L'Alicia ya ussa la nuestra palra d'El Rebollal

D'isquierda a derecha: Álvaro de Benito (editol),
José Manuel Jerez (justicial) y José Benito Mateos
(tradustol)

      El pasáu viernis, 20 de Jebreru del 2026, se presentó en Ciarrodrigu un nuevu libru en la nuestra palra d'El Rebollal: "Lo que jidu l'Alicia nel País de las Maravillas", la tradución a la nuestra palra del famosu libru "Alice in Wonderland", de Lewis Carroll. 

     En la chalra, qu'estuvu presentá pol José Manuel Jerez, justicial del Ayuntamientu Ciarrodrigu (tamién estuvu otra justiciala, Carmen Lorenzo), estuvun el tradustol, José Benito Mateos "Txebe", y l'editol, Álvaro de Benito. Dambus dos estuvun palrandu de lo qu'es el libru, de lo importanti qu'es sacal librus en las palras jechas de menus, de los problemas alreol de la tradución d'esti libru, y otrus temas alreol del libru y de la palra.

     En la chalra, que se jidu en la Cassa la Cultura de Ciarrodrigu, estuvun alreol de 30 presonas, qu'apraudierun a la final la chalra y se quearun a la rubrica los librus pol el tradustol y pol l'editol.

     "Lo que jidu l'Alicia nel País de las Maravillas", sacáu pola editorial Libros desde Tuma, es el segundu libru que saca en la nuestra palra esta editoral, que ya sacó "El Principinu" nel añu 2021. Dambus dos librus jadin asina, compaña, a "El corral los mis agüelus", el primel libru que se jidu en la nuestra palra d'El Rebollal, del añu 2004.

     La presentación de "Lo que jidu l'Alicia nel País de las Maravillas" ha síu una noticia emportanti, y unus cuantus de periódicus han palráu d'ella:

• Alicia viaja al País de El Rebollar: <<Solo los robles son más nuestros que la palra>> (La Gaceta de Salamanca, 20 de Jebreru del 2026)
• Traducción de <<Alicia en el País de las Maravillas>> una forma de visibilizar la palra de El Rebollal de Salamanca (Noticias Ciudad Rodrigo, 20 de Jebreru del 2026)
• El dialecto del palra se pone en valor y reivindica con la traducción de Alicia en el País de las Maravillas (Salamanca RTV al Día, 20 de Jebreru del 2026)
• Presentada en Ciudad Rodrigo L'Alicia nel País de las Maravillas, nueva publicación en la palra d'El Rebollal (Diario de Salamanca, 20 de Jebreru del 2026)
• Alicia habla <<la palra>> del Rebollar en Ciudad Rodrigo (La Gaceta de Salamanca, 20 de Jebreru del 2026)
• Alicia habla <<la palra>> del Rebollar: literatura para salvar una lengua (Actualidad Literatura, 21 de Jebreru del 2026)

Tó preparáu pa la presentación

La genti del públicu n'un momentu la chalra

Afotud'adispués de la charla

INVIERNU 2024 (5): El cini se rueda n'El Rebollal

Grabandu en Peñaparda

      La comarca d'El Rebollal s'ansomó, el pasáu mes d'Eneru, al mundu'l cini. Y es qu'el direutol de Ciarrodrigu Pablo Moreno ha escogíu la nuestra comarca y la nuestra palra d'El Rebollal comu protagonistas prencipalis de la su película "Pastoris". 

Espingardas

     Pablo Moreno, con antepasáus de Villarrubias, ha queríu mostral a la genti la vía los pastoris d'antañu y mostral tamién lo emportanti qu'es la nuestra palra d'El Rebollal. Asina, los presonajis prencipalis van a ussal la nuestra palra, la que himus heredáu de los nuestrus padris y agüelus.

     La hestoria pasa justu dispués de "la francesá", a primerus del sigru XIX, y tolus pueblus d'El Rebollal han síu "prató" de cini pa la película, pos dendi Robrea jasta Navafrías, en pasandu pol Payu, Villarrubias y Peñaparda, en tós cincu s'han grabáu cosinas.

