Las vocis d'El Rebollal para los Votus del 20-D

El 20 de Diciembri, tamién la comarca d’El Rebollal va a estal representá en los Votus. Vos presentamus a los candidatus que, n’estus votus, son las vocis d’El Rebollal. Comu cosa curiosa, idil que dambus dos son candidatus al Senáu (papeleta colol naranja).

Susana Luengo Gallego (PODEMOS)

Susana Luengo Gallego
(PODEMOS)

De 44 añus, esta nieta y sobrina de robreanus es licenciá en Ciencias Políticas, con posgráu en Humanidadis, y doctorá en Estudios Ingleses Avanzados (Estudius Ingresis Alantráus). Además de la lengua oficial, palra inglés, francés, italianu y coreanu.

Perteneci a la asociación cultural Avatar’s y al Foro por la Memoria (Foru pola Mimoria). Entri otrus escritu, escribi nel blog “Farinatos por la Memoria”, además d’habel escritu angunus escritus d’investigación pa una revista coreana.

José Benito Mateos Pascual (PREPAL)

José Benito Mateos Pascual
(PREPAL)

Con 41 añus, vivi en Peñaparda y es hiju, nietu, bisnietu, tataranietu,... de rebollanus, prencipalmenti de Peñaparda (láu de la madri) y Villarrubias (láu del padri). Está dipromáu en Ciencias Empresariales (Ciencias Empresarialis). Además de la lengua oficial, palra leonés (nel mó y manera d’El Rebollal, la palra d’El Rebollal), y algu d’inglés y francés. Es, tamborileru, etnógrafu y escritol, con dos librus pubricáus: “Breve descripción de Peñaparda” (2002) y “El corral los mis agüelus” (2004). Tieni tamién angunus cuentus en “la palra” y ha dáu muchas chalras alreol de la palra d’El Rebollal y de la cultura tradicional d’El Rebollal.

Perteneci a la asociación Documentación y Estudio de El Rebollar y a la asociación Ciudadanos del Reino de León (Ciudadanus El Reinu de León).

Comu tamborileru y bailaol, está en drentru los grupus folclóricus de Peñaparda, el grupu Jálama de Payu y el grupu Arcendajas.

La campaña polus votus llega al Rebollal

Esti miércolis 9 de diciembri, la campaña pa los Votus del 20 de diciembri han llegáu a la comarca d'El Rebollal.

Susana Luengo, candidata al Senáu por PODEMOS (Podemus) ha llegáu a Robrea pa chalral alreol de las propuestas y problemas de la nuestra tierra. Pa jadel éstu, las presonas de PODEMOS han montáu un estalachi ena Praza la Costitución, han repartíu papelis entri la genti y han puestu angunus cartelis alreol de la Praza.

En Robrea, la candidata al Senáu por PODEMOS ha coincidíu con el candidatu, tamién al Senáu, del PREPAL (Partíu Regionalista el País Leonés), José Benito Mateos. Dambus dos candidatus al Senáu han podíu chalral de la nuestra tierra y de los sus problemas. Se da el casu de que dambus dos, lo mesmu Susana Luengo (PODEMOS) y José Benito Mateos (PREPAL) tienin las sus raícis n'El Rebollal: Susana de Robrea y José Benito de Peñaparda y Villarrubias.

Susana Luengo (PODEMOS) y
José Benito Mateos (PREPAL)

La genti de PODEMOS en Robrea

El panderu cuadráu ena arradiu

Esti sábadu, 5 de diciembri, el panderu cuadráu de Peñaparda ha síu unu de los protgonistas del programa "Tarataña", un programa de Radio 3 (Arradiu 3) alreol de la música folk y tradicional. Asina, al final del programa himus podíu oyel a Isabel Ramos y a la su madri, Eugenia González, tocandu un ajecháu (Isabel) y un salteáu (Eugenia), dambus dos sonis sacáus del discu "El panderu cuadrado de Peñaparda" (El panderu cuadráu de Peñaparda). El enlaci andi se puedi oyel el programa es: http://www.rtve.es/alacarta/audios/taratana/taratana-luar-na-lubre-sale-galicia-05-12-15/3394421/

Eugenia González ena portá el discu
"El pandero cuadrado de Peñaparda"

