L'Alicia ya ussa la nuestra palra d'El Rebollal

D'isquierda a derecha: Álvaro de Benito (editol),
José Manuel Jerez (justicial) y José Benito Mateos
(tradustol)

      El pasáu viernis, 20 de Jebreru del 2026, se presentó en Ciarrodrigu un nuevu libru en la nuestra palra d'El Rebollal: "Lo que jidu l'Alicia nel País de las Maravillas", la tradución a la nuestra palra del famosu libru "Alice in Wonderland", de Lewis Carroll. 

     En la chalra, qu'estuvu presentá pol José Manuel Jerez, justicial del Ayuntamientu Ciarrodrigu (tamién estuvu otra justiciala, Carmen Lorenzo), estuvun el tradustol, José Benito Mateos "Txebe", y l'editol, Álvaro de Benito. Dambus dos estuvun palrandu de lo qu'es el libru, de lo importanti qu'es sacal librus en las palras jechas de menus, de los problemas alreol de la tradución d'esti libru, y otrus temas alreol del libru y de la palra.

     En la chalra, que se jidu en la Cassa la Cultura de Ciarrodrigu, estuvun alreol de 30 presonas, qu'apraudierun a la final la chalra y se quearun a la rubrica los librus pol el tradustol y pol l'editol.

     "Lo que jidu l'Alicia nel País de las Maravillas", sacáu pola editorial Libros desde Tuma, es el segundu libru que saca en la nuestra palra esta editoral, que ya sacó "El Principinu" nel añu 2021. Dambus dos librus jadin asina, compaña, a "El corral los mis agüelus", el primel libru que se jidu en la nuestra palra d'El Rebollal, del añu 2004.

     La presentación de "Lo que jidu l'Alicia nel País de las Maravillas" ha síu una noticia emportanti, y unus cuantus de periódicus han palráu d'ella:

• Alicia viaja al País de El Rebollar: <<Solo los robles son más nuestros que la palra>> (La Gaceta de Salamanca, 20 de Jebreru del 2026)
• Traducción de <<Alicia en el País de las Maravillas>> una forma de visibilizar la palra de El Rebollal de Salamanca (Noticias Ciudad Rodrigo, 20 de Jebreru del 2026)
• El dialecto del palra se pone en valor y reivindica con la traducción de Alicia en el País de las Maravillas (Salamanca RTV al Día, 20 de Jebreru del 2026)
• Presentada en Ciudad Rodrigo L'Alicia nel País de las Maravillas, nueva publicación en la palra d'El Rebollal (Diario de Salamanca, 20 de Jebreru del 2026)
• Alicia habla <<la palra>> del Rebollar en Ciudad Rodrigo (La Gaceta de Salamanca, 20 de Jebreru del 2026)
• Alicia habla <<la palra>> del Rebollar: literatura para salvar una lengua (Actualidad Literatura, 21 de Jebreru del 2026)

Tó preparáu pa la presentación

La genti del públicu n'un momentu la chalra

Afotud'adispués de la charla

El nuevu obispu, de vesita n'El Rebollal

 El nuevu obispu de las diócesis de Salamanca y de Ciarrodrigu, José Luis Retana, quiju jadel una vesita a la nuestra comarca d'El Rebollal antis de jural el su cargu comu obispu. Justamenti, l'obispu escogió'l pueblu de Villarrubias p'apencipial su tiempu comu obispu de Ciarrodrigu. 

Ilesia y campanariu de Villarrubias

Asina, el pasáu viernis 7 d'Eneru, l'obispu entró en la su nueva diócesis pol Villarrubias, el primel pueblu de la diócesis de Ciarrodrigu en viniendu de Prasencia, sillón que ha dejáu pa venil a Ciarrodrigu y a Salamanca, cumpriendu asina cola tradición de paral nel primel pueblu de la su nueva diócesis.

