Tardíu 2022 (1): Los jongus, los reyis del Tardíu

   Los jongus siempri han síu protagonistas nel nuestru Tardíu rebollanu, pos la nuestra comarca es jonguera abondu. Peru esti Tardíu'l añu 2022, las noticias alreol los jongus han jechu d'ellus los reyis d'esti tiempu. 

   P'apencipial, y pol mé la Diputación de Salamanca, se ha jechu una "senda micológica"

Cartel del Caminu los Jongus
en la Jessa de Villarrubias

(caminu los jongus) entri Villarrubias y Peñaparda, un caminu bien señaláu y con cartelinus espricandu un montonáu de cosinas alreol de los jongus, las sus crasis y el mó y manera tradicional de vivil n'El Rebollal. Tampocu no ha faltáu en los cartelinus anguna cosina en la nuestra palra d'El Rebollal. En total, el caminu son 14 kilómetrus entri robris, un caminu que, anque esté dedicáu a los jongus, puedi jadelsi tó l'añu.

Cartel del Caminu los Jongus en Peñaparda

   El 15 d'Otubri se jidun nel pueblu Peñaparda las "Jornadas micológicas" (Día los Jongus) de la Diputación de Salamanca. Asina, s'acercarun al lugal alreol de 100 presonas de tolus rinconis de la provincia que pudun andal polus caminus y arrecogel jongus d'un montonáu de crasis.

   Tamién Payu tuvu'l su Día los Jongus, jecha pola asociación "Charco Palo" (Charcu Palu), esta vés el sábadu 5 de Noviembri. Asina, los vedinus de Payu arrecogierun jongus polus campus y bosquis del lugal, jongus qu'adispués crasificarun con la ayúa del botiariu'l lugal, Alfredo.

   Tampocu no faltarun los jongus en Navafrías y en Robrea, pos tolus vedinus que han salíu a jongus han arrecogíu muchus.

Jongu de los robrealis d'El Rebollal

Cartelinu del Día los Jongus en Peñaparda

   Esti añu ha síu escasu en tortullus, peru güenu en güevus de rei, jongus de los práus, champiñonis y nícalus.

NOTA: afotu del cartel del Día los Jongus arrecogíu de la página de micocyl

Veranu 2022 (4): Afecha'l comerciu de l'Andrea

 El pasáu 31 d'Agostu d'esti añu 2022, nel pueblu Peñaparda, afechó'l comerciu de l'Andrea de Martín, el comeriu la Praza'l lugal (en verdá, en la Calli Real). 

Andrea y Martín nel su comerciu

Acaba asina'l caminu de más de 40 añus d'un comerciu nel que podías encontral de tó, dendi fruta, jasta los panderus que jadía la mesma Andrea, y un montonáu d'esas pequeñas cosas que no echas en falta jasta que tienis la necesidá.

Dendi esti rinconinu de la redi, el deséu a Andrea y la su familia de que profintin de la retreta.

Veranu 2022 (3): Laura Ester güelvi a ganal

Lo ha güeltu a jadel. Laura Ester Ramos, con las sus raícis en Peñaparda, ha güeltu a ganal con las sus compañeras de la seleición de watelpolu. Y esta vés, pol dos vedis. 

Laura Ester n'unu de los partíus

La primera jué nel Uropéu de watelpolu, que se jidu en Split (Croacia), d'andi las dagalas españolas se trujun l'oru dispués de ganal en la final del 9 de Setiembri a la Grecia pol 9-6, oru que jadi el terceru ganáu pol España.

Ya nel Tardíu, el segundu títulu llegó'l 6 de Noviembri, la Liga Mundial, ganandu esta vés en la Santa Crús de Tenerifi la final a Hungría pol 19-18, dispués d'una tanda de penaltis (el partíu acabó empardáu a 11).

Dos títulus más pa la nuestra paisana qu'añuil a los que ha ganáu los otrus añus, lo mesmu con la seleición española comu con el su equipu, el Sabadell.

NOTA: afotu arrecogía del canal Teledeporte (cou bien se ve en l'afotu)

Veranu 2022 (2): Tamién golvierun los bailis charrus

 Dispués de dos añus d'áina no podel jadel ná pol mé l'Andanciu, al tercel añu jué la güena y, esti añu sí, los nuestrus pueblus pudun jadel las sus fiestas del charru. 

Nel pueblu Peñaparda golvió a jadelsi la Fiesta'l Panderu Cuadráu. El viernis 29 de Juliu apencipió con una charla de Raúl Benito Calzada alreol los trajis de charru. Al sotru día,el sábadu 30 de Juliu, juerun los bailis, qu'estuvun jechus pol el grupu "Jóvenes Extremeños", de Moraleja (Cáciris), el grupu de dagalis de Peñaparda y el grupu de charru de Peñaparda. El conciertu de la nochi lo jidu'l grupu charru "Entavía".