No es la primera vés que Peñaparda y el su mó y manera de tocal el panderu salin n'esi programa. El 19 de juliu, pol mé la Fiesta el Panderu, tó'l programa "Tarataña" estuvu dedicáu al panderu. Se puedi oyel en esti enlaci: Tarataña - Panderu cuadráu . A la sotra semana, el 25 de juliu, tamién el programa se jidu pregón de la muerti la Tia Gora, y apencipió el programa con una toná cantá pola mujerita. Lo podéis oyel en esti enlaci:Tia Gora ena arradiu

La palra y la fala hermanás en Payu

El pasáu Sábadu 14 de Noviembri tuvu lugal en la Cabaña El Caracolito de Payu una tardi dedicá a las lenguas propias de la Sierra de Gata: "a fala" (la legua propia del Val de Xálima, el Valli de Jálama, ena provincia Cáciris), y la "palra d'El Rebollal", de la nuestra comarca d'El Rebollal.

José Francisco Antúnez (izuierda)
 y Jose Benito Mateos (derecha)

Anguna de la genti qu'estuvu ena chalra

La música y el panderu tampocu faltarun

José Francisco Antúnez Naváis jué, de la asocación "A nosa fala", jue quien chalró alreol de "a fala", que se palra enos pueblus de San Martín de Treveju, Las Eljas y Valverdi del Fresnu. José Benito Mateos Pascual, tamborileru, escritol y etnógrafu, chalró alreol de la "palra d'El Rebollal".

Dambas dos chalras juerun alreol de la hestoria lo mesmu de la fala comu de la palra, además de contal un pocu cómu son. No faltó, comu no puedi sel menus, el pedil que las alministracionis (ayuntamientus, diputacionis,...) pongan más medius y voluntá de la su parti pa defendel esta riqueza cultural. Tamién se pidió que dambas dos lenguas las apriendan los dagalis en las escuelas, y que tóas las callis, caminus y cartelis de los pueblus estén señaláus, tamién en las palras localis. Hogañu, n'El Rebollal, ná más Robrea tieni los nombris de las callis en la "palra d'El Rebollal", y Peñaparda tieni señaláus angunus caminus.

En la chalra estuvun alreol de 30 presonas, que pudun preguntal y chalral tamién. Angunus de los qu'estuvun vinun dendi las provincias de Zamora y León.

En los periódicus d'interné tamién han publicáu alrel de estas chalras. estus son los enlacis con las noticias:

     - CIUDADRODRIGO AL DÍA: La "palra d'El Rebollal", protagonista en unas charlas sobre las lenguas propias
     - ENCIUDADRODRIGO.COM: Las lenguas autóctonas de la Sierra de Gata, a debate en El Payo
     - SALAMANCA24HORAS: Chalra sobre las lenguas propias utilizadas en la comarca de El Rebollar

El agua güelvi a las juentis, ríus y regatus d'El Rebollal

Dispués d'unu de los añus más secus que se recuerdan, el agua güelvi a correl polus regatus y ríus, y las juentis güelvin a manal.

Ríu de Peñaparda (primerus d'otubri)

Y es que juentis omu el Charail de los Chabarconis, en Peñaparda, s'han ensecáu de mó y manera comu no recuerdan ni los más viejus del lugal. Lo mesmu se puedi idil de los ríus y regatus, que han estáu cuasi secus, cuandu no secus del tó. Las afotus que van juntu a la noticia son una güena muestra de la sequeá que himus teníu esti añu n'El Rebollal.

La sequeá acabó a mediáus d'otubri, con las aguarrás caías en el puenti de la Virgin del Pilal (12 d'otubri) y al sotru fin de semana, con lo qu'el Tardíu ha apencipiáu con agua, comu es lo normal pa esti tiempu.

Ríu de Peñaparda (finalis d'otubri)

Lo tardi que ha caíu el agua esti añu tamién ha jechu qu'el tiempu de los jongus haiga veníu más tardi y con menus cantidá, anque la genti ha arrecogíu tartullus, jongus de los práus, güevus de rei, champiñonis y otrus jongus de los que se comin.

Fuegu en Peñaparda

El mes de setiembri mos truju a la comarca d'El Rebollal más d'un fuegu. El más grandi d'estus fuegus jué el de Peñaparda del 11 de Setiembri, que quemó alreol de 3 hestáreas.

P'apagal el fuegu, qu'apencipió nel lugal llamáu "El Centenillu", estaba cerquina de las antenas de los teléfonus de Los Cotorrus. P'apagalu vinun cuatru helicósterus, entri los qu'estaban los de Bodón y El Maíllu, además de los cochis de bomberus de Payu, Guinaldu y alreoris, y las brigás de la comarca.