No faltarun a la cita, jecha en la ilesia San Pedru Apóstol de Villarrubias, l'alcaldi del lugal, Juan José Moreno, ni tampocu los curas y moljas de los diferentis alciprestalgus de la diócesis (Villarrubias está en drentru del alciprestalgu del Altu Águeda). Tampocu no faltarun las gentis del lugal y del restu d'El Rebollal, que quijun acercalsi a conocel al nuevu obispu de Ciarrodrigu.

"El Principinu" tamién sabi palral

"Le Petit Prince", el personaji creáu pol Antoine de Saint-Exupéry nel añu 1943, tamién palra rebollanu.

Portá de "El Principinu"

Y es qu'el pasáu miércolis, 24 de Noviembri del 2021, se presento en la Casa Cultura de Ciarrodrigu la tradución a la nuestra palra d'El Rebollal d'esti crásicu de la Literatura Universal. El nombri escogíu pa la tradución es "El Principinu", y ha síu jecha pol José Benito Mateos Pascual, "Txebe" (o sea, ésti qu'escribi estas palabrinas). En la presentación tamién estuvu presenti l'editol, Álvaro de Benito, de la editorial "Libros desde Tuma". 

D'esti mó y manera, la nuestra palra d'El Rebollal ya tieni dos librinus pubricáus n'ella, dambus dos escritus pol "Txebe": "El corral los mis agüelus" (añu 2004) y "El Principinu" (añu 2021). Asina, el rebollanu (el nuestru mó y manera d'ussal la lengua leonesa) entra en drentru'l grupu de lenguas que sabi palral "Le Petit Prince", alreol de 450, lo que jadi d'esti libru'l segundu más traducíu dispués de la Biblia. 

"Txebe" (izq) y Álvaro de Benito (dcha)
en Ciarrodrigu

La presentación de "El Principinu" ha llamáu muchu la atención a los medius de Salamanca y, asina, lo han sacáu comu noticia "La Gaceta de Salamanca" (tamién en la su seición "Viva mi Pueblo"), "Ciudad Rodrigo Al Día" y "Radio Águeda" (pica nel nombri pa vel las pubricacionis).

Pa la genti interesá, "El Principinu" puedi conseguilsi n'estus lugaris:

- Tahona "El Tamborileru" (Peñaparda)

- Librería Garzón (Ciarrodrigu)

- Librería "Letras Corsarias" (Salamanca)

- Güeb de la editorial "Libros desde Tuma"

El Rebollal se quea sin cajas

Caja de Peñaparda l'últimu día
antis d'afechal

 La comarca d'El Rebollal se quea sin cajas. N'un golpi más a los pueblus, la semana pasá afecharun las cajas de Navafrías (el miércolis 9 de Juniu) y Peñaparda (el juevis 10 de Juniu), dejandu asina a dambus dos pueblus sin servicius bancarius dispués de cuasi 50 añus.

Peru no sólu a ellus, pos era mucha la genti de los otrus pueblus d'El Rebollal que s'acercaban a dambus dos pueblus a jadel las sus cosas de dinerus.

Esti afechal de dambas dos cajas (de la antigua Caja Duero) s'ha uñíu a las ya afechás de Robrea (tamién de Caja Duero) y las de Payu y Villarrubias (de Caja Rural), dejandu asina a esti rinconinu faltu d'esti serviciu.

Caja de Peñaparda ya afechá

Sigún idi la empresa (de la que no vamus a jadel propaganda), van a seguil dandu serviciu en Guinaldu con un agenti (o lo qu'es lo mesmu, tampocu no va a sel una oficina normal). Y polus pueblus (no sabemus si pol tós) pasará un cambión una vés al mes. Pa lo demás, habrá de il a Ciarrodrigu entri 30 y 50 km, sigún el pueblu.

