Eneru mos truju muchu fríu y, por fin, agua

El añu ha apencipiáu n'El Rebollal con el fríu típicu el Inviernu. Asina, el més d'Eneru ha jechu honol (sobri tó a las nochis) al refrán que idi que "Eneru heló a su madri nel lavaéru".

Niebra en Peñaparda

 

Yelu en Villarrubias

Y es que ye verdá que a las nochis ha heláu muchu. La estación de la AEMET en Navafrías midió, el día 13 d'Eneru, la mínima de lo que llevamus d'añu, con -7,9ºC (sieti con nuevi pol baju el ceru), anque en total son sieti los días que llevamus esti añu con mínimas de -7ºC o pol baju.

Lloviendu nel charail

En saliendu de los númerus oficialis, hai genti que, a primera hora de la mañana, ha medíu con el su cochi fríu de jasta -10ºC (diés pol baju el ceru).

Anque el Inviernu mo ha faltáu a la su cita con el fríu, el agua ha estáu más dura de cael, pos no ha caíu ná jasta'l 19 d'Eneru, lloviendu los días 19 y 20, anque pocu (2,8 litrus el sábadu 19, y 0,4 litrus el domngu 20).

El Inviernu se despidi d'El Rebollal con tiempu d'Inviernu

El Inviernu se despidi d'El Rebollal, la comarca más al Sul el Reinu de Llión, con tres semanas de agua, fríu y nievi, jadiendu güenu esi refrán que idi que "el tiempu qu'es su tiempu no es mal tiempu". Asina, el pasu de las borrascas Emma, Félix y Giselle ha dejáu un montonáu d'agua n'El Rebollal, acabandu asina cona sequeá que venía dendi la Primavera el añu pasáu, anque antis d'ellas, el domingu 24 de Jebreru, Navafrías jué unu de los pueblus más fríus el país, pos se midierun -9,9ºC (cuasi diés gráus pol baju el ceru).

"La Pesquera" Riufríu

En total, ena estación de Navafrías, las tres borrascas han dejáu, entri los días 27 de Jebreru y 15 de Marzu un total de 456,6 litrus el metru cuadráu. El día que más agua cayó jué el 9 de Marzu, con 104,2 litrus, o que jidu que ríus y regatus se salieran de madri. En Robrea, el regatu que pasa pol metá el lugal enllenó d'agua la Praza el Cañu y la Praza el Obispu Sánchez Matas. En Villarrubias, el regatu el Cristu tapó el charaíl la Juenti el Gallu y llegó jasta la carretera Ciarrodrigu. En Peñaparda, Payu y Navafrías, los ríus llevaban tanta agua comu no se había vistu en añus. Asina dejó la borrasca Félix El Rebollal.

El airi que truju Giselle dejó a media comarca sin lús el miércolis 14 de Marzu. Villarrubias, Peñaparda, Payu y Navafrías estuvun varias horas sin lús, dendi'l meyudía jasta media tardi. Además, esus mesmus pueblus estuvun sin teléfonu fiju jasta'l sotru día (juevis 15), y sin los móvilis de Movistar jasta'l viernis 16.

El sábadu 17 de Marzu, día San Patriciu, n'El Rebollal mos dispiertamus con nievi, que vinu de sorpresa, anque del mesmu mó y manera que vinu se jué, pos duró pocu enos tejáus las cassas.

Asina es comu se despidi el Inviernu d'El Rebollal, a la espera el fríu que vieni entri el domingu y el lunis.

Ríu La Puenti (Peñaparda)
antis de las lluvias

Ríu La Puenti (Peñaparda)
dispués de las lluvias

Regatu el Cristu (Villarrubias) y
charaíl de la Juenti el Gallu

Praza el Cañu (Robrea)

Picu Jálama conas nievis el 17 de Marzu

Vídeu de la Pesquera Riufríu (14 de Marzu de 2018)

Y el fríu llegó a'l Rebollal

El mes de Jebreru ha apencipiáu con fríu ena comarca d'El Rebollal, jadiendu honol a sel unu de los mesis el Inviernu.

Asina, han síu muchus los días de muchu fríu y de yelus que himus teníu. Con tó y con esu, el día más fríu jué el juevis 8 de Jebreru, cuandu la estación de Navafrías midió -8'2ºC (ochu con dos pol baju el ceru) a esu de las nuevi la mañana, anque juera d'esa estación, hai genti que, dendi el su cochi, ha medíu jasta los 11 y 12 pol baju el ceru (-12ºC) enas zonas cercina los ríus.

