Añu El Andanciu, añu sin fiestas

 Esti añu 2020 será recordáu comu el Añu El Andanciu, el añu que se jidu juerti esi andanciu del "coronavirus COVID-19". Un andanciu que, además de llevalsi a mucha genti pol delantri, mos ha teníu metíus en las nuestras cassas, mos ha obrigáu a ussal las caretas, ha metíu el miéu nel cuerpu a mucha genti y, si palramus de divertilsi comu se ha jechu siempri, ha dejáu a los nuestrus pueblus sin fiestas.

Y es qu'esti añu los nuestrus pueblus se han quedáu "a velas venil" en cuantis a las fiestas. Las fiestas de siempri, las de los santus de los pueblus, se han queáu ná más enas misas al Santu pa que no s'ajuntasi la genti. Asina, San Silveriu, los Sanjuanis y Santu Ferinu han estáu esti Añu El Andanciu más solinus que nunca. Tampocu no se han jechu las fiestas que los nuestrus pueblus jadin nel mes d'Agostu en honol a los emigrantis. Y, en cuantis a la nuestra cultura tradicional, tampocu no s'han jechu ni la Fiesta el Panderu (Peñaparda) ni la Sarten Charra (Payu).

Esperandu qu'el sotru añu venga d'otru mó y manera, aquí vos deju angunas afotus d'otrus añus pa recordal las nuestras fiestas.

       

      

   

El andanciu n'El Rebollal

Esti añu 2020 va a passal a la Hestoria comu el "Añu el Andanciu" pol mé'l andanciu el coronavirus (COVID-19) que ha llegáu a tólus lugaris del Mundu. Tamién jasta la nuestra comarca d'El Rebollal.

Cambión de los bomberus

Esti andanciu ha jechu que, dendi'l sábadu 14 de Marzu, tó'l país esté en Estáu d'Alarma, comu un mó y manera de luchal contra'l virus, Estáu d'Alarma nel que entovía estamus y del que hogañu ya llevamus 60 días.

Con tó y con esu, el andanciu ha llegáu jasta tólus láus y, anque n'El Rebollal hai menus casus pol mé estal más lejus de los lugaris andi ha dáu con más juerza (comu, por ejempru, las capitalis y grandis ciudadis), tamién hai casus.

Los pueblus d'El Rebollal están desapartáus en dos zonas de salús: Robrea (Payu, Peñaparda, Villarrubias y Robrea) y Guinaldu (Navafrías), y los númerus de presonas enfermas son por zonas, no por pueblus. Asina, tenemus que, entri dambas dos zonas, hai un total de 21 presonas con el andanciu (13 ena zona de Robrea y 8 ena de Guinaldu, númerus arrecogíus de CiudadRodrigoAlDía).

Cochi de Peñaparda

En los nuestrus pueblus se están jadiendu cosas pa luchal contra el virus. Asina, los ayuntamientus están dandu mascarillas a la genti, y limpiandu los lugaris más vesitáus comu el médicu, las farmacias, los cuartus, los comercius y los cubus andi tiramus la pubela. Tamién dendi la Mancomunidá y la Deputacion de Salamanca pasan los cambionis de los bomberus a limpial los mesmus lugaris. D'esti mó y manera, el día que no passan los cambionis de los bomberus, passan los cochis de los pueblus.

El pasáu lunis, 11 de Mayu, la zona de salús de Robrea (Payu, Peñaparda, Villarrubias, Robrea, Saúgu, Cespedosa, Martiagu y Agallas) pasó a la llamá "Fase 1" de la güelta a la normalidá, siendu asina la única zona n'esa fasi de tóa la comarca de Ciarrodrigu.

Marzu se despidi con nievi

Corral en Peñaparda

El mes de Marzu d'esti Añu del Andanciu, el añu 2020, se despidi n'El Rebollal con nievi en tólus pueblus d'El Rebollal, con entri 5 y 15 cm de nievi.

Apencipió a neval la tardi del lunis 30 de Marzu, y a seguíu nevandu tóa la mañana del martis 31.

AFOTUS:
 - Peñaparda: José Benito
 - Payu: Maite y Bea
- Robrea: Myram

Tejáus y El Castillu de Peñaparda

Tejáus de Peñaparda

Calli en Peñaparda

Nevandu en Peñaparda

Nievi en Payu

Calli de Payu

Robrea con nievi

Payu Neváu

Menus y menus genti

El Rebollal sigui mermandu. Y es que, sigún cuenta el INE (Istitutu Nacional d'Estadística), cá vés somus menus genti n'El Rebollal. Asina, entri los cincu pueblus d'El Rebollal llegamus a 1.890 habitantis, 51 menus qu'el añu pasáu.

Cassa esbarrungá

Tólus pueblus d'El Rebollal han perdíu genti, menus Payu, andi apaecin tres habitantis más. Nel láu contrariu, Navafrías ha perdíu 24 habitantis.

