El Rebollal estará presenti en los Votus del mes de Mayu

La comarca d'El Rebollal golverá a estal presenti en los Votus del mes de Mayu, nel que van a escogelsi los procuraoris a Cortis, además de a los alcaldis y justicialis de los pueblus.

Presentación de los candidatus

El "culpabri" será José Benito Mateos Pascual, "Txebe", que va comu primeru a las Cortis, ena provincia Salamanca, por el partíu Unión del Pueblo Leonés (UPL, Unión el Pueblu Llionés).

La presentación de los candidatus, lo mesmu pa las Cortis de C. y León comu pa'l ayuntamientu Salamanca, se jidu el pasáu sábadu 23 de Jebreru, nel hotel Rona Dalba de Salamanca.

Ena presentación estuvun, comu se ve ena afotu, José Benito Mateos (candidatu a Cortis), Carlos Javier Salgado (candidatu a alcaldi de Salamanca), Luis Mariano Santos (procuraol de UPL enas Cortis) y Julio Rivó (secretariu el partíu).

La palra d'El Rebollal, protagoniza el final del mes de Jebreru

Artículu de La Gaceta 1

La nuestra palra d'El Rebollal, el mó y manera que tenemus n'El Rebollal d'ussal la lengua leonesa, ha síu protagonista ena segunda metá el mes de Jebreru.

Apencipiandu polu primeru nel tiempu, el sábadu 16 de Jebreru el periódicu La Gaceta de Salamanca sacó un reportaji alreol de la nuestra palra, un reportaji de dos hojas, las mesmas que la matancia de Guijuelu (noticia patrociná) y sólu dos menus que el pregón de los Votus pa'l Congresu y el Senáu pa'l mes d'Abril. Estu muestra que, caicuandu, se la da a la nuestra palra algu de la emportancia que tieni.

Artículu de La Gaceta 2

Esti reportaji, y el qu'en él mentasin el peligru que corri la nuestra palra, jidu qu'el martis 26 de Jebreru, el PSOE (Partíu Socialista Obreru Español) presentasi ena Diputación de Salamanca una propuesta pa la defensa de la nuestra palra d'El Rebollal, propuesta que votarun a favol PSOE, C's (Ciudadanus) y Ganemos Salamanca (Ganemus Salamanca), peru que jué rechazá conus votus del PP (Partíu Populal), que tieni la mayoría de los deputáus provincialis. Curiosu rechazu, pos la Costitución, nel su artículu 3.3, idi que tós los mó y maneras de palral merecin especial respetu y proteición.

P'acabal, la nuestra palra tamién estuvu presenti el pasáu miércolis, 27 de Jebreru, ena presentación ena Cassa las Conchas de Salamanca, el libru "Aire, fuego y deseo" (Airi, fuegu y deséu), del poeta burgalés Juan Carlos García Hoyuelos. La nuestra palra estuvu presenti pol mé la puesía "Pol baju la tu alma de pájaru", tradución del poema "Debajo de tu alma de pájaro", jecha por José Benito Mateos Pascual "Txebe" (o sea, esti qu'escribi estas palabrinas). Además, el ya mentáu Txebe pusu tamién la música, con la gaita y el tamboril, el panderu (con el que cantó en la palra) y el adufe (con el que cantó en portugués, otra de las lenguas palrás en Salamanca). El Rebollal estuvu presenti tamién ena presona de Aída Acosta, navafrieña, que recitó otra de las puesías de Juan Carlos García Hoyuelos.

Hoyuelos (izq.) y Txebe (dcha)

Txebe con el panderu

Con éstu acabó esti mes de Jebreru, un mes nel que la nuestra palra d'El Rebollal jué protagonista.

Aída Acosta

NOTA: afotus de la Cassa las Conchas emprestás por Yago (Hoyuelos y Txebe), Juan Carlos García Hoyuelos (Aída) y por Aída Acosta (Txebe con el panderu)

Las primeras nievis del 2019

La Jañona dendi Peñaparda

El mes de Jebreru apencipió, en la nuestra comarca d'El Rebollal, con las primeras nievis del añu.

Anque no jué mucha la nievi que cayó, sí que se han podíu vel nevás las cumbris de los picus de Jálama y La Jañona, anque el calol d'estus días jadrá que duri pocu tiempu.

Quitandu un pal de días del mes d'Eneru, estas nievis de Jebreru son las primeras que mos train agua a la nuestra tierra esti añu.

NOTA: afotu de "Jálama dendi Navafrías" emprestá por Tomás Acosta (Navafrías). Afotu de "Jálama neváu" emprestá por Lourdes Astorga (Navafrías)

Jálama dendi El Castillu (Peñaparda)

Jálama dendi Navafrías

Jálama neváu

Peñaparda se quéa con un bar sólu

El pasáu 31 d'Eneru del 2019 afechó el penúltimu bar de Peñaparda, el Bar Ramos. Asina, el 1 de Jebreru amaneció en Peñaparda con un bar menus, asina que de los dos que había abiertus tó'l añu ya ná más quea que unu, el bar "El Cruce".

El Rincón (izquierda) y el Ramos (derecha)
los dos últimus baris en afechal

Nel mes d'Otubri afechó la Taberna "El Rincón", y a finalis d'Agostu la discoteca y el bar de las piscinas (anque estus dos últimus ná más que abrierun nel Veranu).