El fuegu dendi El Castillu

Agostu 2015 n'El Rebollal

Comu en tólus lugaris de la Península, el mes d'agostu está acomolgaítu de cosas tamién n'El Rebollal. Estas son angunas de las prencipalis.

• JUEVIS, 6 d'AGOSTU (PAYU). V Festival "Sartén Charra". En drentru las sus fiestas d'agostu, nel pueblu de Payu se jidu la V Fiesta "Sartén Charra", nel qu'estuvun los grupus "Jálama" (Payu) y "El Charaíz Redondo" (Guinaldu), además de los tamborilerus Berna Pérez (Cabrerizos) y José Luis Benito (San Esteban de la Sierra). Esti añu se le dio la "Sartén d'Honol" a Verónica Mangas "Vero", la sartenera del grupu "Jálama". El conciertu de la nochi lo jidu el grupu "Tuntuniar".

Grupu "El Charaíz Redondo"

José Luis Benito, con Berna y Marta de bailaoris

Tuntuniar tocandu a la nochi

• DENDI'L JUEVIS 6 D'AGOSTU (SIERRA DE GATA). El fuegu que, dendi'l 6 d'agostu, quemó más de 8000 hestáreas ena Sierra de Gata tamién se barruntó n'El Rebollal. Además del cachinu que se quemó de Jálama y del montonáu de jumu que se veía nel cielu, las morceñas del fuegu cayerun enos pueblus d'El Rebollal. Las brigás de los fuegus de los nuestrus pueblus ayuarun a apagalu. El fuegu jidu que tuviesin que vadial los pueblus de Acebu, Joyus y Treveju.

Fuegu de la Sierra de Gata vistu dendi Peñaparda

• DOMINGU 9 D'AGOSTU (ROBREA). Homenaji a los muertus ena Guerra Civil nel Monolitu de Robrea. Comu tólus añus, la asociación "Documentación y Estudio de El Rebollar" jidu un homenaji a los preseguíus duranti y después de la Guerra Civil. Se jidu nel monolitu que hai a la entrá de Robrea, en viniendu de Ciarrodrigu.

• DEL VIERNIS 21 AL JUEVIS 27 D'AGOSTU (VILLARRUBIAS). Fiestas de Santu Ferinu. Villarrubias jidu las fiestas al su patrón, Santu Ferinu (26 d'agostu). Además del pinu, d'incierrus, capeas y verbenas, el acurdionista Raúl Diaz de Dios dió un conciertu la nochi el Lunis 24, conciertu nel que participó tamien el tamborileru José Benito Mateos "TXEBE". El Martis 25 se jidu la comía la paella nel Riufríu.

Raúl Díaz de Dios nel conciertu de Santu Ferinu

Los peñaparderus jidun la su Fiesta el Panderu

El pueblu de Peñaparda jidu, entri los días 24 y 25 de Juliu del 2015 (Vierni y Sábadu) la su Fiesta el Panderu, qu'esti añu llegaba a la númeru 16. La Fiesta el Panderu se jadi alreol d'esti estrumentu d'origin asturleonés, el panderu cuadráu, qu'en Peñaparda tieni de particulal el mó y manera de tocalu, con una porra comu la d'un tamborileru, mientris qu'en los demás lugaris andi se toca se toca con las manus.

El Viernis 24 hubu, nel Centru Cultural (escuelas viejas) una chalra alreol la naturaleza, chalra que dió Tomás Rodríguez Martín, de Mediu Ambienti.

El día grandi de la Fiesta el Panderu jué el Sábadu 25.

Pola mañana estuvu puesta la Feria d'Artesanía con puestus comu los quesus d'Hinojosa, turrón de L'Alberca, los panderus de la Andrea, un puestu de algrealis y mantéus veníu dendi'l Val de San Lorenzu (León) o la Joyería Tradicional de L'Alberca. Tampocu faltarun puestus de siempri comu los librus de la Nieves o las oyas y alajas de la Juani, ni los puestus de los dagalis. Además del mercáu, echarun unus bailis las dagalas del cursu de sevillanas.

A la tardi se jidu el Festival Folcloricu, alreol del cual da güeltas tóa la fiesta. En él estuvun, dispués del pasacallis, el grupu de dagalis de Peñaparda, el grupu "Federico Lozano" de Salamanca y el grupu de mayoris de Peñaparda. Esti añu no se pudu jadel el baili el Ofretoriu.

La fiesta terminó, ya de madrugá, con el conciertu el grupu folk "Baleo".

