Tardíu 2023 (4): Peñaparda nel "Conoci los nuestrus pueblus"

     El pueblu Peñaparda tamién tuvu'l su día del "Descubre nuestros pueblos" ("Conoci los nuestrus pueblus"). Esta vés tocó'l sábadu 9 de Diciembri del 2023. 

La palra, el panderu y el charru en la Discoteca

     El día apencipió recibiendu a la genti en la Praza con café y dulcis pa cogel con juerza la mañana.

     Adispués d'esti segundu desayunu, tó'l que quiju pudu jadel la vesita a la Cantera Molal, el lugal d'andi salían antañu las ruéas pa los molinus jarinerus.

     Una vés jechu'l paséu, la genti pudu vesital el pueblu, además de las diferentis muestras qu'estuvun preparás pa esi día.

Recibiendu a la genti

     En la Discoteca, se pudun vel muestras de cuadrus (pintáus pol Mari Ángeles Martín y la su madri Lucía),  jongus y cultura tradicional, con una pequeña chalra alreol de la nuestra palra d'El Rebollal jecha pol José Benito Mateos Pascual "Txebe".

     N'el Muséu, las muestras de trajis de charru y del trabaju'l linu, con una pequeña chalra jecha pol Antonia Pascual Sánchez y Raúl Benito Calzada.

     Dispués de la vesita al pueblu jué la comía, unas patatis guisás con costilla, comía en la qu'estuvun alreol de 150 presonas.

     Pa rematal el día, no podían faltal los bailis charrus, de los que dio una güena muestra'l grupu folclóricu de Peñaparda.

Jongus grandononis

Muestra de jongus

Muestra de cuadrus

Maquetina d'El Charaíl del Rollu (Peñaparda)
y las Tres Columnas de Ciarrodrigu,
jechas pol José Antonio Sánchez

Comiendu

Tampocu no faltarun los bailis

Tardíu 2023 (3): Los "1000 Otoños" vinun a Payu

 El pasáu 25 de Noviembri del 2023, el programa "1000 Otoños en Salamanca" (1000 Tardíus en Salamanca) visitarun el pueblu de Payu. 

La Puenti'l Gas, en Payu

El programa, patrocináu pola Diputación de Salamanca, jidu la su primera pará en Payu.

El día apencipió con la llegá de los vesitantis que, adispués de las presentacionis, salierun al campu a jongus, que jué'l tema escogíu pa esta vesita.

Adispués, la genti pudu jadel una vesita al lugal y, antis de la comía, hubu una chalra alreol de los jongus arrecogíus.

Ya dispués de comel, hubu una chalra-conciertu alreol de la nuestra palra d'El Rebollal jecha pol José Benito Mateos Pascual "Txebe" (esti que vos palra).

En las cosas que se jidun estuvun alreol de 40 presonas, venías dendi tolus rinconis de la provincia Salamanca.

Momentu de la comía

El Tardíu, tiempu de jonguerus

     El Tardíu es un tiempu especial por muchas cosas: se va el calol el Veranu, güelvin las lluvias, múan de colol las hojas los árbolis y acaban cayendu,... Y es el tiempu el añu en que más jongus y de más crasis salin. Pol mé d'esu, los práus, robrealis, pinalis y jessas d'El Rebollal s'enllenan de jonguerus, anque no tós cogin los jongus pa lo mesmu, pos los hai que los cogin pa comel, otrus pa vendel y otrus pa estudialus. 

Jongu

     Pol mé qu'el il a jongus se ha puestu "de móa", cá vés hai más jonguerus que salin a cogel jongus, ya sean tortullus, jongus de los práus, champiñonis, nícalus,... Pol mé d'esi montonáu de jonguerus, d'un tiempu p'acá dendi las istitucionis s'ha intentáu algu asina comu "poneli engarillas al campu", y hogañu hai de sacalsi un carné pa podel cogel jongus tranquilamenti, sin miéu a una multa. Un carné que, dendi los 5€ (cincu eurus) p'alantri, te vali p'arrecogel jongus en tóas las sierras de Salamanca: Sierra Béjal, Sierra Francia y Sierra Gata.

Cartel de las jornás

     El Rebollal, comu güena zona jonguera, siempri ha llamáu a la genti del lugal y de juera pa salil al campu a jongus. Y, pol mé d'ellu, esti añu la Diputación de Salamanca ha escogíu el pueblu rebollanu de Peñaparda p'apencipial los sus "1.000 otoños de Salamanca" (1.000 tardíus de Salamanca). La jorná jonguera jué el domingu 8 de Noviembri, andi se salió al campu a arrecogel jongus n'una mañana ena que cayó una güena aguarrá, se jidu una vesita al Muséu el Linu y se jidu una chalra andi Juana Andrés Catalán chalró alreol de cómu se jadin los panderus.

     Además d'en Peñaparda, se han programáu más jornás jongueras enos pueblus de la Puenti el Congostu, Saldeana, L'Alberca y Valdilossa.

NOTA: afotu del cartel arrecogía de Tribuna de Salamanca

La primera aguarrá el Tardíu

 Esti martis, 20 d'Otubri, ha síu n'El Rebollal unu de los días con más agua que se recuerda. Y es que ha síu mú grandi esta primera aguarrá el Tardíu que mos ha traíu la borrasca "Bárbara".

