"El Principinu" tamién sabi palral

"Le Petit Prince", el personaji creáu pol Antoine de Saint-Exupéry nel añu 1943, tamién palra rebollanu.

Portá de "El Principinu"

Y es qu'el pasáu miércolis, 24 de Noviembri del 2021, se presento en la Casa Cultura de Ciarrodrigu la tradución a la nuestra palra d'El Rebollal d'esti crásicu de la Literatura Universal. El nombri escogíu pa la tradución es "El Principinu", y ha síu jecha pol José Benito Mateos Pascual, "Txebe" (o sea, ésti qu'escribi estas palabrinas). En la presentación tamién estuvu presenti l'editol, Álvaro de Benito, de la editorial "Libros desde Tuma". 

D'esti mó y manera, la nuestra palra d'El Rebollal ya tieni dos librinus pubricáus n'ella, dambus dos escritus pol "Txebe": "El corral los mis agüelus" (añu 2004) y "El Principinu" (añu 2021). Asina, el rebollanu (el nuestru mó y manera d'ussal la lengua leonesa) entra en drentru'l grupu de lenguas que sabi palral "Le Petit Prince", alreol de 450, lo que jadi d'esti libru'l segundu más traducíu dispués de la Biblia. 

"Txebe" (izq) y Álvaro de Benito (dcha)
en Ciarrodrigu

La presentación de "El Principinu" ha llamáu muchu la atención a los medius de Salamanca y, asina, lo han sacáu comu noticia "La Gaceta de Salamanca" (tamién en la su seición "Viva mi Pueblo"), "Ciudad Rodrigo Al Día" y "Radio Águeda" (pica nel nombri pa vel las pubricacionis).

Pa la genti interesá, "El Principinu" puedi conseguilsi n'estus lugaris:

- Tahona "El Tamborileru" (Peñaparda)

- Librería Garzón (Ciarrodrigu)

- Librería "Letras Corsarias" (Salamanca)

- Güeb de la editorial "Libros desde Tuma"

Afecha "El Cruce", en Peñaparda

Bar "El Cruce", ya afecháu

El pasáu domingu, 14 de Noviembri del añu 2021 afechó las sus puertas "El Cruce", unu de los dos baris que quedaban en Peñaparda. Hogañu entovía no se sabi si golverá a abril, anqu'está puestu p'arrendalu.

Afecha, asina, una de las tabernas con más añus del lugal, alreol de mediu sigru, cincuenta añus de recuerdus y güenus momentus.

Veranu 2021

Tenderilis nel marcáu de Payu

N'esti Segundu Añu'l Andanciu, los pueblus d'El Rebollal quijun apencipial a golvel a la vía normal y, el que más el que menus, apencipió a jadel angunas cosinas, anque a medias.

Asina, Peñaparda golvió a jadel las sus fiestas de bienvenía al Veranu, y se jidun angunas cosinas comu verbenas y la misa a San Silveriu, peru sin incierrus ni jorizas. 

Laura Ester (primera a la isquierda) con
la medalla de prata

Tamién jué esti añu otru nel que juimus olímpicus y, pol mé Laura Ester Ramos, la comarca d'El Rebollal y Peñaparda en particulal golvió a vel comu una de las sus hijas ganaba una medalla en los Juegus Olímpicus de Tokiu (nel Japón), d'andi l'equipu güatelpolu femeninu se truju la medalla de prata.

La asociación Charco Palo (Charcu Palu) de Payu s'estrenó jadiendu dos mercáus, unu con tenderilis de cosas viejas, y otru d'artesanus.

Verbena en Peñaparda

Con tó y con esu, juerun muchas las cosas que faltarun nel Segundu Veranu'l Andanciu. Asina, no se jidun ni la Fiesta'l Panderu en Peñaparda, ni la Sartén Charra en Payu, ni las fiestas de los pueblus (menus la misa al Santu, que no faltó en ningún pueblu).

Dendi aquí'l deséu de que, pa'l sotru añu, las cosas güelvan a sel comparantis a las d'antis.

NOTA: afotu del güatelpolu arrecogía del canal Teledeporte, de TVE

Peñaparda jadrá las sus fiestas

N'esti Añu II del Andanciu paeci que las cosas apencipian a sel un poquininu las d'antis. 

Pañuelu nel barcón el Cuartu

D'ésti mó y manera, el pueblu de Peñaparda va a dal la bienvenía al Veranu con las sus fiestas de San Silveriu (20 de Juniu) con angunas cosinas (es curiosu comu, en siendu Peñaparda un pueblu conocíu pola su cultura tradicional, ésta no apaeci en las sus fiestas).

Asina, dos añus dispués, en Peñaparda va a habel:

SÁBADU 19 DE JUNIU

14:00   PAELLA en las Piscinas "Laura Ester" pa la genti del lugal (jecha pol el Ayuntamietu)
TARDI:   CHARANGA
NOCHI:   FIESTA FRAMENCA (jecha pola genti nueva)

NOTA: el "Bar Ramos" pondrá una barra esi día en las piscinas

DOMINGU 20 DE JUNIU

12:00   MISA AL SANTU (sin procesión)
22:00   CANCIÓN ESPAÑOLA (en la Praza)

NOTA: los horarius son alreol, esti añu no hai cartelis oficialis

El Rebollal se quea sin cajas

Caja de Peñaparda l'últimu día
antis d'afechal

 La comarca d'El Rebollal se quea sin cajas. N'un golpi más a los pueblus, la semana pasá afecharun las cajas de Navafrías (el miércolis 9 de Juniu) y Peñaparda (el juevis 10 de Juniu), dejandu asina a dambus dos pueblus sin servicius bancarius dispués de cuasi 50 añus.

