Pasarun las "Navidadis el Andanciu"

Peñaparda estrenó lucis

 Cona vesita los Reyis Magus, la nochi el 5 d'Eneru y la misa los Reyis al sotru día acabarun las celebracionis d'estas "Navidadis el Andanciu" conas que se da la bienvenía al Inviernu, se despidi el "Añu el Andanciu" y se da la bienvenía a al Añu Nuevu. 

Asina, entri los días 24 de Diciembri y el 6 d'Eneru las gentis d'El Rebollal pudun profital de las típicas cenas de la Nochigüena y Añu Vieju, las comías los días de Navidá y Añu Nuevu. Tampocu no faltarun los regalus que le trujun a los dagalis (y no tan dagalis) "El Tamborileru" (la nochi el 24 de Diciembri) y "Los Reyis" (la nochi el 5 d'Eneru).

Lo que no ha podíu habel esta vés, pol mé'l andanciu, han síu las cabalgatas de los Reyis, anqe esu no quitó pa que pudiesin repartil los sus regalus. Tampocu no faltarun las lucis de Navidá, pa alegral un pocu los nuestrus pueblus.

Asina acabó el Añu el Andanciu y apencipió el añu 2021. ¡FELÍS AÑU NUEVU!

Los trajis de charru d'El Rebollal ya tienin el su libru

Portá el libru

 Las vestimientas tradicionalis de la comarca d'El Rebollal ya tienin un libru que palra d'ellas. Esti libru, con el nombri de "Indumentaria tradicional en El Rebollar" (Vestimientas tradicionalis n'El Rebollal) ha síu escritu por el peñaparderu (metá robreanu) Raúl Benito Calzada, que ganó una de las becas d'investigación Ángel Carril pa investigal, justu, esti tema de los nuestrus trajis de charru. 

Asina, en algu más de 100 páginas, Raúl mos chalra alreol de las distintas partis de los nuestrus trajis de charru, lo mesmu de hombri comu de mujel, tó ellu cona compaña d'afotus a colol, y unas espricacionis enas que no podía faltal la nuestra palra d'El Rebollal, pos tóas las partis de los trajis de charru tienin el su nombri en la nuestra palra, y muchus de los informantis del autol, de los que están escritas angunas espricacionis, entovía palran la nuestra lengua.

El libru, pubricáu por el "Instituto de las Identidades" (Istitutu las Identiadis), jué presentáu ena Diputación de Salamanca el juevis 17 de Diciembri d'esti Añu el Andanciu que ha síu el 2020.

El Tardíu, tiempu de jonguerus

     El Tardíu es un tiempu especial por muchas cosas: se va el calol el Veranu, güelvin las lluvias, múan de colol las hojas los árbolis y acaban cayendu,... Y es el tiempu el añu en que más jongus y de más crasis salin. Pol mé d'esu, los práus, robrealis, pinalis y jessas d'El Rebollal s'enllenan de jonguerus, anque no tós cogin los jongus pa lo mesmu, pos los hai que los cogin pa comel, otrus pa vendel y otrus pa estudialus. 

Jongu

     Pol mé qu'el il a jongus se ha puestu "de móa", cá vés hai más jonguerus que salin a cogel jongus, ya sean tortullus, jongus de los práus, champiñonis, nícalus,... Pol mé d'esi montonáu de jonguerus, d'un tiempu p'acá dendi las istitucionis s'ha intentáu algu asina comu "poneli engarillas al campu", y hogañu hai de sacalsi un carné pa podel cogel jongus tranquilamenti, sin miéu a una multa. Un carné que, dendi los 5€ (cincu eurus) p'alantri, te vali p'arrecogel jongus en tóas las sierras de Salamanca: Sierra Béjal, Sierra Francia y Sierra Gata.

Cartel de las jornás

     El Rebollal, comu güena zona jonguera, siempri ha llamáu a la genti del lugal y de juera pa salil al campu a jongus. Y, pol mé d'ellu, esti añu la Diputación de Salamanca ha escogíu el pueblu rebollanu de Peñaparda p'apencipial los sus "1.000 otoños de Salamanca" (1.000 tardíus de Salamanca). La jorná jonguera jué el domingu 8 de Noviembri, andi se salió al campu a arrecogel jongus n'una mañana ena que cayó una güena aguarrá, se jidu una vesita al Muséu el Linu y se jidu una chalra andi Juana Andrés Catalán chalró alreol de cómu se jadin los panderus.

     Además d'en Peñaparda, se han programáu más jornás jongueras enos pueblus de la Puenti el Congostu, Saldeana, L'Alberca y Valdilossa.

NOTA: afotu del cartel arrecogía de Tribuna de Salamanca

La primera aguarrá el Tardíu

 Esti martis, 20 d'Otubri, ha síu n'El Rebollal unu de los días con más agua que se recuerda. Y es que ha síu mú grandi esta primera aguarrá el Tardíu que mos ha traíu la borrasca "Bárbara".

Asina, la estación de la AEMET (Agencia estatal de Meteorología) en Navafrías midió esti martis 175,4 l/m2 (litrus el metru cuadráu), con una dondeá d'airi de jasta 68 km/h (kilómetrus a la hora), anque en Peñaparda se midierun jasta 240 litrus esi mesmu martis.

Esta aguarrá y esi airi jidun que los pueblus de Peñaparda, Payu y Navafrías estuviesin sin lús dendi las 4 y media la tardi d'esi martis jasta las 2 y cuartu la madrugá, ya el miércolis 21. En total 10 horas sin trecidá.

