INVIERNU 2024 (6): Navafrías celebra a la Santa Águeda

     El pasáu 4 de Jebreru (domingu), el pueblu Navafrías golvió a vivil la su fiesta a la Santa Águeda. 

Los "dos alcaldis" de Navafrías
nel emprestáu del bastón de mandu

     Asina, a la mañana, l'alcaldi Navafrías, José Manuel Píriz, emprestó'l bastón de mandu a la qu'esti añu jué "alcaldesa pol un día", Agustina Navais, cosa que celebrarun echandu unus bailis en la Praza'l lugal, con la música de José Benito Mateos "Txebe", tamborileru de Peñaparda y Villarrubias.

     En siguiendu con la compaña de la gaita y el tamboril, l'alcaldesa y demás mujeris del pueblu corrierun las callis del lugal, llevandu la fiesta a tolus rinconis de Navafrías.

     Tampocu no faltarun la comía y la cena, que las águedas d'esti añu la jidun nel restauranti "Lucanus" de Navafrías, dondi estuvun comiendu alreol de 40 mujeris.

     Pa rematal la fiesta, entri la comía y la cena tolas mujeris pudun bailal con la música la charanga "La Clave".

Comía nel "Lucanus"

El restauranti llenu pa la comía las águedas

INVIERNU 2024 (5): El cini se rueda n'El Rebollal

Grabandu en Peñaparda

      La comarca d'El Rebollal s'ansomó, el pasáu mes d'Eneru, al mundu'l cini. Y es qu'el direutol de Ciarrodrigu Pablo Moreno ha escogíu la nuestra comarca y la nuestra palra d'El Rebollal comu protagonistas prencipalis de la su película "Pastoris". 

Espingardas

     Pablo Moreno, con antepasáus de Villarrubias, ha queríu mostral a la genti la vía los pastoris d'antañu y mostral tamién lo emportanti qu'es la nuestra palra d'El Rebollal. Asina, los presonajis prencipalis van a ussal la nuestra palra, la que himus heredáu de los nuestrus padris y agüelus.

     La hestoria pasa justu dispués de "la francesá", a primerus del sigru XIX, y tolus pueblus d'El Rebollal han síu "prató" de cini pa la película, pos dendi Robrea jasta Navafrías, en pasandu pol Payu, Villarrubias y Peñaparda, en tós cincu s'han grabáu cosinas.

     "Pastoris" será la primera pelicula jecha en la nuestra palra d'El Rebollal. Aquí vos deju'l "tráiler".

INVIERNU 2024 (4): El Rebollal celebra San Sebastián

     La comarca d'El Rebollal celebró, comu tolus añus, la fiesta San Sebastián, unu de los prencipalis "Santus del Gorru", los que se jadin nel Inviernu. 

Luminaria en Peñaparda

     Asina, la nochi'l sábadu 20 d'Eneru se jidu la milenaria tradición de la Luminaria, el fuegu  que, lo mesmu que los capazus y fogueras de los Sanjuanis, espantan los malis, comu idi esta poesía que jidi hai unus añus esprés pa celebral esti día (tamién jecha toná):

Luminaria de San sebastián
que ya ardis nel lugal.

Ardi bien juerti, ardi bien altu,
lleva lejotis todu lo malu. (BIS)

Luminaria de San Sebastián,
que ardistis, ardis y arderás.

Ardi bien juerti, damus calol,
lo vieju, lo malu, ya s'acabó.(BIS)

     Tampocu no faltó la música de gaita y tamboril, jecha pol José Benito Mateos "Txebe", tamborileru del lugal (esti que vos escribi).

     Al sotru día (domingu 21), en lo que ya s'ha jechu una nueva tradición, el borraju la Luminaria sirvió pa seguil la fiesta, en la que no faltó la genti asandu carni. Asina, San Sebastián se despidió jasta'l sotru añu.

La genti alreol la Luminaria, en Peñaparda

 

Aprovechandu'l borraju la Luminaria

La fiesta siguó'l domingu

Inviernu 2024 (3): Afecha'l bar Ramos

Bar Ramos

 A finalis del pasáu mes d'Eneru del 2024 afechó en Peñaparda, dispués de 5 añus, el bar Ramos, que n'estus últimus tiempus llevaban "los Álex". Cincu añus entri los qu'estuvun los del Andanciu. L'últimu día jidun una pequeña fiesta de despedía pa los sus creyentis. El "Ramos" era la taberna qu'estaba abierta en la Praza.