Lo peol es que está siendu un Inviernu mú secu, lo mesmu que jué el Tardíu, asina que entovía sigui la sequeá, con los regatus, ríus y juentis mediu secus. Con el tiempu asina, la genti ya apencpia a pensal nun Veranu sin agua n'El Rebollal.

Y el Tardíu se jidu Inviernu

El mes de Diciembri el últimu del Tardíu, mos ha dáu la bienvenía con el tiempu más fríu jasta hogañu. Un Tardíu que, encima, no mos truju a'l Rebollal las lluvias qu'esperabamus con tanta ansia, en siendu el Tardíu más secu que se reuerda.

En cuantis al fríu, los primerus días y, más que ná, las primeras nochis, han síu los más fríus. En Navafrías, la estación ha arrecogíu jasta -8ºC (ochu gráus pol baju el ceru) el día 2 de Diciembri.

Juera el tiempu "oficial", hai genti que conos termómetrus los sus cochis ha llegáu a tomal jasta -16ºC (dieciséis gráus pol baju el ceru).

Asina, el Tardíu se apencipia a despedil con muchu fríu, en dejándomus pensandu en qué mos traerá el Inviernu.

Llegó el fríu al Rebollal

Temperatura en La Puenti (Peñaparda)

El fríu del Invernu ya llegó al Rebollal. Y es que, ena madrugá entri'l miércolis 18 y el juevis 19 d'Eneru se han dáu las temperaturas más bajas de tó'l añu.

En Peñaparda, nel lugal de La Puenti se han medíu ondi gráus y mediu pol baju el ceru (-11,5ºC). Ena estació el tiempu de Navafrías tamién se midierun -11,5ºC a las ochu la mañana del juevis. Cuasi tó'l día estuvu con temperaturas pol baju el ceru en tól'l Rebollal. Había, enos tejáus y enos caminus, un yelu comu si juesi una nevá.

Caminu heláu en Payu

El viernis 20 d'Eneru, día San Sebastián, ya abonó el tiempu y, pol mé las nubis, anque jidu fríu no  jué comu el día d'antis. La estación de Navafrías "ná más" que midió jasta los sieti con ochu pol baju el ceru (-7,8ºC) a las ondi la nochi.

NOTA: afotu del caminu emprestá por Alexandra Vinaty (Payu)

Se va el fríu

La "dondeá de fríu polal" se va hoi de la Península y, anque ha dejáu nievi en muchus lugaris, n'El Rebollal ná más himus vistu fríu, y más o menus el fríu de costumbri. Jasta menus: el añu pasáu llegamus jasta los dodi gráus pol baju el ceru (-12ºC).

El mesmu fríu d'ayel

N'esti últimu parti alreol de la "dondeá de fríu polal", el termómetru ha marcáu los mesmus gráus d'ayel: ochu gráus y mediu pol baju el ceru (-8'5ºC), medíus alreol de las ochu y cuartu la mañana nel Ríu La Puenti, en Peñaparda.

Dis quí p'alantri los del tiempu idin que van a subil las temperaturas, asina que notaremus menus el fríu.

Un poquininu más de fríu

La "dondeá de fríu polal" entovía sigui, asina que n'El Rebollal seguimus con fríu, anque no muchu más que lo qu'es costumbri ena nuestra tierra.

Más fríu que ayel

Ayel llegamus jasta los 7 gráus pol baju el ceru. Esta madrugá los termómetrus han bajáu jasta los 8 gráus y mediu pol baju el ceru (-8'5ºC), medíus nel Ríu La Puenti, en Peñaparda, a esu de las ochu y cuartu la mañana. Una temperatura que, anque fría, no deja de sel lo normal n'esti tiempu. La "dondeá de fríu polal" se barrunta, más que ná, de día.

Esti tiempu va a dural, sigún los del tiempu, jasta mañana domingu.

Menus fríu del pregonáu

El primel día de la "dondeá de fríu polal" ha síu menus juerti de lo pregonáu.

N'El Rebollal, anque ha jechu fríu, esta "dondeá de fríu polal" se ha notáu, más que ná, por el día, cuandu la mareína jadía que el fríu se notasi más.

Peru las temperaturas de la nochi y la madrugá, nesti primel día, han síu apaecías a lo qu'es normal nel inviernu. Nel Ríu La Puenti, en Peñaparda, esta mañana se pudun cogel 7 gráus pol baju el ceru (-7ºC), lo qu'es normal abondu p'al tiempu qu'estamus.

Temperatura la mañana el viernis 3 de jebreru

La "dondeá de fríu polal" va a dural, sigún los del tiempu, jasta'l domingu.