PRIMAVERA 2024 (1): Los bailis d'El Rebollal, protagonistas en la Charrada de Ciarrodrigu

     La nuestra comarca d'El Rebollal jué protagonista en la Charrada de Ciarrodrigu, qu'esti añu 2024 llegaba al númeru 43 y que tuvu de jadelsi nel Teatru pol mé la lluvia.

Milagros Toribio recibi la "Encina Charra"
de manus del alcaldi de Ciarrodrigu,
Marcos Iglesias

     P'apencipial, esti añu juerun dos los grupus d'El Rebollal que bailarun en la Charrada: el grupu "Jálama" de Payu y el grupu folclóricu de Peñaparda.

     Apencipió'l grupu de Payu que, a los sonis de la sartén de Verónica Mangas, las tres parejas de bailaoris jidun tres bailis: la "Jota", la "Charrá Segunda" y el "Fandangu".

     Dispués de Payu le tocó bailal a Peñaparda. Con los sonis del panderu d'Isabel Ramos "Isabelita", las sieti parejas qu'estuvun bailarun "L'Ajecháu", el "Salteáu" y el "Corríu brincáu".

     Peru no sólu en los bailis jué protagonista la nuestra comarca. Y es qu'esti añu la "Encina Charra", el premiu que tolus añus se da en la Charrada a anguién qu'ha dedicáu la su vía al folclori, ha síu pa la peñapardera Milagros Toribio, de 76 añus, bailaora'l grupu de Peñaparda, pol tolus añus qu'ha bailáu y apriendíu a bailal nel pueblu.

     Comu curiosidá, el tamborileru José Benito Mateos "Txebe" bailó con dambus dos grupus d'El Rebollal.

NOTA: afotus emprestás pol Carmen Sánchez (Nuevu Amatus)

Grupu "Jálama" de Payu

Grupu folclóricu de Peñaparda

INVIERNU 2024 (8): ... Y la nievi vesitó los nuestrus pueblus

La nievi de marzu nel Jálama

 L'Inviernu 2024 acabó en la nuestra tierra con la vesita la nievi. Y es que nevó n'El Rebollal el fin de semana del 9 y 10 de Marzu, en drentru lo que mos dejó la borrasca a la que le pusun de nombri "Mónica". 

En los nuestrus pueblus no jué mucha la nievi que cayó, que no llegó ni a cuajal nel suelu. Peru las nuestras sierras sí que vierun neval abondu. Una nievi que, con el fríu los días que siguierun, dejó la nievi en los picus jasta la metá la sotra semana, y que jadrán que no falti l'agua esti añu.

Asina, esperandu que se jaga verdá'l refrán qu'idi esu de "añu de nievis, añu de bienis", l'Inviernu 2024 se despidió jasta'l mes de Diciembri.

INVIERNU 2024 (7): Villarrubias ya tieni la su estela

 El pasáu mes de Jebreru del añu 2024 se jidu en Villarrubias un descubrimientu arqueológicu bien importanti: una estela con grabáus en jorma d'hombri. 

Ángel Justo Rubio, alcaldi de Villarrubias (isquierda)
y José Luis Francisco, arqueólogu (derecha)

La estela, encontrá mú cerquina'l lugal, es bien antigua, pos la jidun entri'l segundu y el tercel mileniu a.C. (alreol del añu 2.000 antis de Cristu). L'arqueólogu José Luis Francisco, el su descubriol, desprica que la estela mangurrina está jecha de granitu (piedra de la que hai bien abondu n'El Rebollal), con 1,52 m d'altu y grabáus lo mesmu pol delantri comu en los láus. Asina, pol delantri la piedra tieni grabáus la jorma d'un hombri con la cabeza y el cuerpu desapartáus, además d'otras cosas que muestran qu'era una presona emportanti, comu una "alabarda" (un arma que rebuja lanza y destral).

Esta estela es la segunda encontrá n'El Rebollal, dispués de la que s'encontró en Robrea nel añu 2009.

NOTA: afotu arrecogía de Noticias Ciudad Rodrigo

Noticia original de Noticias Ciudad Rodrigo: Gran Hallazgo Arquelógico en Villasrubias

VÍDEU con el alcaldi y l'arqueólogu mostrandu la estela de Villarrubias.