VERANU 2024 (1): Los Sanjuanis dierun la bienvenía al Veranu

     El Veranu apencipió en la comarca d'El Rebollal con los tradicionalis "Sanjuanis", que se jadin en los pueblus de Navafrías, Payu y Robrea. 

Juenti Santa (Navafrías)
Afotu emprestá pol Tomás Acosta (Navafrías)

     Tós tres pueblus dierun la bienvenía al Veranu con unas fiestas acomolgaítas d'incierrus, capeas y verbenas, entri las que podemus mental (pol sel diferenti a las demás) el homenaji a la música los añus 80 que se jidu en Robrea pol mé'l grupu "Pandora". Tampocu no faltarun las diferentis misas y procesionis en honol al Santu, el 24 de Juniu.

     Entri las tradicionis d'esti tiempu y estas fiestas, qu'ajundin las sus raícis en tiempus antigus (milis d'añus), se jidun éstas: levantamientu la Viga y Capazu (Payu); levantamientu'l Pinu (Robrea); engalanal las Juentis y Foguera (Navafrías).

     Es curiosu que, en siendu'l Rebollal una comarca con una lengua propia, la palra d'El Rebollal, en ningunu de los pueblus l'haigan ussáu pa los cartelis de las Fiestas. Tamién es curiosu que, en siendu una comarca rica en istrumentus, trajis y bailis, el folclori tampocu no estuvu presenti.

     Asina, con los Sanjuanis, la nuestra comarca d'El Rebollal entró nel Veranu, un Veranu que, de seguru, tendrá fiestas abondu.

La Viga (Payu)

Homenaji a la música de los 80 (Robrea)

La genti en Robrea profitó de la música de los 80

El Pinu (Robrea)

Los Sanjuanis 2019 vinun con agua

La viga y el campanariu la ilesia de Payu

Juntu a San Silveriu (Peñaparda), juerun tres los pueblus d'El Rebollal que dierun la bienvenía al Veranu con las sus fiestas, los Sanjuanis: Navafrías, Payu y Robrea. Asina, las fiestas el Solsticiu de Veranu trujun 11.4 l/m2 (litrus el metru cuadráu, sigún la AEMET, Agencia Estatal de Meteorología), aguas que jidun que la paella de Robrea la tuviesin del jadel baju tejáu.

Los Sanjuanis vinun, enos tres pueblus, con cosas apaecías. Asina, en ningunu faltarun, el 24 de Juniu, la misa en honol al Santu (San Juan), juntu a las procesionis que (polu menus en Payu) tuvun de sel más cortas pol mé'l agua. Tampocu no faltarun las vaquis conus incierrus a caballu y las capeas. Y tampocu no faltarun las verbenas a la nochi y los juegus pa los dagalis.

Procesión en Payu

Las tradicionis estuvun representás pol mé el levantamientu la Viga (Payu) o el Pinu (Robrea). Tampocu no faltó el fuegu, con el Capazu (Payu) y la Foguera San Juan (Navafrías), o el agua con el ritu las sieti juentis.

La música tradicional la pusun en Payu, andi José Benito Mateos "Txebe" animó, cona su gaita y tamboril, el conviti que se jidu dispués de la misa al Santu.

Con estus Sanjuanis, El Rebollal pasa las sus fiestas de bienvenía al Veranu, dejandu las de Villarrubias (Santu Ferinu, 26 d'Agostu) comu las únicas patronalis por celebral, en esti casu de despedía el Veranu y bienvenía al Tardíu.

NOTA: tóas las afotus son de los Sanjuanis de Payu. L'afotu de "Txebe" tocandu nel conviti la jiduSara Bayón (Payu)

"Txebe" tocandu nel conviti

Conviti en Payu

El Rebollal mantieni vivu unu de los ritus d'Inviernu

La comarca d'El Rebollal ha güentu a vivil los ritus milenarius del inviernu. Asina, Robrea y Peñaparda jidun la su tradicional foguera en honol a San Sebastián, que se jidu esa mesma nochi el 20 d'Eneru. Antañu siempri se jadía la víspera, peru hogañu se lleva al fin de semana, asina que se jadi el sábadu más cerca el día San Sebastián.

Los peñaparderus, además de disfrutal pola nochi, tamién pudun assal carni al sotru día aprovechandu el borraju de la lumbri.

Asina, Peñaparda cona su Luminaria y Robrea con el su Capazu han revivíu una tradición que, de seguru, tieni angunus milis d'añus.

NOTA: afotu de Robrea emprestá por Chema Sánchez

Luminaria de Peñaparda

Capazu de Robrea

Asina juerun los Sanjuanis 2015 n'El Rebollal

Dispués de San Silveriu en Peñaparda, los demás pueblus d'El Rebollal dierun la su bienvenía al Veranu y al su solsticiu por mé los Sanjuanis. Navafrías, Payu y Robrea jidun las fiestas al su patrón con misas, juegus, incierrus, capeas y verbenas en tólus pueblus, y aunguna otra cosina que muába d'un lugal a otru.

