Veranu 2023 (2): Villarrubias jidu la Fiesta la Mancomunidá

 El pasáu 30 de Juliu, domingu, se jidu en Villarrubias la Fiesta la Mancomunidá, que tolus añus jadi la "Mancomunidad Alto Águeda" (Mancomunidá Altu Águeda) n'unu de los pueblus de la mesma. Por ordin, esti añu l'ha tocáu a Villarrubias, l'últimu pueblu en siguiendu l'ordin l'abecidariu.

Pol tó'l día se jidun cosas en tó'l lugal, con muestras en tolas callis del pueblu, comu carrus, trajis de charru, aperus, achiperris de codina,... que tolus vedinus de Villarrubias pusun bien a gustu y bien abondu pa jadel esti día. Tampocu no faltarun los tenderilis d'artesanus de la comarca.

Además de tolas muestras, a la mañana se jidu'l comienzu la Fiesta, con las chalras de Lourdes Palos comu presidenta de la Mancomunidá (es tamién l'alcaldesa de Guinaldu), Ángel Justo Rubio (Justu), l'alcaldi de Villarrubias) y Marcos Iglesias, diputáu provincial (es tamién l'alcaldi de Ciarrodrigu). Dispués, tamién a la mañana, se pudun vel los bailis charrus del grupu "El Charaíz Redondo" (Guinaldu), y la mañana acabó con una comía pa toa la genti, en la que s'ajuntarun alreol de 1.000 presonas.

Ya a la tardi, además de los juegus pa los dagalis, juerun los conciertus de los grupus "En3Jazz" (Ciarrodrigu) y "Santarén folk" (Zamora), con el que s'afechó'l día.

Carru n'una las callis

Lavandu nel regatu

Muestra n'un jardín

En la puerta la Cassa Rural

En la puerta l?Hotel Rural

Carru en la Calli la Ilesia

Molinu de manu

Unu de los tenderilis

Robrea celebra el Día los Jongus

El pueblu de Robrea va a jadel, esti sábadu 23 de Noviembri, el XV Día los Jongus de la Mancomunidá Altu Águeda.

El día apencipiará a las 10 de la mañana ena Praza la Costitución, andi se formarán las compañas pa salil al campu en busca jongus.

Adispués, alreol de las dos y media el meyudía, habrá una comía nel restauranti "Los Pinos".

Pa acabal, adispués de la comía, se jadrá una muestra de los jongus arrecoíus a la mañana, muestra que tendrá la compaña de una chalra alreol de los jongus por José Ignacio Gómez Risueño, dambas dos (muestra y chalra) nel ginasiu el lugal.

Se da el casu de qu'esti añu han síu en Robrea dambas dos fiestas de la mancomunidá, el Día la Mancomunidá y el Día los Jongus.

Robrea jidu la Fiesta de la Mancomunidá

Cuartu de Robrea

El pasáu domingu, 28 de Juliu de 2019, el pueblu de Robrea jidu la Fiesta de la Mancomunidá, que tólus añus se jadi en unu de los pueblus qu'están en drentru la Mancomunidad Alto Águeda (Mancomunidá Altu Águeda). Esti añu, en drentru la fiesta, jué la XVII Feria d'Artesanía y de Negocius, y la X Muestra de Ganáu.

Tenderil de mantas de Bodón

La Fiesta la Mancomunidá apencipió al meyudía el domingu, con la chalra los alcaldis y el presidenti la Mancomunidá pa seguil, adispués, con la Feria d'Artesanía y la Muestra de Ganáu, qu'estuvun tó'l día. Tamién a la mañana, el grupu "El Fandangu" de Robrea jidu una muestra de los sus bailis y los sus sonis tradicinalis.

Tenderilis ena Calli Larga

Ya a la tardi, además de juegus pa los dagalis y un burru-taxi, tampocu no faltarun los bailis, esta vés pol mé el grupu de Torrejoncillu (Cáciris), que afechó el día de fiesta con los sus bailis.

Tamién se pudun vel angunas muestras, comu la de trajis de charru nel bar de la Encarni, o la muestra d'afotus antiguas y del trabaju del bercéu, nel salón el Cuartu.

Pa'l sotru añu la Fiesta la Mancomunidá se jadrá nel pueblu de Saúgu, pueblu vedinu d'El Rebollal.