Cuertá la carretera de Ciarrodrigu

La carretera entri Ciarrodrigu y Coria, la C-526, estará cuertá pol un mes, dendi'l 22 d'Otubri (lunis) jasta'l 23 de Noviembri (viernis) pol mé'l arregru que van a jadeli. 

Carretera cuertá nel Empalmi

El cachu qu'está cuertáu es el que va dendi'l Empalmi de Peñaparda (km. 34'600) jasta la pista que va a Payu, antis de llegal al Puertu Peralis (km. 41'600). Pol mé d'esti corti, el caminu a Coria y Cáciris pasa hogañu pol Peñaparda y pola metá de Payu.

Al estal cuertá la carretera Ciarrodrigu ha jechu que pasin tamién los cambionis por dambus dos pueblus. En Payu, los problemas enas callis han jechu que haigan teníu de ponel semáforus a la entrá y a la salía del lugal, de mó y manera que no puéan encontralsi dos cambionis en drentru el pueblu.

Esti cachu es unu de los tres que van a arregral, pos está pensáu arregral tóa la carretera entri Robrea y el Puertu Peralis. El últimu arregru se jidu ya hai unus 25 añus, cuandu pasó por El Rebollal la Vuelta a España.

El grupu "Raícis del Águeda" lleva a los tabráus la nuestra palra

La nuestra palra d'El Rebollal, el mó y manera que tenemus n'El Rebollal d'ussal la lengua leonesa, tieni nuevus defensoris. Esta vés se trata del grupu "Raícis del Águeda" que, rebujandu la nuestra palra con las vestimientas y bailis tradicionalis, ha jechu una comedia llamá "Nuestras Raícis", comedia de la que ya han jechu dos representacionis. 

Procesión cona Virgin

La primera representación jué el pasáu 13 d'Agostu, lunis, nel pabellón de Robrea. Jué tanta la genti que jué a vela que muchus de los que s'arrimarun a Robrea no pudun entral nel pabellón (entri ellus, esti qu'escribi estas palabrinas).

La segunda representación jué hai unus días, el sábadu 20 d'Otubri, nel Teatru de Ciarrodrigu (d'andi son las afotus). Otra vés, hubu mucha genti viendu lo que, encima el tabráu jadían los miembrus el grupu. Las comedias gustarun muchu, y la genti salió mú contenta el Teatru.

Lavandu nel regatu

Bailandu ena matancia

Las comedias se jadin en sieti partis, que jadin un recorríu polas tradicionis de Robrea, dendi el ofretoriu a la Virgin el Rosariu jasta las bóas, pasandu por el laval la ropa nel regatu, la ronda, los ratus de los hombris ena taberna, la siega o la matancia, ussandu pa ellu los bailis tradicionalis de Robrea y la palra d'El Rebollal en las chalras de los personajis.

El grupu "Raícis del Águeda" está jechu con gentis, además de Robrea, d'otrus pueblus comu Payu y Guinaldu. Anque no han confirmáu si van a jadel las comedias en más lugaris, es algu que, de seguru, puéa sel n'un tiempu no mú lejotis.

Los sonis de la sartén relindarun polus rinconis de Payu nel su Festival

Tamborilerus nel pasacallis

Las callis y la Praza de Payu golvierun a enllenalsi con sonis y bailis pol mé el su festival folclóricu, la Sartén Charra, qu'esti añu 2018 llegó jasta'l númeru 8. Asina, el pasáu 2 d'Agostu, los sonis y tonás de la sartén, la gaita y el tamboril, las castañuelas y el acurdión se pudun oyel en drentru el festival d'esti añu.

La tardi apencipió con el tradicional pasacallis, nel que tóa la genti corrió las callis del lugal vestíus conas sus vestimientas tradicionalis.

