Payu y la su lucha polus médicus de los pueblus

Concentración del sábadu 11

El pueblu de Payu ha cogíu la bandera de la lucha polus médicus de los pueblus, protestandu polus planis "de futuru" de la Junta de C. y León.

Y es que, dendi Valladolís, tienin un pran pa qu'haiga de pedil cita con el médicu pa que te pueda atendel, dejandu asina a los pueblus sin médicu a diariu, y jadiendu más difícil el vivil en ellus, lo mesmu a dagalis, a la genti nueva o a los viejus. Esi programa "de futuru" quierin probalu, primeru, ena comarca d'Alisti, ena provincia leonesa de Zamora y, "si va bien", ponela en tóas las provincias de la actual autonomía, lo mesmu en las tres provincias leonesas (Salamanca, Zamora y León) comu en las demás.

Cartel "oficial" de la lucha
polus médicus de los pueblus

A éstu tenemus d'añuil que la comarca d'El Rebollal, la más al Sul de tóa la provincia de Salamanca (y, por estensión de tó'l Reinu de Llión), lo que jadi que tengamus el hospital a más d'una hora, tan lejotis que van dendi los 120 km que hai dendi Robrea jasta los más de 140 km dendi Navafrías.

Agapito Pascual, alcaldi de Payu,
antis d'entral en vivu

Asina, el pueblu de Payu (135 km dendi Salamanca) no ha queríu quedalsi de brazus crudáus, y ha jechu, pol mé el su alcaldi, Agapito Pascual, dos concentracionis pa protestal y denuncial los planis pensáus en Valladolís. La primera, el sábadu 11 d'Eneru, que salió pubricá ena prensa charra. La segunda, el lunis 13 d'Eneru, ena que vinun dendi la cadena estatal Cuatro, saliendu en vivu nel su programa "Cuatro al Día", algu que podéis vel n'esti enlaci: https://www.cuatro.com/cuatroaldia/el-payo-municipio-salamanca-lucha-conservar-servicio-medico-diario_18_2882520341.html

Estas protestas se uñin a las d'otrus pueblus de la comarca de Ciarrodrigu, y a otras d'otras comarcas, comu la de Benaventi (Zamora), que tamién tuvu su tiempu nel parti de La Sexta, en una noticia ena que mentarun la lucha por el médicu enos pueblus charrus. Podéis vesital la noticia n'esti enlaci: https://www.lasexta.com/noticias/sociedad/ni-traumatologo-ni-pediatra-24-horas-las-deficiencias-de-la-sanidad-en-provincias-envejecidas_202001145e1dd46d0cf28446b0bf8e44.html

La lucha polus médicus de los pueblus se convierti, asina, en una de las señas de los pueblus y de lo que se conoci comu "España Vaciada".

NOTA: afotu del sábadu 11 emprestá por Maite Martín