Grupu de los dagalis de Peñaparda

Los dagalis de Peñaparda bailandu

Grupu "Baleo"

Grupu "Federico Lozano" 

Mos dejó la Tia Gora

El pasáu Domingu 19 de Juliu, a pocus minutus de las dodi la nochi, murió la Tia Gora de Peñaparda, a los 110 añus y mediu (habría jechu los 111 el  d'Eneru).

Nacía en Peñaparda el 4 d'Eneru del añu 1905, Gregoria Benito Rodríguez, la Tia Gora, era una de las últimas mujeris rebollanas auténticas: entovía (y siempri) vestía al mó y manera tradicional; entovía (y siempri) ussaba la nuestra palra d'El Rebollal; tós las mañanas se la podía oyel cantal los sonis tradicionalis que l'aprendienrun cuandu era una dagala;... Y entovía, con 110 añus, sabía tocal el panderu cuandu lo tenía a manu.

La Tia Gora, el día que jidu los 110 añus

La noticia de la su muerti ha salíu en periódicus, arradius y televisionis, algu a lo que ya estaba acostumbrá en vía, pos tólus añus era noticia el su cumpriañus y son muchus los programas de telivisión andi salió, entri los que tenemus de mental el "Camín de Cantares" de la Telivisión Asturiana que, nel añu 2010 y de la mano de Xosé Ambás, estuvu dedicáu a la nuestra palra d'El Rebollal y al nuestru panderu, un programa nel que la Tia Gora jué una de las protagonistas prencipalis.

La Tia Gora mos dejú del mesmu mó y manera que había vivíu rodeá de la su genti y de la su familia. Enos útimus días, cuandu ya se barruntaba que se iba a il, juerun muchus los vedinus de Peñaparda que pasarun pola su casa a dali el últimu adiós, lo mesmu que juerun muchas las que estuvun nel intierru.

Con la su muerti se va, no sólu la mujel más vieja de Peñaparda, la mujel más vieja d'El Rebollal, la mujel más vieja la provincia de Salamanca, la mujel más vieja el Reinu de León, una de las mujeris más viejas d'España,.. Con ella se mos va una parti de la nuestra hestoria, una parti de la nuestra cultura, una de las personas que jadían de Peñaparda y d'El Rebollal algu especial pol el su caráuti, la su alegría y la su puerta siempri abierta pa quien quijiera chalral con ella.

Jasta siempri, Tia Gora.

El grupu "Jálama" de Payu, en la Charrá de Ciarrodrigu

Esti Sábadu 18 de Juliu jué, en Ciarrodrigu, la XXXVI Fiesta de la Charrada ("La Charrá de Ciarrodrigu"), quiciás la última que se jaga en Veranu. Esti añu la nuestra comarca d'El Rebollal estuvu representáu por el grupu "Jálama" de Payu.

El grupu "Jálama" jadiendu el pasacallis

El grupu más nuevu d'El Rebollal (se jidu nel añu 2011) bailó pol vés primera ena Charrá de Ciarrodrigu ena Praza Mayol (ya había bailáu añu 2012 en una "Charrá Chica" que se jidu pa los dagalis). A los sonis de la sartén de Verónica Mangas, y dirigíus por Verónica González y José Benito Mateos "Txebe", el grupu Jálama bailó la Jota, la Charrá segunda y el Fandangu y repicoteáu.

Juntu al grupu de Payu, estuvun nel tabráu los estudiantis de la escuela de folclori de Ciarrodrigu, "Poldo" con un grupu de la Sierra de Francia, el grupu de paléus de Vilvestri, tós tres de la provincia de Salamanca, los estudiantis de los bailis de la provincia de León de la escuela de Veranu y, comu grupus envitáus el "Rancho Infantil Facendas" (de Almerinsi, Portugal) y el grupu "Etnográfico Das Mariñas" (Galicia).

Bailandu encima el tabráu

La Encina Charra 2015, un premiu a la defensa de la cultura y la música tradicional, jué esti añu para Afrodisio Hernández "Afro", el tamborileru del grupu de paléus de Vilvestri.

AFOTUS: Alberto Vela (pasacallis) y Patricia Santamaría (tabráu)

Ríus y piscinas

Ya llevamus unus días de Veranu, y es agora cuandu apencipian a abrilsi las piscinas y la genti a il al ríu, pos esti principiu el Veranu es, sigún idin los sabius, el más calienti en los últimus 40 añus.