Grupu "Jálama" nel pasacallis

Al Son del Tamboril

Ya ena Praza, los grupus jidun los sus bailis. Apencipió el grupu "Jálama" de Payu que, a los sonis de la sartén de Verónica Mangas, "Vero", bailó "La Jota", "Charrá segunda" y "El Fandangu y repicotéu". Adispués le tocó la vés a Berna Pérez, de Cabrerizus que, a la gaita y el tamboril tocó, entri otras cosas, "La Rosca". El sotru grupu, dendi Ciarrodrigu, jué "Al Son del Tamboril", nel que Juan José Sánchez, "Juanjo", tocó, tamién a la gaita y el tamboril, angunus sonis tradicionalis de la provincia de Salamanca. Golvió a subil el grupu "Jálama" que, esta vés a la gaita y el tamboril de José Benito Mateos, "Txebe", bailó la "Jota de dos pasus" y "La botella". P'acabal, una pareja de cá grupu bailó una charrada y una jota, esta vés a la gaita de Txebe (la charrada) y de Juan Antonio Muñoz, "Juanan" (jota).

Grupu Jálama

Berna Pérez y los sus bailaoris

Esti añu, se premió cona Sartén d'Honol a Maribel Barrado, maestra de cantu y percusión enos cursus de Guinaldu, andi ha apriendíu a tocal a la genti estrumentus comu el panderu, la pandereta,...

Maribel Barrado, Sartén d'Honol 2018

Al Son del Tamboril

Ya a la nochi, el final al festival lo pusu Raúl Díaz de Dios con el su acurdión, en un conciertu nel que tamién subierun, a acompañali con el acurdión Jesús Mangas y Agapito Pascual, dambus dos de Payu, y Antonio Rastrero (Navafrías), y con la gaita y el tamboril Berna Pérez y José Benito Mateos, "Txebe".

Comu otrus añus, el festival de Payu, comu compromisu ena defensa de la cultura tradicional, golvió a ussal la nuestra palra d'El Rebollal, la nuestra lengua leonesa, enos cartelis.

NOTA: afotus jechas por Rubén Mateos, menus la del grupu "Al Son del Tamboril" dendi'l tabráu, de José Benito Mateos

Grupu "Jálama" al tamboril

Baili entri tólus grupus

Raúl Díaz de Dios y otrus acurdionis

La palra d'El Rebollal
nel cartel de Payu

El grupu "Jálama" de Payu, nel II Festival Hispanu-Lusu de Ciarrodrigu

El grupu "Jálama" de Payu jué el pasáu 21 de Juliu, unu de los grupus protagonistas nel II Festival Hispanu-Lusu que se jidu en Ciarrodrigu comu remati a la Escuela de Veranu de Folclori. 

Pasacallis

Baju la batuta de Verónica Mangas "Vero" (la sartenera) y José Benito Mateos "Txebe" (el tamborileru), el grupu "Jálama" jidu un recorríu polus bailis jechus al rismu la sartén. Asina, encima el tabráu se pudun vel los bailis de "La Jota", "Charrá segunda" y "Fandangu y repicotéu".

Grupu Jálama ena Praza de Ciarrodrigu

Además del grupu de Payu, tamién estuvun encima el tabráu, ena Praza Mayol de Ciarrodrigu, los alunus de la Escuela de Veranu, el Rancho Folklórico Machinhatense (Oliveira de Azeméis, Aveiru, Portugal), la Asociación Cultura Tradición y Música Popular (Zamora, Reinu de Llión), el Grupo de Danzas Justo del Río (Burgus, Castilla) y la Asociación Folklórica Renacer (Badajós, Estremaúra).

NOTA: afotus emprestás por Beatriz Mateos (Payu, pasacallis) y Poli (Ciarrorigu, nel tabráu)

La palra d'El Rebollal relumbió tamién en Ciarrodrigu

La nuestra palra d'El Rebollal golvió a relumbial, esta vés nel Palaciu los Águila de Ciarrodrigu.

