Apencipia la campaña las Eleicionis

Las Eleicionis Generalis (pa escogel diputáus y senaoris) están ya mú cerquina y, comu no pué sel menus, los diferentis partíus políticus y candidatus apencipian cona su campaña pa dal a conocel las sus ideas.

Las eleicionis son pa tó'l país, peru n'El Rebollal mos tocan un poquinu más de cerca qu'en otrus lugaris porque tres personas de los nuestrus pueblus están comu candidatus al Congresu y al Senáu.

Asina, en drentru el PREPAL (Partíu Regionalista el País Leonés), tenemus comu númeru 2 pa'l Congresu a Mª Isabel Rodríguez Mateos (Marisa, la dagala de la Julia, de Villarrubias), y comu candidatu pa'l Senáu a José Benito Mateos Pascual (TXEBE, tamborileru, escribiol,..., metá mangurrinu y metá peñaparderu). Además, otra vedina de Peñaparda, Patricia Santamaría Hernández (Patri), está comu suprenti pa'l Senáu.

Dibuju del PREPAL,
partíu por el que se presentan  los tres rebollanus

El día los votus es el domingu 20 de Noviembri. Los resultáus, en cuantis se sepan, los pubricaremus en esti blog.

El airi y el agua güelvin juertis

El airi y el agua han güeltu a la nuestra comarca con juerza.

La nochi del martis 1 y el miércolis 2 de Noviembri, la comarca d'El Rebollal ha teníu lluvia y airi juerti. D'agua cayerun alreol de 80 litrus el metru cuadráu, y el airi tuvu dondeás de más de 80 kilómetrus a la hora.

Las dondeás d'airi tumbarun, sigún poni en La Gaceta de hoi, un árbol que cuertó un ratu la C-526 nel términu de Villarrubias. Tamién en Villarrubias tumbó un conteneol de los de la basura y, lo más peligrosu, esbarrungó el tejáu d'una cassa ena Calli Estremaúra. La cassa, del añu 1880, hai muchu tiempu qu'está abandoná, lo que ha jechu que aguanti peol estus aironis tan juertis.

El Rebollal recuerda a los que faltan nel día de Tólus Santus

Las gentis d'El Rebollal recuerdan, un añu más por esti tiempu, a los que se juerun.

Comu tólus añus, el primeru de Noviembri las gentis van a los ciminterius con froris pa honral a padris, hermanus, agüelus, hijus,... que tienin allí, el día de Tólus Santus, que se celebra tamién en tóa la Península.

Esti añu, al habel caíu en martis el día, mucha genti ha teníu un puenti de cuatru días, lo que ha enllenáu los nuestrus pueblus, polu menus el sábadu y el domingu.

Lo que no ha acompañáu muchu es el tiempu, pos la tardi de Tólus Santus (y al sotru día) hubu mucha agua y muchu airi, tantu qu'enos ciminterius se han tumbáu muchas de las froris que se pusun pol mé las dondeás d'airi que hubu.

El Rebollal a escuras

Esti miércolis 26 d'otubri himus güeltu a quedalmus a escuras ena comarca d'El Rebollal.

Un poquinu dispués de las cincu la tardi, la lús se jué n'El Rebollal pol mé el agua y el airi tan juerti que jadía. La trecidá golvió alreol de las onci y media de la nochi, asina que El Rebollal estuvu más de seis horas sin lús.

N'El Rebollal no es la primera vés que pasa algu asina. Hai unus añus, pol mé una nevá grandi, la comarca estuvu angunas horas sin lús, cona diferencia de que aquella vés la lús golviú alreol del meyudía, asina que los nuestrus pueblus estuvun sin trecidá, angunas horas más.

Güelvi a llovel

El fin de semana truju las primeras lluvias del Tardíu a tierras d'El Rebollal.

Dispués de muchu tiempu sin llovel (anguna tormentina nel mes d'agostu), El Rebollal ha güeltu a vel llovel. El domingu y, sobri tó, la madrugá del lunis mos ha traíu a la nuestra tierra ha güeltu a recebil agua del cielu. La lluvia del domingu jué agua bien caía, peru la madrugá del lunis truju agua caía con muchu jostigu pos, además del cael una güena aguarrá (alreol de los 100 litrus pol metru cuadráu), el agua ha caíu con muchu jostigu pol mé el airi.

Asina, los ríus y regatus d'El Rebollal han güeltu a acomolgaítus llenus d'agua. Con tó y con esu, estas lluvias, las primeras del Tardíu, no remedian más que un poquininu la sequeá que hai ena comarca dendi'l mes de mayu, sequeá que ha jechu que esti añu entovía no haigan salíu los jongus.

Pa esta semana, las telivisionis dan agua pa'l miércolis y el juevis.

Il a jongus n'El Rebollal

Afotu de los cartelis de avisu pa los jongus

Dendi el sábadu 15 d'otubri d'esti añu 2011, il a jongus n'El Rebollal es de pagu.

Pol mé d'unus papelis firmáus polus ayuntamientus, la Diputación de Salamanca, y la Junta de C. y León, dendi esti añu hay que pagal pa salil a jongus. Los premisus son apaecíus a los de il de pesca o de caza (o sea, que es obrigáu tenel el premisu si se quieri salil a jongus).

Los precius de los premisus varían sigún d'andi sea el jongueru, sigún pa qué se quieran los jongus y sigún pa cuántu tiempu sea. Asina, pa la genti del lugal el premisu es de 3 eurus (3 €) pa tóa la temporá si se sali pa pasal el ratu y 10 eurus (10 eurus) si se sali a jongus pa vendelus (la temporá va dendi el 1 d'agostu jasta'l 31 de juliu del sotru añu). Esi preciu se va encarandu sigún d'andi sea el que sali a jongus. Asina, los que tienin algu de vel con el lugal pagarían 10 y 100 eurus, respectivamenti. Los de la provincia de Salamanca 20 y 200 eurus, y los forasterus 400 eurus (ná más pa vendelus).

El dineru que se saqui conos premisus se partirá entri los ayuntamientus (cá pueblu sigún los premisus que dé) y la empresa cona que se han firmáu los papelis. Los premisus se puedin sacal enos cuartus de cá lugal (de lunis a viernis) y enas tabernas (sábadus y domingus).

Númerus nuevus enas callis de Peñaparda

Las callis de Peñaparda estrenan númerus.

El lunis 3 d'otubri apencipiarun a remual los númerus de tóas las callis del lugal pa ponelus a la par con los del Catastru. Asina, anque muchas cassas tienin el mesmu númeru, son otras muchas las que van a remual, con diferencias angunas vecis jasta de 10 númerus arriba o abaju.

AFOTU: a la izquierda, el númeru nuevu; a la derecha, el vieju