Lejus quéan aquellus tiempus en que Peñaparda tuvu más d'una dodena de baris. Al quedalsi con ná más un bar, Peñaparda es, agora mesmu, el pueblu con menus baris d'El Rebollal.

De momentu no se sabi si van a golvel a abrilu, anque no sería raru.

El Rebollal honra a San Sebastián con las sus Luminarias

La nuestra comarca d'El Rebollal, la mas al sur el Reinu de Llión, celebró las sus tradicionalis fiestas en honol a San Sebastián, unu de los llamáus "Santus del Gorru", llamáus d'esti mó y manera por jadelsi nel Inviernu. Se cumpri asina, el refrán que idi: "el venti d'Eneru San Sebastián el primeru", por sel la primera fiesta que se jadi dispués de las Navidadis (contestáu por angunus con el tamién conocíu "tenti, varón, qu'antis va San Antón", que no se jadi n'estus lugaris). 

Luminaria de Peñaparda

Luminaria de Robrea

La fiesta apencipia el día antis del Santu, cuandu se chisca la Luminaria, quiciás la más antigua de las tradicionis de los nuestrus pueblus (juntu al Pinu de los Quintus), un ritu de "purificación" pol mé el fuegu. Aprovechandu la Luminaria, la genti se arrima a la lumbri, jadiendu la fiesta alreol de la foguera, calientandu asina una de las más frías nochis d'Eneru. Comu se ha jechu dendi siempri, los Quintus han corríu el lugal pidiendu pa jadel la fiesta, recibiendu nel su paséu por el lugal lo mesmu comía (choridus, morcillas, dulcis, pan,...) que bebía (cerveza, refrescus,...). Esta fiesta, la última que celebran los Quintus del añu pasáu, caicuandu dura jasta que ya ha amanecíu.

Asandu carni

Domingu a la mañana en Peñaparda

Asina, las gentis de Peñaparda jidun la su Luminaria ena Praza el lugal, mientris qu'en Robrea la jidun al láu el Pabellón.

Peru no para ahí la fiesta pos, al seguil chiscá la Luminaria, los vedinus de Peñaparda aprovechan el borraju pa assal carni, choridus,... con lo que la fiesta sigui p'alantri. Asina, alreol del fuegu, los peñaparderus profitan de dos días de fiesta en metá el Inviernu, a la espera del tiempu del su patrón, San Silveriu (20 de Juniu), mientris que los robreanus cuentan los días jasta los Sanjuanis (24 de Juniu).

NOTA: afotu de Robrea emprestá por Kike Martín Lozano (Robrea)

Eneru mos truju muchu fríu y, por fin, agua

El añu ha apencipiáu n'El Rebollal con el fríu típicu el Inviernu. Asina, el més d'Eneru ha jechu honol (sobri tó a las nochis) al refrán que idi que "Eneru heló a su madri nel lavaéru".

Niebra en Peñaparda

 

Yelu en Villarrubias

Y es que ye verdá que a las nochis ha heláu muchu. La estación de la AEMET en Navafrías midió, el día 13 d'Eneru, la mínima de lo que llevamus d'añu, con -7,9ºC (sieti con nuevi pol baju el ceru), anque en total son sieti los días que llevamus esti añu con mínimas de -7ºC o pol baju.

Lloviendu nel charail

En saliendu de los númerus oficialis, hai genti que, a primera hora de la mañana, ha medíu con el su cochi fríu de jasta -10ºC (diés pol baju el ceru).

Anque el Inviernu mo ha faltáu a la su cita con el fríu, el agua ha estáu más dura de cael, pos no ha caíu ná jasta'l 19 d'Eneru, lloviendu los días 19 y 20, anque pocu (2,8 litrus el sábadu 19, y 0,4 litrus el domngu 20).

Las Navidadis pasarun por El Rebollal

La comarca d'El Rebollal tuvu, comu no podía sel menus, las sus fiestas de Navidá, fiestas enas que no pudun faltal lucis, adornus, villancicus y regalus.

Lucis de Peñaparda

Lucis de Villarrubias

Lucis de Robrea

Grupu "Flor de Jara"

En cuantis a las lucis, tólus pueblus pusun unas lucis especialis pa recordal a la genti el tiempu n'el qu'estabamus. Unus nel barcón el Cuartu, otrus tamién enas entrás del lugal, y angunus jasta enroscás enas farolas.

Los villancicus estuvun, sobri tó, en Peñaparda, andi los dagalis de la escuela estuvun cantandu a los agüelus de la residencia. Tamién, el día 26 de Diciembri, el grupu estremeñu "Flor de Jara" jidu una pequeña muestra de villancicus, esta vés enas escuelas viejas.

Tampocu no faltarun los regalus pa la genti, más que ná pa los dagalis, regalus que trujun, entri otrus, los Reyis o el Tamborileru.

Muestra d'achiperris antigus de Navafrías

Pa acabal, mental la muestra d'achiperris antigus que jidun en Navafrías. El su amu, José Antonio Leal, quiju con esta muestra apriendel a la genti cómu ha evolucionáu el hombri.

La Navidá tampocu no dejó premius enas luterías.

NOTA: afotu de Navafrías arrecogía de Navasfrías.net