Cartel de la chalra
de Ciarrodrigu

Y es qu'el pasáu sábadu 9 de Juniu d'esti añu 2018 se jidu una chalra alreol de la lengua leonesa, en drentru la qu'está la nuestra palra d'El Rebollal. Asina, de la palra d'El Rebollal, además d'una pequeña espricación de cómu es, se pudun oyel las poesías "Jálama" y "El corral los mis agüelus", escritus y leíus por José Benito Mateos "Txebe" (esti que vos escribi estas cosinas). Txebe cantó, con el panderu de Peñaparda, "La rondaora", tamién ena palra d'El Rebollal.

Además de la palra d'El Rebollal, tuvun tamién el su tiempu otrus mó y maneras d'ussal la lengua leonesa. La parti Las Arribis jué contá por Carlos Javier Salgado, de Guadramiru, que jidu tamién un paséu polus nombris de lugal en lengua leonesa qu'entovía tenemus ena provincia Salamanca. La parti musical pa'l arribeñu la jidun Albert Calderón (gaita y tamboril), de Guadramiru, y Txebe (vós y pandereta), que cantarun "El burru de Villarinu". De la palra la Sierra Francia chalró David Panchuelo. Luis García, d'El Tejáu de Béjal, palró alreol la palra de la Sierra Béjal.

Un momentu de la chalra

Otrus mó y maneras de palral la lengua leonesa de juera de Salamanca tampocu faltarun. David Panchuelo, de Béjal, leyó la puesía "El Embargo", de Gabriel y Galán, escrita en jurdanu (qu'está en drentru el leonés oriental, lo mesmu que la palra d'El Rebollal). José Benito Mateos leyó alreol la jabla sajambriega, tamién leonés oriental de la comarca Sajambri (Llión). Dos dagalinas, Isabel y Beatriz, leyerun la "Caperucina Bermella", el cuentu la "Caperucita Roja" (Caperucina Colorá) escritu en senabrés (comarca de Sanabria, Zamora). P'acabal, María Pérez, de Riufríu el Órbigu (La Cepeda, Llión), leyó una puesía en defensa las encinas el Campu Charru, "Raigaños y ancinas", escrita nel mó y manera de palral la lengua leonesa ena Ribera el Órbigu.

Txebe y Albert cantandu
"El Burru de Villarinu"

Además de la música, los relatus y las puesías, Txebe y Luiso jidun a lo primeru una espricación alreol de la lengua leonesa. Tamién se pudun vel dos vídeus comu parti de la espricación de la lengua leonesa y de la parti de la palra d'El Rebollal, sacáus el documental alreol de la lengua leonesa "Llionés. De Senabria a El Rebollal", y del programa "Camín de Cantares" dedicáu a Peñaparda. Y, un poquinu más p'alantri, otru vídeu d'una toná cantá en patsuezu (Tsaciana, Llión/Asturies).

La chalra, ena qu'estuvun alreol de 40 presonas, jué organizá por el "Colectivo Ciudadanos del Reino de León" (CCRL, Grupu Ciudadanus El Reinu de Llión).

NOTA: afotu de "El Burru de Villarinu" emprestá por Agustín García (El Cabacu)

Chalra alreol la lengua leonesa

La genti s'acercó al Palaciu los Águila

Robrea y Peñaparda ena Charrá de Ciarrodrigu 2017

"El Fandangu" de Robrea

La XXXVIII Charrá de Ciarrodrigu, el sábadu 15 d'Abril, ha síu especial pa los grupus d'El Rebollal. Y es que esti añu han síu dos los grupus d'El Rebollal que han estáu presentis: el grupu "El Fandangu", de Robrea, y el grupu folclóricu de Peñaparda. Digu que ha síu especial porque, cuasi siempri, es ná más un pueblu u otru el qu'está, y esti añu han estáu dambus dos juntus.

Dispués del pasacallis, los primerus rebollanus que subierun al tabráu juerun los robreanus de "El Fandangu". Las tres parejas bailarun, al son de la gaita y el tamboril de José María, tres bailis: "Jota de dos pasus", "El Son" y "El Fandangu".

