Inviernu 2023 - 2024 (1). Las Navidadis pasarun pol El Rebollal

 La comarca d'El Rebollal tamién celebró las Navidadis al su mó y manera. 

Árbul de Navidá

En los nuestrus cincu pueblus (Navafrías, Payu, Peñaparda, Robrea y Villarrubias) no faltarun los adornus y lucis, lo mesmu en las callis qu'en las cassas. Tampocu no faltó la genti que güelvi n'esti tiempu a pasal las fiestas en familia.

Los villancicus tamién estuvun, además d'en las misas señalás, en los conciertus que dierun en Navafrías (9 de Diciembri) y Peñaparda (23 de Diciembri) los del grupu "El Charaíz Redondo" de Guinaldu.

Tampocu no faltarun los regalus que mos trujun El Tamborileru (pa la Nochigüena, el 24 de Diciembri) y Los Reyis (nel su día, el 6 d'Eneru), éstus últimus con las sus cabalgatas en tolus pueblus.

Las que pasarun sin paralsi juerun, comu tolus añus, la Loterías de Navidá y del Dagal, que ná más que mos dejarun anguna "pedrea". Pa otru golpi.

NOTA: toas las afotus son de Peñaparda (Esti añu no pudi sacal de los otrus pueblus. Pa'l sotru añu, más y mejol)

Adornus en las callis

Grupu El Charaíz Redondo

Ya vienin Los Reyis

Los Reyis dandu los regalus

Pasarun las "Navidadis el Andanciu"

Peñaparda estrenó lucis

 Cona vesita los Reyis Magus, la nochi el 5 d'Eneru y la misa los Reyis al sotru día acabarun las celebracionis d'estas "Navidadis el Andanciu" conas que se da la bienvenía al Inviernu, se despidi el "Añu el Andanciu" y se da la bienvenía a al Añu Nuevu. 

Asina, entri los días 24 de Diciembri y el 6 d'Eneru las gentis d'El Rebollal pudun profital de las típicas cenas de la Nochigüena y Añu Vieju, las comías los días de Navidá y Añu Nuevu. Tampocu no faltarun los regalus que le trujun a los dagalis (y no tan dagalis) "El Tamborileru" (la nochi el 24 de Diciembri) y "Los Reyis" (la nochi el 5 d'Eneru).

Lo que no ha podíu habel esta vés, pol mé'l andanciu, han síu las cabalgatas de los Reyis, anqe esu no quitó pa que pudiesin repartil los sus regalus. Tampocu no faltarun las lucis de Navidá, pa alegral un pocu los nuestrus pueblus.

Asina acabó el Añu el Andanciu y apencipió el añu 2021. ¡FELÍS AÑU NUEVU!

Los trajis de charru d'El Rebollal ya tienin el su libru

Portá el libru

 Las vestimientas tradicionalis de la comarca d'El Rebollal ya tienin un libru que palra d'ellas. Esti libru, con el nombri de "Indumentaria tradicional en El Rebollar" (Vestimientas tradicionalis n'El Rebollal) ha síu escritu por el peñaparderu (metá robreanu) Raúl Benito Calzada, que ganó una de las becas d'investigación Ángel Carril pa investigal, justu, esti tema de los nuestrus trajis de charru. 

Asina, en algu más de 100 páginas, Raúl mos chalra alreol de las distintas partis de los nuestrus trajis de charru, lo mesmu de hombri comu de mujel, tó ellu cona compaña d'afotus a colol, y unas espricacionis enas que no podía faltal la nuestra palra d'El Rebollal, pos tóas las partis de los trajis de charru tienin el su nombri en la nuestra palra, y muchus de los informantis del autol, de los que están escritas angunas espricacionis, entovía palran la nuestra lengua.

El libru, pubricáu por el "Instituto de las Identidades" (Istitutu las Identiadis), jué presentáu ena Diputación de Salamanca el juevis 17 de Diciembri d'esti Añu el Andanciu que ha síu el 2020.

El Rebollal celebró las Navidadis

Adornus ena Praza de Villarrubias

La nuestra comarca d'El Rebollal no faltó al su "rendevú" conas Navidadis, tiempu ésti, alreol el Solsticiu d'Inviernu, nel que las familias suelin arrecogelsi pa estal juntus esus días tan señaláus.

Asina, en tólus pueblus pudun velsi (unus más y otrus menus) las sus callis, comercius, tabernas y cassas conus adornus típicus d'esti tiempu: lucis, cintas, muñecus, achiperris,...

Tampocu no faltarun los personajis que trujun los presentis a dagalis y mayoris, comu "El Tamborileru" o "Los Reyis". Éstos últimus tuvun, en tólus pueblus, sus cabalgatas y su ratinu de dal los regalus a los dagalis.

Asina, con regalus, comías, misas, villancicus y otrus enréus típicus de las Navidadis, El Rebollal despidió el Añu Vieju y dió entrá al Añu Nuevu, el añu 2020.

NOTA: afotu de Payu emprestá por Verónica Mangas

Lucis ena Praza de Robrea

Cuartu de Peñaparda

Los Reyis en Payu

Los Reyis llegandu a Peñaparda

Las Navidadis pasarun por El Rebollal

La comarca d'El Rebollal tuvu, comu no podía sel menus, las sus fiestas de Navidá, fiestas enas que no pudun faltal lucis, adornus, villancicus y regalus.

Lucis de Peñaparda

Lucis de Villarrubias

Lucis de Robrea

Grupu "Flor de Jara"

En cuantis a las lucis, tólus pueblus pusun unas lucis especialis pa recordal a la genti el tiempu n'el qu'estabamus. Unus nel barcón el Cuartu, otrus tamién enas entrás del lugal, y angunus jasta enroscás enas farolas.

Los villancicus estuvun, sobri tó, en Peñaparda, andi los dagalis de la escuela estuvun cantandu a los agüelus de la residencia. Tamién, el día 26 de Diciembri, el grupu estremeñu "Flor de Jara" jidu una pequeña muestra de villancicus, esta vés enas escuelas viejas.

Tampocu no faltarun los regalus pa la genti, más que ná pa los dagalis, regalus que trujun, entri otrus, los Reyis o el Tamborileru.

Muestra d'achiperris antigus de Navafrías

Pa acabal, mental la muestra d'achiperris antigus que jidun en Navafrías. El su amu, José Antonio Leal, quiju con esta muestra apriendel a la genti cómu ha evolucionáu el hombri.

La Navidá tampocu no dejó premius enas luterías.

NOTA: afotu de Navafrías arrecogía de Navasfrías.net

"EL TAMBORILERU" dejó los sus regalus ena Nochigüena

"EL TAMBORILERU" pasó por El Rebollal esta Nochigüena dejandu regalus.

Comu tóas las Nochigüenas, "EL TAMBORILERU" pasó por El Rebollal dejandu la su bolsina de frutas y bombonis. En angunas cassas, jasta dejó anguna cosina más.

Tampocu faltarun esa nochi los villancicus (cántigus de Navidá) tocáus con los sus estrumentus: la gaita y el tamboril.

Dibuju de "EL TAMBORILERU"