Asina, el pueblu Peñaparda se quea (de momentu) con ná más qu'una taberna, "El Cruce".

Dend esti rinconinu les deseaus mucha suerti n'esti nuevu tiempu, lo mesmu a los que se van comu a los que se quean.

Inviernu 2024 (2): Mueri'l "cura cordobés" de Villarrubias

Don Manuel
con el su libru

El pasáu 2 d'Eneru del 2024 murió en Córdoba, a los 83 añus, Manuel González Muñana, cura que, en habiendu nacíu en Córdoba y estudiáu en Ciarrodrigu, pasaba las sus vacancias del Veranu en Villarrubias, dondi jadia las misas los domingus nel mes de Juliu. 

Don Manuel jué, además, el qu'escribió'l libru alreol de Villarrubias, "Mis vacaciones en Villasrubias" ("Las mis vacancias en Villarrubias"), nel que contaba un poquinu la hestoria y la cultura del lugal, y más que ná, cómu profitaba de las sus vacancias nel pueblu. Un libru que presentó en Villarrubias nel mes de Juliu del añu 2011.

Dendi esti rinconinu, un recuerdu pa Don Manuel, Q.E.P.D. (Qu'en Pás Descansi)

Inviernu 2023 - 2024 (1). Las Navidadis pasarun pol El Rebollal

 La comarca d'El Rebollal tamién celebró las Navidadis al su mó y manera. 

Árbul de Navidá

En los nuestrus cincu pueblus (Navafrías, Payu, Peñaparda, Robrea y Villarrubias) no faltarun los adornus y lucis, lo mesmu en las callis qu'en las cassas. Tampocu no faltó la genti que güelvi n'esti tiempu a pasal las fiestas en familia.

Los villancicus tamién estuvun, además d'en las misas señalás, en los conciertus que dierun en Navafrías (9 de Diciembri) y Peñaparda (23 de Diciembri) los del grupu "El Charaíz Redondo" de Guinaldu.

Tampocu no faltarun los regalus que mos trujun El Tamborileru (pa la Nochigüena, el 24 de Diciembri) y Los Reyis (nel su día, el 6 d'Eneru), éstus últimus con las sus cabalgatas en tolus pueblus.

Las que pasarun sin paralsi juerun, comu tolus añus, la Loterías de Navidá y del Dagal, que ná más que mos dejarun anguna "pedrea". Pa otru golpi.

NOTA: toas las afotus son de Peñaparda (Esti añu no pudi sacal de los otrus pueblus. Pa'l sotru añu, más y mejol)

Adornus en las callis

Grupu El Charaíz Redondo

Ya vienin Los Reyis

Los Reyis dandu los regalus

Tardíu 2023 (4): Peñaparda nel "Conoci los nuestrus pueblus"

     El pueblu Peñaparda tamién tuvu'l su día del "Descubre nuestros pueblos" ("Conoci los nuestrus pueblus"). Esta vés tocó'l sábadu 9 de Diciembri del 2023. 

La palra, el panderu y el charru en la Discoteca

     El día apencipió recibiendu a la genti en la Praza con café y dulcis pa cogel con juerza la mañana.

     Adispués d'esti segundu desayunu, tó'l que quiju pudu jadel la vesita a la Cantera Molal, el lugal d'andi salían antañu las ruéas pa los molinus jarinerus.

     Una vés jechu'l paséu, la genti pudu vesital el pueblu, además de las diferentis muestras qu'estuvun preparás pa esi día.

Recibiendu a la genti

     En la Discoteca, se pudun vel muestras de cuadrus (pintáus pol Mari Ángeles Martín y la su madri Lucía),  jongus y cultura tradicional, con una pequeña chalra alreol de la nuestra palra d'El Rebollal jecha pol José Benito Mateos Pascual "Txebe".

     N'el Muséu, las muestras de trajis de charru y del trabaju'l linu, con una pequeña chalra jecha pol Antonia Pascual Sánchez y Raúl Benito Calzada.

     Dispués de la vesita al pueblu jué la comía, unas patatis guisás con costilla, comía en la qu'estuvun alreol de 150 presonas.

     Pa rematal el día, no podían faltal los bailis charrus, de los que dio una güena muestra'l grupu folclóricu de Peñaparda.

Jongus grandononis

Muestra de jongus

Muestra de cuadrus

Maquetina d'El Charaíl del Rollu (Peñaparda)
y las Tres Columnas de Ciarrodrigu,
jechas pol José Antonio Sánchez

Comiendu

Tampocu no faltarun los bailis