Justu dispués bailó el grupu de Peñaparda, al son del panderu d'Isabel Ramos. Las dos parejas bailarun el "Ajecháu", el "Salteáu" y el "Corríu brincáu".

Bailaoris de Peñaparda

Además de los grupus d'El Rebollal estuvun tamién de otrus lugaris, comu Ciarrodrigu, la Sierra Francia o Las Arribis, y d'otras provincias comu Cáciris o Güelva. El premiáu esti añu cona "Encina Charra" jué Diego Vacas, bailaol de Vilvestri, que cogi asina el relevu a Isabel Ramos, panderera de Peñaparda, a la que le dierun el premiu ena Charrá del añu pasáu.

Peñaparda, nel regresu de la Charrada al Sábadu Santu

Esti sábadu, 26 de Marzu, la Charrada de Ciarrodrigu golvió a jadelsi, dispués de angunus añus, el Sábadu Santu. El grupu folclóricu de Peñaparda estuvu ena que jué la XXXVII Fiesta de la Charrada, juntu a los grupus de Barruecupardu, Sierra de Francia, Valdecarrus, Arcadio de Barreras, Ciarrodirgu, Cañizal y la comarca La Guareña (dambus dos de Zamora).

El grupu de Peñaparda nel pasacallis

El grupu de Peñaparda, que jué en segundu lugal, bailó, al son del panderu d'Isabel Ramos "Isabelita", los bailis del Ajecháu, el Salteáu y el Corríu brincáu. Además, al son de la gaita y el tamboril de José Benito Mateos "TXEBE" se bailó el Ofretoriu.

Peñaparda tamién jué protagonista ena entrega de la Encina Charra, premiu que tólus añus se le da  genti relacioná con el folclori. Esti añu el premiu a síu pa Isabel Ramos, tocaera del panderu. El premiu se le dió Juan Tomás Muñoz, el alcaldi de Ciarrodrigu.

La Charrada, qu'esti añu se jidu metá ena Praza y metá nel teatru pol mé el agua, jué presentá por José Ramón Cid.

Afotu jecha por Patricia Santamaría

El grupu "Jálama" de Payu, en la Charrá de Ciarrodrigu

Esti Sábadu 18 de Juliu jué, en Ciarrodrigu, la XXXVI Fiesta de la Charrada ("La Charrá de Ciarrodrigu"), quiciás la última que se jaga en Veranu. Esti añu la nuestra comarca d'El Rebollal estuvu representáu por el grupu "Jálama" de Payu.

El grupu "Jálama" jadiendu el pasacallis

El grupu más nuevu d'El Rebollal (se jidu nel añu 2011) bailó pol vés primera ena Charrá de Ciarrodrigu ena Praza Mayol (ya había bailáu añu 2012 en una "Charrá Chica" que se jidu pa los dagalis). A los sonis de la sartén de Verónica Mangas, y dirigíus por Verónica González y José Benito Mateos "Txebe", el grupu Jálama bailó la Jota, la Charrá segunda y el Fandangu y repicoteáu.

Juntu al grupu de Payu, estuvun nel tabráu los estudiantis de la escuela de folclori de Ciarrodrigu, "Poldo" con un grupu de la Sierra de Francia, el grupu de paléus de Vilvestri, tós tres de la provincia de Salamanca, los estudiantis de los bailis de la provincia de León de la escuela de Veranu y, comu grupus envitáus el "Rancho Infantil Facendas" (de Almerinsi, Portugal) y el grupu "Etnográfico Das Mariñas" (Galicia).

Bailandu encima el tabráu

La Encina Charra 2015, un premiu a la defensa de la cultura y la música tradicional, jué esti añu para Afrodisio Hernández "Afro", el tamborileru del grupu de paléus de Vilvestri.

