San Silveriu dio la bienvenía al Veranu 2023

San Silveriu (20 de Juniu), patrón de Peñaparda, despidió la Primavera y dio la bienvenía al Veranu d'esti añu 2023. 

El Pinu los Quintus

Las Fiestas apencipiarun el viernis 16 de Juniu, cuandu los Quintus trujun el Pinu y lo pusun nel su lugal de siempri. A la nochi hubu una discu-móvil.

El sábadu 17 de Juniu, la mañana apencipió con el cambiu d'alcaldi (n'este casu, alcaldesa), en dejandu'l puestu Camila Vizarro en manus d'Alicia Palos, nueva alcaldesa de Peñaparda. En cuantis a la fiesta propia, a la mañana se jidu l'incierru de vaquillas polas callis del lugal. A la tardi jué la joricia, la capea tradicional, que tuvu de sel suspendía pol mé d'un acidenti del direutol de lidia. Y a la nochi, la genti bailó en la verbena cola música de la orquesta "MORODA".

El domingu 18 de Juniu, la fiesta continuó con el incierru de vaquillas a la mañana y la capea tradicional de la tardi (esta ya sin que pasasi ná del otru mundu).

Ya'l martis 20 de Juniu, el Día'l Santu, se jidu la misa al Santu y la procesión polas callis de Peñaparda. Los peñaparderus despedimus las nuestras fiestas de San Silveriu, qu'acabarun esa tardi con los juegus pa los dagalis.

Preparandu'l Pinu

Levantandu'l Pinu

Incierru'l sábadu

Capea'l sábadu

Incierru'l domingu

Cómu juerun los votus p'alcaldi n'El Rebollal

 El pasáu domingu, 28 de Mayu del 2023, juerun los Votus pa escogel a los alcaldis en tó'l país. Tamién, comu no podía sel menus, en la nuestra comaca d'El Rebollal. Asina juerun los votus en los nuestrus pueblus. 

Ilesia y pinu de Payu

Las letras y númerus qu'apaecin se léin asina:

PARTÍU   votus (tantu pol cientu)   númeru de justicialis

NAVAFRÍAS

PSOE     166 (58'65%)     4 
PP     116 (40'98%)     3
Brancus     1 (0,35%)
Malus     3 (1'04%)
TOTAL     286 (85'62%)

Navafrías múa la colol del su alcaldi, que golverá a sel del PSOE, con José Manuel Píriz

PAYU

PSOE     161 (63'88%)     5 
PP     85 (33'73%)     2
Brancus     6 (2,38%)
Malus     12 (4'54%)
TOTAL     264 (84'34%)

En Payu güelvi a ganal el PSOE. Seguirá comu alcaldi Agapito Pascual

PEÑAPARDA

PP     117 (44'65%)     3
PPC     95 (36'25%)     3
PSOE     48 (12'32%)     1
Brancu     2 (0'76%)
Malus     0
TOTAL     262 (87'62%)

Toítu pol sabelsi en Peñaparda dondi, en siendu'l PP el partíu más votáu, no ha sacáu abondu de votus pa tenel l'alcaldi. Es el únicu pueblu d'El Rebollal nel que habia tres partíus

ROBREA

PSOE     196 (60'68%)     4
PP     118 (36,53%)     3
Brancu     9 (2,78%)
Malus     4 (1,22%)
TOTAL     327 (80'54%)

En Robrea golverá a sel alcaldi José Luis Varas, con los cuatru justicialis qu'ha sacáu el PSOE. El 5º entovía no se sabi, pol mé un votu malu, que podía sel tamién del PSOE. Se sabrá n'unus días

VILLARRUBIAS

PP     125 (77'63%)     6
PSOE     33 (20'49%)     1
Brancu     3 (1'86%)
Malus     1 (1,22%)
TOTAL     163 (70'56%)

En Villarrubias güelvi a ganal el PP, anque habrá nuevu alcaldi pol mé que no se presentó el qu'estaba. Asina, el nuevu alcaldi será Ángel Justo Rubio

NOTA. Los nombris de los partíus son

PP   Partido Popular (Partíu Populal)
PSOE   Partido Socialista Obrero Español (Partíu Socialista Obreru Español)
PPC   Peñaparda por el Cambio (Peñaparda Pol Cambiu)

Tardíu 2022 (2): Payu ya tieni la su residencia

El pasáu 26 de Noviembri del 2022, Payu inauguró la su nueva residencia. 

Dispués d'añus d'obras (cuasi 30 añus), a la fin Payu ya tieni la su residencia, a la que se l'ha puestu'l nombri de "Jálama".

Esta residencia payenga, en la que puedin vivil jasta 24 presonas, podemus encontrala en metá'l lugal, en siendu la cassa más grandi'l pueblu. Ha costáu jadela alreol de 1,2 millonis d'eurus, de los que 250.000 los ha puestu ADECOCIR (Asociación pa'l Desarrollu la Comarca Ciarrodrigu).

Asina, dendi'l 1 de Dicimbri, Payu ya tieni abierta y furrulandu la su residencia.

Residencia dendi la Calli'l Castillu

Entrá de la residencia de Payu

Tardíu 2022 (1): Los jongus, los reyis del Tardíu

   Los jongus siempri han síu protagonistas nel nuestru Tardíu rebollanu, pos la nuestra comarca es jonguera abondu. Peru esti Tardíu'l añu 2022, las noticias alreol los jongus han jechu d'ellus los reyis d'esti tiempu. 