     "Pastoris" será la primera pelicula jecha en la nuestra palra d'El Rebollal. Aquí vos deju'l "tráiler".

Tardíu 2023 (4): Peñaparda nel "Conoci los nuestrus pueblus"

     El pueblu Peñaparda tamién tuvu'l su día del "Descubre nuestros pueblos" ("Conoci los nuestrus pueblus"). Esta vés tocó'l sábadu 9 de Diciembri del 2023. 

La palra, el panderu y el charru en la Discoteca

     El día apencipió recibiendu a la genti en la Praza con café y dulcis pa cogel con juerza la mañana.

     Adispués d'esti segundu desayunu, tó'l que quiju pudu jadel la vesita a la Cantera Molal, el lugal d'andi salían antañu las ruéas pa los molinus jarinerus.

     Una vés jechu'l paséu, la genti pudu vesital el pueblu, además de las diferentis muestras qu'estuvun preparás pa esi día.

Recibiendu a la genti

     En la Discoteca, se pudun vel muestras de cuadrus (pintáus pol Mari Ángeles Martín y la su madri Lucía),  jongus y cultura tradicional, con una pequeña chalra alreol de la nuestra palra d'El Rebollal jecha pol José Benito Mateos Pascual "Txebe".

     N'el Muséu, las muestras de trajis de charru y del trabaju'l linu, con una pequeña chalra jecha pol Antonia Pascual Sánchez y Raúl Benito Calzada.

     Dispués de la vesita al pueblu jué la comía, unas patatis guisás con costilla, comía en la qu'estuvun alreol de 150 presonas.

     Pa rematal el día, no podían faltal los bailis charrus, de los que dio una güena muestra'l grupu folclóricu de Peñaparda.

Jongus grandononis

Muestra de jongus

Muestra de cuadrus

Maquetina d'El Charaíl del Rollu (Peñaparda)
y las Tres Columnas de Ciarrodrigu,
jechas pol José Antonio Sánchez

Comiendu

Tampocu no faltarun los bailis

Veranu 2023 (4): "Nuestras raícis", el teatru jechu en la nuestra palra

 La nuestra palra d'El Rebollal golvió a subilsi a los tabráus en mó y manera de teatru o comedias. Y es qu'el pasáu 11 d'Agostu, el grupu "Raícis del Águeda" jidu en Robrea la obra "Nuestras Raícis", escrita y dirigía pol Catalina Sánchez. 

Grupu "Raícis del Águeda"

"Nuestras Raícis" vieni a sel un continual de la comedia que, con el mesmu nombri, jidun ya los d'esti grupu nel añu 2018, y que tuvu muchu ésitu, jadiéndula en varius pueblus. Un ésitu qu'han repetíu con esta nueva jechura de "Nuestras Raícis".

Asina, el grupu "Raícis del Águeda" güelvi a jadel una güena y alegri defensa de la nuestra palra d'El Rebollal. Que sea pol muchus añus.

NOTA: afotus emprestás pol Andrea Carreño (Guinaldu)

´Momentu de "Nuestras Raícis"

"El Principinu" tamién sabi palral

"Le Petit Prince", el personaji creáu pol Antoine de Saint-Exupéry nel añu 1943, tamién palra rebollanu.

Portá de "El Principinu"

Y es qu'el pasáu miércolis, 24 de Noviembri del 2021, se presento en la Casa Cultura de Ciarrodrigu la tradución a la nuestra palra d'El Rebollal d'esti crásicu de la Literatura Universal. El nombri escogíu pa la tradución es "El Principinu", y ha síu jecha pol José Benito Mateos Pascual, "Txebe" (o sea, ésti qu'escribi estas palabrinas). En la presentación tamién estuvu presenti l'editol, Álvaro de Benito, de la editorial "Libros desde Tuma". 

D'esti mó y manera, la nuestra palra d'El Rebollal ya tieni dos librinus pubricáus n'ella, dambus dos escritus pol "Txebe": "El corral los mis agüelus" (añu 2004) y "El Principinu" (añu 2021). Asina, el rebollanu (el nuestru mó y manera d'ussal la lengua leonesa) entra en drentru'l grupu de lenguas que sabi palral "Le Petit Prince", alreol de 450, lo que jadi d'esti libru'l segundu más traducíu dispués de la Biblia. 