AFOTUS: Alberto Vela (pasacallis) y Patricia Santamaría (tabráu)

Más genti n'El Rebollal

El pasáu mes de diciembri se pubricarun los númerus de los habitantis enos pueblus, pol mé el INE (Istitutu Nacional d'Estadística).

Estus númerus mos idin que, nel total d'El Rebollal, somus más la genti que vivimus ena comarca. Himus passáu de los 2.045 habitantis (a 1 d'eneru del 2013) jasta los 2.061 habitantis (a 1 d'eneru del 2014). Es algu que mos llama la atención, mirandu que nel total la comarca de Ciarrodrigu ha perdíu 627 habitantis.

Peñaparda, unu de los pueblus
que ha perdíu habitantis

Mirandu un poquinu más de cerca los númerus, vemus que los pueblus que han aumentáu los sus habitantis han síu Navafrías (+1) y, más que ningunu, Robrea (+32). Del otru láu, han perdíu habitantis Payu (-8), Peñaparda (-7) y Villarrubias (-2).

Los númerus, pa los añus 2013 y 2014 son éstus:

NAVAFRÍAS     485 (2013)     486 (2014)
PAYU     376 (2013)     368 (2014)
PEÑAPARDA     391 (2013)     384 (2014)
ROBREA     488 (2013)     520 (2014)
VILLARRUBIAS     305 (2013)     303 (2014)

TOTAL     2.045 (2013)     2.061 (2014)

El Rebollal nel primel Festival Folclóricu d'Águeda

El domingu 19 se jidu, nel pueblu d'Águeda (al láu de Ciarrodrigu) el primel Festival Folclóricu, organizáu por Rubén Vegas Ratero y cona ayúa del ayuntamientu de Águeda. Nel Festival participarun gentis de la nuestra comarca d'El Rebollal, de los pueblus de Robrea, Peñaparda y Payu.

Angunus de los tamborilerus y bailaoris del Festival

Esi domingu, a la mañana, se jidu un pasacallis polas callis del lugal. Ya a la tardi, ena praza el pueblu, sería el Festival. Allí se pudun vel bailis de Payu y Peñaparda tocáus con gaita, tamboril, panderu y sartén por José Benito Mateos "TXEBE" (Peñaparda y Villarrubias). Comu no podía sel menus, los sonis de panderu y sartén estuvun cantáus ena nuestra palra d'El Rebollal.

Además de las tradicionis d'El Rebollal se pudun vel tamién los sonis y bailes de tamborilerus comu Alberto Vela "El Tutura" (La Maya), Jose "El Tamborino" (Casaris de Las Jurdis), además de los bailis del grupu de dagalis de "El Botón Charro" de Ciarrodrigu.

Nel pasacallis d'antis del festival se pudun oyel tamién a muchus tamborilerus de la comarca veníus dendi Robrea, Payu, Peñaparda, Saúgu, Ciarrodrigu, Alba de Yeltis, Casaris de las Jurdis y Villasbuenas de Gata (estus dos últimus de la provincia de Cáciris).

NOTA: afotu emprestá por José M. Pintado

Payu y Robrea estuvun ena Charrá de Ciarrodrigu

El Rebollal golvió a estal representáu ena Charrá de Ciarrodrigu, esti golpi conos grupus de Payu y Robrea.

Pola mañana, el grupu "JÁLAMA" de Payu, bailó la "Charrá segunda", "Fandangu" y "Jota" al son de la sartén. Nel tabráu compartierun lugal con el grupu de dagalis del Botón Charro de Miróbriga, el grupu d'ASPRODES, el grupu de mayoris del centru de día de Ciarrodrigu y los dulzainerus de la escuela de Macotera y Villamayol. Estus bailis de pola mañana se tuvun de jadel nel teatru pol mé la lluvia.

