de las nuestras tradicionis dendi tolus puntus d'ondi se miri, dendi los bailis y las vestimientas jasta la nuestra palra d'El Rebollal, el mó y manera que tenemus n'El Rebollal d'ussal la lengua leonesa.

José Benito Mateos "Txebe"

Esti 13 de Jebreru será la primera vés que los Votus serán sólu pa escogel a los procuraoris en las Cortis de C. y León.

Dibuju de la UPL

"El Principinu" tamién sabi palral

"Le Petit Prince", el personaji creáu pol Antoine de Saint-Exupéry nel añu 1943, tamién palra rebollanu.

Portá de "El Principinu"

Y es qu'el pasáu miércolis, 24 de Noviembri del 2021, se presento en la Casa Cultura de Ciarrodrigu la tradución a la nuestra palra d'El Rebollal d'esti crásicu de la Literatura Universal. El nombri escogíu pa la tradución es "El Principinu", y ha síu jecha pol José Benito Mateos Pascual, "Txebe" (o sea, ésti qu'escribi estas palabrinas). En la presentación tamién estuvu presenti l'editol, Álvaro de Benito, de la editorial "Libros desde Tuma". 

D'esti mó y manera, la nuestra palra d'El Rebollal ya tieni dos librinus pubricáus n'ella, dambus dos escritus pol "Txebe": "El corral los mis agüelus" (añu 2004) y "El Principinu" (añu 2021). Asina, el rebollanu (el nuestru mó y manera d'ussal la lengua leonesa) entra en drentru'l grupu de lenguas que sabi palral "Le Petit Prince", alreol de 450, lo que jadi d'esti libru'l segundu más traducíu dispués de la Biblia. 

"Txebe" (izq) y Álvaro de Benito (dcha)
en Ciarrodrigu

La presentación de "El Principinu" ha llamáu muchu la atención a los medius de Salamanca y, asina, lo han sacáu comu noticia "La Gaceta de Salamanca" (tamién en la su seición "Viva mi Pueblo"), "Ciudad Rodrigo Al Día" y "Radio Águeda" (pica nel nombri pa vel las pubricacionis).

Pa la genti interesá, "El Principinu" puedi conseguilsi n'estus lugaris:

- Tahona "El Tamborileru" (Peñaparda)

- Librería Garzón (Ciarrodrigu)

- Librería "Letras Corsarias" (Salamanca)

- Güeb de la editorial "Libros desde Tuma"

Votus pa'l Senáu (Noviembri 2019)

La provincia Salamanca escogía, en los Votus el 10 de Noviembri del 2019, 4 senaoris, que se repartierun 3 pa’l PP y 1 pa’l PSOE.

Los votus pa'l Senáu, en la nuestra comarca d’El Rebollal, juerun asina:

	Navafrías	Payu	Peñaparda	Robrea	Villarrubias	EL REBOLLAL
Elena Diego Castellanos (PSOE)	113	73	80	109	60	435
Bienvenido de Arriba Sánchez (PP)	94	72	97	100	71	434
Fernando Vegas Sánchez (PSOE)	111	73	80	105	60	429
María Rosa Hernández Rubio (PSOE)	110	69	79	101	56	415
Gonzalo Robles Orozco (PP)	88	65	95	93	70	411
Esther Basilia del Brío González (PP)	81	63	91	84	62	381
Emilio Polo García (VOX)	24	25	16	34	27	126
Manuel Morán González (C’s)	12	9	9	23	2	55
María Natalia del Arco Pozas (C’s)	9	8	10	16	2	45
Jerónimo Gamallo de Cabo (C’s)	8	7	10	14	2	41
Genaro Luis García López (UP)	11	5	3	15	0	34
María Isabel López Blázquez (UP)	9	5	3	15	0	32
José Benito Mateos Pascual (UPL)	2	12	7	3	5	29
José Vicente Delgado (UP)	9	4	1	12	0	26
Carlos Javier Salgado Fuentes (UPL)	1	6	3	0	1	11
Pilar Blanco Paredes (UPL)	0	6	3	0	1	10
Juan Manuel Andrés López (PREPAL)	2	1	0	1	0	5
Miguel Ángel Simón Merino (CONTIGO)	0	0	5	0	0	5
Miguel Ángel Diego Núñez (PREPAL)	2	1	0	0	0	3
Julio Alberto Ceballo Sánchez (PACMA)	2	0	0	0	0	2
Manuela Iglesias Carreño (PREPAL)	2	0	0	0	0	2
José Manuel Domínguez de la Fuente (PUM+J)	2	0	0	0	0	2
Cristina Daza García Blanes (PACMA)	1	0	0	0	0	1
Benjamín de Francisco Tundidor (Recortes Cero)	0	0	0	0	0	1
Emilio Cano Díez (CONTIGO)	1	0	0	0	0	1
María Monserrat Nieto Nieto (CONTIGO)	0	0	0	0	0	0

PARTÍUS:

PSOE (Partíu Socialista Obreru Español)
PP (Partíu Populal)
C'S (Ciudadanus)
VOX (VOX)
UP (Uñías Podemus)
UPL (Uñión el Pueblu Llionés)

RECORTES CERO (Recortis Ceru - Grupu Verdi)
PREPAL (Partíu Regionalista el País Llionés)
PACMA (Partíu Animalista Contra el Mal Tratu a los Animalis)
PUM+J (Por un Mundu Más Justu)

CONTIGO (Contigu Somus Democracia)