Tampocu no faltarun los bailis charrus en Payu. Asina, el juevis 4 d'Agostu golvierun a retumbal en la Praza'l lugal los sonis y bailis de la "Sartén Charra" que esti añu llegó al númeru 10. Además del grupu "Jálama" de Payu estuvu tamién un ranchu portugués veníu dendi Guarda (Portugal). El conciertu la nochi lo jidu esti añu la cantanti la provincia Valladolís Vanesa Muela, a la que le dierun la Sartén d'Honol pol el su trabaju en defensa la cultura tradicional. Otru añu más, la nuestra palra d'El Rebollal estuvu presenti en los cartelis del festival.

Robrea tampocu no se quedó sin bailis charrus. Asina, el miércolis 10 d'Agostu, el grupu del lugal, "El Fandangu", jidu una muestra de los bailis de Robrea y de los sonis de siempri, muchus d'ellus cantáus en la nuestra palra d'El Rebollal.

NOTA: afotu del grupu "El Fandangu" emprestá pol José Machado, de Robrea

Pasacallis del Panderu Cuadráu

Grupu de dagalis de Peñaparda

Grupu "Jóvenes extremeños" de Moraleja

 

Vanesa Muela arrecogi la su Sartén d'Honol

Grupu "Jálama" de Payu

Ranchu de Guarda

Grupu "El Fandangu" de Robrea

Veranu 2022 (1): Las Fiestas golvierun a los nuestrus pueblus

Dispués de tres añus en que tó se paró pol mé'l Andanciu, las fiestas golvierun a tolus pueblus d'El Rebollal.

Asina, Peñaparda golvió a dal la bienvenía al Veranu con las sus fiestas de San Silveriu (20 de Juniu). Navafrías, Payu y Robrea, con los sus Sanjuanis (24 de Juniu). Y Villarrubias golvió a celebral Santu Ferinu (26 d'Agostu).

Aquí vos deju angunas afotus de las nuestras fiestas d'esti Veranu 2022.

Poniendu'l pinu en Peñaparda

Incierru en Peñaparda

Conciertu de Claudio en Peñaparda

Procesión de San Silveriu

Viga de Payu

Cartelinu de los quintus en Payu

Chocolati pola Ucrania

 El pasáu domingu 13 de Marzu, nel pueblu de Peñaparda se jidu un "chocolati solidariu" con la Ucrania.

Asina, alreol de 100 presonas estuvun en las escuelas viejas de Peñaparda comiendu chocolati y biscochus pa sacal dineru p'ayudal a la genti qu'ha teníu d'ajuyil de la Ucrania pol mé de la guerra, una guerra qu'apencipió'l día 24 de Jebreru de 2022.

Vasus de chocolati

Caja'l dineru

13 de Jebreru del 2022: Los Votus n'El Rebollal

 Anque paeza una cosa que pasó jadi muchu, muchu tiempu, áina si ha pasáu mes y mediu dendi qu'el pasáu 13 de Jebreru del 2022, los vedinus de la nuestra comarca d'El Rebollal juimus a votal, lo mesmu que nel restu de León y de Castilla, pa escogel al Presidenti y a los deputáus pa las Cortis autonómicas. 

Los votus n'El Rebollal juerun asina:

	Navafrías	Payu	Peñaparda	Robrea	Villarrubias	TOTAL
PP	69 (33,99%)	65 (42,48%)	91 (46,43%)	86 (35,25%)	61 (47,66%)	372 (40,09%)
PSOE	92 (45,32%)	51 (33,33%)	72 (36,73%)	83 (34,02%)	44 (34,38%)	342 (36,85%)
VOX	25 (12,32%)	14 (9,15%)	18 (9,18%)	42 (17,21%)	18 (14,06%)	117 (12,61%)
EVA	6 (2,96%)	14 (9,15%)	2 (1,02%)	10 (4,10%)	1 (0,78%)	33 (3,56%)
PODEMOS	3 (1,48%)	3 (1,96%)	1 (0,51%)	11 (4,51%)	1 (0,78%)	19 (2,05%)
UPL	0	2 (1,31%)	3 (1,53%)	7 (2,87%)	1 (0,78%)	13 (1,40%)
C’s	5 (2,46%)	2 (1,31%)	2 (1,02%)	4 (1,64%)	0	13 (1,40%)
PREPAL	0	0	1 (0,51%)	1 (0,41%)	0	2 (0,22%)
VOLT	0	1 (0,65%)	0	0	1 (0,78%)	2 (0,22%)
PACMA	1 (0,49%)	0	0	0	0	1 (0,11%)
PCTE	0	0	1 (0,51%)	0	0	1 (0,11%)
Brancus	2 (0,99%)	1 (0,65%)	5 (2,55%)	0	1 (0,78%)	9 (0,97%)
Malus	0	1 (0,65%)	0	1 (0,41%)	2 (1,54%)	4 (0,43%)
TOTAL	203	154	196	245	130	928

El Rebollal tamién estará presenti en los Votus del 13 de Jebreru

Patricia Santamaría

La comarca d'El Rebollal también estará presenti en los Votus del domingu, 13 de Jebreru d'esti 2022. Y es que dos de los sus vedinus están en drentru las listas del partíu UPL (Uñión el Pueblu Leonés). 

