Robrea y Peñaparda ena Charrá de Ciarrodrigu 2017

"El Fandangu" de Robrea

La XXXVIII Charrá de Ciarrodrigu, el sábadu 15 d'Abril, ha síu especial pa los grupus d'El Rebollal. Y es que esti añu han síu dos los grupus d'El Rebollal que han estáu presentis: el grupu "El Fandangu", de Robrea, y el grupu folclóricu de Peñaparda. Digu que ha síu especial porque, cuasi siempri, es ná más un pueblu u otru el qu'está, y esti añu han estáu dambus dos juntus.

Dispués del pasacallis, los primerus rebollanus que subierun al tabráu juerun los robreanus de "El Fandangu". Las tres parejas bailarun, al son de la gaita y el tamboril de José María, tres bailis: "Jota de dos pasus", "El Son" y "El Fandangu".

Justu dispués bailó el grupu de Peñaparda, al son del panderu d'Isabel Ramos. Las dos parejas bailarun el "Ajecháu", el "Salteáu" y el "Corríu brincáu".

Bailaoris de Peñaparda

Además de los grupus d'El Rebollal estuvun tamién de otrus lugaris, comu Ciarrodrigu, la Sierra Francia o Las Arribis, y d'otras provincias comu Cáciris o Güelva. El premiáu esti añu cona "Encina Charra" jué Diego Vacas, bailaol de Vilvestri, que cogi asina el relevu a Isabel Ramos, panderera de Peñaparda, a la que le dierun el premiu ena Charrá del añu pasáu.

El grupu "Jálama" de Payu, en la Charrá de Ciarrodrigu

Esti Sábadu 18 de Juliu jué, en Ciarrodrigu, la XXXVI Fiesta de la Charrada ("La Charrá de Ciarrodrigu"), quiciás la última que se jaga en Veranu. Esti añu la nuestra comarca d'El Rebollal estuvu representáu por el grupu "Jálama" de Payu.

El grupu "Jálama" jadiendu el pasacallis

El grupu más nuevu d'El Rebollal (se jidu nel añu 2011) bailó pol vés primera ena Charrá de Ciarrodrigu ena Praza Mayol (ya había bailáu añu 2012 en una "Charrá Chica" que se jidu pa los dagalis). A los sonis de la sartén de Verónica Mangas, y dirigíus por Verónica González y José Benito Mateos "Txebe", el grupu Jálama bailó la Jota, la Charrá segunda y el Fandangu y repicoteáu.

Juntu al grupu de Payu, estuvun nel tabráu los estudiantis de la escuela de folclori de Ciarrodrigu, "Poldo" con un grupu de la Sierra de Francia, el grupu de paléus de Vilvestri, tós tres de la provincia de Salamanca, los estudiantis de los bailis de la provincia de León de la escuela de Veranu y, comu grupus envitáus el "Rancho Infantil Facendas" (de Almerinsi, Portugal) y el grupu "Etnográfico Das Mariñas" (Galicia).

Bailandu encima el tabráu

La Encina Charra 2015, un premiu a la defensa de la cultura y la música tradicional, jué esti añu para Afrodisio Hernández "Afro", el tamborileru del grupu de paléus de Vilvestri.

AFOTUS: Alberto Vela (pasacallis) y Patricia Santamaría (tabráu)

Payu y Robrea estuvun ena Charrá de Ciarrodrigu

El Rebollal golvió a estal representáu ena Charrá de Ciarrodrigu, esti golpi conos grupus de Payu y Robrea.

Pola mañana, el grupu "JÁLAMA" de Payu, bailó la "Charrá segunda", "Fandangu" y "Jota" al son de la sartén. Nel tabráu compartierun lugal con el grupu de dagalis del Botón Charro de Miróbriga, el grupu d'ASPRODES, el grupu de mayoris del centru de día de Ciarrodrigu y los dulzainerus de la escuela de Macotera y Villamayol. Estus bailis de pola mañana se tuvun de jadel nel teatru pol mé la lluvia.

Pola tardi, esta vés ena praza, el grupu "EL FANDANGU" de Robrea, al son de la gaita y el tamboril, mostró encima el tabráu cómu se bailan "El Fandangu", la "Jota de dos pasus", "El Son" y "El Ofretoriu". Al láu los robreanus bailarun tamién los grupus "Sabor Escondidico" de Nuñomoral (Las Jurdis), "El Botón Charro de Miróbriga", un grupu de la Sierra Francia, un grupu de La Huebra (Campu Charru) y el grupu "Reija", de Langréu (Asturies), grupu esti que (comu no pué sel menus) cantó las sus tonás en asturianu, lengua de la mesma familia astur-lionesa que la nuestra palra d'El Rebollal.

La Encina Charra, premiu que tólus añus se da a una persona que haiga jechu algu polas tradicionis de Salamanca, se la han dáu esti añu al folclorista Nino Sánchez.

AFOTUS:
"JÁLAMA", sacá de www.ciudadrodrigoaldia.es
"EL FANDANGU", de www.redciudadrodrigo.com