PRIMAVERA 2024 (2): La música tradicional de Robrea, en los Premius MT

 La cultura tradicional d'El Rebollal está de noragüena. Primeru, con la película "Pastoris", grabá en la nuestra palra d'El Rebollal, qu'está a piqui d'estrenalsi. Segundu, con la "Encina Charra" que le dierun a la bailaora de Peñaparda Milagros Toribio.

Y agora, pol mé'l discu "Música Tradicional de Robleda 2023", del robreanu José María Mateos Valiente, qu'ha síu finalista al mejol discu tradicional del añu 2023 en los "Premios MT Reino de León" (Premius MT Reinu de Llión), premiu qu'a la final ganó'l discu "N'el arca d'os mieus recuerdos", del cabreirés Edilberto Rodríguez.

"Música Tradicional de Robleda 2023" es un discu-vídeu (o vídeu-discu) d'alreol de 53 minutus con 20 sonis tradicionalis del pueblu de Robrea, tocáus con gaita de güesu pol José Maria Mateos Valiente, que se jadi compaña a sí mesmu con las castañuelas. Tieni además el valol de tenel los nombris de los sonis en la nuestra palra d'El Rebollal (pol ejempru, "Pasacallis de tíu Emilianu", "El Fandangu de tíu Emilianu",...).

Aquí podéis vel y oyel el discu de Robrea.

La entrega los Premius MT será nel Teatru Benaventi el viernis 7 de Juniu.

Tardíu 2023 (2): Robrea nel "Conoci los nuestrus pueblus"

 El programa de "Descubre nuestros pueblos" ("Conoci los nuestrus pueblus") golvió a pisal n'El Rebollal el sábadu 21 d'Otubri. Esta vés le tocó al pueblu de Robrea. 

Ilesia de Robrea

P'apencipial, los vesitantis pudun esprimental dulcis típicus, jechu polas vedinas del lugal. Dispués tocó correl los caminus, esta vés 9 kilómetrus pol el Miraol de la Lapa.

Dispués del paséu, los vesitantis (y tó'l que quiju) pudun conocel la hestoria la ilesia de Robrea pol mé las chalras de José Alonso Pascual y Raúl Benito Calzada.

Tampocu no faltó la música, con gaita, tamboril y acurdión.

P'acabal el día, tocó la comía: una paella que pudun esprimental las alreol de 160 presonas que s'acercarun a Robrea a conocel el lugal.

Tardíu 2023 (1): Payu nel "Conoci los nuestrus pueblus"

Angunus aperus de la muestra

     El sábadu, 30 de setiembri, el programa "Descubre nuestros pueblos" ("Conoci los nuestrus pueblus") llegó a Payu. Esti programa quieri dal a conocel los pueblus de la comarca de Ciarrodrigu, jadiendu vesitas a cá unu de los pueblus duranti tó'l añu. 

     Asina, dispués de correl unus pocus de pueblus (n'El Rebollal ya habían pasáu pol Navafrías antis del Veranu), tocó conocel Payu, andi vinun a conocel el pueblu alreol de 200 presonas.

     El día apencipió dandu la bienvenía a tolus vesitantis, con dulcis y café en la Praza'l lugal.

Más aperus

   Dispués del desayunu, tocó correl los caminus. Esta vés se jidu un paséu pol ríu, un paséu d'alreol de 9 km, nel que se dio a la genti un almuerzu pa recuperal juerzas.

     Alreol el meyudía, nel multiussus, los vesitantis pudun vel una muestra d'afotus y achiperris antigus, con la compaña d'otras cosas nuevas jechas pola genti del pueblu. N'esta vesita a la muestra pusu la música l'acurdión de Jesús Mangas.

Artesanus

     Tampocu no faltó la comía, que se jidu nel mesmu multiussus de Payu.

     Pa rematal el día, el grupu de charru "Jálama", del mesmu Payu, jidu una muestra de los bailis del lugal con las tonás de Verónica Mangas (sartén) y José Benito Mateos "Txebe" (gaita y tamboril).

La muestra se jidu nel Multiusus

Muestra d'artesanus

Traji de charru d'hombri

Grupu "Jálama", antis de jadel los sus bailis

Veranu 2023 (5): Santu Ferinu no faltó a la su cita en Villarrubias

     El pueblu Villarrubias jué fiel a la cita con el su patrón, Santu Ferinu (26 d'Agostu) con una semana de fiestas, del 21 al 27 d'Agostu. 

El Pinu los quintus

     Las fiestas apencipiarun el lunis, 21 d'Agostu con el concursu de ZÁPITI y copras cantás pol "Pablo Plaza Singer".

     Al sotru día, el martis 22, jué la comía nel Riufríu, dondi alreol de 300 presonas pudun comel la paella. Tampocu no faltarun la música y los bailis, pos pol allí aparecierun un grupu d'adufeiras venías dendi Oportu que, juntu a la gaita y el tamboril de José Benito Mateos "Txebe" y el panderu de Mª Antonia Pascual Mateos, de Peñaparda, jidun bailal a la genti.