Piscinas naturalis de Riufríu

En tólus pueblus El Rebollal tenemus lugaris pa il a bañalmus y estal más frescus, o pa tomal el sol y tomalms algu. D'una punta a la otra d'El Rebollal tenemus:

 - La zona El Bardal, en Navafrías
 - El Charcu Palu y la Pesquera en Payu
 - Las Piscinas de Peñaparda
 - Las piscinas naturalis y La Pesquera de Riufríu, en Villarrubias
 - Las piscinas de Robrea

Piscinas y chiringuitu de Peñaparda

Comu cosa nueva, las piscinas naturalis de Riufríu se han jechu nuevas esti añu, y las inaugurarun el pasáu Juevis 2 de Juliu.

Asina que, sea cual sea el pueblu d'El Rebollal nel qu'estemus, tenemus la nuestra "praya" particulal, los nuestrus ríus y piscinas, muchu más naturalis, muchu más limpias y sin tantus afrontus.

Asina juerun los Sanjuanis 2015 n'El Rebollal

Dispués de San Silveriu en Peñaparda, los demás pueblus d'El Rebollal dierun la su bienvenía al Veranu y al su solsticiu por mé los Sanjuanis. Navafrías, Payu y Robrea jidun las fiestas al su patrón con misas, juegus, incierrus, capeas y verbenas en tólus pueblus, y aunguna otra cosina que muába d'un lugal a otru.

Pasacallis polas callis de Payu

Navafrías es el únicu pueblu d'El Rebollal andi no se poni el pinu, peru sí que se jadi el capazu la nochi San Juan. Además, esti añu hubu un encuentru pa uñil puesías y música, que jidu esa nochi un poquinu más mágica. Además de los juegus pa los dagalis, en Navafrías tuvun un campeonatu de fútbul sala y una muestra de magia.

En Payu s'escapó una de las vaquis nel incierru asna que, además del sustu que llevó la genti, la Guardia Civil tuvu que cuertal la carretera. Otras cosas emportantis juérun el levantamientu la Viga polus quintus, y el Capazu ena praza el lugal. Polu demás, en Payu jué nel únicu puebru d'El Rebollal andi se pudun vel, de mó y manera oficial, los bailis tradicionalis, pol mé el grupu de charru del lugal, el grupu "Jálama", que jidu'n pasacallis y enllenó el Centru Multiusus la mañana el domingu.

El grupu "Jálama" bailandu

Pa acabal, en Robrea tamién pusun el pinu los quintus y, comu una de las cosas prencipalis, se jidu una paella pa tóa la genti nel pabellón. La música tradicional tamién se pudu oyel, anque no juesi de mó y manera oficial, pol mé los tamborilerus de Robrea, que salierun a jadel la alborá polas callis del lugal.

Pinu de Robrea

Asina, con San Silveriu y los Sanjuanis, es comu se ha dáu la bienvenía al Veranu n'El Rebollal. Comu fiestas patronalis quean, pa últimus d'agostu, las de Santu Ferinu en Villarrubias (26 d'agostu).

San Silveriu truju l'alegría a Peñaparda

Comu tólus añus, el pueblu de Peñaparda celebró el Solsticiu y la llegá el Veranu con las sus tradicionalis fiestas de San Silveriu. Unas fiestas qe, sigún se cuenta nel lugal, han síu las fiestas con más genti en muchus añus.

El Viernis 19 de Juniu los quintus pusun el pinu, en un ritu verdaeramenti antigu y tradicional que vieni de antigu. El levantamientu el pinu estuvu animáu por una charanga, y la nochi por una discu-móvil.

El día grandi las fiestas, el Sábadu 20 de Juniu, día de San Silveriu, jué la misa al patrón, seguía d'incierru, capea y verbena cona orquesta "HOLD'EM". Esa mesma tardi, mientris la capea, se pudun oyel polas callis la gaita y el tamboril, que animarun a la genti a bailal jotas, charrás y, comu no puedi sel menus, los nuestrus ajecháu, salteáu y corríu-brincáu.

Las fiestas de Peñaparda acabarun el Domingu 21 de Juniu con incierru, capea y fuegus artificialis, que dierun la bienvenía al Veranu con unas gotinas d'agua.

El Pinu

Angunus de los Quintus 2015

No faltarun las vaquillas

Tampocu faltarun los bailis

La orquesta Hold'em animó las madrugás

Los fuegus pusun el fin a las fiestas

Procesión de San Silveriu

El Rebollal en Fiestas 2015

Comu tólus añus, cuandu llega esti tiempu los nuestrus pueblus se ponin las vestimientas de fiesta. Y es que jadin la fiesta el su Patrón cuasi tólus pueblus d'El Rebollal. Asina, Peñaparda celebra San Silveriu (20 de juniu) y del mesmu mó y manera, Navafrías, Payu y Robrea celebran los Sanjuanis (24 de juniu).

