28 feb 2015

El PREPAL pidi que la Palra d'El Rebollal s'aprienda ena escuela

El PREPAL (Partíu Regionalista el País Leonés) jidu un escritu, aprovechandu el Día la Lengua Madri (21 de Jebreru) pidiendu que la nuestra Palra d'El Rebollal la pudiesin aprendel los dagalis ena escuela.
Dibuju del PREPAL

Además de la Palra d'El Rebollal, qu'está en drentru la lengua leonesa, el PREPAL chalra tamién alreol d'otrus mó y maneras de la lengua leonesa (comu la palra de Las Arribis), del gallegu ussáu ena comarca de Sanabria y el Oesti El Bierzu, y del portugués de La Alamedilla y La Bouza.

20 feb 2015

S'acabarun los Carnavalis

Dispués d'angunus días de fiesta, s'acabarun los Carnavalis n'El Rebollal. Cá unu de los pueblus lo ha celebráu al su mó y manera, con más o menus respetu a las tradicionis del lugal.

En Villarrubias, el Domingu de Carnaval los quintus matarun (y comierun) el gallu, comu se vieni jadiendu nel lugal dendi siempri.

Domingu de Carnaval, Peñaparda
(Afotu de Virginia Iglesias)
Charrascona de Payu
(Afotu d'Asun Núñez)



En Peñaparda, el Domingu de Carnaval se jidu una paella, acompañá a la tardi de chocolati y baili con charanga. El Miércolis de Cenida se jidu el Intierru la Sardina, con una comía de panceta y sardinas assás.

En Payu, sacarun a la tradicional Charrascona, que corrió las callis del lugal montá en un burru, comu se vieni jadiendu dendi antigu.

En Robrea, las gentis salierun los tradicionalis jorramachis el Martis de Carnaval.

Pa acabal, idil que una hija de Navafrías, Aída Acosta dió, al apencipial los famosus Carnavalis de Ciarrodrigu, el pregón de la peña "El Porvenir".
Intierru la Sardina, Peñaparda
(Afotu de Virginia Iglesias)
Charrascona de Payu
(Afotu de Verónica Mangas)

13 feb 2015

Apencipian los Carnavalis

Esti viernis han apencipiáu los Carnavalis del Añu 2015.

Los dagalis del "CRA El Bodón" (en drentru el qu'están las escuelas de Peñaparda, Villarrubias y Robrea) han jechu la su fiesta el Antrueju ena mañana el viernis en Peñaparda, conas sus vestimientas de hombri antigu. Cá pueblu iba de la su colol. En Payu (del CRA de Navafrías), los dagalis iban vestíus de pintoris.
Dagalis ena Praza de Peñaparda

La fiesta seguirá en los nuestrus pueblus los demás días jasta'l martis, y en tós podrán velsi gentis vestías de jorramachi, y oyelsi cantaris d'esti tiempu comu "La Charrascona" o "Un Martis de Carnaval". El domingu al meyudía se va a jadel, pa tó'l que se haiga apuntáu, una paella en Peñaparda, con chocolati y baili pola tardi.

Asina que, otru añu más, El Rebollal va a celebral los sus Carnavalis ¿Veremus esti añu polas callis d'El Rebollal a La Charrascona y a la Vaca Galana (o Vaca Romera)?
Dagalis en Payu

NOTA: Afotu de Payu jecha pr Verónica Mangas