Veranu 2022 (2): Tamién golvierun los bailis charrus

 Dispués de dos añus d'áina no podel jadel ná pol mé l'Andanciu, al tercel añu jué la güena y, esti añu sí, los nuestrus pueblus pudun jadel las sus fiestas del charru. 

Nel pueblu Peñaparda golvió a jadelsi la Fiesta'l Panderu Cuadráu. El viernis 29 de Juliu apencipió con una charla de Raúl Benito Calzada alreol los trajis de charru. Al sotru día,el sábadu 30 de Juliu, juerun los bailis, qu'estuvun jechus pol el grupu "Jóvenes Extremeños", de Moraleja (Cáciris), el grupu de dagalis de Peñaparda y el grupu de charru de Peñaparda. El conciertu de la nochi lo jidu'l grupu charru "Entavía".

Tampocu no faltarun los bailis charrus en Payu. Asina, el juevis 4 d'Agostu golvierun a retumbal en la Praza'l lugal los sonis y bailis de la "Sartén Charra" que esti añu llegó al númeru 10. Además del grupu "Jálama" de Payu estuvu tamién un ranchu portugués veníu dendi Guarda (Portugal). El conciertu la nochi lo jidu esti añu la cantanti la provincia Valladolís Vanesa Muela, a la que le dierun la Sartén d'Honol pol el su trabaju en defensa la cultura tradicional. Otru añu más, la nuestra palra d'El Rebollal estuvu presenti en los cartelis del festival.

Robrea tampocu no se quedó sin bailis charrus. Asina, el miércolis 10 d'Agostu, el grupu del lugal, "El Fandangu", jidu una muestra de los bailis de Robrea y de los sonis de siempri, muchus d'ellus cantáus en la nuestra palra d'El Rebollal.

NOTA: afotu del grupu "El Fandangu" emprestá pol José Machado, de Robrea

Pasacallis del Panderu Cuadráu

Grupu de dagalis de Peñaparda

Grupu "Jóvenes extremeños" de Moraleja

 

Vanesa Muela arrecogi la su Sartén d'Honol

Grupu "Jálama" de Payu

Ranchu de Guarda

Grupu "El Fandangu" de Robrea

El Panderu llegó al númeru XX

Los pasáus 26 y 27 de Juliu (viernis y sábadu) Peñaparda celebró la su Fiesta el Panderu Cuadráu, qu'esti añu 2019 llegó al númeru XX.

Pasacallis

Presentación del libru

El viernis 26 se presentó el libru "Tesoro de Tradiciones de Peñaparda", escritu por el etnógrafu José Manuel Fraile Gil, libru que vieni cona compaña d'un CD con más de 80 tonás tradicionalis del lugal. Ese mesmu viernis, se le entregó el "Panderu d'Honol" al folclorista Ismael Peña.

El sábadu 27 jué el festival folclóricu, qu'esti añu contó con el grupu de Peñaparda (dagalis y mayoris), el Ofretoriu y la compaña del grupu gallegu "Donaire", de La Coruña. A la mañana se jidu el mercáu. La tardi apencipió con unus bailis a los mayoris de la Residencia, seguíu del tradicional pasacallis y, adispués, los bailis del grupu de dagalis, el ofretoriu, el grupu "Donaire" y el grupu de Peñaparda. A la nochi, la fiesta terminó con el grupu gallegu "Donaire".

NOTA: afotus emprestás por Rubén Mateos (Peñaparda)

Ismael Peña, Panderu d'Honol 2019

Tenderilis del mercáu

Pasacallis con el grupu "Donaire"

Grupu de dagalas de Peñaparda

Grupu "Donaire" bailandu

Otru baili del grupu "Donaire"

Bailaoras del Ofretoriu

Grupu de Peñaparda

Grupu "Donaire" a la nochi

Fin de fiesta con el grupu "Donaire"

El panderu cuadráu ena arradiu

Esti sábadu, 5 de diciembri, el panderu cuadráu de Peñaparda ha síu unu de los protgonistas del programa "Tarataña", un programa de Radio 3 (Arradiu 3) alreol de la música folk y tradicional. Asina, al final del programa himus podíu oyel a Isabel Ramos y a la su madri, Eugenia González, tocandu un ajecháu (Isabel) y un salteáu (Eugenia), dambus dos sonis sacáus del discu "El panderu cuadrado de Peñaparda" (El panderu cuadráu de Peñaparda). El enlaci andi se puedi oyel el programa es: http://www.rtve.es/alacarta/audios/taratana/taratana-luar-na-lubre-sale-galicia-05-12-15/3394421/

Eugenia González ena portá el discu
"El pandero cuadrado de Peñaparda"

No es la primera vés que Peñaparda y el su mó y manera de tocal el panderu salin n'esi programa. El 19 de juliu, pol mé la Fiesta el Panderu, tó'l programa "Tarataña" estuvu dedicáu al panderu. Se puedi oyel en esti enlaci: Tarataña - Panderu cuadráu . A la sotra semana, el 25 de juliu, tamién el programa se jidu pregón de la muerti la Tia Gora, y apencipió el programa con una toná cantá pola mujerita. Lo podéis oyel en esti enlaci:Tia Gora ena arradiu

