29 nov 2016

Las primeras nievis del Tardíu

Esti juevis y, sobri tó, el viernis 25 de Noviembri la nievi se dejó vel, por primera vés n'esti Tardíu, ena comarca d'El Rebollal.

Los pueblus andi más nievi cayó juerun Navafrías y Payu, tanta que tuvun de cuertal, el viernis a la mañana, la carretera entri dambus dos pueblus.

En los demás pueblus d'El Rebollal estuvu nevandu tamién, anque no cuajó. Sí que se han podíu vel neváus los picus del Podu Moru, Jálama y La Jañona.

NOTA:
   - Afotu de las señalis emprestá por José "El Moteru" (Robrea)
   - Afotu de Payu emprestá por Verónica Mangas (Payu)

La nievi cuertó la carretera entri Navafrías y Payu

Nievi en Payu

El Podu Moru neváu

Los jongus juerun los reyis en Villarrubias

El pasáu sábadu 19 de Noviembri se jidu, en Villarrubias, el XIII Jornadas Micológicas ("XIII Día los Jongus") organizáu pola "Mancomunidad Alto Águeda" (Mancomunidá Altu Águeda).

En Villarrubias estuvun alreol de 100 presonas, que cogierun alreol de 150 crasis de jongus, qu'estuvun mostráus nun local del ayuntamientu.

Los participants (y los que quijun estal) tuvun una comía nel restauranti "La Mina" de Villarrubias.

Pola tardi, dio una chalra José Ignacio Gómez Risueño.

Grupu de "jonguerus"

Chalra de J. Ignacio Gómez Risueño








NOTA: Afotus emprestás por Verónica Mangas (Payu)

14 nov 2016

El Día los Jongus de la mancomunidá, esti añu en Villarrubias

La Mancomunidá Alto Águeda va a jadel el su Día los Jongus, qu'esti añu jadi el númeru 13. Esti añu va a sel en Villarrubias, el sábadu 19 de Noviembri.
Cartel de los Jongus
Villarrubias 2016

A las 10 de la mañana se recibi, ena Praza el lugal, a la genti que va a participal

A las 10 y media se sali en grupus al campu pa arrecogel los jongus.

La comía, pa tóa la genti que ha participáu, será a las dos de la tardi nel restauranti "La Mina", allí en Villarrubias.

Pa acabal, se va a ponel una muestra de los jongus arrecogíus, que se van a crasifical, y habrá una chalra jecha por José Ignacio Gómez Risueño.

Pa tó'l que quiera apuntalsi, tieni de tiempu jasta'l martis 15 de Noviembri. La comía costará 12 Eurus (12 €), y se tieni de pagal ena cuenta de Caja España-Duero ES10 2108 2219 28 0031137681

Apencipia un nuevu tallel de trabaju n'El Rebollal

Dendi primerus el mes de Noviembri, ena comarca d'El Rebollal s'está jadiendu un nuevu cursu de trabaju. esta vés pa sacal resina de los pinus.

El cursu, que va a dural 9 mesis, es pa genti sin trabaju, y ha entráu genti de los cincu pueblus d'El Rebollal: Navafrías, Payu, Peñaparda, Villarrubias y Robrea.

Navafrías estrena escudu y bandera

El pueblu de Navafrías estrenó escudu y bandera el pasáu mes de Otubri.
Escudu de Navafrías

El acuerdu lo tomarun nel plenu que jidun el día 17 d'Agostu, y jué pubricáu nel Periódicu Oficial de la Provincia de Salamanca (BOP) el viernis, 7 d'Otubri del 2016.

El escudu está dividíu en cuatru partis:
 - Ena primera parti, sali la ilesia por sel el edificiu prencipal del lugal
 - Ena segunda parti sali un león rampanti por estal Navafrías en drentru el históricu Reinu de León
 - Ena tercera, la crús de la Ordin d'Alcántara, en drentru la qu'estuvu Navafrías
 - Ena cuarta, una rama de robri, por estal en drentru la comarca d'El Rebollal