8 ene. 2017

Se mos jué la "Tia Pepa", sartenera de Villarrubias

Esti miércolis 4 d'Eneru murió en Itueru, a los 96 añus, María Josefa Hernández Hernández, más conocía comu la "Tia Pepa", la última sartenera de Villarrubias.
La "Tia Pepa" con la su sartén

La "Tia Pepa" tocó pa'l grupu de charru de Villarrubias ena Charrá d'El Rebollal que se jidu, nel añu 1990, nel pueblu de Villarrubias, una de las últimas que se jidun. Nel II Festival Folclóricu "Juenti el Gallu", nel añu 2011 en Villarrubias, los grupus jidun el pasacallis pasandu pola su cassa, comu homenaji a la "Tia Pepa".

Cona su muerti, el charru de Villarrubias pierdi a la su sartenera, y a una de las pocas presonas (quiciás la última) qu'entovía s'acordaban de los bailis de Villarrubias.

El intierru jué el juevis, 5 d'Eneru, en Villarrubias.

La "Tia Pepa" con el grupu de charru de Villarrubias

NOTA: afotu del grupu de charru arrecogía de la página web de Villarrubias

2 comentarios:

  1. Gran perdida dagal. Y con la pena añadía de que con Ella se pierdan partí de los requicius folkroricus de Villas.

    ResponderEliminar
  2. Una mujel valienti cumu pocas, justa y verdadera, cumu idia ella: lo que yo digu se escribi. Es una gran perdida pa la memoria de villasrubias pues será la unica que queaba que pudiera dal fé de lo que júe el canti y el baili con ella se acabó lo pocu que queaba. Sé bien que no le tenia mieu a la muerti y que tenia los cojonis bien puestus y que por andi quiera que iba derramaba alegria y saleru dispues de pasal penas. Descansa en paz Diosa!

    ResponderEliminar