La palra d'El Rebollal, protagonista ena nueva edición de "El dialecto leonés"

La nuestra palra d'El Rebollal güelvi a sel protagonista. Esta vés, pol mé la nueva edición del libru "El dialecto leonés". 

José Benito Mateos "Txebe"
con el libru

La Cátedra de Estudios Leoneses (CELe) de la ULE (Universidá de Llión), dirigía por José Ramón Morala, ha jechu una nueva edición del libru que, nel añu 1906, escribió Ramón Menendez Pidal alreol de la lengua leonesa, "El dialecto leonés". Además d'una edición "facsímil" del libru (o sea, el libru aparenti a comu salió nel su tiempu), n'esta nueva edición se han metíu relatus nuevus, escritus y leíus polus sus autoris, relatus que corrin tólus lugaris andi se palra leonés enas tres provincias leonesas (Salamanca, Zamora y Llión).

Portá del libru

Y aquí es andi güelvin a sel protagonistas la nuestra palra y la nuestra comarca (la más al sur el Reinu de Llión), pos unu de los relatus vieni escritu ena nuestra palra. Se trata de "Caminus", de José Benito Mateos Pascual, "Txebe", tamborileru y escritol (o sea, el mesmu qu'escribi estas palabrinas). Además de los esritus, se han metíu los mesmus leíus polus sus autoris, y angunus sonis cantáus tamién en leonés, entri los qu'está un ajecháu cantáu, al panderu y ena nuestra palra, por José Benito Mateos, "Cuandu la dorra vieni / La rondaora". Los audius de Txebe y de los demás autoris, se puedin oyel pol mé d'unus códigus QR que vienin ena parti d'atrás el libru, además d'ena página de la Cátedra de Estudios Leoneses.

La nueva edición ha síu jecha pola editorial "El Búho Viajero".

NOTA: afotu del libru sacáu de la página de la CELe

La palra d'El Rebollal relumbió tamién en Ciarrodrigu

La nuestra palra d'El Rebollal golvió a relumbial, esta vés nel Palaciu los Águila de Ciarrodrigu.

Cartel de la chalra
de Ciarrodrigu

Y es qu'el pasáu sábadu 9 de Juniu d'esti añu 2018 se jidu una chalra alreol de la lengua leonesa, en drentru la qu'está la nuestra palra d'El Rebollal. Asina, de la palra d'El Rebollal, además d'una pequeña espricación de cómu es, se pudun oyel las poesías "Jálama" y "El corral los mis agüelus", escritus y leíus por José Benito Mateos "Txebe" (esti que vos escribi estas cosinas). Txebe cantó, con el panderu de Peñaparda, "La rondaora", tamién ena palra d'El Rebollal.

Además de la palra d'El Rebollal, tuvun tamién el su tiempu otrus mó y maneras d'ussal la lengua leonesa. La parti Las Arribis jué contá por Carlos Javier Salgado, de Guadramiru, que jidu tamién un paséu polus nombris de lugal en lengua leonesa qu'entovía tenemus ena provincia Salamanca. La parti musical pa'l arribeñu la jidun Albert Calderón (gaita y tamboril), de Guadramiru, y Txebe (vós y pandereta), que cantarun "El burru de Villarinu". De la palra la Sierra Francia chalró David Panchuelo. Luis García, d'El Tejáu de Béjal, palró alreol la palra de la Sierra Béjal.

Un momentu de la chalra

Otrus mó y maneras de palral la lengua leonesa de juera de Salamanca tampocu faltarun. David Panchuelo, de Béjal, leyó la puesía "El Embargo", de Gabriel y Galán, escrita en jurdanu (qu'está en drentru el leonés oriental, lo mesmu que la palra d'El Rebollal). José Benito Mateos leyó alreol la jabla sajambriega, tamién leonés oriental de la comarca Sajambri (Llión). Dos dagalinas, Isabel y Beatriz, leyerun la "Caperucina Bermella", el cuentu la "Caperucita Roja" (Caperucina Colorá) escritu en senabrés (comarca de Sanabria, Zamora). P'acabal, María Pérez, de Riufríu el Órbigu (La Cepeda, Llión), leyó una puesía en defensa las encinas el Campu Charru, "Raigaños y ancinas", escrita nel mó y manera de palral la lengua leonesa ena Ribera el Órbigu.

Txebe y Albert cantandu
"El Burru de Villarinu"

Además de la música, los relatus y las puesías, Txebe y Luiso jidun a lo primeru una espricación alreol de la lengua leonesa. Tamién se pudun vel dos vídeus comu parti de la espricación de la lengua leonesa y de la parti de la palra d'El Rebollal, sacáus el documental alreol de la lengua leonesa "Llionés. De Senabria a El Rebollal", y del programa "Camín de Cantares" dedicáu a Peñaparda. Y, un poquinu más p'alantri, otru vídeu d'una toná cantá en patsuezu (Tsaciana, Llión/Asturies).