Pasacallis polas callis de Payu

Navafrías es el únicu pueblu d'El Rebollal andi no se poni el pinu, peru sí que se jadi el capazu la nochi San Juan. Además, esti añu hubu un encuentru pa uñil puesías y música, que jidu esa nochi un poquinu más mágica. Además de los juegus pa los dagalis, en Navafrías tuvun un campeonatu de fútbul sala y una muestra de magia.

En Payu s'escapó una de las vaquis nel incierru asna que, además del sustu que llevó la genti, la Guardia Civil tuvu que cuertal la carretera. Otras cosas emportantis juérun el levantamientu la Viga polus quintus, y el Capazu ena praza el lugal. Polu demás, en Payu jué nel únicu puebru d'El Rebollal andi se pudun vel, de mó y manera oficial, los bailis tradicionalis, pol mé el grupu de charru del lugal, el grupu "Jálama", que jidu'n pasacallis y enllenó el Centru Multiusus la mañana el domingu.

El grupu "Jálama" bailandu

Pa acabal, en Robrea tamién pusun el pinu los quintus y, comu una de las cosas prencipalis, se jidu una paella pa tóa la genti nel pabellón. La música tradicional tamién se pudu oyel, anque no juesi de mó y manera oficial, pol mé los tamborilerus de Robrea, que salierun a jadel la alborá polas callis del lugal.

Pinu de Robrea

Asina, con San Silveriu y los Sanjuanis, es comu se ha dáu la bienvenía al Veranu n'El Rebollal. Comu fiestas patronalis quean, pa últimus d'agostu, las de Santu Ferinu en Villarrubias (26 d'agostu).

Llegan los Sanjuanis a El Rebollal

Las fiestas de San Juan, que dan la bienvenía al veranu, llegan a la nuestra comarca. Navafrías, Payu y Robrea tienin estus días la su fiesta prencipal. Esti programa de fiestas de los tres pueblus:

NAVAFRÍAS


VIERNIS, 22 DE JUNIU
16:30 Juegus pa los dagalis n'El Bardal
23:00 Verbena con el "TRIO GUATEQUE"


SÁBADU, 23 DE JUNIU
12:00 Incierru a caballu n'El Bardal
18:00 Capea tradicional
22:30 Capazu


DOMINGU, 24 DE JUNIU
11:00 Misa en honol a San Juan, patrón el lugal

12:00 Incierru a caballu n'El Bardal
18:00 Capea tradicional


Duranti tóas las fiestas habrá, nel Cuartu de Navafrías, una muestra de trabajus jechus polas gentis del lugal con el nombri de "Labores de Navasfrías" (Laboris de Navafrías)



PAYU


VIERNIS, 22 DE JUNIU
21:00 Levantamientu la Viga polus quintus el lugal
23:00 Capazu
23:30 Verbena


SÁBADU, 23 DE JUNIU
13:00 Incierru a caballu polas callis de Payu, cona música d'una charanga
18:30 Capea tradicional cona música d'una charanga
23:30 Verbena


DOMINGU, 24 DE JUNIU
11:00 Misa en honol a San Juan, patrón el lugal
17:00 Juegus pa los dagalis




ROBREA


VIERNIS, 22 DE JUNIU
20:00 Levantamientu el pinu polus quintus ena Praza el Cañu
23:00 Verbena jecha pol "MARIANO"


SÁBADU, 23 DE JUNIU
11:30 Juegus pa los dagalis
14:00 Paella pa tós nel pabellón
18:30 Capea tradicional entri la calli La Calzá y la Praza el Cañu
23:00 Verbena pola orquesta "CARAMELO"


DOMINGU, 24 DE JUNIU
11:30 Incierru a caballus pola Carretera el Saúgu
13:00 Misa en honol a San Juan
18:30 Capea ena Praza Torus

El Rebollal tamién s'acuerda de San sebastián

La comarca d'El Rebollal tamién celebró unu de los sus "Santus del Gorru", quiciás el más emportanti: San Sebastián.

Nel pueblu de Peñaparda la mañana del viernis 20 d'eneru, el mesmu día de San Sebastián, el tamborileru José Benito Mateos Pascual, "TXEBE", salió a tocal la alborá polas callis del lugal. Al sotru día los quintus salierun a pedil y jidun la Luminaria nel lugal de costumbri.

En Robrea la nochi el sábadu, 21 d'eneru, jidun el Capazu, y los qu'estuvun pudun bailal al son del curdión, la gaita y el tamboril.

Pa'l sotru añu el día San Sebastián cai en domingu.