El pasu de "Bárbara" por El Rebollal tamién ha dejáu antenas caías, parés esbarrungás otrus malis menoris. Lo güenu es que, pol mé d'esti agua, los ríus y regatus güelvin a correl y las juentis a manal.

NOTA: afotus emprestás por
- Charcu Palu: Verónica Mangas (Payu)
- Arrópeonis: Kike Lozano (Robrea)
- Robrea: arrecogía del Facebook de "Robleda, capital del Rebollar"
- Villarrubias: Marisa Rodríguez (Villarrubias)

Charcu Palu
(Payu)

Arropeonis
(Peñaparda)

Robrea

Juenti el Gallu (Villarrubias)

Peñaparda reparti caretas a los sus vedinus

N'esti Añu el Andanciu, muchus son los pueblus qu'han jechu cossas pa que no llegui esti andanciu al lugal.

Caretas de Peñaparda

Unu d'estus pueblus es Peñaparda. L'alcaldesa y los justicialis acordarun ussal el dineru no gastáu esti añu enas fiestas el Santu (San Silveriu, 20 de Juniu) ni enas fiestas el mes d'agostu en jadel caretas y dalas a tólus vedinus del lugal.

Asina, s'han repartíu, enos mesis d'Agostu y Setiembri, alreol de 500 caretas jechas en tres coloris: colorás, verdis y brancas, tóas ellas con el escudu de Peñaparda. 

Jasta'l domingu 4 d'Otubri, naidi s'ha puestu malu d'esti andanciu nel lugal, lo mesmu qu'en Payu, Villarrubias o Navafrías. Y en Robrea ya hai tiempu sin habel casus. Que siga asina.

Añu El Andanciu, añu sin fiestas

 Esti añu 2020 será recordáu comu el Añu El Andanciu, el añu que se jidu juerti esi andanciu del "coronavirus COVID-19". Un andanciu que, además de llevalsi a mucha genti pol delantri, mos ha teníu metíus en las nuestras cassas, mos ha obrigáu a ussal las caretas, ha metíu el miéu nel cuerpu a mucha genti y, si palramus de divertilsi comu se ha jechu siempri, ha dejáu a los nuestrus pueblus sin fiestas.

Y es qu'esti añu los nuestrus pueblus se han quedáu "a velas venil" en cuantis a las fiestas. Las fiestas de siempri, las de los santus de los pueblus, se han queáu ná más enas misas al Santu pa que no s'ajuntasi la genti. Asina, San Silveriu, los Sanjuanis y Santu Ferinu han estáu esti Añu El Andanciu más solinus que nunca. Tampocu no se han jechu las fiestas que los nuestrus pueblus jadin nel mes d'Agostu en honol a los emigrantis. Y, en cuantis a la nuestra cultura tradicional, tampocu no s'han jechu ni la Fiesta el Panderu (Peñaparda) ni la Sarten Charra (Payu).

Esperandu qu'el sotru añu venga d'otru mó y manera, aquí vos deju angunas afotus d'otrus añus pa recordal las nuestras fiestas.

       

      

   

El andanciu n'El Rebollal

Esti añu 2020 va a passal a la Hestoria comu el "Añu el Andanciu" pol mé'l andanciu el coronavirus (COVID-19) que ha llegáu a tólus lugaris del Mundu. Tamién jasta la nuestra comarca d'El Rebollal.

Cambión de los bomberus

Esti andanciu ha jechu que, dendi'l sábadu 14 de Marzu, tó'l país esté en Estáu d'Alarma, comu un mó y manera de luchal contra'l virus, Estáu d'Alarma nel que entovía estamus y del que hogañu ya llevamus 60 días.

Con tó y con esu, el andanciu ha llegáu jasta tólus láus y, anque n'El Rebollal hai menus casus pol mé estal más lejus de los lugaris andi ha dáu con más juerza (comu, por ejempru, las capitalis y grandis ciudadis), tamién hai casus.

Los pueblus d'El Rebollal están desapartáus en dos zonas de salús: Robrea (Payu, Peñaparda, Villarrubias y Robrea) y Guinaldu (Navafrías), y los númerus de presonas enfermas son por zonas, no por pueblus. Asina, tenemus que, entri dambas dos zonas, hai un total de 21 presonas con el andanciu (13 ena zona de Robrea y 8 ena de Guinaldu, númerus arrecogíus de CiudadRodrigoAlDía).

Cochi de Peñaparda

En los nuestrus pueblus se están jadiendu cosas pa luchal contra el virus. Asina, los ayuntamientus están dandu mascarillas a la genti, y limpiandu los lugaris más vesitáus comu el médicu, las farmacias, los cuartus, los comercius y los cubus andi tiramus la pubela. Tamién dendi la Mancomunidá y la Deputacion de Salamanca pasan los cambionis de los bomberus a limpial los mesmus lugaris. D'esti mó y manera, el día que no passan los cambionis de los bomberus, passan los cochis de los pueblus.

El pasáu lunis, 11 de Mayu, la zona de salús de Robrea (Payu, Peñaparda, Villarrubias, Robrea, Saúgu, Cespedosa, Martiagu y Agallas) pasó a la llamá "Fase 1" de la güelta a la normalidá, siendu asina la única zona n'esa fasi de tóa la comarca de Ciarrodrigu.