Inviernu 2023 - 2024 (1). Las Navidadis pasarun pol El Rebollal

 La comarca d'El Rebollal tamién celebró las Navidadis al su mó y manera. 

Árbul de Navidá

En los nuestrus cincu pueblus (Navafrías, Payu, Peñaparda, Robrea y Villarrubias) no faltarun los adornus y lucis, lo mesmu en las callis qu'en las cassas. Tampocu no faltó la genti que güelvi n'esti tiempu a pasal las fiestas en familia.

Los villancicus tamién estuvun, además d'en las misas señalás, en los conciertus que dierun en Navafrías (9 de Diciembri) y Peñaparda (23 de Diciembri) los del grupu "El Charaíz Redondo" de Guinaldu.

Tampocu no faltarun los regalus que mos trujun El Tamborileru (pa la Nochigüena, el 24 de Diciembri) y Los Reyis (nel su día, el 6 d'Eneru), éstus últimus con las sus cabalgatas en tolus pueblus.

Las que pasarun sin paralsi juerun, comu tolus añus, la Loterías de Navidá y del Dagal, que ná más que mos dejarun anguna "pedrea". Pa otru golpi.

NOTA: toas las afotus son de Peñaparda (Esti añu no pudi sacal de los otrus pueblus. Pa'l sotru añu, más y mejol)

Adornus en las callis

Grupu El Charaíz Redondo

Ya vienin Los Reyis

Los Reyis dandu los regalus

Tardíu 2023 (4): Peñaparda nel "Conoci los nuestrus pueblus"

     El pueblu Peñaparda tamién tuvu'l su día del "Descubre nuestros pueblos" ("Conoci los nuestrus pueblus"). Esta vés tocó'l sábadu 9 de Diciembri del 2023. 

La palra, el panderu y el charru en la Discoteca

     El día apencipió recibiendu a la genti en la Praza con café y dulcis pa cogel con juerza la mañana.

     Adispués d'esti segundu desayunu, tó'l que quiju pudu jadel la vesita a la Cantera Molal, el lugal d'andi salían antañu las ruéas pa los molinus jarinerus.

     Una vés jechu'l paséu, la genti pudu vesital el pueblu, además de las diferentis muestras qu'estuvun preparás pa esi día.

Recibiendu a la genti

     En la Discoteca, se pudun vel muestras de cuadrus (pintáus pol Mari Ángeles Martín y la su madri Lucía),  jongus y cultura tradicional, con una pequeña chalra alreol de la nuestra palra d'El Rebollal jecha pol José Benito Mateos Pascual "Txebe".

     N'el Muséu, las muestras de trajis de charru y del trabaju'l linu, con una pequeña chalra jecha pol Antonia Pascual Sánchez y Raúl Benito Calzada.

     Dispués de la vesita al pueblu jué la comía, unas patatis guisás con costilla, comía en la qu'estuvun alreol de 150 presonas.

     Pa rematal el día, no podían faltal los bailis charrus, de los que dio una güena muestra'l grupu folclóricu de Peñaparda.

Jongus grandononis

Muestra de jongus

Muestra de cuadrus

Maquetina d'El Charaíl del Rollu (Peñaparda)
y las Tres Columnas de Ciarrodrigu,
jechas pol José Antonio Sánchez

Comiendu

Tampocu no faltarun los bailis

Tardíu 2023 (3): Los "1000 Otoños" vinun a Payu

 El pasáu 25 de Noviembri del 2023, el programa "1000 Otoños en Salamanca" (1000 Tardíus en Salamanca) visitarun el pueblu de Payu. 

La Puenti'l Gas, en Payu

El programa, patrocináu pola Diputación de Salamanca, jidu la su primera pará en Payu.

El día apencipió con la llegá de los vesitantis que, adispués de las presentacionis, salierun al campu a jongus, que jué'l tema escogíu pa esta vesita.

Adispués, la genti pudu jadel una vesita al lugal y, antis de la comía, hubu una chalra alreol de los jongus arrecogíus.

Ya dispués de comel, hubu una chalra-conciertu alreol de la nuestra palra d'El Rebollal jecha pol José Benito Mateos Pascual "Txebe" (esti que vos palra).

En las cosas que se jidun estuvun alreol de 40 presonas, venías dendi tolus rinconis de la provincia Salamanca.

Momentu de la comía

Tardíu 2023 (2): Robrea nel "Conoci los nuestrus pueblus"

 El programa de "Descubre nuestros pueblos" ("Conoci los nuestrus pueblus") golvió a pisal n'El Rebollal el sábadu 21 d'Otubri. Esta vés le tocó al pueblu de Robrea. 

Ilesia de Robrea

P'apencipial, los vesitantis pudun esprimental dulcis típicus, jechu polas vedinas del lugal. Dispués tocó correl los caminus, esta vés 9 kilómetrus pol el Miraol de la Lapa.

Dispués del paséu, los vesitantis (y tó'l que quiju) pudun conocel la hestoria la ilesia de Robrea pol mé las chalras de José Alonso Pascual y Raúl Benito Calzada.

Tampocu no faltó la música, con gaita, tamboril y acurdión.