D'esti mó y manera, los habitantis d'El Rebollal se repartin asina (entri paréntesis, lo que han variáu):

Navafrías   436  (-24)
Payu   338 (+3)
Peñaparda   353  (-11)
Robrea   492  (-7)
Villarrubias   271  (-12)

La España de Laura Ester Ramos gana el oru nel campeonatu d'Uropa

Laura Ester Ramos, con las sus raícis nel pueblu de Peñaparda, ha güeltu a ganal una medalla cona seleción d'España de "watelpolu", andi juega comu primera portera. 

El equipu de watelpolu mostrandu
las medallas d'oru

Esta vés, la medalla qu'ha ganáu el equipu es la medalla d'oru nel Campeonatu d'Uropa, que s'ha jechu ena ciudá de Budapest, Hungría, ganandu a Rusia ena final por un resultáu de 13-12. Terceras quearun las dagalas del equipu de cassa, Hungría.

Laura Ester con el premiu a la
mejol jugaora del añu

Con esta nueva medalla el equipu español ha ganáu tamién el su billeti pa los Juegus Olímpicus, qu'esti añu van a sel en Tokiu (Japón).

A Laura le dierun tamién el premiu comu mejol jugaora del añu, un premiu más de añuil al montonáu que lleva, entri medallas y premius propius, dendi las Juegus de Londris (Reinu Uñíu), Juegus de los qu'el equipu español se truju la medalla de prata.

NOTA: afotus jechas de la telivisión Teledeporte, de RTVE

Ardierun las Luminarias n'El Rebollal

Los pueblus de Robrea y Peñaparda jidun las sus Luminarias a San Sebastián, antañu fiesta grandi en los pueblus d'El Rebollal, y que hogañu ha quedáu ena nochi y madrugá de la Luminaria.

Luminaria de Peñaparda

Asina, la nochi del 18 al 19 d'Eneru, dambus dos pueblus jidun las sus Luminarias, alreol de las cualis se jidu la fiesta, ena que no faltarun la comía y la bebía.

Aprovehandu la Luminaria

San Sebastian es unu de los "santus del gorru", llamáus asina por jadelsi nel Inviernu. Una fiesta que ajundi las sus raícis ena nochi de los tiempus.

Payu y la su lucha polus médicus de los pueblus

Concentración del sábadu 11

El pueblu de Payu ha cogíu la bandera de la lucha polus médicus de los pueblus, protestandu polus planis "de futuru" de la Junta de C. y León.

Y es que, dendi Valladolís, tienin un pran pa qu'haiga de pedil cita con el médicu pa que te pueda atendel, dejandu asina a los pueblus sin médicu a diariu, y jadiendu más difícil el vivil en ellus, lo mesmu a dagalis, a la genti nueva o a los viejus. Esi programa "de futuru" quierin probalu, primeru, ena comarca d'Alisti, ena provincia leonesa de Zamora y, "si va bien", ponela en tóas las provincias de la actual autonomía, lo mesmu en las tres provincias leonesas (Salamanca, Zamora y León) comu en las demás.

Cartel "oficial" de la lucha
polus médicus de los pueblus

A éstu tenemus d'añuil que la comarca d'El Rebollal, la más al Sul de tóa la provincia de Salamanca (y, por estensión de tó'l Reinu de Llión), lo que jadi que tengamus el hospital a más d'una hora, tan lejotis que van dendi los 120 km que hai dendi Robrea jasta los más de 140 km dendi Navafrías.

Agapito Pascual, alcaldi de Payu,
antis d'entral en vivu

Asina, el pueblu de Payu (135 km dendi Salamanca) no ha queríu quedalsi de brazus crudáus, y ha jechu, pol mé el su alcaldi, Agapito Pascual, dos concentracionis pa protestal y denuncial los planis pensáus en Valladolís. La primera, el sábadu 11 d'Eneru, que salió pubricá ena prensa charra. La segunda, el lunis 13 d'Eneru, ena que vinun dendi la cadena estatal Cuatro, saliendu en vivu nel su programa "Cuatro al Día", algu que podéis vel n'esti enlaci: https://www.cuatro.com/cuatroaldia/el-payo-municipio-salamanca-lucha-conservar-servicio-medico-diario_18_2882520341.html

Estas protestas se uñin a las d'otrus pueblus de la comarca de Ciarrodrigu, y a otras d'otras comarcas, comu la de Benaventi (Zamora), que tamién tuvu su tiempu nel parti de La Sexta, en una noticia ena que mentarun la lucha por el médicu enos pueblus charrus. Podéis vesital la noticia n'esti enlaci: https://www.lasexta.com/noticias/sociedad/ni-traumatologo-ni-pediatra-24-horas-las-deficiencias-de-la-sanidad-en-provincias-envejecidas_202001145e1dd46d0cf28446b0bf8e44.html

La lucha polus médicus de los pueblus se convierti, asina, en una de las señas de los pueblus y de lo que se conoci comu "España Vaciada".

NOTA: afotu del sábadu 11 emprestá por Maite Martín