Los peñaparderus jidun la su Fiesta el Panderu

El pueblu de Peñaparda jidu, entri los días 24 y 25 de Juliu del 2015 (Vierni y Sábadu) la su Fiesta el Panderu, qu'esti añu llegaba a la númeru 16. La Fiesta el Panderu se jadi alreol d'esti estrumentu d'origin asturleonés, el panderu cuadráu, qu'en Peñaparda tieni de particulal el mó y manera de tocalu, con una porra comu la d'un tamborileru, mientris qu'en los demás lugaris andi se toca se toca con las manus.

El Viernis 24 hubu, nel Centru Cultural (escuelas viejas) una chalra alreol la naturaleza, chalra que dió Tomás Rodríguez Martín, de Mediu Ambienti.

El día grandi de la Fiesta el Panderu jué el Sábadu 25.

Pola mañana estuvu puesta la Feria d'Artesanía con puestus comu los quesus d'Hinojosa, turrón de L'Alberca, los panderus de la Andrea, un puestu de algrealis y mantéus veníu dendi'l Val de San Lorenzu (León) o la Joyería Tradicional de L'Alberca. Tampocu faltarun puestus de siempri comu los librus de la Nieves o las oyas y alajas de la Juani, ni los puestus de los dagalis. Además del mercáu, echarun unus bailis las dagalas del cursu de sevillanas.

A la tardi se jidu el Festival Folcloricu, alreol del cual da güeltas tóa la fiesta. En él estuvun, dispués del pasacallis, el grupu de dagalis de Peñaparda, el grupu "Federico Lozano" de Salamanca y el grupu de mayoris de Peñaparda. Esti añu no se pudu jadel el baili el Ofretoriu.

La fiesta terminó, ya de madrugá, con el conciertu el grupu folk "Baleo".

Grupu de los dagalis de Peñaparda

Los dagalis de Peñaparda bailandu

Grupu "Baleo"

Grupu "Federico Lozano" 

Bailis y música tradicional enllenarun el veranu n'El Rebollal

El veranu está acabandu y llega la hora de recordal las cosinas que han passáu ena nuestra tierra. Vamus a apencipial pola cultura tradicional, tan rica (y a las vedis tan olvidá)  n'El Rebollal.

Los pueblus d'El Rebollal se han enllenáu esti veranu de bailis y música tradicional, pos son unus cuantus los festivalis que se han organizáu en los nuestrus pueblus.

Apencipiamus con la XIII Fiesta el Panderu Cuadráu, que se jidu en Peñaparda los días 27 y 28 de juliu. Esti añu estuvu, además del grupu folclóricu de Peñaparda, el grupu "Tresbolillo" de Salamanca. Esti au el "pandero de honor" (panderu de honol) jué para el folklorista Eliseo Parra que, acompañáu del grupu "Coetus" dio el conciertu de la nochi el sábadu.

El folclori y los bailis d'El Rebollal tamién estuvun nel Día la Mancomunidá Altu Águeda, que se jidu en Itueru el domingu 29 de juliu, conos grupus "El Fandangu" de Robrea, "El pandero cuadrado" de Peñaparda y el grupu "Jálama" de Payu.

En Payu se jidu el 9 d'agostu, pol segundu añu, el Festival "La Sartén Charra", ena qu'estuvun, además del grupu "Jálama" de Payu, Berna Pérez (Cabrerizus), Sergio "El Manterito" (Bodón) y el grupu "El Charaíz Redondo" (Guinaldu), además de tamborilerus de la comarca comu Rubén Vegas o Juan Antonio. Comu cosa nueva, esti añu se dió la "sartén de honor" a José Benito Mateos Pascual "TXEBE", tamborileru de Peñaparda y Villarrubias y miembru del grupu "Jálama" de Payu, pola su labol de recuperación y defensa de la cultura tradicional.

Pa acabal, tamién Villarrubias golvió a celebral, esta vés el 17 d'agostu, el su Festival "Juenti el Gallu". Esti añu estuvun, además de José Benito Mateos (comu tamborileru del lugal), Pablo y Juanjo (tamborilerus de Robrea), Alberto Vela (tamborileru de La Maya), Berna Pérez (Cabrerizus), Isabel Ramos (Peñaparda) y Jesús Andrés Andrés (Guinaldu). Comu cosa nueva, se jidu la final del concursu d'acurdión, concursu que ganó Antonio Rodríguez Mateos, de Villarrubias.

Aqui vos ponemus anguas afotus de los festivalis.

Pasacallis ena Fiesta el Panderu Cuadráu

Pasacallis del II Festival "La Sartén Charra"

Los 11 tocaoris d'acurdión

Los participantis del festival "Juenti el Gallu"
cona Tia Pepa de Villarrubias