Pinu de Peñaparda. Añu 2014

En cogiendu, día por día, lo que hai enas fiestas, tenemus éstu.

VIERNIS 19 DE JUNIU

12:00   Juegus pa los dagalis (PEÑAPARDA)
17:00   Juegus popularis y más juegus pa los dagalis (PEÑAPARDA)
20:00   Levantamientu del pinu polus quintus del lugal (PEÑAPARDA)
23:00   Música con Disck Jockey (PEÑAPARDA)


SÁBADU 20 DE JUNIU

12:00   Misa a San Silveriu (PEÑAPARDA)
13:00   Incierru polas callis del lugal (PEÑAPARDA)
18:30   Capea (PEÑAPARDA)
23:00   Verbena con el grupu "HOLDEM" (PEÑAPARDA)


DOMINGU 21 DE JUNIU

13:00   Incierru polas callis del lugal (PEÑAPARDA)
18:30   Capea (PEÑAPARDA)
22:30   Fuegus artificialis


MARTIS 23 DE JUNIU

23:00   Capazu de San Juan jechu polus quintus (NAVAFRÍAS)


MIÉRCOLIS 24 DE JUNIU

12:00   Misa a San Juan (NAVAFRÍAS y ROBREA)
13:00   Vinu d'honol nel Cuartu (NAVAFRÍAS)
14:00   Paella nel pabellón (ROBREA)


JUEVIS 25 DE JUNIU

16:30   Juegus pa los dagalis n'El Bardal (NAVAFRÍAS)
19:30   Campeonatu de fútbul sala n'El Bardal (NAVAFRÍAS)


VIERNIS 26 DE JUNIU

19:00   Incierru pa los dagalis con carretonis ena Praza Ramos Andrade (NAVAFRÍAS)
20:00   Levantamientu del pinu polus quintus del lugal (ROBREA)
21:00   Levantamientu de la viga polus quintus del lugal (PAYU)
23:00   Magia por el "MAGO TOÑO" nel salón el Cuartu (NAVAFRÍAS)
23:00   Capazu (PAYU)
23:30   Verbena con el "TRÍO OBSESIÓN" (PAYU)
23:30   Discuteca-móvil por "DISCO TRÓPICO" (ROBREA)


SÁBADU 27 DE JUNIU

10:00 a 14:00   Juegus pa los dagalis nel frontón (ROBREA)
12:00   Incierru a caballu (NAVAFRÍAS)
13:00   Incierru a caballu (PAYU)
18:00   Capea (NAVAFRÍAS)
18:30   Capea (PAYU)
18:30   Capea ena Praza el Cañu (ROBREA)
23:00   Verbena por el grupu "HECHIZO" (NAVAFRÍAS)
23:30   Verbena con el "TRÍO MUSICAL HECHIZO" (PAYU)
23:30   Verbena con el grupu "PASIONES" (ROBREA)


DOMINGU 28 DE JUNIU

11:00   Misa a San Juan (PAYU)
12:00   Bailis charrus por el grupu "JÁLAMA" (PAYU)
12:00   Incierru a caballu (NAVAFRÍAS)
12:00   Incierru a caballu (ROBREA)
13:00   Conviti (PAYU)
17:00   Juegus pa los dagalis (PAYU)
18:00   Capea (NAVAFRÍAS)
18:30   Capea ena Praza Torus (ROBREA)

Comu no puedi sel menus, al tenel tres pueblus el mesmu patrón, San Juan, los días de fiesta s'ajuntan y esus días hai un montonáu de cosas a la mesma vés.

Es curiosu comu, en una comarca rica en bailis, bailaoris y tocaoris, nel únicu pueblu andi va a habel bailis charrus sea en Payu.

Tamién es curiosu que, en teniendu ena comarca una lengua propia, ningunu de los cartelis tieni escrita ni una palabra en la nuestra palra d'El Rebollal. A vel si nel mes d'agostu hai suerti...