Pola tardi, esta vés ena praza, el grupu "EL FANDANGU" de Robrea, al son de la gaita y el tamboril, mostró encima el tabráu cómu se bailan "El Fandangu", la "Jota de dos pasus", "El Son" y "El Ofretoriu". Al láu los robreanus bailarun tamién los grupus "Sabor Escondidico" de Nuñomoral (Las Jurdis), "El Botón Charro de Miróbriga", un grupu de la Sierra Francia, un grupu de La Huebra (Campu Charru) y el grupu "Reija", de Langréu (Asturies), grupu esti que (comu no pué sel menus) cantó las sus tonás en asturianu, lengua de la mesma familia astur-lionesa que la nuestra palra d'El Rebollal.

La Encina Charra, premiu que tólus añus se da a una persona que haiga jechu algu polas tradicionis de Salamanca, se la han dáu esti añu al folclorista Nino Sánchez.

AFOTUS:
"JÁLAMA", sacá de www.ciudadrodrigoaldia.es
"EL FANDANGU", de www.redciudadrodrigo.com

Nuevu libru de José Alonso

El robreanu José Alonso presentó esti juevis, 12 d'eneru, el su libru "El ilustre canónigo Dr. D. Serafín Tella".

Sigui asina José Alonso dandu a conocel a genti famosa salía d'El Rebollal, dispués de la vía el obispu Sanchez-Matas. Serafín Tella nació en Robrea nel añu 1880, anque estuvu mú uñíu a Ciarrodrigu, andi jué profesol nel seminariu y canónigu, un cargu de la Ilesia, en tiempus el obispu Yurramendi.

Asina, pol mé d'esta relación con Ciarrodrigu, la presentación del libru se jidu ena Casa la Cultura de Ciarrodrigu. Alreol de 25 presonas pudun oyel las chalras de Francisco Javier Alonso Torrens, qu'escribió el prólogu el libru y jué vecinu de Serafín Tella, y de José Alonso Pascual, autol del libru.

José Alonso Pascual y Fco. Javier Alonso Torrens ena presentación el libru

Ésti es el tercel libru pubricáu pol José Alonso con temas d'El Rebollal, dispués de "Robleda. Crónica y descripción del lugar" (2002) y "El obispo robledano Fr. Antonio Sánchez-Matas (1762-1853)" (2004). Sigún el autol, el libru d'agora se puedi compral, al preciu de 12 eurus, nel kioscu y ena Librería Garzón, dambus dos en Ciarrodrigu, ena Librería Cervantes de Salamanca y nel cuartu de Robrea.

Nuevu libru con tonás d'El Rebollal

Esti lunis, 12 de diciembri, se presentó en Ciarrodrigu un libru con tonás d'El Rebollal: "Cancionero y formulario lúdico de tradición infantil en El Rebollar y otros lugares del occidente salmantino"

El robreanu Ángel Iglesias Ovejero presentó, ena Casa la Cultura de Ciarrodrigu, un libru con los cantaris de dagalis de la comarca d'El Rebollal y alreoris. Asina, además de los cántigus de los cincu pueblus d'El Rebollal (Navafrías, Payu, Peñaparda, Robrea y Villarrubias), esti libru tieni en drentru cantaris del suroesti de la provincia de Salamanca y del noroesti de la de Cáciris, comu Gata, Cadalsu,...

El libru (escritu pol Ángel Iglesias, ayudáu pola su mujel, Françoise Giraud y la su dagala Cécile Iglesias) tieni 686 cantaris repartíus en 258 páginas y en él se puedin leel dendi juegus jasta villancicus. Al final, comu acostumbra a jadel Ángel Iglesias enos sus librus, vieni un pequeñu vocabulariu conas palabras de la palra d'El Rebollal (el nuestru mó y manera de palral la lengua leonesa) que ussarun los dagalis enas tonás.

El libru, además d'ena Librería Garzón de Ciarrodrigu se puedi peil al Istitutu las Identiadis de la Diputación de Salamanca, nel corréu ides@lasalina.es