P'acabal el día, tocó la comía: una paella que pudun esprimental las alreol de 160 presonas que s'acercarun a Robrea a conocel el lugal.

Tardíu 2023 (1): Payu nel "Conoci los nuestrus pueblus"

Angunus aperus de la muestra

     El sábadu, 30 de setiembri, el programa "Descubre nuestros pueblos" ("Conoci los nuestrus pueblus") llegó a Payu. Esti programa quieri dal a conocel los pueblus de la comarca de Ciarrodrigu, jadiendu vesitas a cá unu de los pueblus duranti tó'l añu. 

     Asina, dispués de correl unus pocus de pueblus (n'El Rebollal ya habían pasáu pol Navafrías antis del Veranu), tocó conocel Payu, andi vinun a conocel el pueblu alreol de 200 presonas.

     El día apencipió dandu la bienvenía a tolus vesitantis, con dulcis y café en la Praza'l lugal.

Más aperus

   Dispués del desayunu, tocó correl los caminus. Esta vés se jidu un paséu pol ríu, un paséu d'alreol de 9 km, nel que se dio a la genti un almuerzu pa recuperal juerzas.

     Alreol el meyudía, nel multiussus, los vesitantis pudun vel una muestra d'afotus y achiperris antigus, con la compaña d'otras cosas nuevas jechas pola genti del pueblu. N'esta vesita a la muestra pusu la música l'acurdión de Jesús Mangas.

Artesanus

     Tampocu no faltó la comía, que se jidu nel mesmu multiussus de Payu.

     Pa rematal el día, el grupu de charru "Jálama", del mesmu Payu, jidu una muestra de los bailis del lugal con las tonás de Verónica Mangas (sartén) y José Benito Mateos "Txebe" (gaita y tamboril).

La muestra se jidu nel Multiusus

Muestra d'artesanus

Traji de charru d'hombri

Grupu "Jálama", antis de jadel los sus bailis

Veranu 2023 (5): Santu Ferinu no faltó a la su cita en Villarrubias

     El pueblu Villarrubias jué fiel a la cita con el su patrón, Santu Ferinu (26 d'Agostu) con una semana de fiestas, del 21 al 27 d'Agostu. 

El Pinu los quintus

     Las fiestas apencipiarun el lunis, 21 d'Agostu con el concursu de ZÁPITI y copras cantás pol "Pablo Plaza Singer".

     Al sotru día, el martis 22, jué la comía nel Riufríu, dondi alreol de 300 presonas pudun comel la paella. Tampocu no faltarun la música y los bailis, pos pol allí aparecierun un grupu d'adufeiras venías dendi Oportu que, juntu a la gaita y el tamboril de José Benito Mateos "Txebe" y el panderu de Mª Antonia Pascual Mateos, de Peñaparda, jidun bailal a la genti.

     El miércolis 23 jué'l día los dagalis, con juegus, incierrus con carretonis,... A la nochi hubu discu-móvil con "Samuray".

     Ya'l juevis 24 se jidu'l campeonatu de fútbul a la mañana y, a la tardi, el pregón de las fiestas que jidun los quintus, acabandu'l día con la discu-móvil "Full Equip". 

La paella del Riufríu

     El viernis 25 jué'l día'l Pinu, que pusun los quintus del lugal, n'una de las costumbris más antiguas d'El Rebollal. A la nochi hubu verbena con l'orquesta "Expresión".

     El sábadu 26 d'Agostu, el día Santu Ferinu, el día apencipió con la misa y la procesión al Santu, a la que siguió l'incierru a caballu pola Jessa y la capea a la tardi. El Día'l Santu acabó con una verbena jecha pola orquesta "La Invasión".

     Y, pa l'acabiju esta semana de fiestas, el domingu 27 golvió a habel incierru a la mañana y capea a la tardi.

La genti en la comía del Riufríu

Las adufeiras que vinun dendi Portugal

Tampocu no faltarun los bailis

Momentu del incierru a caballu

Una de las vaquis nel incierru

La praza estuvu acomolgaíta de genti en las capeas

Veranu 2023 (4): "Nuestras raícis", el teatru jechu en la nuestra palra

 La nuestra palra d'El Rebollal golvió a subilsi a los tabráus en mó y manera de teatru o comedias. Y es qu'el pasáu 11 d'Agostu, el grupu "Raícis del Águeda" jidu en Robrea la obra "Nuestras Raícis", escrita y dirigía pol Catalina Sánchez. 

Grupu "Raícis del Águeda"

"Nuestras Raícis" vieni a sel un continual de la comedia que, con el mesmu nombri, jidun ya los d'esti grupu nel añu 2018, y que tuvu muchu ésitu, jadiéndula en varius pueblus. Un ésitu qu'han repetíu con esta nueva jechura de "Nuestras Raícis".

Asina, el grupu "Raícis del Águeda" güelvi a jadel una güena y alegri defensa de la nuestra palra d'El Rebollal. Que sea pol muchus añus.

NOTA: afotus emprestás pol Andrea Carreño (Guinaldu)

´Momentu de "Nuestras Raícis"