La chalra, ena qu'estuvun alreol de 40 presonas, jué organizá por el "Colectivo Ciudadanos del Reino de León" (CCRL, Grupu Ciudadanus El Reinu de Llión).

NOTA: afotu de "El Burru de Villarinu" emprestá por Agustín García (El Cabacu)

Chalra alreol la lengua leonesa

La genti s'acercó al Palaciu los Águila

La nuestra palra d'El Rebollal, protagonista ena Casa las Conchas

El pasáu viernis, 9 de Jebreru, se jidu ena Casa las Conchas, en Salamanca, una jorná alreol la lengua leonesa, lengua en drentru la qu'está la nuestra palra d'El Rebollal.

Cartel de la jorná

 Comu no puedi sel menus, el mó y manera que tenemus n'El Rebollal d'ussal la lengua leonesa jué unu de los protagonistas de la tardi, pol mé José Benito Mateos Pascual, tamborileru y escritol que, además de chalral alreol de la lengua leonesa en general, chalró de la palra d'El Rebollal y leyó el su poema "Jálama" y cantó con el panderu "La rondaora". Txebe tamién acompañó, cantandu y a la pandereta, la versión en arribeñu d'"El burru de Villarinu", que tocó con gaita y tamboril Albert Calderón, de Guadramiru. Tamién alreol de la palra, se pudun oyel las opinionis apaecías nel documental alreol el llionés, comu la de Ángel Iglesias Ovejero, o oyel palral a la Tia Gora, nun cachinu el programa "Camín de Cantares" que, para la TPA (la Telivisión d'Asturies), grabó en Peñaparda, hai unus añus, Xosé Ambás.

El panderu tamién sonó

La nuestra palra d'El Rebollal tuvu comu compaña reflanis, cuentus y poemas leíus nel leonés d'otrus lugaris, comu mirandés (Miranda el Dueru, Portugal), cabreirés (La Cabreira, Llión), senabrés (Senabria, Zamora), patsuezu (Llaciana, Llión/Asturies), serranu (Sierra Francia y Sierra Béjal, Salamanca) o el ya mentáu arribeñu (Las Arribis, Salamanca). Carlos Javier Salgado chalró alreol de los nombris de lugal que, ena provincia Salamanca, vienin de la lengua leonesa.

Momentu de la chalra

N'esta tardi de lengua y literatura, estuvun, además de los ya mentáus José Benito Mateos (El Rebollal), Albert Calderón (Las Arribis) y Carlos Javier Salgado (Las Arribis), David Carrasco (Sierra Béjal), Gustavo Rubio (Zamora), Alejando de Vega (Llión, que leyó en patsuezu), María Pérez y Blanca del Río  (de Llión, que leyerun, dambas dos, en cepedanu).

La jorná, ena qu'estuvun alreol de 60 presonas, jué organizá por el Coleutivu de Ciudadanus el Reinu de Llión (CCRL), con el nombri de "Leonés. Asomándonos a la lengua de nuestros abuelos" ("Leonés. Ansomándomus a la lengua los nuestrus agüelus".

Estrenáu el doumental alreol de la lengua leonesa con El Rebollal comu protagonista

Esti miércolis, 1 de Noviembri, ena 7 de la telivisión de C. y León s'estrenó el segundu documental alreol de la lengua leonesa. N'esta segunda parti, llamá "Llionés. De Senabria a El Rebollal",  la nuestra comarca y la nuestra palra d'El Rebollal han síu protagonistas.

Portá del documental

Asina, además de la comarca zamorana de Senabria, la comarca d'El Rebollal ha síu una parti emportanti en drentru el documental, parandu enos pueblus de Robrea y Peñaparda.

Pa tóa la genti que no pudu velu en vivu, aquí vos deju el enlaci con el documental:
Llionés. De Senabria a El Rebollal

NOTA: afotu arrecogía de "León cultural"

La palra d'El Rebollal, protagonista ena segunda parti del documental alreol de la lengua leonesa

La nuestra comarca d'El Rebollal y la nuestra palra güelvin a sel protagonistas ena telivisión, esta vés pol mé un documental alreol de la lengua leonesa, en drentru la qu'está la nuestra palra d'El Rebollal.

Calli en Robrea

El documental se va a estrenal a las 21:30 (nuevi y media de la nochi) esti miércolis, 1 de Noviembri, ena 7 de la telivisión de C. y León. Jechu por RICI Comunicación & Promoción, esti documental jadi el númeru dos en drentru los dedicáus a la lengua leonesa, y tieni de nombri "Llionés. De Senabria a El Rebollal". Asina, los documentalis alreol de la lengua leonesa corrin tóas tres provincias el Reinu de León, ya que la primera parti jué alreol de la lengua ena provincia León, y esta segunda parti alreol de la lengua enas otras dos provincias leonesas, Zamora y Salamanca.

El adelantu del documental puedi velsi aquí: Llionés. De Senabria a El Rebollal