Asina, comu númeru 2 de la lista de la UPL tenemus a Patricia Santamaría Hernández, "Patri", de 39 añus, y comu númeru 5 está José Benito Mateos Pascual, "Txebe", de 47 añus, tamborileru y escritol.

Dambus dos, vedinus de Peñaparda, son orgullosus defensoris de las nuestras tradicionis dendi tolus puntus d'ondi se miri, dendi los bailis y las vestimientas jasta la nuestra palra d'El Rebollal, el mó y manera que tenemus n'El Rebollal d'ussal la lengua leonesa.

José Benito Mateos "Txebe"

Esti 13 de Jebreru será la primera vés que los Votus serán sólu pa escogel a los procuraoris en las Cortis de C. y León.

Dibuju de la UPL

La Luminaria, centru de la fiesta en Peñaparda

El pueblu de Peñaparda golvió, n'esti Tercel Añu l'Andanciu, a jadel la Luminaria (o Lumbrinaria) pa celebral San Sebastián (20 d'Eneru), unu de los "Santus del Gorru". 

Luminaria en Peñaparda

La fiesta se jidu, comu dendi hai milis d'añus, alreol de la lumbri. Asina, la nochi'l sábadu 22 al domingu 23 d'Eneru, la Luminaria estuvu relumbiandu en la Praza'l lugal, y jué mucha la genti que s'arrimó al calol y estuvu toa la nochi en la fiesta, aprovechandu la lumbri p'assal choridus, panceta,...

A la mañana'l domingu 23 la genti tamién pudu aprovechal el borraju de la Luminaria p'assal panceta y choridu, algu que s'ha jechu tradición, n'una continuación tranquila de la fiesta que jidu de brochi de la mesma.

La genti aprovechó'l borraju

Parrillas asandu panceta

El nuevu obispu, de vesita n'El Rebollal

 El nuevu obispu de las diócesis de Salamanca y de Ciarrodrigu, José Luis Retana, quiju jadel una vesita a la nuestra comarca d'El Rebollal antis de jural el su cargu comu obispu. Justamenti, l'obispu escogió'l pueblu de Villarrubias p'apencipial su tiempu comu obispu de Ciarrodrigu. 

Ilesia y campanariu de Villarrubias

Asina, el pasáu viernis 7 d'Eneru, l'obispu entró en la su nueva diócesis pol Villarrubias, el primel pueblu de la diócesis de Ciarrodrigu en viniendu de Prasencia, sillón que ha dejáu pa venil a Ciarrodrigu y a Salamanca, cumpriendu asina cola tradición de paral nel primel pueblu de la su nueva diócesis.

No faltarun a la cita, jecha en la ilesia San Pedru Apóstol de Villarrubias, l'alcaldi del lugal, Juan José Moreno, ni tampocu los curas y moljas de los diferentis alciprestalgus de la diócesis (Villarrubias está en drentru del alciprestalgu del Altu Águeda). Tampocu no faltarun las gentis del lugal y del restu d'El Rebollal, que quijun acercalsi a conocel al nuevu obispu de Ciarrodrigu.

Navidadis 2021 n'El Rebollal

Estrella a la entrá de Peñaparda

 Con Andanciu y con tó, los pueblus d'El Rebollal no han dejáu de celebral las Navidadis, las fiestas del Solsticiu d'Inviernu. Asina, el que más y el que menus, los Ayuntamientus han adornáu las callis y prazas de los sus pueblus.

Pa estus adornus, angunas de las asociacionis d'El Rebollal han ayuáu a que los nuestrus pueblus estén más políus y más alegris n'esti tiempu de Pascua. Asina, en Robrea la asociación "El Roble" ha jechu adornus de maera que han repartíu pol el lugal. Tamién en Payu ha habíu una asociación engalanandu el pueblu, la asociación "Charco Palo", que ha jechu adornus con tolu qu'encontraban. 

Muñecu de nievi en Villarrubias

Tampocu no faltarun los regalus que mos trujun El Tamborileru y Los Reyis. La que sí que no dejó ná jué la Lutería, qu'otra vés pasó de largu.

Con tó y con esu, se pasarun las Navidadis n'El Rebollal y entramus nel Añu Nuevu, el Tercel Añu l'Andanciu, el añu 2022.

¡Felís Añu Nuevu!

Muñecu de maera en Robrea

Adornus en Payu