"Txebe" (izq) y Álvaro de Benito (dcha)
en Ciarrodrigu

La presentación de "El Principinu" ha llamáu muchu la atención a los medius de Salamanca y, asina, lo han sacáu comu noticia "La Gaceta de Salamanca" (tamién en la su seición "Viva mi Pueblo"), "Ciudad Rodrigo Al Día" y "Radio Águeda" (pica nel nombri pa vel las pubricacionis).

Pa la genti interesá, "El Principinu" puedi conseguilsi n'estus lugaris:

- Tahona "El Tamborileru" (Peñaparda)

- Librería Garzón (Ciarrodrigu)

- Librería "Letras Corsarias" (Salamanca)

- Güeb de la editorial "Libros desde Tuma"

El Rebollal, en drentru las propuestas de la UPL pa los Votus del 10-N

La nuestra comarca d'El Rebollal estará presenti enos Votus del 10 de Noviembri tamién enas propuestas de los partíus, esta vés de la manu de la UPL (Uñión el Pueblu Lliones).

Cartelinu de los caminus de Robrea

Y es que son varias las propuestas enas que la nuestra comarca d'El Rebollal sali mentáu y beneficiáu. Entre las más emportantis, UPL pidi una salía de la autovía a la carretera C-526 (Ciarrodrigu-Coria), pa que la nuestra genti no tenga de pasal pol metá Ciarrodrigu pa il a Salamanca.

Otra de las propuestas de la UPL que sería güena pa la nuestra tierra es la de jadel un hospital comarcal en Ciarrodrigu. Y es que, agora mesmu, tólus pueblus d'El Rebollal estamus a más de 100 km del hospital que mos toca, el de Salamanca.

Por último, nel apartáu de "Cultura", la UPL mienta la defensa de la nuestra palra d'El Rebollal, el nuestru mó y manera d'ussal la lengua leonesa.

Asina, la nuestra comarca d'El Rebollal estará presenti en los votus del 10-N d'un mó y manera dobri: pol mé el José Benito Mateos Pascual "TXEBE", candidatu al Senáu pola UPL, y polas propuestas que tienin de vel con la nuestra tierra, tamién de la UPL.

Dibuju de la UPL

José Benito Mateos Pascual
candidatu al Senáu pola UPL

La Sartén Charra de Payu se jidu internacional

Pasacallis

El pasáu 3 d'Agostu del 2019 (sábadu), el pueblu de Payu jidu el su festival folclóricu, la "Sartén Charra", organizáu por el grupu del lugal, el grupu "Jálama".

Grupu Jálama bailandu

La Sartén Charra d'esti añu tuvu, ademas del grupu "Jálama" de Payu y a Berna Pérez (Cabrerizus), a Juanan (Ciarrodrigu, premiu MT 2019), al grupu folclóricu de Villamiel (Cáciris) y, por primera vés, un grupu veníu dendi el país vedinu, Portugal, dendi vinun los del grupu de Sabugal (lugal que jué del Reinu de Llión jasta finalis el sigru XIII).

Grupu "Jálama" de Payu

No faltarun, en drentru el Festival, el tradicional pasacallis polas callis del lugal, los tenderilis d'artesanía y la genti de Payu, que siempri enllena la Praza pa vel los bailis de los grupus.

Esti añu, la "Sartén d'Honol" ha síu pa Hipólito Martín Vicente, "Poli", unu de los bailaoris el grupu "Jalama".

Berna, Marta y Sergio

La Sartén Charra 2019 acabó con el conciertu del grupu estremeñu "Anhinojo Folk", que vinun dendi'l pueblu d'Hinojal (Cáciris), conciertu nel que participó "Txebe", el tamborileru el grupu Jálama.

Berna Pérez al tamboril

Un añu más, mostrandu el su compromisu con la nuestra cultura, los cartelis del festival folclóricu estuvun escritus tamién en la nuestra palra d'El Rebollal, el mó y manera que tenemus n'El Rebollal d'ussal la lengua leonesa.

