27 oct 2011

El Rebollal a escuras

Esti miércolis 26 d'otubri himus güeltu a quedalmus a escuras ena comarca d'El Rebollal.

Un poquinu dispués de las cincu la tardi, la lús se jué n'El Rebollal pol mé el agua y el airi tan juerti que jadía. La trecidá golvió alreol de las onci y media de la nochi, asina que El Rebollal estuvu más de seis horas sin lús.

N'El Rebollal no es la primera vés que pasa algu asina. Hai unus añus, pol mé una nevá grandi, la comarca estuvu angunas horas sin lús, cona diferencia de que aquella vés la lús golviú alreol del meyudía, asina que los nuestrus pueblus estuvun sin trecidá, angunas horas más.

24 oct 2011

Güelvi a llovel

El fin de semana truju las primeras lluvias del Tardíu a tierras d'El Rebollal.

Dispués de muchu tiempu sin llovel (anguna tormentina nel mes d'agostu), El Rebollal ha güeltu a vel llovel. El domingu y, sobri tó, la madrugá del lunis mos ha traíu a la nuestra tierra ha güeltu a recebil agua del cielu. La lluvia del domingu jué agua bien caía, peru la madrugá del lunis truju agua caía con muchu jostigu pos, además del cael una güena aguarrá (alreol de los 100 litrus pol metru cuadráu), el agua ha caíu con muchu jostigu pol mé el airi.

Asina, los ríus y regatus d'El Rebollal han güeltu a acomolgaítus llenus d'agua. Con tó y con esu, estas lluvias, las primeras del Tardíu, no remedian más que un poquininu la sequeá que hai ena comarca dendi'l mes de mayu, sequeá que ha jechu que esti añu entovía no haigan salíu los jongus.

Pa esta semana, las telivisionis dan agua pa'l miércolis y el juevis.

15 oct 2011

Il a jongus n'El Rebollal

Afotu de los cartelis de avisu pa los jongus
Dendi el sábadu 15 d'otubri d'esti añu 2011, il a jongus n'El Rebollal es de pagu.

Pol mé d'unus papelis firmáus polus ayuntamientus, la Diputación de Salamanca, y la Junta de C. y León, dendi esti añu hay que pagal pa salil a jongus. Los premisus son apaecíus a los de il de pesca o de caza (o sea, que es obrigáu tenel el premisu si se quieri salil a jongus).

Los precius de los premisus varían sigún d'andi sea el jongueru, sigún pa qué se quieran los jongus y sigún pa cuántu tiempu sea. Asina, pa la genti del lugal el premisu es de 3 eurus (3 €) pa tóa la temporá si se sali pa pasal el ratu y 10 eurus (10 eurus) si se sali a jongus pa vendelus (la temporá va dendi el 1 d'agostu jasta'l 31 de juliu del sotru añu). Esi preciu se va encarandu sigún d'andi sea el que sali a jongus. Asina, los que tienin algu de vel con el lugal pagarían 10 y 100 eurus, respectivamenti. Los de la provincia de Salamanca 20 y 200 eurus, y los forasterus 400 eurus (ná más pa vendelus).

El dineru que se saqui conos premisus se partirá entri los ayuntamientus (cá pueblu sigún los premisus que dé) y la empresa cona que se han firmáu los papelis. Los premisus se puedin sacal enos cuartus de cá lugal (de lunis a viernis) y enas tabernas (sábadus y domingus).

8 oct 2011

Númerus nuevus enas callis de Peñaparda

Las callis de Peñaparda estrenan númerus.

El lunis 3 d'otubri apencipiarun a remual los númerus de tóas las callis del lugal pa ponelus a la par con los del Catastru. Asina, anque muchas cassas tienin el mesmu númeru, son otras muchas las que van a remual, con diferencias angunas vecis jasta de 10 númerus arriba o abaju.

AFOTU: a la izquierda, el númeru nuevu; a la derecha, el vieju

5 oct 2011

Volanderas n'El Rebollal

Sigún sali escritu hoi nel periódicu La Gaceta de Salamanca, la Junta va a dejal ponel volanderas pa jadel trecidá nel Espaciu Natural Protegíu d'El Rebollal (no confundil cona nuestra comarca, que somus los cincu pueblus de siempri: Navafrías, Payu, Peñaparda, Villarrubias y Robrea).

Asina, anque estus molinus d'airi no van a estal en drentru la nuestra comarca (sinu enos pueblus de Martiagu, Saúgu, Agallas y Serraílla el Llanu), si que mos va a llegal el golpi pa'l paisaji porque, anque las volanderas no estén n'El Rebollal, sí que se van a vel dendi aquí.

Estus molinus d'airi ponin en peligru que nel futuru jagan El Rebollal Parqui Natural ya que, además d'estus molinus, tamién tienin pensáu ponelus nel restu la Sierra de Gata, anque entovía no está aprobáu.

3 oct 2011

Avisu d'Iberdrola

Esti juevis, 6 d'otubri, se va a cuertal la lús en tó El Rebollal, sigún el avisu d'Iberdrola.

La lús va a estal cuertá dendi las 9 de la mañana jasta las 11:30, tamién de la mañana.

1 oct 2011

Viaji a Galicia

Ayel viernis, 30 de setiembri, salió dendi la nuestra comarca una escursión a Galicia.

Un cochi de línea, acomolgaítu de genti d'El Rebollal, salió caminu de Galicia, andi tienin pensáu pasal cincu días. Las gentis han salíu prencipalmenti de Robrea y Peñaparda, anque tamién hai genti de Villarrubias y Payu.

La güelta está pensá pa'l martis 5 d'otubri.

Ena nuestra palra

Hoi, primeru d'otubri, apencipia esti nuevu "blog" de noticias, PARTI D'EL REBOLLAL, un "blog" que quieri sel un lugal pa encontralmus tóas las gentis d'El Rebollal, lo mesmu los que vivimus aquí comu los que vivís juera de la nuestra tierra. Un lugal pa sabel lo que pasa n'El Rebollal ena lengua que himus heredáu de los nuestrus padris y agüelus.

Las nuestras noticias, ena nuestra palra.