Veranu 2023 (3): Peñaparda "estrenó" las sus Fiestas d'Agostu

     El pueblu Peñaparda golvió a estal en fiestas nel mes d'Agosu. Anque ye verdá que tolus añus s'ha jechu una fiesta en honol a los emigrantis, esti añu las fiestas han síu diferentis pol mé d'habel un programa conocíu de fiestas, cartelis y cuatru días, con vaquis y tó. 

Alreol de 500 pesonas s'ajuntarun pa la paella

Alpacas pa los juegus

     Asina, las fiestas d'Agostu apencipiarun la nochi'l juevis 10 con la verbena jecha pola orquesta "DAKAR".

     Ya'l día 11, lo mesmu a la mañana qu'a la tardi, hubu juegus pa los dagalis, repartíus entri la Praza (a la mañana) y las piscinas (a la tardi), juegus en los que pudun profital lo mesmu los "dagalis chicus" comu los "dagalis grandis".

     El sábadu 12 d'Agostu le tocó'l turnu a las vaquis, con un incierru a la mañana polas callis del lugal, y una capea a la tardi.

     Y, p'acabal a lo grandi las fiestas, el domingu 13 d'Agostu la Praza Peñaparda s'enllenó de la genti que s'apuntó a la paella, en la que s'ajuntarun alreol de 500 presonas lo que, con la compaña de música de charanga, pusu un botón doráu a estas Fiestas del Emigranti.

Verbena cola orquesta "DAKAR"

Momentu el incierru

La paella ya está lista

Tampocu no faltó la música

Robrea jidu la Fiesta de la Mancomunidá

Cuartu de Robrea

El pasáu domingu, 28 de Juliu de 2019, el pueblu de Robrea jidu la Fiesta de la Mancomunidá, que tólus añus se jadi en unu de los pueblus qu'están en drentru la Mancomunidad Alto Águeda (Mancomunidá Altu Águeda). Esti añu, en drentru la fiesta, jué la XVII Feria d'Artesanía y de Negocius, y la X Muestra de Ganáu.

Tenderil de mantas de Bodón

La Fiesta la Mancomunidá apencipió al meyudía el domingu, con la chalra los alcaldis y el presidenti la Mancomunidá pa seguil, adispués, con la Feria d'Artesanía y la Muestra de Ganáu, qu'estuvun tó'l día. Tamién a la mañana, el grupu "El Fandangu" de Robrea jidu una muestra de los sus bailis y los sus sonis tradicinalis.

Tenderilis ena Calli Larga

Ya a la tardi, además de juegus pa los dagalis y un burru-taxi, tampocu no faltarun los bailis, esta vés pol mé el grupu de Torrejoncillu (Cáciris), que afechó el día de fiesta con los sus bailis.

Tamién se pudun vel angunas muestras, comu la de trajis de charru nel bar de la Encarni, o la muestra d'afotus antiguas y del trabaju del bercéu, nel salón el Cuartu.

Pa'l sotru añu la Fiesta la Mancomunidá se jadrá nel pueblu de Saúgu, pueblu vedinu d'El Rebollal.

Puestu de cosas jechas con barru

Muestra de trajis de charru

Gorra y otras cosinas jechas de bercéu

Muestra de ganáu

Grupu de Torrejoncillu

Muestra d'afotus antiguas

Genti viendu los bailis estremeñus
ena Praza la Costitución

Peñaparda tieni un nuevu libru

Portá del libru

El pueblu de Peñaparda ya tieni un nuevu libru alreol, esta vés alreol de las sus tradicionis.

Con el nombri de "Tesoro de tradiciones. Peñaparda (Salamanca)", el escritol, José Manuel Fraile Gil, corri las tradicionis musicalis el pueblu de Peñaparda, arrecogiendu los sonis y tonás antiguas, qu'el autol llevaba arrecogiendu nel lugal dendi los añus 80 el sigru XX. Asina, en áina 400 páginas, Fraile escribi los sonis y romancis arrecogíus a las mujeris que, nel sigru pasáu juerun las últimas de las tocaoras antiguas, de las que poni afotus. Esu, sin olvial a las nuevas pandereras, que tamién tienin un rinconinu enas hojinas el libru.

Momentu de la presentación

Presentáu en Peñaparda por el su autol el pasáu viernis, 26 de Juliu, en drentru la XX Fiesta el Panderu, el libru vieni cona compaña de un CD nel que puedin oyelsi 86 cancionis, romancis y cuentus. Un CD nel que, anqu'el panderu es protagonista, tampocu no faltan la gaita y el tamboril, o las vocis d'aquellus hombris y mujeris que mos dejarun, comu el nombri el libru mos idi, un tesoru de tradicionis en mó y manera de ajecháus, salteáus, corríus, jotas, ofretorius, pasacallis, romancis, copras, cuentus,... Y la palra d'El Rebollal, que tamién tieni un rinconinu bien importanti nel libru.

Nel libru, además de las gentis de Peñaparda, han ayuáu el Ayuntamientu de Peñaparda, la Diputación de Salamanca, el Instituto de la Identidades de Salamanca y la Cátedra de Estudios Leoneses.

NOTA: afotu de la presentación emprestá por Rubén Mateos (Peñaparda)