Asina, la estación de la AEMET (Agencia estatal de Meteorología) en Navafrías midió esti martis 175,4 l/m2 (litrus el metru cuadráu), con una dondeá d'airi de jasta 68 km/h (kilómetrus a la hora), anque en Peñaparda se midierun jasta 240 litrus esi mesmu martis.

Esta aguarrá y esi airi jidun que los pueblus de Peñaparda, Payu y Navafrías estuviesin sin lús dendi las 4 y media la tardi d'esi martis jasta las 2 y cuartu la madrugá, ya el miércolis 21. En total 10 horas sin trecidá.

El pasu de "Bárbara" por El Rebollal tamién ha dejáu antenas caías, parés esbarrungás otrus malis menoris. Lo güenu es que, pol mé d'esti agua, los ríus y regatus güelvin a correl y las juentis a manal.

NOTA: afotus emprestás por
- Charcu Palu: Verónica Mangas (Payu)
- Arrópeonis: Kike Lozano (Robrea)
- Robrea: arrecogía del Facebook de "Robleda, capital del Rebollar"
- Villarrubias: Marisa Rodríguez (Villarrubias)

Charcu Palu
(Payu)

Arropeonis
(Peñaparda)

Robrea

Juenti el Gallu (Villarrubias)

Y el Tardíu se jidu Inviernu

El mes de Diciembri el últimu del Tardíu, mos ha dáu la bienvenía con el tiempu más fríu jasta hogañu. Un Tardíu que, encima, no mos truju a'l Rebollal las lluvias qu'esperabamus con tanta ansia, en siendu el Tardíu más secu que se reuerda.

En cuantis al fríu, los primerus días y, más que ná, las primeras nochis, han síu los más fríus. En Navafrías, la estación ha arrecogíu jasta -8ºC (ochu gráus pol baju el ceru) el día 2 de Diciembri.

Juera el tiempu "oficial", hai genti que conos termómetrus los sus cochis ha llegáu a tomal jasta -16ºC (dieciséis gráus pol baju el ceru).

Asina, el Tardíu se apencipia a despedil con muchu fríu, en dejándomus pensandu en qué mos traerá el Inviernu.

Semana de niebra n'El Rebollal

La tercera semana de diciembri ha síu la semana más fría n'El Rebollal pol mé las niebras. Jasta angún día no ha levantáu la niebra, asina que estus días ha jechu más fríu que ningunu en lo que va del Tardíu.

Peñaparda

Peñaparda, una hora dispués

Se jidu la V Fiesta el Tardíu

El pasáu sábadu 22 de noviembri se jidu en Robrea la V Fiesta el Tardíu, un "rendez-vous" que, pol mé de dal la bienvenía al Tardíu, ajunta n'El Rebollal a un montonáu de gentis del folclori y la música tradicional de la provincia de Salamanca.

Cartel de la V Fiesta el Tardíu

Asina, esti añu han cenáu alreol de 50 presonas, con una comía de bacaláu, carni assá, nícalus,... Las tonás de siempri se pudun oyel ya mientris la cena, tonás comu la "Calli de la Botica" y otras muchas.

Dispués de la cena se pudun oyel sonis tocáus polus tamborilerus veníus dendi Salamanca, Ciarrodrigu, Guinaldu, Bodón, Robrea, Peñaparda,... Acompañáus de panderetas, castañuelas, guitarra y jasta una gaita gallega. Tamién se pudun oyel los sonis de la sartén de Payu. No faltarun los bailaoris, veníus además dendi pueblus comu Vitigudinu, Bogaju, Saúgu, Barruecupardu,...

Momentu del baili

La palra d'El Rebollal tamién estuvu presenti ena Fiesta el Tardíu, apencipiandu por el mesmu nombri de la fiesta, siguiendu polus cartelis y por angunas cancionis ena Palra comu "Que rompan la Jessa Arriba".

Sentáus a la mesa pa cenal

Esta bienvenía al Tardíu jadi la númeru 5, dendi aquella primera del añu 2009.

Güelvi a llovel

El fin de semana truju las primeras lluvias del Tardíu a tierras d'El Rebollal.

Dispués de muchu tiempu sin llovel (anguna tormentina nel mes d'agostu), El Rebollal ha güeltu a vel llovel. El domingu y, sobri tó, la madrugá del lunis mos ha traíu a la nuestra tierra ha güeltu a recebil agua del cielu. La lluvia del domingu jué agua bien caía, peru la madrugá del lunis truju agua caía con muchu jostigu pos, además del cael una güena aguarrá (alreol de los 100 litrus pol metru cuadráu), el agua ha caíu con muchu jostigu pol mé el airi.

Asina, los ríus y regatus d'El Rebollal han güeltu a acomolgaítus llenus d'agua. Con tó y con esu, estas lluvias, las primeras del Tardíu, no remedian más que un poquininu la sequeá que hai ena comarca dendi'l mes de mayu, sequeá que ha jechu que esti añu entovía no haigan salíu los jongus.

Pa esta semana, las telivisionis dan agua pa'l miércolis y el juevis.