El grupu "Raícis del Águeda" lleva a los tabráus la nuestra palra

La nuestra palra d'El Rebollal, el mó y manera que tenemus n'El Rebollal d'ussal la lengua leonesa, tieni nuevus defensoris. Esta vés se trata del grupu "Raícis del Águeda" que, rebujandu la nuestra palra con las vestimientas y bailis tradicionalis, ha jechu una comedia llamá "Nuestras Raícis", comedia de la que ya han jechu dos representacionis. 

Procesión cona Virgin

La primera representación jué el pasáu 13 d'Agostu, lunis, nel pabellón de Robrea. Jué tanta la genti que jué a vela que muchus de los que s'arrimarun a Robrea no pudun entral nel pabellón (entri ellus, esti qu'escribi estas palabrinas).

La segunda representación jué hai unus días, el sábadu 20 d'Otubri, nel Teatru de Ciarrodrigu (d'andi son las afotus). Otra vés, hubu mucha genti viendu lo que, encima el tabráu jadían los miembrus el grupu. Las comedias gustarun muchu, y la genti salió mú contenta el Teatru.

Lavandu nel regatu

Bailandu ena matancia

Las comedias se jadin en sieti partis, que jadin un recorríu polas tradicionis de Robrea, dendi el ofretoriu a la Virgin el Rosariu jasta las bóas, pasandu por el laval la ropa nel regatu, la ronda, los ratus de los hombris ena taberna, la siega o la matancia, ussandu pa ellu los bailis tradicionalis de Robrea y la palra d'El Rebollal en las chalras de los personajis.

El grupu "Raícis del Águeda" está jechu con gentis, además de Robrea, d'otrus pueblus comu Payu y Guinaldu. Anque no han confirmáu si van a jadel las comedias en más lugaris, es algu que, de seguru, puéa sel n'un tiempu no mú lejotis.

La teli llega a Peñaparda a grabal el su folclori

Daniel Peces (izq) y 
José Benito Mateos "TXEBE"

Esti juevis, 17 de Marzu, la telivisión vinu a Peñaparda a grabal pa'l programa "Con la música a todas partes" (Cona música a tóas partis), programa de la telivisión de C. y León dedicáu a las tradicionis.

Pol mé d'essu, el presentaol el programa, Daniel Peces, jidu un recorríu pol una parti la cultura tradicional de Peñaparda. Asina, se grabarun angunus sonis tradicionalis de Peñaparda (comu "La Charrascona" o los "Esquilonis de Prata"), asina comu los trajis de charru de los bailaoris y los trajis y aperus del Muséu. Tamién se grabarun angunus de los bailis del charru de Peñaparda: el Ajecháu, el Salteáu y el Corríu Brincáu.

Se quearun nel tinteru otras cosas emportantis de la nuestra cultura tradicional comu el Ofretoriu, el Corríu Antigu,... los toquis del tamboril o la nuestra palra d'El Rebollal.

Mujeris cantandu

Espricandu los trajis de charru

El Rebollal nel primel Festival Folclóricu d'Águeda

El domingu 19 se jidu, nel pueblu d'Águeda (al láu de Ciarrodrigu) el primel Festival Folclóricu, organizáu por Rubén Vegas Ratero y cona ayúa del ayuntamientu de Águeda. Nel Festival participarun gentis de la nuestra comarca d'El Rebollal, de los pueblus de Robrea, Peñaparda y Payu.

Angunus de los tamborilerus y bailaoris del Festival

Esi domingu, a la mañana, se jidu un pasacallis polas callis del lugal. Ya a la tardi, ena praza el pueblu, sería el Festival. Allí se pudun vel bailis de Payu y Peñaparda tocáus con gaita, tamboril, panderu y sartén por José Benito Mateos "TXEBE" (Peñaparda y Villarrubias). Comu no podía sel menus, los sonis de panderu y sartén estuvun cantáus ena nuestra palra d'El Rebollal.

Además de las tradicionis d'El Rebollal se pudun vel tamién los sonis y bailes de tamborilerus comu Alberto Vela "El Tutura" (La Maya), Jose "El Tamborino" (Casaris de Las Jurdis), además de los bailis del grupu de dagalis de "El Botón Charro" de Ciarrodrigu.

Nel pasacallis d'antis del festival se pudun oyel tamién a muchus tamborilerus de la comarca veníus dendi Robrea, Payu, Peñaparda, Saúgu, Ciarrodrigu, Alba de Yeltis, Casaris de las Jurdis y Villasbuenas de Gata (estus dos últimus de la provincia de Cáciris).

NOTA: afotu emprestá por José M. Pintado

Peñaparda en fiestas

Pinu puestu polus quintus

Esti viernis 15 de juniu apencipiarun las fiestas de Peñaparda, en honol a San Silveriu, con el levantamientu el pinu polus quintus el lugal, qu'esti añu son cincu: Fátima, Sonia, Rocío, Christian y Sergio.

El sábadu y el domingu pola mañana se jidun los incierrus de vaquillas polas callis del pueblu, ganáu con el que, a la tardi, se jidun la capeas al mó y manera tradicional. A la espera de la tardi el domingu, lo mesmu incierrus que capeas se jidun sin que pasasi ná en cuantu a cornás, jeríus,...

Incierru del sábadu

La nochi el sábadu, tamién ena Praza, se jidu verbena con la orquesta "OBSESIÓN" pa tó'l que quijiera bailal seguíus, vas corríus, rumbas,... Tamién se pudun bailal sonis charrus enas tabernas pol mé los tamborilerus que vinun dendi Robrea y Saúgu que, juntu a TXEBE (un serviol, de Peñaparda y Villarrubias), tocarun pa cantal y bailal.

Pa esti domingu quea otra capea (a las 6 y media la tardi) y otra verbena, esti golpi jecha por el grupu "MIRAMAR".

Las fiestas de Peñaparda seguirán el miércolis 20 de juniu, día de San Silveriu, cona misa al Santu (a las 12), juegus pa los dagalis (a las 5 la tardi), fuegus artificialis (10  media y media) y verbena framenca.