Los votus n'El Rebollal

El pasáu domingu 24 de mayu juerun los votus pa escogel a los alcaldis y justicialis de los nuestrus pueblus, además de pa escogel los de las Cortis. Los resultáus en los nuestrus pueblus juerun éstus:

MUNICIPALIS 2015

NAVAFRÍAS

PP: 182 votus (51,41%)    -->   4 justicialis
PSOE: 166 votus (46,89%)    --> 3 justicialis

Brancus: 6 votus (1,69%)
Malus: 14 votus (3,80%)

El alcaldi de Navafrías será Esteban Alfonso González (PP)


PAYU

PP: 111 votus (35,69%)   --> 2 justicialis
PSOE: 198 votus (63,67%)   --> 5 justicialis

Brancus: 2 votus (0,64%)
Malus: 4 votus (1,27%)

El alcaldi será Agapito Pascual Silva (PSOE)


PEÑAPARDA

PP: 173 votus (73,31%)   --> 6 justicialis
PSOE: 52 votus (22,03%)   --> 1 justicial

Brancus: 11 votus (4,66%)
Malus: 12 votus (4,84%)

Será alcalesa Camila Vizarro Andrés (PP)


ROBREA

PP: 133 votus (36,44%)   --> 2 justicialis
PSOE: 226 votus (61,92%)   --> 5 justicialis

Brancus: 6 votus (1,64%)
Malus: 12 votus (3,18%)

Será alcaldi José Luis Varas Carballo (PSOE)


VILLARRUBIAS

PP: 159 votus (71,95%)   --> 6 justicialis
PSOE: 52 votus (23,53%)   --> 1 justicial

Brancus: 10 votus  (4,52%)
Malus: 2 votus (0,90%)

El alcaldi será Juan José Moreno Mateos (PP)

VOTUS PA LAS CORTIS 2015

NAVAFRÍAS

PP: 161 votus (44,72%)

PSOE: 161 votus (44,72%)

PODEMOS: 16 votus (4,44%)

CIUDADANOS: 8 votus (2,22%)

IU: 5 votus (1,39%)

UPyD: 3 votus (0,83%)

PCPE: 1 votu (0,28%)

PCAS-TC: 1 votu (0,28%)

PAYU

PP: 107 votus (35,43%)

PSOE: 154 votus (50,99%)

CIUDADANOS: 20 votus (6,62%)

PODEMOS: 8 votus (2,65%)

UPyD: 4 votus (1,32%)

PREPAL: 4 votus (1,32%)

IU: 1 votu (0,33%)

PEÑAPARDA

PP: 144 votus (61,54%)

PSOE: 62 votus (26,50%)

PODEMOS: 9 votus (3,85%)

CIUDADANOS: 7 votus (2,99%)

PREPAL: 3 votus (1,28%)

IU: 2 votus (0,85%)

VOX: 1 votu (0,53%)

ROBREA

PP: 145 votus (40,28%)

PSOE: 133 votus (36,94%)

PODEMOS: 44 votus (12,22%)

CIUDADANOS: 16 votus (4,44%)

IU: 6 votus (1,67%)

PCAS-TC: 6 votus (1,67%)

UPyD: 3 votus (0,83%)

VILLARRUBIAS

PP: 123 votus (60,00%)

PSOE: 54 votus (26,34%)

PODEMOS: 9 votus (4,39%)

CIUDADANOS: 7 votus (3,41%)

PREPAL: 2 votus (0,98%)

IU: 2 votus (0,98%)

PCPE: 1 votu (0,49%)

El total de votus de cá unu de los partíus n'El Rebollal es:

PP: 680 votus

PSOE: 564 votus

PODEMOS: 86 votus

CIUDADANOS: 58 votus

IU: 16 votus

UPyD: 10 votus

PREPAL: 9 votus

PCAS-TC: 7 votus

PCPE: 2 votus

VOX: 1 votu

TOTAL: 1433 votus

El PREPAL denuncia los bachis de la carretera entri Robrea y Saúgu

Bachis de la carretera entri Robrea y Saúgu

El PREPAL (Partíu Regionalista el País Leonés) ha denunciáu que la carretera entri Robrea y Saúgu está llena de bachis.

El partíu regionalista, pol mé un escritu, ha pedíu que las carreteras de la nuestra tierra sean decentis y dignas del sigru XXI.

Sin lús y sin teléfonu

El pasáu miércolis 29 d'Abril golvimus a quealmus sin lús en aungunus de los pueblus d'El Rebollal. A las 9 la mañana, sin estal pregonáu, cuertarun la lús polu menus en Peñaparda y en Payu, anque la golvierun a dal al meyudía.

