Los Sanjuanis 2016 n'El Rebollal

La comarca d'El Rebollal acabó de dal la bienvenía al Veranu con los Sanjuanis que se jidun en Navafrías, Payu y Robrea.

Los quintus de Payu y Robrea pusun el pinu, cá unu nel lugal de costumbri: los payengus pusun la su viga ena Praza el lugal; los robreanus levantarun el pinu ena Praza el Cañu.

Los capazus se pudun vel en Navafrías y en Payu, cumpriendu asina cona tradición de dal la bienvenía al Veranu con fuegu.

No faltarun tampocu, lo mesmu en Navafrías qu'en Payu y en Robrea, los incierrus, capeas y verbenas, y tampocu no los juegus pa los dagalis (y no tan dagalis), que animarun a las gentis a salil de casa y pasalu bien.

No faltarun tampocu, comu no podía sel menus, las misas y procesionis en honol a San Juan, protagonista de los Sanjuanis.

Asina, con tós estus festejus, uñíus a los que se jidun en Peñaparda por San Silveriu, la comarca d'E Rebollal ha dáu la bienvenía al Veranu 2016.

Capazu en Navafrías

Procesión de San Juan en Robrea

El pinu de Payu

Capea en Robrea

Llegá del pinu a la Praza de Robrea

AFOTUS:
   - Capazu de Navafrías: Paz
   - Pinu de Payu: Verónia Mangas
   - Procesión y capea de Robrea: José "Moteru"
   - Pinu de Robrea: "TXEBE"

El Cuartu de Peñaparda estrena escudu

El Cuartu de Peñaparda luci, ena su fachá, un nuevu escudu. 

Escudu de Peñaparda

Pol mé la Lei la Mimoria Histórica, el Ayuntamientu de Peñaparda ha muáu el su escudu antigu, del tiempu de Francu, por el escudu del pueblu, jechu con tres robris a la derecha (pol mé la comarca d'El Rebollal) y El Castillu ena metá isquierda (que da el su nombri al lugal, Peñaparda).

El miércolis 22 se quitó es escudu antigu (el d'España con el águila imperial). El juevis 23 de Juniu ya se pusu el nuevu (el escudu de Peñaparda) y el viernis 24 de Juniu se jidun los trabajus que faltaban pa rematal la obra.

Escudu antigu

La múa el escudu es el segundu cambiu jechu pol mé la Lei la Mimoria Histórica. Lo primeru jué mual el nombri de la antigua calli Salas Pombo por el de Calli Real.

El Rebollal, presenti enos Votus del 26 de Juniu

El domingu 26 de Juniu, los españolis golvemus a votal pa escogel Presidenti. 

Susana Luengo,
candidata al Senáu

Comu el passáu 20 de Diciembri, El Rebollal estará representáu n’estus Votus ena presona de Susana Luengo, candidata al Senáu por Unidos Podemos (Uñíus Podemus). Susana Luengo tieni las sus raícis nel pueblu de Robrea.

Por primera vés en 12 añus no estará enos Votus el otru candidatu de la comarca, José Benito Mateos. En los otrus Votus del mes de Diciembri, estuvu comu candidatu al Senaú por el PREPAL (Partíu Regionalista el País Leonés).

Las fiestas de San Silveriu dan la bienvenía al Veranu 2016

El pueblu de Peñaparda celebró, entri’l viernis 17 y el lunis 20 de Juniu las sus fiestas de San Silveriu, que dan la bienvenía al Veranu.

Las fiestas apencipiarun el viernis 17, cuandu los Quintus trujun el Pinu. Esi mesmu viernis y al sotru día, sábadu, hubu verbena a la nochi cona orquesta “HOLD’EM”. El sábadu y el domingu se pudun vel los incierrus y las capeas. Ya el día el Santu, el lunis 20 de Juniu, apencipió cona misa en honol a San Silveriu. Tó’l día hubu juegus pa los dagalis. La tardi truju tamién la magia del magu “TOÑO”. Ya a la nochi, la fiesta acabó, dandu la bienvenía al Veranu, con fuegus artificialis.

Duranti los cuatru días se pudun oyel los sonis tradicionalis tocáus con el acurdión y la gaita y el tamboril.

Pinu de los Quintus

Polas callis sonarun los acurdionis

Fuegus artificialis

Capea ena Praza

Procesión de San Silveriu

Llegan las Fiestas del añu 2016 a los pueblus d'El Rebollal

San Silveriu y los Sanjuanis ya están aquí. Cuatru de los cincu pueblus d'El Rebollal jadin esti mes las fiestas del su santu: San Silveriu (20 de Juniu, Peñaparda) y San Juan Bautista (25 de Juniu, Navafrías, Payu y Robrea). Villarrubias deja a Santu Ferinu pa'l mes d'Agostu.

Asina, los pueblus de Navafrías, Payu, Peñaparda y Robrea dan la bienvenía al Veranu. Es curiosu que en unus pueblus famosus por el su folclori, ná d'estu esté programáu enas sus fiestas. Tamién es curiosu que, en habiendu una lengua propia ena comarca, la "palra d'El Rebollal", tampocu se vea enos cartelis.

Día a día, estas cosinas son las que mos vamus a encontral.