Puestu de cosas jechas con barru

Muestra de trajis de charru

Gorra y otras cosinas jechas de bercéu

Muestra de ganáu

Grupu de Torrejoncillu

Muestra d'afotus antiguas

Genti viendu los bailis estremeñus
ena Praza la Costitución

Día la Mancomunidá 2017

El domingu, 30 de Juliu, la "Mancomunidad Alto Águeda" (Mancomunidá Altu Águeda) jidu en Peñaparda el ya tradicional Día la Mancomunidá. Al sel siempri al sotru día de la Fiesta el Panderu, esti añu Peñaparda tuvu dos días seguíus de fiesta.

Tenderilis ena Calli Fontanilla

El Día la Mancomunidá apencipió cona chalra las autoriadis, comu Camila Vizarro (aldaldesa de Peñaparda), Julián Fandiño (presidenti de la Mancomunidá y alcaldi de Campillu) y Javier Iglesias (presidenti de la Diputación).

Adispués jué la muestra de folclori, que la jidu el grupu de Peñaparda, que jidu comu bailis el "ajecháu", el "salteáu", el "corríu brincáu" y el "ofretoriu".

El mercáu d'artesanía y la muestra de ganáu estuvun puestus tó'l día, los tenderilis polas callis del lugal y el ganáu ena cortina el caminu Payu. Además, estuvu abiertu el muséu y hubu una muestra d'afotus antiguas.

Tenderilis alreol del Charail del Rollu

Al meyudía tó'l que quiju pudu subil a las eras de las Majaíllas a comel una paella.

A la tardi tólus dagalis que quijjun se pudun montal nel tren que corrió las callis del pueblu, y hubu una muestra de magia por el magu Juan F. Luzón.

Tamién a la tardi, el Día la Mancomunidá acabó cona música y el folclori charrus del grupu "Enflautados".

Grupu "Enflautados"

Tren polas callis del lugal

Peñaparda acabará el mes de Juliu con fiestas

El pueblu de Peñaparda va a tenel, entri'l viernis 28 jasta'l domingu 30, tres días de fiesta conos qu'el lugal va a despedil el mes de Juliu. Estus tres días de fiesta vienin pol mé de dos fiestas: la Fiesta el Panderu (días 28 y 29) y la Fiesta la Mancomunidá Altu Águeda (día 30).

FIESTA EL PANDERU 

Cartel de la Fiesta el Panderu

Viernis, 28 de Juliu

19:00   CHALRA alreol de "Rollus y picotas", por Cristian Berga, restauraol
20:00   SEVILLANAS


Sábadu, 29 de Juliu

11:00   FERIA d'artesanía
            ALBORÁ polus tamborilerus de la comarca
            MUESTRA de cómu se jadi un panderu, por Andrea Mateos

19:00   PASACALLIS
             FESTIVAL FOLCLÓRICU          
            - Grupu de dagalis de Peñaparda
            - Jadel "Socia d'honol" a la tia Juliana "Mansa"
            - Grupu "Las Ramajeras" (Las Jurdis)
            - Entrega del Panderu d'Honol a Isabel Ramos "Isabelita"
            - Grupu "El Roble Charro" (Ciarrodrigu)
            - Grupu folclóricu de Peñaparda

23:00   Conciertu de Raúl Díaz de Dios


FIESTA LA MANCOMUNIDÁ 

Cartel de la Fiesta de la Mancomunidá

Domingu, 30 de Juliu

12:00   Principiu de la XV Feria d'Artesanía y Negocius, y de la VIII Feria de Ganáu

12:15   Actuación del Grupu Folclóricu de Peñaparda, ena Praza Mayol

15:00   Comía pa tóa la genti enas piscinas

17:00   Magia, enas piscinas, por el magu Juan F. Luzón

20:30   Conciertu por el grupu "Enflautados"

Duranti tó'l día habrá varias muestras:
 - Muestra de Ganáu (caminu Payu)
 - Muséu etnográficu
 - Muestra d'afotus (centru cultural)
 - Muestra d'encaji de bolillus (Praza)
 - Muestra de cenderrus (corral en Calli Eras)

Pola tardi, dendi las 5 la tardi, habrá juegus pa los dagalis, con castillus jincháus y tren.

Los jongus juerun los reyis en Villarrubias

El pasáu sábadu 19 de Noviembri se jidu, en Villarrubias, el XIII Jornadas Micológicas ("XIII Día los Jongus") organizáu pola "Mancomunidad Alto Águeda" (Mancomunidá Altu Águeda).

En Villarrubias estuvun alreol de 100 presonas, que cogierun alreol de 150 crasis de jongus, qu'estuvun mostráus nun local del ayuntamientu.

Los participants (y los que quijun estal) tuvun una comía nel restauranti "La Mina" de Villarrubias.

Pola tardi, dio una chalra José Ignacio Gómez Risueño.