NOTA: afotus de Rubén Mateos y José Benito Mateos

"Poli", Sartén d'Honol 2019

Grupu de Villamiel bailandu

Grupu de Villamiel (Cáciris)

Juanan (Ciarrodrigu)

Grupu de Sabugal

Músicus del grupu de Sabugal

La genti de Payu no faltó

Gruu "Anhinojo Folk"

"Txebe" tocandu con los "Anhinojo"

El cartel, tamién en la nuestra
palra d'El Rebollal

La palra d'El Rebollal, protagoniza el final del mes de Jebreru

Artículu de La Gaceta 1

La nuestra palra d'El Rebollal, el mó y manera que tenemus n'El Rebollal d'ussal la lengua leonesa, ha síu protagonista ena segunda metá el mes de Jebreru.

Apencipiandu polu primeru nel tiempu, el sábadu 16 de Jebreru el periódicu La Gaceta de Salamanca sacó un reportaji alreol de la nuestra palra, un reportaji de dos hojas, las mesmas que la matancia de Guijuelu (noticia patrociná) y sólu dos menus que el pregón de los Votus pa'l Congresu y el Senáu pa'l mes d'Abril. Estu muestra que, caicuandu, se la da a la nuestra palra algu de la emportancia que tieni.

Artículu de La Gaceta 2

Esti reportaji, y el qu'en él mentasin el peligru que corri la nuestra palra, jidu qu'el martis 26 de Jebreru, el PSOE (Partíu Socialista Obreru Español) presentasi ena Diputación de Salamanca una propuesta pa la defensa de la nuestra palra d'El Rebollal, propuesta que votarun a favol PSOE, C's (Ciudadanus) y Ganemos Salamanca (Ganemus Salamanca), peru que jué rechazá conus votus del PP (Partíu Populal), que tieni la mayoría de los deputáus provincialis. Curiosu rechazu, pos la Costitución, nel su artículu 3.3, idi que tós los mó y maneras de palral merecin especial respetu y proteición.

P'acabal, la nuestra palra tamién estuvu presenti el pasáu miércolis, 27 de Jebreru, ena presentación ena Cassa las Conchas de Salamanca, el libru "Aire, fuego y deseo" (Airi, fuegu y deséu), del poeta burgalés Juan Carlos García Hoyuelos. La nuestra palra estuvu presenti pol mé la puesía "Pol baju la tu alma de pájaru", tradución del poema "Debajo de tu alma de pájaro", jecha por José Benito Mateos Pascual "Txebe" (o sea, esti qu'escribi estas palabrinas). Además, el ya mentáu Txebe pusu tamién la música, con la gaita y el tamboril, el panderu (con el que cantó en la palra) y el adufe (con el que cantó en portugués, otra de las lenguas palrás en Salamanca). El Rebollal estuvu presenti tamién ena presona de Aída Acosta, navafrieña, que recitó otra de las puesías de Juan Carlos García Hoyuelos.

Hoyuelos (izq.) y Txebe (dcha)

Txebe con el panderu

Con éstu acabó esti mes de Jebreru, un mes nel que la nuestra palra d'El Rebollal jué protagonista.

Aída Acosta

NOTA: afotus de la Cassa las Conchas emprestás por Yago (Hoyuelos y Txebe), Juan Carlos García Hoyuelos (Aída) y por Aída Acosta (Txebe con el panderu)

El grupu "Raícis del Águeda" lleva a los tabráus la nuestra palra

La nuestra palra d'El Rebollal, el mó y manera que tenemus n'El Rebollal d'ussal la lengua leonesa, tieni nuevus defensoris. Esta vés se trata del grupu "Raícis del Águeda" que, rebujandu la nuestra palra con las vestimientas y bailis tradicionalis, ha jechu una comedia llamá "Nuestras Raícis", comedia de la que ya han jechu dos representacionis. 

Procesión cona Virgin

La primera representación jué el pasáu 13 d'Agostu, lunis, nel pabellón de Robrea. Jué tanta la genti que jué a vela que muchus de los que s'arrimarun a Robrea no pudun entral nel pabellón (entri ellus, esti qu'escribi estas palabrinas).

