24 may 2017

Los caballus golvierun a Robrea pa la su Feria

El pueblu de Robrea golvió a jadel, y cona d'esti añu 2017 van ochu vedis, la su Feria el Caballu. Esta vés la jidun entri'l viernis 19 y el domingu 21 de Mayu.
Preparáus pa'l paséu a caballu

El viernis 19 se jidu una chalra alreol de los torus, que valió d'homenaji a los torerus José Miguel Pérez "Joselillo" y Eduardo Gallo.

Ya el sábadu 20 se desayunarun migas y, una vés cogías juerzas, se jidu una paséu a caballu jasta La Cascajera. Dispués de la comida pa tós, la feria se llevó jasta'l pabellón andi, además de cenal, se pudun vel sevillanas y, a la nochi, un conciertu de framencu con el grupu "Kurkillo".

Pa acabal, el domingu 21 se jidu una feria d'artesanía, una muestra d'afotus del mundu el toru, y se remató tó con sevillanas.

Sali d'oju que, en algu que se jadi ena nuestra comarca, no apareza ni la nuestra palra d'El Rebollal (ni enos cartelis, ni nel programa), y que se apuesti por el framencu y las sevillanas dejandu de láu lo charru. Un puntu a corregil pa'l sotru añu, en drentru de lo qu'es una güena idea.

3 comentarios:

  1. Güenu, a poquinu a pocu se dirá sostribandu la palra correta. Un saluinu collaçu Txebe.

    ResponderEliminar
  2. Mira dagal , no esta encara esa fiesta con lo charru , sino con lo andaluz. Mira tu que tendrá que vel.

    ResponderEliminar
  3. Güenas a dambus dos.

    José, de verdá que sí encara con lo charru. Lo que pasa es que, del mesmo mó y manera que han jechu con otras cosas, los medios siempri han ajuntáu el tema "torus" y tó lo d'alreol con lo "andalús", y asina es comu lo han "jechu cassal".

    Pero mira tú. ¿No ha habíu en la nuestra tierra torus? ¿No ha habíu ganáu? ¿No ha habíu caballus? La respuesta es: sí, dendi siempri. No mos los han traíu dendi Andalucía en tiempus modernus.

    No sé si lo habrás oyíu anguna vés, peru lo qu'es el traji de charru del Campu Charru s'ussaba pa'l ganáu, pa os torus y pa los caballus. Tampocu sé si han oyíu estu otru, peru el famosu guerrilleru Julián Sánchez "El Charro", cona su compaña de lancerus a caballu, iban con el traji charru ena su lucha contra los soldáus francesis del sigru XIX. Y, comu esu, un montonáu de cosas.

    Sí, compañeru, lo charru casa muchu con el tema, peru mos han vendíu otra cosa...

    No estoi creticandu que se traiga framencu, o se bailin sevillanas. Lo que creticu es que se deji de láu lo nuestru.

    Un saludu, compañeru.

    ResponderEliminar