     El miércolis 23 jué'l día los dagalis, con juegus, incierrus con carretonis,... A la nochi hubu discu-móvil con "Samuray".

     Ya'l juevis 24 se jidu'l campeonatu de fútbul a la mañana y, a la tardi, el pregón de las fiestas que jidun los quintus, acabandu'l día con la discu-móvil "Full Equip". 

La paella del Riufríu

     El viernis 25 jué'l día'l Pinu, que pusun los quintus del lugal, n'una de las costumbris más antiguas d'El Rebollal. A la nochi hubu verbena con l'orquesta "Expresión".

     El sábadu 26 d'Agostu, el día Santu Ferinu, el día apencipió con la misa y la procesión al Santu, a la que siguió l'incierru a caballu pola Jessa y la capea a la tardi. El Día'l Santu acabó con una verbena jecha pola orquesta "La Invasión".

     Y, pa l'acabiju esta semana de fiestas, el domingu 27 golvió a habel incierru a la mañana y capea a la tardi.

La genti en la comía del Riufríu

Las adufeiras que vinun dendi Portugal

Tampocu no faltarun los bailis

Momentu del incierru a caballu

Una de las vaquis nel incierru

La praza estuvu acomolgaíta de genti en las capeas

Veranu 2023 (3): Peñaparda "estrenó" las sus Fiestas d'Agostu

     El pueblu Peñaparda golvió a estal en fiestas nel mes d'Agosu. Anque ye verdá que tolus añus s'ha jechu una fiesta en honol a los emigrantis, esti añu las fiestas han síu diferentis pol mé d'habel un programa conocíu de fiestas, cartelis y cuatru días, con vaquis y tó. 

Alreol de 500 pesonas s'ajuntarun pa la paella

Alpacas pa los juegus

     Asina, las fiestas d'Agostu apencipiarun la nochi'l juevis 10 con la verbena jecha pola orquesta "DAKAR".

     Ya'l día 11, lo mesmu a la mañana qu'a la tardi, hubu juegus pa los dagalis, repartíus entri la Praza (a la mañana) y las piscinas (a la tardi), juegus en los que pudun profital lo mesmu los "dagalis chicus" comu los "dagalis grandis".

     El sábadu 12 d'Agostu le tocó'l turnu a las vaquis, con un incierru a la mañana polas callis del lugal, y una capea a la tardi.

     Y, p'acabal a lo grandi las fiestas, el domingu 13 d'Agostu la Praza Peñaparda s'enllenó de la genti que s'apuntó a la paella, en la que s'ajuntarun alreol de 500 presonas lo que, con la compaña de música de charanga, pusu un botón doráu a estas Fiestas del Emigranti.

Verbena cola orquesta "DAKAR"

Momentu el incierru

La paella ya está lista

Tampocu no faltó la música

Veranu 2023 (2): Villarrubias jidu la Fiesta la Mancomunidá

 El pasáu 30 de Juliu, domingu, se jidu en Villarrubias la Fiesta la Mancomunidá, que tolus añus jadi la "Mancomunidad Alto Águeda" (Mancomunidá Altu Águeda) n'unu de los pueblus de la mesma. Por ordin, esti añu l'ha tocáu a Villarrubias, l'últimu pueblu en siguiendu l'ordin l'abecidariu.

Pol tó'l día se jidun cosas en tó'l lugal, con muestras en tolas callis del pueblu, comu carrus, trajis de charru, aperus, achiperris de codina,... que tolus vedinus de Villarrubias pusun bien a gustu y bien abondu pa jadel esti día. Tampocu no faltarun los tenderilis d'artesanus de la comarca.

Además de tolas muestras, a la mañana se jidu'l comienzu la Fiesta, con las chalras de Lourdes Palos comu presidenta de la Mancomunidá (es tamién l'alcaldesa de Guinaldu), Ángel Justo Rubio (Justu), l'alcaldi de Villarrubias) y Marcos Iglesias, diputáu provincial (es tamién l'alcaldi de Ciarrodrigu). Dispués, tamién a la mañana, se pudun vel los bailis charrus del grupu "El Charaíz Redondo" (Guinaldu), y la mañana acabó con una comía pa toa la genti, en la que s'ajuntarun alreol de 1.000 presonas.

Ya a la tardi, además de los juegus pa los dagalis, juerun los conciertus de los grupus "En3Jazz" (Ciarrodrigu) y "Santarén folk" (Zamora), con el que s'afechó'l día.

Carru n'una las callis

Lavandu nel regatu

Muestra n'un jardín

En la puerta la Cassa Rural

En la puerta l?Hotel Rural

Carru en la Calli la Ilesia

Molinu de manu

Unu de los tenderilis

Veranu 2023 (1): El panderu golvió a rugil en las callis de Peñaparda

Los días 28 y 29 de Juliu se jidu en Peñaparda la XXIII Fiesta'l Panderu.