Peru esti corti de lús truju, en Peñaparda, un cuerti tamién de los teléfonus móvilis de las compañías de Movistar y Yoigo. Las gentis con teléfonus de dambas dos compañías de teléfonu estuvun sin podel ussalu dendi el miércolis a las 9 la mañana jasta'l viernis 1 de Mayu a las 3 de la tardi. En total, los peñaparderus (y los vesitantis) estuvun más de dos días sin podel ussal el teléfonu.

Murió la Tia Josefa, la centenaria de Payu

Tia Josefa

Pocus días dispués de jadel los 100 añus, murió la Tia Josefa de Payu. Sigún la genti que la conocía, ya había cumpríu la su ilusión de llegal a los 100. Y asina jué el pasáu 21 de marzu.

Josefa Martín Mateos, la Tia Josefa murió el 27 de marzu. El intierru jué al sotru día nel ciminteriu de Payu, jechu andi estaba el antigu castillu.

Güelvi la nievi

Esti lunis 23 de Marzu, la nievi golvió a presentalsi n'El Rebollal de repenti, pos no estaba anunciá polus servicius el Tiempu.

Asina, anque cuasi se pusu a la tardi (cayó jasta granizdu), en cuantis se pusu el sol apencipió a neval con juerza, cumpriendu lo que idi el reflán, esu de que "la nievi es mú vergonzosa" y no sali de día.

Estuvu nevandu jasta bien entrá la madrugá, y queó cuajá la nievi enos tejáus, carreteras, caminus y veréas peru, pol mé el pocu fríu, a media mañana ya s'había quitáu cuasi tóa en Peñaparda. En Payu, pol mé d'estal algu más altu, ha duráu un poquinu más.

Comu muestra de la nievi d'anochi, aquí vos deju estas afotus.

NOTA: La afotu de Payu, emprestá por Verónica Mangas

Nevandu en Peñaparda a la nochi 1

Nevandu en Peñaparda a la nochi 2

Peñaparda a la mañana 1

Payu a la nochi

Peñaparda a la mañana 2

Peñaparda a la mañana 3

La Tia Josefa de Payu jadi 100 añus

Payu tamién tieni la su centenaria. Josefa Martín Mateos, la Tia Josefa, ha jechu los 100 añus esti 19 de marzu ena su cassa de Payu.

La Tia Josefa de Payu, 100 añus

Con 4 hijus, 9 nietus y 11 bisnietus, Josefa s'uñi asina al "Clús de los Cientu" d'El Rebollal, cá vés más grandi, del que la Tia Gora de Peñaparda, conos sus 110 añus jechus en eneru, es la más conocía. Tamién de Payu es la Tia Jandra, que con 103 añus vivi en Moraleja (Cáciris).

NOTA: Afotu emprestá por Verónica Mangas (a la isquierda ena afotu)

Conteneol quemáu en Peñaparda

Paici que el fuegu le ha cogíu querencia a Peñaparda y, ena madrugá del domingu 15 al lunis 16 hubu otru fuegu.

Conteneol quemáu

Esta vés jué un conteneol de los de la basura, de los qu'estaban al láu la taberna "El Cruce". Polu qu'idi la genti paici que anguién echó cenida nel conteneol y acabó quemándosi con tólu que había en drentru. Ena afotu se puedin vel las botellas quemás.

Fuegu en Peñaparda

El mes de Marzu ha apencipiáu mú "calienti" en Peñaparda. Han síu dos fuegus en dos días.

El primeru, y más grandi, jué dendi las cuatru la tardi el lunis 9 de Marzu jasta ya entrá la madrugá el día 10. El fuegu quemó robris, pinus y matorralis en La Estacá, el Valli Zaós y la Juenti Canal. Apagandu el fuegu estuvun cambionis de bomberus de Payu, Ciarrodrigu y Guinaldu, además de brigás contra fuegus y el cochi-pompa el ayuntamientu de Peñaparda. Tamién llegarun dos helicósterus, anque al llegal ya llevaba el fuegu más de dos horas chiscáu.

El segundu, más chicu, jué a la mañana del martis 10 nun güertu nel Guijarru, ena carretera entri Peñaparda y Payu. A apagalu vinun un helicósteru, el cambión de Payu y el cochi-pompa el ayuntamientu Peñaparda.

Pol mé d'estus dos fuegus, se ha echáu un bandu dendi el Cuartu prohibiendu jadel fuegus y quemas nel campu, jasta teniendu premisu de quema.

El de Peñaparda jué unu de los seis fuegus que hubu el lunis en la provincia de Salamanca.