   P'apencipial, y pol mé la Diputación de Salamanca, se ha jechu una "senda micológica"

Cartel del Caminu los Jongus
en la Jessa de Villarrubias

(caminu los jongus) entri Villarrubias y Peñaparda, un caminu bien señaláu y con cartelinus espricandu un montonáu de cosinas alreol de los jongus, las sus crasis y el mó y manera tradicional de vivil n'El Rebollal. Tampocu no ha faltáu en los cartelinus anguna cosina en la nuestra palra d'El Rebollal. En total, el caminu son 14 kilómetrus entri robris, un caminu que, anque esté dedicáu a los jongus, puedi jadelsi tó l'añu.

Cartel del Caminu los Jongus en Peñaparda

   El 15 d'Otubri se jidun nel pueblu Peñaparda las "Jornadas micológicas" (Día los Jongus) de la Diputación de Salamanca. Asina, s'acercarun al lugal alreol de 100 presonas de tolus rinconis de la provincia que pudun andal polus caminus y arrecogel jongus d'un montonáu de crasis.

   Tamién Payu tuvu'l su Día los Jongus, jecha pola asociación "Charco Palo" (Charcu Palu), esta vés el sábadu 5 de Noviembri. Asina, los vedinus de Payu arrecogierun jongus polus campus y bosquis del lugal, jongus qu'adispués crasificarun con la ayúa del botiariu'l lugal, Alfredo.

   Tampocu no faltarun los jongus en Navafrías y en Robrea, pos tolus vedinus que han salíu a jongus han arrecogíu muchus.

Jongu de los robrealis d'El Rebollal

Cartelinu del Día los Jongus en Peñaparda

   Esti añu ha síu escasu en tortullus, peru güenu en güevus de rei, jongus de los práus, champiñonis y nícalus.

NOTA: afotu del cartel del Día los Jongus arrecogíu de la página de micocyl

Veranu 2022 (4): Afecha'l comerciu de l'Andrea

 El pasáu 31 d'Agostu d'esti añu 2022, nel pueblu Peñaparda, afechó'l comerciu de l'Andrea de Martín, el comeriu la Praza'l lugal (en verdá, en la Calli Real). 

Andrea y Martín nel su comerciu

Acaba asina'l caminu de más de 40 añus d'un comerciu nel que podías encontral de tó, dendi fruta, jasta los panderus que jadía la mesma Andrea, y un montonáu d'esas pequeñas cosas que no echas en falta jasta que tienis la necesidá.

Dendi esti rinconinu de la redi, el deséu a Andrea y la su familia de que profintin de la retreta.

Veranu 2022 (3): Laura Ester güelvi a ganal

Lo ha güeltu a jadel. Laura Ester Ramos, con las sus raícis en Peñaparda, ha güeltu a ganal con las sus compañeras de la seleición de watelpolu. Y esta vés, pol dos vedis. 

Laura Ester n'unu de los partíus

La primera jué nel Uropéu de watelpolu, que se jidu en Split (Croacia), d'andi las dagalas españolas se trujun l'oru dispués de ganal en la final del 9 de Setiembri a la Grecia pol 9-6, oru que jadi el terceru ganáu pol España.

Ya nel Tardíu, el segundu títulu llegó'l 6 de Noviembri, la Liga Mundial, ganandu esta vés en la Santa Crús de Tenerifi la final a Hungría pol 19-18, dispués d'una tanda de penaltis (el partíu acabó empardáu a 11).

Dos títulus más pa la nuestra paisana qu'añuil a los que ha ganáu los otrus añus, lo mesmu con la seleición española comu con el su equipu, el Sabadell.

NOTA: afotu arrecogía del canal Teledeporte (cou bien se ve en l'afotu)

Veranu 2022 (2): Tamién golvierun los bailis charrus

 Dispués de dos añus d'áina no podel jadel ná pol mé l'Andanciu, al tercel añu jué la güena y, esti añu sí, los nuestrus pueblus pudun jadel las sus fiestas del charru. 

Nel pueblu Peñaparda golvió a jadelsi la Fiesta'l Panderu Cuadráu. El viernis 29 de Juliu apencipió con una charla de Raúl Benito Calzada alreol los trajis de charru. Al sotru día,el sábadu 30 de Juliu, juerun los bailis, qu'estuvun jechus pol el grupu "Jóvenes Extremeños", de Moraleja (Cáciris), el grupu de dagalis de Peñaparda y el grupu de charru de Peñaparda. El conciertu de la nochi lo jidu'l grupu charru "Entavía".

Tampocu no faltarun los bailis charrus en Payu. Asina, el juevis 4 d'Agostu golvierun a retumbal en la Praza'l lugal los sonis y bailis de la "Sartén Charra" que esti añu llegó al númeru 10. Además del grupu "Jálama" de Payu estuvu tamién un ranchu portugués veníu dendi Guarda (Portugal). El conciertu la nochi lo jidu esti añu la cantanti la provincia Valladolís Vanesa Muela, a la que le dierun la Sartén d'Honol pol el su trabaju en defensa la cultura tradicional. Otru añu más, la nuestra palra d'El Rebollal estuvu presenti en los cartelis del festival.

Robrea tampocu no se quedó sin bailis charrus. Asina, el miércolis 10 d'Agostu, el grupu del lugal, "El Fandangu", jidu una muestra de los bailis de Robrea y de los sonis de siempri, muchus d'ellus cantáus en la nuestra palra d'El Rebollal.

NOTA: afotu del grupu "El Fandangu" emprestá pol José Machado, de Robrea

Pasacallis del Panderu Cuadráu

Grupu de dagalis de Peñaparda

Grupu "Jóvenes extremeños" de Moraleja

 

Vanesa Muela arrecogi la su Sartén d'Honol

Grupu "Jálama" de Payu

Ranchu de Guarda

Grupu "El Fandangu" de Robrea