La segunda representación jué hai unus días, el sábadu 20 d'Otubri, nel Teatru de Ciarrodrigu (d'andi son las afotus). Otra vés, hubu mucha genti viendu lo que, encima el tabráu jadían los miembrus el grupu. Las comedias gustarun muchu, y la genti salió mú contenta el Teatru.

Lavandu nel regatu

Bailandu ena matancia

Las comedias se jadin en sieti partis, que jadin un recorríu polas tradicionis de Robrea, dendi el ofretoriu a la Virgin el Rosariu jasta las bóas, pasandu por el laval la ropa nel regatu, la ronda, los ratus de los hombris ena taberna, la siega o la matancia, ussandu pa ellu los bailis tradicionalis de Robrea y la palra d'El Rebollal en las chalras de los personajis.

El grupu "Raícis del Águeda" está jechu con gentis, además de Robrea, d'otrus pueblus comu Payu y Guinaldu. Anque no han confirmáu si van a jadel las comedias en más lugaris, es algu que, de seguru, puéa sel n'un tiempu no mú lejotis.

Los sonis tradicionalis enllenarun Peñaparda ena Fiesta el Panderu

Las callis y rinconis de Peñaparda golvierun, un añu más, a enllenalsi de sonis y bailis tradicionalis pol mé la Fiesta el Panderu, que ya jidu la númeru 19.

Afotu de los qu'estuvun ena Fiesta el Panderu

El viernis 27 de Juliu apencipió la Fiesta el Panderu con una chalra alreol la música bretona (Bretaña) jecha por Pedro Sánchez Encinas. Nel mesmu lugal, el escritol peñaparderu Francisco M. Aldehuelo presentó, nel su pueblu, el su libru "La primera morada".

A última hora la tardi se jidu ena Praza una muestra de sevillanas.

Ya el sábadu 28 se jidu lo prencipal de la Fiesta el Panderu.

Pasacallis

A la mañana, estuvun los tenderilis del mercáu tradicional.

A la tardi, el festival folclóricu apencipió con el pasacallis dendi la Residencia jasta la Praza. Adispués, bailarun encima el tabráu los siguientis grupus:
 - Grupu de dagalis de Peñaparda
 - Grupu Zangaena (Riulobus, Cáciris)
 - Ofretoriu de Peñaparda
 - Grupu de mayoris de Peñaparda

Panderu d'Honol

En metá el festival, recibió el Panderu d'Honol el periodista Javier Pérez de Andrés, pol mé los programas grabáus en Peñaparda pa la telivisión autonómica. Ena su chalra de agraecimientu, Javier Pérez reivindicó la cultura de los pueblus, olvidá frenti a la "gran cultura" de masas, idiendu que tenemus de defendel la nuestra cultura, tantu los sonis, comu los bailis, las vestimientas, los juegus,... Y la nuestra palra d'El Rebollal, qu'es el mó y manera que tenemus n'El Rebollal d'ussal la lengua leonesa.

Baili el Ofretoriu

No jué la del periodista la única reivindicación de la tardi, pos José Benito Mateos, "Txebe", tamborileru del lugal, reivindicó que la palra d'El Rebollal etuviesi tamién presenti ena Fiesta el Panderu comu parti emportanti qu'es de la nuestra cultura tradicional.

Ya a la nochi, pa rematal la Fiesta el Panderu, se pudu oyel el conciertu el grupu charru "Zaragata Folk", conciertu nel que tuvun la ayúa del ya mentáu José Benito Mateos "Txebe", a la gaita y el tamboril, y de las pandereras de Peñaparda, al panderu.

Entri la genti qu'estuvu ena Fiesta el Panderu, se pudu vel al famosu José Pinto, de Casillas, conocíu por el programa "Boom!".

NOTA: Afotus emprestás por Rubén Mateos (Peñaparda) menus la de las sevillanas (José Benito Mateos) y la chalra (Toi Collado, de Peñaparda)

Grupu de mayoris

Pandereras

Zaragata Folk

Grupu de dagalis

Grupu Zangaena

Sevillanas

Manuel Pérez (izquierda) y Txebe (derecha)
nel conciertu de Zaragata Folk

Chalra y presentación el libru