La peñapardera Toña Pascual recibi un homenaji ena Casa de Salamanca de Leganés

La Casa de Salamanca de Leganés (Madrís) se pusu el pasáu domingu 17 de Juniu las sus mejoris vestimientas pa jadel un homenaji, comu Socia d'Honol, a Mª Antonia Pascual Mateos, nacía en Peñaparda nel añu 1949, por el su trabaju ena defensa la cultura tradicional y nel grupu de charru de la Casa de Salamanca, el grupu "Charrería".

Toña Pascual

Toñi (comu la conocin allí), lleva más de 20 añus de socia ena Casa de Salamanca, ena que siempri ha está nel grupu de charru, de la qu'es directora. Es madri, además, de José Benito "TXEBE" y Rubén Mateos Pascual, dambus dos tamborilerus y bailaoris, que tamién lo juerun de los grupus "Charrería", "Sentires del Duero" (paléu) y "Jumbrio" (folk).

Además, del su trabaju nel grupu de charru, y ya juera de la Casa de Salamanca, ha bailáu con el grupu folclóricu de Peñaparda y nel grupu "Chabarconis d'El Rebollal". Jué tamién protagonista ena parti musical del programa "Camín de Cantares" de la TPA (Telivisión d'Asturies), tocandu el panderu nel programa dedicáu a Peñaparda. Es, además, una de las recuperadoras del Ofretoriu de Peñaparda.

Nel homenaji tamién estuvun, entri otrus, los tamborilerus Alejandro y Fernando (dambus dos de Saucelli) y Amador (del pueblu de Muñoz). El homenaji estuvu en drentru la semana cultural que, en honol a San Juan de Sahagún, patrón de Salamanca, jadi tólus añus la Casa de Salamanca de Leganés.

Momentu del homenaji

Grupu "Charrería"