Grupu de "jonguerus"

Chalra de J. Ignacio Gómez Risueño

NOTA: Afotus emprestás por Verónica Mangas (Payu)

El Día los Jongus de la mancomunidá, esti añu en Villarrubias

La Mancomunidá Alto Águeda va a jadel el su Día los Jongus, qu'esti añu jadi el númeru 13. Esti añu va a sel en Villarrubias, el sábadu 19 de Noviembri.

Cartel de los Jongus
Villarrubias 2016

A las 10 de la mañana se recibi, ena Praza el lugal, a la genti que va a participal

A las 10 y media se sali en grupus al campu pa arrecogel los jongus.

La comía, pa tóa la genti que ha participáu, será a las dos de la tardi nel restauranti "La Mina", allí en Villarrubias.

Pa acabal, se va a ponel una muestra de los jongus arrecogíus, que se van a crasifical, y habrá una chalra jecha por José Ignacio Gómez Risueño.

Pa tó'l que quiera apuntalsi, tieni de tiempu jasta'l martis 15 de Noviembri. La comía costará 12 Eurus (12 €), y se tieni de pagal ena cuenta de Caja España-Duero ES10 2108 2219 28 0031137681

La Mancomunidá jidu la su fiesta en Payu

El pueblu de Payu recibió, el domingu 31 de Juliu, la Fiesta de la Mancomunidá Altu Águeda.

Duranti tó'l día se pudun vel, polas callis del lugal, los tenderilis el mercáu d'artesanía (alreol de 30). Además, hubu tamién una muestra de ganáu y otra de trajis de charru.

La Fiesta apencipió con los alcaldis palrandu encima el tabráu. Estuvu comu envitáu el Presidenti de la Cámara de Sabugal, concellu portugués con el que la nuestra comarca comparti muchas cosas, entre las que podemus destacal la hestoria, pos Sabugal jué parti el nuestru Reinu de León jasta'l Tratáu d'Alcañicis (1297).

Dispués de la chalra los alcaldis, le tocó el turnu al grupu "Jálama", que jidu una muestra de los bailis de Payu, lo mesmu al son de la sartén de Verónica Mangas comu de la gaita y el tamboril de José Benito Mateos "TXEBE".

La hora de comel tuvu de protagonista a la paella, que tóa la genti (feriantis, bailaoris, alcaldis, públicu) pudu probal ena comía populal.

La Fiesta la Mancomunidá acabó con el conciertu el grupu estremeñu "Manantial Folk".

Pa'l sotru añu, la Fiesta la Mancomunidá será en Peñaparda, tamién ena nuestra comarca d'El Rebollal.

Grupu "Jálama" de Payu

El burru-taxi polas callis de Payu

Tenderilis del mercáu

El grupu estremeñu "Manantial Folk"

Muestra de trajis de charru

El panderu cuadráu y la Mancomunidá train un fin de semana de fiesta a la comarca d'El Rebollal

La comarca d'El Rebollal güelvi a vestilsi de fiesta, esta vés pol mé el panderu cuadráu y la mancomunidá Alto Águeda (Altu Águeda).

Peñaparda jadi la su XVII Fiesta el Panderu Cuadráu. El viernis es la chalra alreol el panderu (19:00), jecha por Raúl Benito, cona compaña d'una muestra d'afotus jechas por Juana Andrés, y una de dibujus jechus por el pintol Carlos Medina. Dispués (20.30) se jadrá baili de sevillanas ena Praza. El sábadu habrá un pasacallis a la mañana (11:00) y unus tenderilis d'artesanía. A la tardi, será el festival con el Baili el Ofretoriu, el charru del grupu de Peñaparda y el grupu "Sedeiro", de Zamora. Se le dará el Panderu d'Honol al folclorista Joaquín Díaz. A la nochi, la fiesta terminará con el conciertu de "Gabriel Calvo y la Fabulosa Retahíla" (23:00).

La fiesta sigui en Payu, andi se jadrá la Fiesta la Mancomunidá. A la mañana s'abrirán los tenderilis d'artesanía. Seguirá a mañana con el folclori del grupu "Jálama" de Payu (12:30). Duranti tó'l día habrá una muestra de ganáu, otra de trajis de charru, otra d'afotus,... A las 14.30 será la comía populal. A la tardi, habrá juegus pa los dagalis (16:30). La fiesta acabará a última hora de la tardi, con e conciertu el grupu estremeñu "Manantial folk" (20:00).

Cartel Fiesta de la Mancomunidá

Cartel de la VII Fiesta el Panderu