Peru no sólu a ellus, pos era mucha la genti de los otrus pueblus d'El Rebollal que s'acercaban a dambus dos pueblus a jadel las sus cosas de dinerus.

Esti afechal de dambas dos cajas (de la antigua Caja Duero) s'ha uñíu a las ya afechás de Robrea (tamién de Caja Duero) y las de Payu y Villarrubias (de Caja Rural), dejandu asina a esti rinconinu faltu d'esti serviciu.

Caja de Peñaparda ya afechá

Sigún idi la empresa (de la que no vamus a jadel propaganda), van a seguil dandu serviciu en Guinaldu con un agenti (o lo qu'es lo mesmu, tampocu no va a sel una oficina normal). Y polus pueblus (no sabemus si pol tós) pasará un cambión una vés al mes. Pa lo demás, habrá de il a Ciarrodrigu entri 30 y 50 km, sigún el pueblu.

La asociación "Charco Palo", de Payu, aballa con una ruta alreol el lugal

En llegandu al cabu'l Andanciu (o, polu menus, esu esperamus tós), paeci que la nuestra tierra se va acercandu, poquinu a poquinu, a la vía normal. 

La ruta vista dendi'l cielu

Asina, l'asociación "Charco Palo" (Charcu Palu) de Payu ha apencipiáu a jadel cosinas, y ha aballáu jadiendu una ruta  polus caminus d'alreol el lugal. Con esta ruta se quiju dal a conocel los antigus caminus del pueblu, muchus con pocu ussu hogañu, además de jadel una pequeña limpieza de los lugaris qu'estaban puercus, pa lo que la genti llevó nus saquinus p'asina podel arrecogel papelis, prásticus, latas,...

Alreol de 25 personas salierun el pasáu sábadu 5 de Juniu dendi la Praza'l Payu  jacia'l caminu Perosín y, en pasandu pol lugaris comu'l caminu la Pesquera, caminu la Pascualita, el regatu Perosín y el Lavatoriu, golvierun a la mesma Praza.

Asina apencipia a acordalsi la nuestra tierra, dispués d'añu y mediu dormía pol mé'l Andanciu.

NOTA: afotus emprestás pol Maite Martín y Clemente González (Payu)

La genti que salió de Payu

Una parti del caminu
alreol de Payu

Pasarun las "Navidadis el Andanciu"

Peñaparda estrenó lucis

 Cona vesita los Reyis Magus, la nochi el 5 d'Eneru y la misa los Reyis al sotru día acabarun las celebracionis d'estas "Navidadis el Andanciu" conas que se da la bienvenía al Inviernu, se despidi el "Añu el Andanciu" y se da la bienvenía a al Añu Nuevu. 

Asina, entri los días 24 de Diciembri y el 6 d'Eneru las gentis d'El Rebollal pudun profital de las típicas cenas de la Nochigüena y Añu Vieju, las comías los días de Navidá y Añu Nuevu. Tampocu no faltarun los regalus que le trujun a los dagalis (y no tan dagalis) "El Tamborileru" (la nochi el 24 de Diciembri) y "Los Reyis" (la nochi el 5 d'Eneru).

Lo que no ha podíu habel esta vés, pol mé'l andanciu, han síu las cabalgatas de los Reyis, anqe esu no quitó pa que pudiesin repartil los sus regalus. Tampocu no faltarun las lucis de Navidá, pa alegral un pocu los nuestrus pueblus.

Asina acabó el Añu el Andanciu y apencipió el añu 2021. ¡FELÍS AÑU NUEVU!

Los trajis de charru d'El Rebollal ya tienin el su libru

Portá el libru

 Las vestimientas tradicionalis de la comarca d'El Rebollal ya tienin un libru que palra d'ellas. Esti libru, con el nombri de "Indumentaria tradicional en El Rebollar" (Vestimientas tradicionalis n'El Rebollal) ha síu escritu por el peñaparderu (metá robreanu) Raúl Benito Calzada, que ganó una de las becas d'investigación Ángel Carril pa investigal, justu, esti tema de los nuestrus trajis de charru. 

Asina, en algu más de 100 páginas, Raúl mos chalra alreol de las distintas partis de los nuestrus trajis de charru, lo mesmu de hombri comu de mujel, tó ellu cona compaña d'afotus a colol, y unas espricacionis enas que no podía faltal la nuestra palra d'El Rebollal, pos tóas las partis de los trajis de charru tienin el su nombri en la nuestra palra, y muchus de los informantis del autol, de los que están escritas angunas espricacionis, entovía palran la nuestra lengua.

El libru, pubricáu por el "Instituto de las Identidades" (Istitutu las Identiadis), jué presentáu ena Diputación de Salamanca el juevis 17 de Diciembri d'esti Añu el Andanciu que ha síu el 2020.