VIERNIS 17 DE JUNIU

20:00 Levantamientu del Pinu polus Quintus (PEÑAPARDA)
23:00 Verbena jecha por la orquesta "HOLD'EM" (PEÑAPARDA)


SÁBADU 18 DE JUNIU

13:30 Incierru polas callis del lugal (PEÑAPARDA)
18:00 Capea (PEÑAPARDA)
23:00 Espectáculu de vós y soníu con animaoris y bailaoris (PEÑAPARDA)


DOMINGU 19 DE JUNIU

13:30 Incierru polas callis del lugal (PEÑAPARDA)
18:00 Capea (PEÑAPARDA)


LUNIS 20 DE JUNIU

12:00 Misa en honol a San Silveriu (PEÑAPARDA)
13:00 Incierru pa los dagalis, jechu con carretonis (PEÑAPARDA)
16:00 Juegus pa los dagalis (PEÑAPARDA)
21:00 Magia jecha por el magu Toño (PEÑAPARDA)
22:30 Fuegus artificialis (PEÑAPARDA)


JUEVIS 23 DE JUNIU

23:00 Capazu de los Quintus (NAVAFRÍAS)


VIERNIS 24 DE JUNIU

11:00 Misa en honol a San Juan (ROBREA)
11:00 Misa en honol a San Juan (NAVAFRÍAS)
13:00 Incierru a caballu (NAVAFRÍAS)
18:00 Capea (NAVAFRÍAS)
20:00 Levantamientu del Pinu polus Quintus (ROBREA)
21:00 Levantamientu de la Viga polus Quintus (PAYU)
23:00 Capazu (PAYU)
23:30 Verbena por el "TRÍO OBSESIÓN" (PAYU)
23:30 Discoteca móvil jecha pol ·DISCO TRÓPICO" (ROBREA)
23:30 Discoteca móvil echa or "DJ ARYS" (NAVAFRÍAS)


SÁBADU 25 DE JUNIU

13:00 Incierru a caballu (NAVAFRÍAS)
13:00 Incierru polas callis del lugal (PAYU)
18:00 Joricia de novillus por torerus de la Escuela Taurina de Salamanca (NAVAFRÍAS)
18:30 Capea (PAYU)
18:30 Capea (ROBREA)
23:30 Verbena hecha por el "TRÍO RITUAL" (NAVAFRÍAS)
23:30 Discoteca móvil jecha pol "PARTY DANCE" (PAYU)
24:00 Verbena pola orquesta "SUROESTE" (ROBREA)


DOMINGU 26 DE JUNIU

11:00 Misa en honol a San Juan (PAYU)
14:00 Paella pa tóa la genti (ROBREA)
16:00 Juegus pa los dagalis enas piscinas (ROBREA)
16:00 Juegus tradicionalis (jincacha, carreras de sacus,...) y juegus pa los dagalis, tó jechu n'El Bardal (NAVAFRÍAS)
17:00 Juegus pa los dagalis (PAYU)

Las aguas d'abril enllenan ríus y regatus

El famosu refrán de "en abril, aguas mil" se está cumpriendu esti añu comu nunca ena nuestra comarca d'El Rebollal. Y es que, dendi que acabarun las celebracionis de Pascua, la lluvia no ha faltáu cuasi ningún día enos nuestrus pueblus.

Tóa esta agua caía (angunas vedis con muchu jostigu) ha jechu que las nuestras juentis, ríus y regatus se haigan enllenáu, y jasta se haigan salíu d'andi van siempri.

En Robrea, el regatu El Cañu, que pasa pola metá el lugal, se ha salíu y ha encharcáu tóa la Praza el Cañu. El día que más agua llevó jué el martis 19.

En Villarubias, el regatu el Cristu (el qu'está ala entrá del láu de Cáciris) tamién se salió, llegndu a tapal el charail de la Juenti el Gallu. Las sus aguas tamién juerun polus güertus del Barderón. El otru regatu, el del Valli la Cuesta (a la entrá en viniendu de Robrea), llegó a il tamién polus güertus. El regatu Manzanu, que cuasi tó'l añu está secu, hogañu lleva bien d'agua.

En Peñaparda, el ríu tamién se salió, tapandu güertus y pasileras.

Estas aguas d'Abril han síu, en cuasi tólus casus, bien caía, y a jechu que güelvan a manal juentis y maniantalis que s'habían ensecáu.

El regatu el Cristu y la Juenti el Gallu
(Villarrubias)

Ríu La Puenti (Peñaparda)

Pesquera de Riufríu

Regatu el Cañu (Robrea)

Peñaparda recupera el nombri de la Calli Real

Peñaparda está d'estrenu. Y es que'esti miércolis 6 d'Abril las sus callis tienin nuevus cartelis enas sus parés. La que jasta esi día se llamaba Salas Pombo agora tieni el nombri de Real, el nombri que tuvu d'antigu.

Cartel nuevu de la Calli Real

El nombri de la calli se ha remuáu pol mé la Lei la Mimoria Histórica, que prohíbi que las callis tengan nombris relacionáus cona distaúra (Salas Pombo jué, entri otras cosas, Gobernaol Civil de Salamanca en tiempus de Franco, entri los añus 1945 y 1950, pol mé d'essu, en muchus pueblus de Salamanca había callis con el su nombri).

Los cartelis nuevus ya se puedin vel enas parés d'angunas cassas de la nueva Calli Real anque es estrañu que, en un pueblu famosu pola su defensa de la cultura tradicional, los cartelis estén ná más ena lengua oficial y se haiga dejáu de láu la palra del lugal.