El Rebollal, tierra d'escritoris

Que la comarca d'El Rebollal es famosa pola su cultura tradicional es sabíu. Los nuestrus estrumentus, los nuestrus bailis, las nuestras vestimientas y la nuestra palra d'El Rebollal son algu bien conocíu, tamién ena nuestra tierra, anque caicuandu no esté valoráu cou tendría de sel.

Pero hai otra cosa ena que la nuestra comarca d'El Rebollal apencipia a destacal. Y es que, anque es algu menus conocíu, son muchus los escritoris que han salíu de los nuestrus pueblus, no ya pa palral de los nuestrus pueblus y la nuestra cultura, sino pa escribil librus de cuentus, puesías o novelas.

Por el camino de Esperanza

Vamus a palral de los ultimus ejemprus que himus conocíu.

Apencipiamus por el robreanu Sergio Lozano Mateos, qu'ha pubricáu la su segunda novela "Por el camino de Esperanza" ("Por el caminu d'Esperanza"), un libru de 540 hojinas que cuenta las cosas que le pasan a un catalán perdíu en un pueblinu enas montañas de León pol mé la avería el su cochi. Se suma asina Sergio a la lista d'escritoris de Robrea comu Ángel Iglesias Ovejero o José Alonso Pascual.

La primera morada

 Muandu de pueblu, llegamus a Peñaparda, pueblu nel que nació Francisco Martín Aldehuelo, que ha escritu la novela que lleva el nombri de "La primera morada" ("La primera morá"), un libru de 464 hojinas que cuenta la hestoria d'un cazaol nuevu en tiempus antigus llenus de magia y misterius. Quea asina, Franciscu, metíu ena lista d'escritoris peñaparderus con José Benito Mateos Pascual (esti que escribi estas rayinas).

The dark legend

En llegandu a Payu mos encontramus con Samuel Iglesias Iglesias, que ha pubricáu la su primera novela, "The dark legend" ("La leyenda escura"), una novela de misteriu que, en drentru las sus 178 hojinas, pasa en Payu y alreoris. Samuel jadi compaña asina a María Jesús Martín Vicente comu escritol payengu.

Sílabas de luz

Anque ya pubricáu el añu pasáu, no quería olvial el libru de puesías de Aída Acosta, de Navafrías. El nombri el libru es "Sílabas de luz" ("Sílabas de lús"), una coleición de puesías metías en un libru mú políu de 68 hojinas. Entra asina ena lista d'escritoris nafrieñus juntu a l'asociación de mayoris o Francisco Javier Morales Paíno.



Cuatru nuevus librus escritus por cuatru rebollanus. Quiciás, si se quieri regalal cultura, cuatru librus pa tenel en cuenta comu regalu pa'l tiempu que vieni.

NOTA: afotus arrecogías de la redi. la del libru "Por el camino de Esperanza", jecha por José Alonso, puesta nel grupu de Facebook de Robrea. Las de los demás librus, arrecogías de páginas de librus.

S'acabarun los Carnavalis

Dispués d'angunus días de fiesta, s'acabarun los Carnavalis n'El Rebollal. Cá unu de los pueblus lo ha celebráu al su mó y manera, con más o menus respetu a las tradicionis del lugal.

En Villarrubias, el Domingu de Carnaval los quintus matarun (y comierun) el gallu, comu se vieni jadiendu nel lugal dendi siempri.

Domingu de Carnaval, Peñaparda
(Afotu de Virginia Iglesias)

Charrascona de Payu
(Afotu d'Asun Núñez)

En Peñaparda, el Domingu de Carnaval se jidu una paella, acompañá a la tardi de chocolati y baili con charanga. El Miércolis de Cenida se jidu el Intierru la Sardina, con una comía de panceta y sardinas assás.

En Payu, sacarun a la tradicional Charrascona, que corrió las callis del lugal montá en un burru, comu se vieni jadiendu dendi antigu.

En Robrea, las gentis salierun los tradicionalis jorramachis el Martis de Carnaval.

Pa acabal, idil que una hija de Navafrías, Aída Acosta dió, al apencipial los famosus Carnavalis de Ciarrodrigu, el pregón de la peña "El Porvenir".

Intierru la Sardina, Peñaparda
(Afotu de Virginia Iglesias)

Charrascona de Payu
(Afotu de Verónica Mangas)