18 ene 2015

Las primeras nievis el 2015

Esti domingu 18 d'Eneru mos truju, a los pueblus d'El Rebollal, las primeras nievis el añu 2015.

Cassa nevá en Peñaparda
Anque los primerus copinus apencipiarun a cael antis de la medianochi, jué tóa la madrugá el domingu cuandu cayó la nievi de verdá, de mó y manera qu'esti domingu amaneció n'El Rebollal con la colol branca de la nievi.

Esta nevá truju unus poquinus de problemas enas carreteras d'El Rebollal las primeras horas del día. Pol mé d'éstu, a Villarrubias lo mentarun nel telitestu de TVE, andi ponía que había problemas de nievi ena carretera C-526 entri los kilómetrus 33 y 43 (dendi Riufríu jasta'l Puertu Peralis). Peru esus problemas dejarun d'estal en cuantis pasó la máquina quitanievis, y al meyudía ya no salía ena teli.

Pol mé el calol (alreol de los 3 ó 4 gráus), a la tardi ya cuasi no quedaba ná de nievi.

Aquí vos deju angunas de las afotus que se pudun jadel esta mañana.

Praza de Peñaparda
Nievi en Peñaparda


Caminu en Villarrubias
La cabra Ríufríu con nievi

Parqui de Payu (afotu de Verónica Mangas)
Máquina quitanievis en Peñaparda




4 ene 2015

La Tia Gora jadi 110 añus

Esti domingu 4 d'Eneru la Tia Gora jidu 110 añus. 110 añus que ha cumpríu ena su cassa de siempri, cona compaña de los sus dagalis, Colasa y Jussé, y de la genti de Peñaparda, que estuvu tó'l día passandu pola su cassa a felicitali el cumpriañus.
La Tia Gora

El cumpriañus de la Tia Gora ha síu noticia en tólus periódicus de Salamanca, lo mesmu en papel que d'interné, asina que lo mesmu el día antis comu el mismu día vinun por Peñaparda periodistas d'essus periódicus a jadeli afotus y a chalral cona Tia Gora. Los enlacis conas noticias de los periódicus son éstus:

   - Ciudad Rodrigo al Día: La Tia Gora cumple 110 años
   - En Ciudad Rodrigo: La Tía Gora cumple 110 años rodeada del cariño de sus vecinos en Peñaparda
   - La Gaceta de Salamanca: La "Tía Gora" cumple 110 años

Tamién ha salíu en periódicua forasterus comu:
   - Agencia ICAL: A la vejez... dulces
   - 20 minutos: Tía Gora, una mujer de Salamanca, cumple 110 años. Pero ¿Cuántos años tengo ya?

Con 110 añus, la Tía Gora es una de las mujeris más viejas Salamanca y de la Península y, comu no puedi sel menus, la presona más vieja que ha vivíu en Peñaparda. Anque no es la única presona centenaria del lugal: la Tia Lonisia murió nel añu 2014 con 107 añus; la Tia Anastasia murió, ya hai añus, con 102. Y entovía vivi (en Francia) el Tiu Miguel "Gatu", con 100 pa 101.

2 ene 2015

Más genti n'El Rebollal

El pasáu mes de diciembri se pubricarun los númerus de los habitantis enos pueblus, pol mé el INE (Istitutu Nacional d'Estadística).

Estus númerus mos idin que, nel total d'El Rebollal, somus más la genti que vivimus ena comarca. Himus passáu de los 2.045 habitantis (a 1 d'eneru del 2013) jasta los 2.061 habitantis (a 1 d'eneru del 2014). Es algu que mos llama la atención, mirandu que nel total la comarca de Ciarrodrigu ha perdíu 627 habitantis.
Peñaparda, unu de los pueblus
que ha perdíu habitantis

Mirandu un poquinu más de cerca los númerus, vemus que los pueblus que han aumentáu los sus habitantis han síu Navafrías (+1) y, más que ningunu, Robrea (+32). Del otru láu, han perdíu habitantis Payu (-8), Peñaparda (-7) y Villarrubias (-2).

Los númerus, pa los añus 2013 y 2014 son éstus:

NAVAFRÍAS     485 (2013)     486 (2014)
PAYU     376 (2013)     368 (2014)
PEÑAPARDA     391 (2013)     384 (2014)
ROBREA     488 (2013)     520 (2014)
VILLARRUBIAS     305 (2013)     303 (2014)

TOTAL     2.045 (2013)     2.061 (2014)