29 dic. 2011

Comedias pas los dagalis en Peñaparda

Esti viernis, 30 de diciembri, se van a jadel unas comedias pa los dagalis en Peñaparda.

El grupu KAMARU va a jadel la obra "Bucaneros" pa tólus dagalis (grandis y chicus) que vayan a velus.

Las comedias, organizás por el ayuntamientude Peñaparda con la ayúa de la Diputación de Salamanca, van a sel esti viernis, 30 de diciembri, a las 6 de la tardi, enas escuelas viejas. La entrá es de baldi.

26 dic. 2011

"EL TAMBORILERU" dejó los sus regalus ena Nochigüena

"EL TAMBORILERU" pasó por El Rebollal esta Nochigüena dejandu regalus.

Comu tóas las Nochigüenas, "EL TAMBORILERU" pasó por El Rebollal dejandu la su bolsina de frutas y bombonis. En angunas cassas, jasta dejó anguna cosina más.


Tampocu faltarun esa nochi los villancicus (cántigus de Navidá) tocáus con los sus estrumentus: la gaita y el tamboril.

Dibuju de "EL TAMBORILERU"

24 dic. 2011

Apencipian las Navidadis

Esta nochi es Nochigüena y mañana Navidá...

Asina apencipia el villancicu que, el 24 de diciembri, jadi que esta parti de la su letra sea verdá. Y es que hoi sábadu, 24 de diciembri, apencipian oficialmenti, las fiestas de la Navidá, fiesta ena que los cristianus celebran el Nacimientu de Cristu, andi los antigus celebraban el Solsticiu d'Inviernu (cuandu los días apencipiaban a ganali tiempu a las nochis), andi los romanus celebraban las "Saturnalias" y el "Sol Invictus",...

Los nuestrus pueblus s'enllenan de genti que quierin passal estus días cona familia, y polas cassas y las callis, anque haiga crisis, no faltan lucis y adornus que mos idin qu'estus días no son comu los demás del añu, qu'el principiu el inviernu, esus diínas que van dendi'l 24 de diciembri jasta'l 6 d'eneru, es especial.

Dendi esti rinconinu de la redi, deseamus a tóa la genti, en especial a las gentis d'El Rebollal, que pasin unus güenus días.

FELICIS FIESTAS

AFOTU: lucis de Navidá nel Cuartu de Peñaparda

Muestra de mineralis en Navafrías

Dendi'l día 23 de diciembri jasta fin de añu, las gentis de Navafrías (y alreoris) puedin vel una muestra de mineralis, piedras preciosas y fósilis.

La muestra la tienin nel salón d'actus del Cuartu el lugal, y es de baldi. El que quiera il a golel tieni jasta'l 31 de diciembri.

13 dic. 2011

Nuevu libru con tonás d'El Rebollal

Esti lunis, 12 de diciembri, se presentó en Ciarrodrigu un libru con tonás d'El Rebollal: "Cancionero y formulario lúdico de tradición infantil en El Rebollar y otros lugares del occidente salmantino"

El robreanu Ángel Iglesias Ovejero presentó, ena Casa la Cultura de Ciarrodrigu, un libru con los cantaris de dagalis de la comarca d'El Rebollal y alreoris. Asina, además de los cántigus de los cincu pueblus d'El Rebollal (Navafrías, Payu, Peñaparda, Robrea y Villarrubias), esti libru tieni en drentru cantaris del suroesti de la provincia de Salamanca y del noroesti de la de Cáciris, comu Gata, Cadalsu,...

El libru (escritu pol Ángel Iglesias, ayudáu pola su mujel, Françoise Giraud y la su dagala Cécile Iglesias) tieni 686 cantaris repartíus en 258 páginas y en él se puedin leel dendi juegus jasta villancicus. Al final, comu acostumbra a jadel Ángel Iglesias enos sus librus, vieni un pequeñu vocabulariu conas palabras de la palra d'El Rebollal (el nuestru mó y manera de palral la lengua leonesa) que ussarun los dagalis enas tonás.

El libru, además d'ena Librería Garzón de Ciarrodrigu se puedi peil al Istitutu las Identiadis de la Diputación de Salamanca, nel corréu ides@lasalina.es