El viernis 28 de Juliu la fiesta apencipió con una charla alreol d'El Rebollal jecha pol Ángel Iglesias Ovejero, natural de Robrea y prencipal investigaol alreol de la nuestra palra d'El Rebollal. Ángel recibía esti añu'l "Panderu d'Honol" que tolus añus da l'"Asociación el Pandero Cuadrado de Peñaparda" (Asociación el Panderu).

Al sotru día, sábadu 29 de Juliu, el día apencipió con un mercáu artesanal, nel qu'hubu varius tenderilis con miel, quesu, cosas jechas de maera,... Ya a la tardi, fué cuandu se jidu'l festival folclóricu, qu'apencipió con un pasacallis con los grupus, y terminò en la Praza con los bailis del grupu e dagalis de Peñaparda, el grupu Abuela Santa Ana d'Albaceti y el grupu de mayoris de Peñaparda. Entri medias, se le dio'l Panderu d'Honol a Ángel Iglesias Ovejero.

La fiesta acabó, ya a la nochi, con el conciertu'l grupu "Charros y gitanos", conciertu nel que rebujarun el charru con el framencu.

La fiesta la jidu, comu tols añus, l'Asocación el Panderu.

Tamborilerus nel pasacallis

Tenderilis nel mercaíllu artesanu

El puestu los panderus de la Juana

Grupu de dagalis de Peñaparda

Grupu Abuela Santa Ana

El grupu d'Albaceti n'unu los sus bailis

Ángel Iglesias recibiendu'l Panderu d'Honol

Grupu de mayoris de Peñaparda

"Charros y gitanos" nel conciertu

Txebe y Raúl tocandu con el grupu

Conoci a los nuevus alcaldis d'El Rebollal (añu 2023)

El pasáu 28 de Mayu s'escogierun, en tó'l país, los nuevus alcaldis. N'El Rebollal, dispués de jadelsi los nuevus Ayuntamientus, el pasáu sábadu 17 de Juniu, éstus son los nuevus alcaldis d'El Rebollal.

José Manuel Píriz Seijo (Navafrías) 

Con 28 añus, ésti es l'alcaldi más nuevu d'El Rebollal. Anque hogañu vivi en Salamanca pol mé'l trabaju, siempri que puedi (cuasi tolus días) s'escapa al su pueblu, Navafrías. S'estrena comu alcaldi, anque ya había síu justicial, pol PSOE (Partíu Socialista Obreru Español) con muchas ganas e ilusión pol jadel cosas pol su pueblu.

Agapito Pascual Silva (Payu)

Con 73 añus, es unu de los pocus alcaldis d'El Rebollal que repitin nel puestu, nel que lleva dendi l'añu 2012, siempri en las listas del PSOE (Partíu Socialista Obreru Español). Dispués d'abril la residencia a finalis del añu 2022, lo que quieri jadel (sigún una entrevista en La Gaceta de Salamanca) es agrandal el depósitu l'agua, arregral la parti'l ríu y arregral callis que tienin falta.

Alicia Palos Ramos (Peñaparda)

La nueva alcaldesa de Peñaparda tieni 35 añus. Vivi a metá'l caminu entri Ciarrodrigu y Peñaparda, pos va y vieni tolus días. S'estrena comu alcaldesa pol nuevu partíu PPC (Peñaparda pol Cambiu), anque antis había síu justicial pol PP (Partíu Populal). Cogi'l puestu pa, en las sus palabras, tiral p'arriba'l pueblu. Comu curiosidá, es prima de Laura Ester Ramos, la portera de la seleición española de güatelpolu.

José Luis Varas Carballo (Robrea)

Con 55 añus, otru de los alcaldis que repitin es el de Robrea, el que más añus lleva nel puestu, pos entró d'alcaldi nel añu 2007 pol PSOE (Partíu Socialista Obreru Español), siendu unu de los "culpabris" de que los cartelis de Robrea estén en la palra d'El Rebollal. L'ojetivu sigui siendu que la genti se quedi a vivil nel lugal.

Ángel Justo Rubio Rubio (Villarrubias)

Otru de los que s'estrenan comu alcaldi nel su pueblu es Justo, de 66 añus, qu'ha salíu d'alcaldi pol PP (Partíu Populal). Se da'l casu de que, además de comu alcaldi, s'estrena tamién comu justicial. En viviendu en Villarrubias, quieri vel qué puedi jadel pol su pueblu.

NOTA. Afotus arrecogidas en:

- José Manuel Píriz Seijo. Facebook del PSOE de Navasfrías

- Agapito Pascual Silva. Periódico Salamanca RTV Al Día

- Alicia Palos Ramos. José Benito Mateos

- José Luis Varas Carballo. Periódico Salamanca24horas

- Ángel Justo Rubio Rubio. Facebook de Ángel Justo